|
وأنا جالس على الطاولة مستمتع بالريحة المعفنة حقت البوفيه جاني ( فك وافكـ ) وجلس معي وهو يقول شف اتصلت عليها تقولي بتخلص وبتجي للبوفيه بس أتمنى ما تقوم معي انتظرني هنا قلت ليش خلني أشوف هالجمال اللي مسحبنا عشانه للجامعة وأنا أسولف جت ( هدى ) البنت اللي كانت جنبي في المحاضرة ومعها شلتها وابتسمت في وجهي وهي تقول ممكن نجلس معكم .. قلت وقلبي يخفق.gif) أجلسي على الكراسي وأن ما كفت الكراسي مستعد أتعلم السحر وأسحر زميلتي ( ياره ) عشان أحولها لك كرسي أنا قلت أسم ( ياره ) طاحوا البنات ضحك: وهم يقولون لـ ( فكـ وافكـ ) بالله أسمك ( ياره ) ثمن ألتفتت البنت وهي تقولي وأنت وش أسمك قلت أنا أسمي ( شهيرة ) ويدلعوني ( أم الزين ) أنا قلت كذا على طول طاحوا ضحك ووحده منهم تقول وش هالاسامي أسامي لبنانيين: : .. قلت وأنا ألعب بخصلة من خصلات شعري إيه الوالده جدها لبناني:: عشان كذا نعود لبنانيين من عائلة الأطرش .. قالت وحده منهم غريبة مع أن أشباهك أشباه يمنية طاقها الجوع .. ابتسمت وأنا أقول قصدك عشان بشرتي لا اللي مخرب بشرتي هو لأننا نسافر كثير لليمن وأنت تعرفين اللي يسافر لليمن ويشرب من موية النيل حقهم لازم يرجع لهم شوي جاني كوع من ( فكـ وافكـ ) وهو يقول وش نيلة النيل في اليمن نعنبو خيرك ما درست جغرافيا :
قلت من زين هالجغرافيا اللي درسنها كلها عن طقس المملكة من الأبتدائي الين الجامعة والطقس ما تغير هو هو .. جلسوا البنات وهم يضحكون ووحده منهم تقولي أنت تحفه هبال دمك خفيف ممكن أتعرف عليك وإذا ما عندك مانع تكونين من شلتي .. قلت أنا في الخدمة مستعدة لو تبين تتبنيني وإلا تسكنيني في غرفة السواق حقكم ما عندي مشكلة :.. أضحكت وهي تقول خلاص أجل بس اعملي حسابك ترى البنات يجتمعون عند الشيخة في القصر وهي تحب الضحك .. وأنا أبعرفك عليها بتنبسط عليك .. دق جوال ( فكـ وافكـ ) ثمن قال بصوت ناعم عن أذنكم مواعده وحدة وأن شاء الله أخلص وأجي قلت مهوب مشكلة بس لا تتأخرين قام وخلاني معهم ووجهي يحرقني من النير:: ووحده من البنات تقول وهي تأشر علي أنا أبروح أجيب شي نشربه أنت وش تحبين تشربين .. قلت وأنا متحمس علي الطلاق محد يجيب:: الطلابات غيري .. وقفوا البنات يناظروني وهم مستغربين :: واستوعبت أني دمرت المسألة كلها ثمن قلت الله يلعن أخوي علمني هالكلمة وعلقت في لساني:: .. ابتسموا ووحده منهم تقول تحفه .. تحفه جنان هالبنت .. قلت معليش وش أسمك من اليوم تقولين تحفه تحفه شكل تخصصك أثار ومرسلينك الإدارة تقنعيني عشان يحطوني في متحف الجامعة .. هنا البنت أنسدحت على الطاولة وغطت وجهها وهي ميته ضحك :: .. قلت يا جماعة شوفوا خويتكم ليكون جاها هبوط وداخلت في غيبوبه
رفعت راسها وهي تضحك وتقول خلاص خلاص ... قلت وأنا مرتبك عن إذنكم أبروح أجيب لكم شي تشربونه وتاكلونه وش تبون قالت وحده يا حسره وش عندهم غير الكفي والكرواسون:: قلت حلو نعمه ثمن رحت للبوفيه وأنا أمشي اسمع سواليف البنات في الجلسات .. بنات يتكلمون في الميك أب وفي اللبس وبنات يحشون في الدكاتره وفي مبنى المعلمات رقم ( 15 ) وبنات يتكلمون عن سوء الزفلته الداخليه بين المباني وعن كمية الحصى اللي تكسر الجزم والرجلين وفيه بنت تأشر علي وهي تقول شوفوا جسمها كيف شكله طالعه كأنها غسالة بابطين:: ووحدة جالسه على الكرسي حابسه دمعتها وهي تكلم بالجول وتقول معليش يا قلبي يا ( مــصلح ) صدقني كنت في المحاضرة ما قدرت أرد عليك صدقني ما صكيتها في وجهك عمد كنت في محاضرة .. أرجوك لا تزعل وهو شكله يهزئها ومستقوي عليها وهي حابسه عبرتها والمنديل في يدها متفط ومتلوي وحالته حاله وتمسح عبرتها وتسوي أن عينها داخل فيها شعرة عشان محد ينتبه :: .. جيت عندها وقلت معليش أختي ترى سمعتك وأتمنى ما تضنين انه تطفل مني لكن أبقولك شي ترى اللي خلقه خلق غيره واللي ما يحس فيك وفي دموعك ما يستاهل أنك تذرفين له دمعة :: وأبيك تعرفين شي ثاني ترى فيه نوعية من الرجال يستمتع لما يشوف البنت تصيح وتبكي يحس أنها ملكه .. عشان كذا شوتيه وأكثر ما كثر الله الرجال اللي يحسون ولو تبين رقمي خذيه:: .. ناظرتني بعين ثمن استوعبت الموقف وقلت وأنا مرتبك سوري أخذني الحماس وترى أمزح معك : بس صدقيني خذيها كلمة اللي ما يحس فيك لا تحسين فيه أبد ابتسمت لي وقالت شكرا
رحت للبوفيه وجبت الطلبات ورجعت للبنات ولقيتهم مهمومين ومتضايقين قلت وش القصة يا بنات سلمات ناظرتني وحده منهم وقالت ( هدى ) متضايقة جيت جلست جنب ( هدى ) وقلت وش فيه سلمات وش اللي مكدرك قالت مافيه شي .. قلت ( هدى ) هالحين صرنا صديقات وبيكون بعد شوي بينا كرواسون:: وكفي عشان كذا وش فيك .. ناظرتي وهي تقول مدري بس أحس بضيقة قاطعتها ما يحق لي اعرف هالضيقة وإلا تشوفين اني غريبه .. قالت لا عادي وش دعوة تمونين أنت هالحين وحده منا وفينا .. قلت دامني وحده منكم وفيكم اجل وش فيه ردت علي وهي ضايقة تعرفت على واحد من الشباب في الانترنت:: وجلست أسولف معه وأنا من طبعي أحب خفة الدم والضحك وأخذت وعطيت معه وحبيتة مع مرور الوقت وكان يطلب مني صورتي بإلحاح وكنت أقوله صورتي على الجهاز مانيب موريتك ألين توريني صورتك ووراني صورته وقلت ما عندي لك صورة عقبها حقد وطلب من هكر أنه يهكر على جهازي وأخذ الصورة ثمن طلب مني رقم جوالي وعطيته وكلمته وهالحين طالب مني أنه يقابلني والا بيفضحني وينشرها: .. قلت لا حول الله ولا قوة إلا بالله وش هالناس مصايبهم كثيرة مالك هم واللي يريحك منه قالت كيف ..
قلت ما عليك هاتي رقمه .. وعطتني رقمه وحفظته عندي .. ثمن قلت فليها ووسعي صدرك:: وما عليك وشوفي وجه خويتك هالدبه اللي معك كنه دونات بدون سكر:: .. ضحكت بدون نفس وأخذت دونات وعطيتها وقلت خذي هذي من يدي وأكلنا سوى وحنا ناكل حسيت بمغص غير طبيعي ...مغص قطع أحشائي من قوته وقفت وأنا أقول سوري يا بنات أبروح دورة المياه بعد اذنكم .. رحت أمشي ألين بعدة عنهم ثمن رفعت التنورة ألين الركبه وقمت أركض والسيقان مشلعة:: ألين وقفت عند وحده والوجع سيطر على مخي وأنا أقولها عفوا أختي وين دورات مياه الرجال ناظرتني:: وهي تقول تستخفين دمك مافيه إلا سيدات وإلا نزعتي الحياء قلت أحب رجلك وينها .. قالت في أخر السيب .. رحت ركض ودخلت لقيت كومة بنات على المريات يعدلون في الميك أب وأنا أقولهم عن أذنكم دورة المياه:.. وأنا أمشي لقيت في وجهي ( شروق ) وهي تقولي إيش الصدفة الغريبة هذي ..
قلت مهوب صدفة ولا شي كنت متوقعه ألقاك في دورة المياه هذا مكانك الطبيعي:: قلت كلامي وزواني بطني ومغصني ودفيت ( شروق ) واختل توازنها وأنا أدخل لدورة المياه تمسكت ( شروق ) في حافة باب الحمام وأنا من العجلة ما شفت يدها صكيت الباب على أصابعها شوي سمعت صرخة رجت الجامعة كلها :: .. صرخة وحدة تقول أفتحي الباب يا حيوانة قلت بكل برود وش هالاخلاق بين البنات ألفاظ منحطه:grin_1: ( ما أدري أنها تكلمني ) .. جلست شوي ثمن فتحت الباب لقيت ( شروق ) طايحه عند الباب ووجهها أزرق قمت أخذت شنطتي وسطرتها على خشتها وأنا أقول قلة أدب جالسه تطلين من تحت الباب وصلت فيك الوقاحه للدرجة:: هذي رفعت ( شروق ) وجهها لي وهي تقول وش أطل أنت اللي سكرتي الباب على أصابع يدي حسبي الله عليك قلت لها يا أختي ما أبي أتعرف عليك أنت بالنسبة لي محل كفرات مستعملة:: يعني انسي بعدها طلعت ورجعت للبنات وجلست معهم وتوني أبقول لـ ( هدى ) لا تشيلين هم دخل علي ( فكـ وافكـ ) وهو يقول بعد إذنكم ممكن اكلم ( شهيرة ) على أنفراد .. قمت معه ورحت بعيد .. قلت وش فيه قال خلنا نطلع طلعت البنت بشعة كنها حراشف سمك .. قلت طيب وخير يا طير يعني أنت زين هالحين:: عشان تعذرب على البنت أهم شي الجوهر إذا هي تحبك مافيه مشكلة قال قم أقولك خلنا نطلع .. قلت طيب ابستأذن من البنات .. وجيت عندهم وقلت لهم بعد إذنكم يا بنات ... ومعليش يا ( هدى ) ممكن تعطيني رقم جوالك عطتني رقم جوالها وقلت صدقيني بخصوص الشاب الوقح راح تسمعين أخبار تسرك ومهوب متعرض لك ابد أن شاء الله بس انتبهي في المرة الجاية لا تثقين في أحد ..
بعدها دقيت على رقم الرجال وقلت له أني خويت ( هدى ) وأني مره سمعتك تكلمها و أعجبت فيك وأخذت رقمك بدون ما تدري ( يا كثر ما صتير الحركة )وأبي أتعرف عليك
تعرفت عليه وطلبت أقابله وعطاني موعد ورحت شفته وأنا مرسم وجيت عنده وقلت له ممكن يا الحبيب
قالي خير .. قلت ممكن نجلس شوي قال وش تبي .. قلت معليش يمكن تنصدم بس أنا اللي كان يتصل عليك و ( هدى ) اللي كانت تكلمك هي واحد من الشباب يقلد وكنا نسحبك وصراحة اسمح لي أقولك أكلت المقلب وكنت أحسن واحد لعب دور الحمار اكرم الله اللي يقرون): .. وبخصوص الصورة اللي معك ترى مقصوصه من مجلة أتمنى ما أكون صدمتك بالخبر ولا تزعل .. شوي جاني بقس خلخل عظامة وجهي وورمت خشتي .. وبدى يلكم والناس تجمعت وقامت تفك وأنا غايبه شمسي معد أشوف صرت أشوف الاموات اللي كانوا معنا حسبت أني انتقلت للرفيق الأعلى :من قوة البقوس حسيت أنها طالعه من قلب وبحقد .
بعدها رحت البيت وطلعت الكمادات والثلج اللي في الفريزر وأكياس اللحم المجمدة و صففتها على وجهي وبعد أيام أتصلت ( هدى ) وهي تقول وش سويتي:: الرجال يهزئني ويقول لعد تمثل أنت وخشتك تراك ولد ومدري إيش وجلدت خويك..انت وش قلتي له .. قلت بهدوء ممكن تسمعيني شوي عشان تفهمين وش السالفة .. قالت أنا معك و جميلك هذا مستحيل أنساه لك طول حياتي .. قلت الله يخليك أهم شي أبيك تسمعيني .
أنا ... أنا ... مش بنت مثل ما أنت مفكرة .. أنا ولد ودخلت الجامعة متنكر أنا وخويي عشان يقابل خويتة ومع البلبلة أعجبت فيك لكن يوم شفت مصيبتك ما هنتي علي عشان كذا قابلت الرجال وكلمته ولعبت عليه أن حنا شله كبيره نستهبل على الشباب ونخيشهم أن حنا بنات عشان كذا قالك الكلام هذا وبعد عنك .. وصدقيني أنا مستحقر نفسي على اللي سويته لكن أهم شي أنك هالحين مبسوطه وهو بعيد عنك .. قالت وش تقولين .. قلت قصدك وش تقول أنا أسمي ( الزين ) ساكن في الشمال الجوووف وانا المتضرر نفسيا من اللي شفته في الجامعة من لبس ومن جمال ومن أمور كثيرة ما توقعتها أنها في عالم البنات .. قالت أنا ودي أسكر في وجهك السماعة لكن برضوا أنا مش ناكرة جميل وأشكرك على تصرفك وعلى فزعتك ومثل ما قلت لك جميل مستحيل أنساه لك لكن أتمنى ما تتصل على رقمي هذا ولا أشوف رقمك في جهازي .. قلت مالك هم بس أهم شي أنك مرتاحه ومبسوطه وصدقيني أنا ماني راعي لف ودوران وعند كلمتي ومستحيل اتصل عليك .. كحت وهي تقول هذا العشم فيك واسمح لي أقولك عجبتني خفة دمك وطيبتك اللي مالها حدود .. طلعت خدودي حمر flowerhat1: وأنا أقول الله يسلمك ومالك الا اللي يرضيك هذا رقمك أبحذفه وصدقيني ما اخذته إلا بعد ما قلتي معاناتك لي
وبعد ماسكرت السماعه عشت قصه الحب والعذاب والهيام وانا الان في حاله لا يرثى لها بين مزنه وهدى <. بتعلمهم انك تحب
ماستفاد؟
1 ــ لا احد يحب ويتعذب على الفاضي مثلي ومثل فك وافك
2 ــ معجبني هالرقم وحطيته فيها شي
( النهـــاية )
تحياتي
محبكمـ
الزين يفرض نفسه
|
|
رد مع اقتباس
