عنوان الموضوع : مذكرات مراهق ( خيال علمي ) للكبار فقط مضحكو جدا
مقدم من طرف منتديات الشامل

مقدمه:
عندما تضمحل الخشش وتتبوتق الكشرات ( جمع مؤنث سالب لكشره) وتندرج التيارات تحت تيار العولمه المنسدحه من خلال بوصله الانحلال لصواميل صدام الددسن في سيارة الحضارات
عندها تنطبح الارداة الدولية وتسلم بالطاعة لحركة الانغلاق نحو استبنه سيارة ابو جيراننا الموقر اللي بأذن الله سوف يلهمه الله الصبر والسلوان ويتنازل وينقل كفالة الشغاله المصونه
ويزوجني ايها حفظها الله ذات الخمس والستين ربيعاً
تدور احداث هاذي القصه في القرن التاسع عشر


الموضوع :
كنت واقف في وقت من الصباح البدري مطلع خشمي عشان يتمغط مع نسمات الهواء العليل
وكنت احس بنشوه غير طبيعية والفرح مبين من خشتي اللي كلها ملح لدرجة ان العصافير اللي تمر من عند الدريشة اللي بالسطح <<< ولد شغاله
كانت تضرب بالجدران من قوة ما ابتسامتي مشرقه وتعمي العيون وتسلب القلوب <<<< قسم اني تنهدت على روحي فديتني

كان يوماً ولا كل الايام لاني في ذاك اليوم ودعت ايام البزاره ودخلت عالم الدشارة اللي هي عالم المراهقه

اول مره بحياتي اقوم من النوم وانا اركض كني جايب هدف بالكيرم في مونديال الكيرم اللي يقام على شرف كومار السباك اللي في الحارة ..

بعد ماقمت من فراشي ودخلت انا وخلاقيني تحت بزبوز المغسله لاني داري ان مافيه غيرهم كان ابوي ما يشتري لي ملابس الا اذا فاز النصر في بطولة
بعد ماتروشت وغسلت راسي بتايد ( يقالي بكشخ الحين ) رحت فوق الخزان وبديت اتنفض كني قطو طايح بتانكي ماء <<< الله من زين التشبيه

وفجعه وبينما انا اتنفض وإذ بقمر الزمان ورمانه الرمان شبيهة حليمة بولند
آسره قلوب بلاد السند والهند وبلاد ما وراء سور الصين العظيم تعجن العجين وتتزحلق بالطين (مشغله السواقين وآسرة الداجين ). .
الانسه سووومه ذات الشعر الذي يشبه المكرونه تطلع مع باب السطح مطلعتن كراعينها المحروقه ومعها طن خلاقين تبي تنشرهم
انا وبدون مقدمات حسيت بشي يجذبني لها <<< لا والله فاتحه البلوغ عز الله اللي ماتزوجت
حسيت بنفاضه وحسيت بقلبي يقرقع بصدري كن احد يلحقه يبي يذبحه اذكر اني كنت فوق ماصورة الخزان مادريت الا وانا طابعن خشتي بالبلاط حق السطح قمت وبديت اجمع البلاط واصلحه بعد ماجمعت البلاط
قمت اجمع باقي كسر سنوني عشان الزقهم بالليل بصمغ ابو جن زي العادة ..

بعد ماخلصت اخذت عبايه امي المعلقه في السطح
وبديت اطل يقالي مؤدب وعشان اخذ راحتي يمكن لامن شافت العبايه تحسبني عجوز وبدال الكراعين يطلع شي ثاني ==>مراهق لاحد يشره

صرت هايم فيها وكل يوم على ها الحالة وكل مالي اسمن <<<< يسمع بالغرام
صارت حالتي يرثى لها وزني طق الخمسين بعد ماكنت مسواك ووزني 20

صرت اكتب قصايد وخواطر على مظاريف الرسايل <<< تربية شغالات
صرت اذا جيت انام اجمع قراطيس الاندومي و قواطي الببسي اللي تشربهم وتذبهم بالشارع واضمهم واجلس اتنهد واصيح لين الفجر

تعبت نفسياً لاني ما اقدر اعبر لها عن شعوري لانها ماراح تفهم شي وكل ماقلت شي قالت يس بابا وهي ماتدري ان البابا يشم ريحة الفكس اللي تحطه من مسافة كيلو من قوة ماهو يحبها

قررت ادخل دورة لغه في ورشة عندنا وابن الكلب العامل ماصدق خبر اني اصير صبي عنده بس عشان اتعلم بدا يكرفني كرف لدرجه
انه اذا بغى يشوف تنسيم باي كفر يخليني انا انفخه واجلس اللحسه لين يشوف وين الشق يوفر على حسب خشتي ..

صرت اشتغل بالليل والنهار وعلى الحال شهرين واخرتها ماعرفت الا اس فيه .. صديق .. نفر .. كويس
قررت اعتزل بعد ماصارت خدودي تقل ظهر فرس نهر معجز .. طايحه لين وصلت لبطني وبراطمي منسحلات تقل فحمات بسيارة سواق عائلة بنغالي .

كان ودي انتقم بس لاني احب صرت مرهف الحس ومابغيت اجرح مشاعر احد وخاصة اذا واحد من بني جلدة سومه

راحت الايام وحالي كل ماله بردا .. وكل يوم منسدحاً بعاير .
اسعسع في كل عاير .. امطخ ذا الجدار وذا الجدار
اسأل عن حال سومه ... اسعبل بالليل وفي النهار .


فصلت من المدرسة الليليه وصدمت بالسيكل وراح للتشليح بديت ابيع سنوني المتكسره للمستوصفات الاهليه عشان يتعلمون عليها بس عشان اوفر لنفسي كم ريال اشتري فيهم مظاريف واكتب عليهم .


وفي يوم من الايام مسكت نفسي وجلست افكر بحالي ولين متى وانا كذا لانيب اللي صارحتها ولا نيب اللي تركتها ... وماتركت نفسي لين عاهدتها اني اشوف صرفه واخربها ..

رحت للبيت ولبست احسن قميص عندي وحطيت جل على شعري وسويت سبايكي ==> طلع شكلي تقل هدهد

فكرت اجيها مع وين ؟؟ انط عليها اذا طلعت السطح واحطها قدام الامر الواقع والا ادخل مع الباب لابو الجيران واشوف لي صرفه معه ..
قررت اني ادخل مع الباب لاني مااضمنها اخاف تسوي فيني شي وانا ما اضمن انها تبي تتزوجني واللزم ماعلى الانسان الشرف

وقفت عند الباب وقريت وردي وتشهدت تحسباً لاي طاري الواحد ما يدري هو يبي يرجع والا لا وخاصة اني عارف ان ابو الجيران دايم يطلع عصاقيله عندها يتميلح

وقبل لا اطق الباب مادريت الا وسيارة شرطة سافطة عند الباب وخذ ياركض لوسط بيت الجيران
قمت ولزقت معهم من باب اللقافه ويوم دخلت المجلس والا هذا ابو الجيران معه عقاله وفيه حرمه تحته وخذ ياجلد لين فكوها الشرطه ...!

مسكوها الشرطة ويوم وقفت والا وش اشوف هذي سومه
والدم يصب من خشتها كنها حنفيه مسجد تاركها ولد ورايح يصلي <<<< هذا تشبيه والا قصة حياة البزر ؟؟

بدت الدموع تطلع من عيني وانا ماسك نفسي .. واقول بيني وبين نفسي اطب عليهم واخذها واطلع برا <<<< عنتر بن شداد

خفت اتكلم يكلبشوني معها خفت انها سارقة شي من البيت وتحطني معها اسكت ..مادريت الا وابو الجيران يرز علي طارت عيوني وش يبي ذا الله ياخذ ابليسه !
لاو الله اللي رحت فيها يوم جمع انفاسه قال : حتى ها الرخمه هذي ساحرته شايف صورته معها


وبعد ماسطروها الشرطة والشيخ اللي معهم دلتهم على بلاوي مسويتها وحاطتهم تحت الارض قام الشيخ وفك العقد والطلاسم وفجأة بسم الله الا وانا اشوف انها اشين حرمه على وجه الارض لدرجة اني اغسل
عيوني اذا شفتها بديتول عشان اتنظف


اثرها بنت اللذين ساحرتني بس تنتظرني ابلغ <<<<< توم كروز
بس اللي قارهني شي واحد ؟؟
ليش ساحرة ابو الجيران وش هي شايفتن فيه هو وعصاقيله اللي كنه عيدان تنظيف اذان ؟؟؟


******وخلصت السالفه ******

>>>>> ردود الأعضـــــــــــــــــــاء على الموضوع <<<<<
==================================

هههههههههههههههههههههههههههههههههههههههههه
مسكين هالمراهق كسر خاطري

مشكور ياكثرك عالموضوع

وتقبل مروري

يسلمووووووووووووووو

__________________________________________________ __________
بعد ماقمت من فراشي ودخلت انا وخلاقيني تحت بزبوز المغسله لاني داري ان مافيه غيرهم كان ابوي ما يشتري لي ملابس الا اذا فاز النصر في بطولة

على كذا مهو شايف لبس جديد عشرة سنين زيادة لووووووووول
مع احترامي للعالمي <<<< هههههههههههههه ترقع الموضوع


صرت هايم فيها وكل يوم على ها الحالة وكل مالي اسمن <<<< يسمع بالغرام
صارت حالتي يرثى لها وزني طق الخمسين بعد ماكنت مسواك ووزني 20


انا اعرف الواحد من الحب ينحف من شدة تفكير يفكر ان الدجاجة
وجهة الحبيبة وماعد ياكل تنسد نفسة من شينها لوووووووووووول

ههههههههههههههههههههههه
وزي ماقلت مراهق ماعليه شرهه

يعطيك العافية ياكثرك تقبل مروري

دمت بكل خير


__________________________________________________ __________
خخخخخخخخخخخخخخخخخخخخخخخ
خخخخخخخخخخخخخخخخخ
خخخخخخخخخخخ


يقطع ام المذكراات اللي عليهه


تشكرااااااااااااات

__________________________________________________ __________
هههههههههههههههه
ذكريااااااااات عدم
الله يلعن ام المذكرات اللي عليه
هههههههههههههههه
موتني من الضحك

__________________________________________________ __________
ههههههههههههههههههههههههههه
هيك المذكرات يا بلآ <<<<<<<<<--------- متاثره بباب الحاره
يسلمووووووووووووووووووووو