عنوان الموضوع : قصه الزين يفرض نفسه مع البنت اللي قابلها باالصدفه(وحده بوحده)ههههههه مضحكو جدا
مقدم من طرف منتديات الشامل

نبــدآ آربطـو الآحزمـه < يآخي بتقـول ولا شـلووون
في احد الايام من ايام آب اللهاب الباردة قمت من فراشي وكلي نشاط وحيوية ومن زود النشاط رجفت لحافي ووأثره متعلق فوق المروحة ورحت لدريشة غرفتي وانا لابس بيجامتي الفوشية ذات الاكمام الطويلة الي واصله الى أظافر يدي. وقفت امام الدريشة واخذت نفس عميق وقمت امارس بعض التمارين الرياضية مع العلم اني من زمان وانا ودي اسوي هالحركة قاهريني الممثلين في الافلام الامريكية إلا قاموا يتميلحون بعضلاتهم قدام الدريشة ثم يجيب لنا المخرج لقطة لبنت جيرانهم الي تقوطر ملح وزين وهي تناظر بعيون كلها شفاحة ودها تاكل هالشاب الوسيم الي قاعد يتمرن بفنيلته العلاقي اه بس لا ذكرت هاللقطة أكح تقول مكينة كابرس مفورة !!
________________
فجاءة قطع حبل الغسيل قصدي التفكير صوت مبحوح متحشرج مبحوح ( كل المردافات الي تضيق الصدر فيه ) و يقول وبكل بجاحة : اروح ملح ياحلو ماودك تفتر وتسوي تمارين الاطالة؟؟ (تفتر يعني تلقينا ضهرك لغير الناطقين بلغة اهل الرياض ) !! كان هذا الصوت صوت السربوت الدحمي ولد جيرانا ، ! ايضا وللمرة الثانية قمت اكح كني مكينة كابرس مفورة !! ماشعرت بنفسي الا وانا أأشر له بيدي مفرق اصابعي على رقم خمسة وهذه علامة معناه كش على وجهك ---******** الله لايلوم الدحمي اذا طمع فيك !! وبحركة غير ارادية صبخت بالدريشة على وضع الاغلاق ! سد نفسي الدحمي وأهانني في اغلى شي الواحد يملكه الا وهو الكرامة والشرف والي قاطع قلبي زيادة اني البارح شايف مسلسل مصري يقول فيه نور الشريف (هو احنا حيلتنا اية غير الشرف) !! نزلت مع الدرج وانا أحضرم واتكلم بيني وبين نفسي واقول ليش ذالدب الامريكي يطلع له بنت وانا يطلع لي ذا الداشر ؟ياربي انا وش سويت في حياتي وش حليلي ولانيب اوذي احد، حتى في المنتدى مانيب اشتشت في المواضيع ولانيب ادخل بيوزارت انتحارية واتميصل على الاعضاء ولانيب ادخل منتدى الشعر واهزء في الي قصايدهم مكسرة واقول له :خل قصيدتك تراجع مستشفى الشميسي !
__________________
طليت مع باب البيت اشوف لايكون الدحمي واقف عند بابهم يوم ماشفته قلت الله يستر لايكون حاط نفسه على وضع التخفي ---******** لاعبت في رويسك المنتديات!! ركبت سيارتي وانا صدري يكح للمرة الثالثه وكنه مكينة كابرس مفورة!
انطلقت بسيارتي متجهاً الى دوامي بكل نشاط وحيوية محلق في سماء الخيال وانا استمع الى رائعة (سنخوض معاركنا معهم )----****امحق معارك الي تبي تخوضها وانت تطل مع الباب الابغيت تطلع!! ماحسيت بنفسي الاوانا اضرب بيدي وبكل قوة على الدركسون خشيت جو مع الاغنية صرت ادعس واكمخ في الدركسون ادعس واكمخ في الدركسون حتى وصلت الفرقة الى الكوبلية الي يقول (وسنمضي جموعا نردعهم ) ففي هذا المقطع بالذات وصلت الى ذروة الحماس وصرت اردد كلمة نردعهم نردعهم وادعس مادريت الاوانا رادعن في الرصيف!! نعنبو ذالبلدية وتحويلاتها الضاهر ان الي يحطهن يهودي اجل عمركم شفتوا تحويلة في اللفه
نزلت و ترجلت من سيارتي الفارهة ناظرت يمين ويسار ماشافني احد يعرفني!هذا كان اهم شي عندي ولا الحديد مافكرت فيه , اشوى مافيه احد يعرفني اطمئنيت وارتاحت نفسي في هاللحظة. عاد فكرت في الحديد عسى ماجا السيارة شي؟!المسجل انا متاكد ماجاه شي لاني يوم انزل والشباب يردحون وما جابو خابر الصدمة. لفيت جهة الركن الايمن وانا داق اللطمة واثر الدعوى بسيطة سلامات ماغير عفط بسيط في الرفرف يوم شفت الدعوى زينة واناظر تحت الكفر اخاف لااكون واطي نملة ماودي والله اضر مسلم <---والنملة مسلم يالخبل! المهم وانا مدنق مادريت الابأصبع ينغزني مع ظهري! خفت انا وما جاء في بالي الا الدحمي ولد جيرانا قلت عزالله انه هذا هو يبي يستغل الموقف ويبدا شغل الابتزاز! ما إلتفت على بالي ابضيع وقت ويمل ويروح مادريت الاوالنغزة جايتني مرة ثانية بس هالمرة معها صوت يدوخ كلة رقة وعذوبة تراعش جلدي وانا اسمع ذالصوت يقول :يالاخو لو سمحت ؟ الصوت نسائي يطق لصوت حليمة بولند باصبع قمت وانا اناظر في الارض وقلت نعم ولا ذا الشمحوطة الي لابسه عباية لف وعليها ذالطرحة المطرزة وذالعيون الي ماودك الاتناظرهن انا اشهد انه صادق الي يقول اشتر طول والمتن يجي بعدين, ناظرت تحت مستحي ماقدر احط عيوني في عيونها نعنبوها مهيب تغضي , ولا تحت جنااااااان و من فوق لابسة صندل ورجليها بيض ولا فيه ازين من رجلين البنت البيضا اذا صارت لابسة صندل وبعد حاطه مناكير احمر فكيت اللطمة وقعدت اعدل في العفطة الي في الرفرف يعنني ماهتميت واتميلح واعدل طقم الباركر الي في مخباتي اشوى اني شاريه امس من شارع العطايف لاني بغيت اهون قعدت اكاسر الحضرمي ساعة اشوى اني شريته لاني بغيت اهون حسيت انه زايد علي في السعر كان وش ابشخص به هالحين واذكر السبحة الي شاريها من الثميري وادورها في مخباتي مالقيتها عسى ماطارت مع الصدمة واذكر ان خالي عادل ماخذها مني قبل يسافر يامصله ذالادمي وصلتني مضرته حتى وهو بعيد! كان يمكن ان البنت تجوز لها السبحة وتقول الله يازينها واقول لها تامرين عليها واعطيها أيها عقب مانقش الرقم على الخرزة الوسطانية.
بادرتني البنت وقالت لوسمحت توديني الكلية لي ساعة واقفة ابي ليموزين ولا مر ولا واحد وانا عندي اختبار نهائي ومليت وانا انتظر قلت يارب ان احد يصدم في الرصيف علشان اتجراء واطلب منه انه يوديني الجامعة !!
_________________
البنت ماعطتني فرصة اقول ايه او لا!! راحت للسيارة وركبت لا وقدام بعد! الضاهر انها درت عني اني ماعندك احد! رحت انا اركض علشان اطفي المسجل اخاف تسمع النشيد وتنقد علي تحسبني ارهابي،ركبت وما امداني افتح فمي واقول خير ان شالله وش السالفة الاوهي تقول لي يالله يالله بسرعة ترى وراي اختبار امشى وخل عنك البرود ترى البرود مهوب زين في الرجال!!
انا يوم سمعتها تقول البرود مهوب زين في الرجال وادعس بس قمت اقلبها في راسي وش تقصد ذالبنت ان البرود مهوب زين في الرجال تشجعت وقلت لها وين كليتك فية ؟ قالت في جنبي! ثم فقعت امها ضحكة ههههههههههههههههههههاي , انا بعد ضحكت على الذبة حقتها مهوب علشانها زينه لا لان الي قايلتها بنت! هالحين عرفت ليش يركزون في الدعايات على البنات لو يجيبون دعاية حراثة خلو بنت تسوقها حتى النشرة الجوية نتابعها في الام بي سي ونسحب عليها اذا شفنا كراني مسيكين والله ياني ارحمه ذالكراني عشرين سنة ماحد يتابعه ولا أحد يدري وشو يقول!!
قلت لها الجامعة حقتك وينها فيه وخلي عنك المصول قالت في دايل. استغليت الموقف مسوي عيار وقلت لايكون دايل أب ؟ ثم فقعت ام امها أنا ضحك على ذبتي اللي زي وجهي! ناظرتني ثم حبت يدها ظهر وقفا وقالت: اخس يا مقطع السمكة وذيلها ! قلت تعرفينه ؟ قالت ايه وانت تعرفه عاد ؟ قلت ايه هذا اللي بيثبت موضوعي بعد شوي
استانست انا وانبسطت انها في دايل يعني قريبة لأننا حنا يالدلوخ ماطعنا ندل في الشمال ماندل فيها الا جامعة الملك سعود بس! لا واذا بتل الي على يسارك
واجبرك تبتل معه فالله يعينك على الضيعة!!
البنت ماخذه راحتها على اخر ايراط على قولة المصاريا وحاطه رجل على رجل وتناظرني وانا اسوق وماغير تمضغ في ذالعلك واللي يشوفني انا وياها يقول ذولي لهم عشر سنين متزوجين!! انا فسرت الوضع بان البنت درت اني ماحولك احد <---مسكين الي ماعنده ثقة في نفسه!
وبينما حنا طالعين من شارع السويدي ومتجهين الى شارع سلطانة قالت لي البنت ليش انت ساكت ؟ قلت ابد ضايق صدري عقب مارقيت الرصيف <---الا بلاي مالقيت لي سالفة! ضحكت البنت وبكل غنج ودلال حتى اني صكيت القزازة لان جنبنا وحنا واقفين عند الاشارة ذاك الخال الي يروع عيونه حمر خفت يسمع ضحكتها ويطمع فيني وفيها !
قالت يارجال وسع صدرك اذا سلم العود فالحال تعود كم رقمك بس عطيتها الرقم ودقت علي وسكرت قلت وانا على بالي ذيب من هالحين بدينا ندق ونسكر
ضحكت ضحكة ومن الأول حتى اني اضطريت انزل من السيارة وافتح باب سيارة الخال واسكر قزازته علشان مايسمع الضحكة , بعد مارجعت وركبت السيارة قالت يالثور هذا رقمي علشان تتصل علي اذا حبيت نتقابل ضحكت وتبسمت وقلت مير الله يسلمك مايحتاج ودنا نتعرف عليك لان معرفة الرجال تجارة <--امحق اسلوب
دخلنا الجرادية والين ذا الكوينانات كلهم جد ونشاط وكل واحد شايلن شنطته ويدربي راسه كنهم نمل ياحسافة قومتهم بس الصبح عاد الله واكبر بيطلعون مهندسين ولا بيخترعون الذرة. وفي وسط الحارة الشعبية دئما تكون البقالات صغيرة كنها بسطة عجوز في سوق اوشيقر ودئما تحتل هذه البقالات الركن قالت لي صديقتي <-- صارت صديقتي! ايه قالت صديقتي طلبتك لاتفشلني قلت تم من دون تفكير فمجرد اني اناظر عيونها اتنوم تنويم مغناطسيسي قالت بصوت مبحوح وكلة انوثة ورقة (والله الي مهوب صوت الدحمي ) : وقف عند وحدة من ذا البقالات الصغار من زماااان وانا امر من عندهن وودي اوقف عند وحد منهم واشتري حلويات او اي شي قلت ابشري واصفط جنب وحدة من البقالات واطفي موتري واسحب المفتاح , ذيب اخاف يسرق موتري وحد من ذالحونشية وابلش بعمري في الجرادية ومعي بنت بعد والله ياشيكاغو ارحم!!
دخلنا البقالة نقول البقالة تجاوزا والا هي بسطة قامت البنية تمد يدها وتجمع في ذا البساكيت جالكسي وسنكرز وغيره وراعي البقالة يناظر يدها الظاهر انها اول وحدة بيضا تشتري منه انا قمت اغطي يدها بعباتها هي تمد وانا اغطي وصار مالها شغلة ألا تمد وانا مالي شغلة الا اغطي لفت انتباهي ان في ذا البقالة كت كات ابو قصديره على طول هالمرة انا الي مديت يدي وخذته حاسبت راعي البقالة وطلعت انا وايها وركبنا السيارة وقامت تجتر من ذا البساكيت ,
قالت : ليش ماتاكل ؟ قلت بعدين قالت لا لازم اوكلك وبيدي بعد !!فكت الكت كات وطلعت الاصبع الاول ودخلته في فمي وانا ماسكة يدها مستحي والله يا فيها نعومة لو يوزعونها على الافغانيين ان يشكشكون كلهم. وانا اقول بس ياعمري وهي تقول ها العرمة بس ياحياتي!! ورحت انا وطي مابين عمري وحياتي! وصار صدري ... ( ترى ان قلت يكح كنه مكينة كابرس مفورة لعنا جدك ) ايه صار صدري يرقع كنه مكينة بلاكستون مخبطه!!فجاءة حسيت ببلكة طايحة على رجلي واصرخ ذيك الصرخة يوم فتحت عيوني!! ولا هذي امي توكلني جريش وتقول بس هاللقمة ياعميري , قلت يمة وين انا فيه : قالت انت في المستشفى صابخن لك في عمود ومتكسرة رجليك وفي غيبوبة ولولا ان عمار ولد خالد عادل الله يصلحه طاح على رجلك المكسورة وهو يلعب كان مابعد صحيت الا هالحين
قمت اتلمس شنباتي كودي القى اثر شوكلاطة لكن ماش الاثر اثر جريش حتى ان الوالدة الله يجزاها خير متوصيه بالكشنة الين صارت خشتي تقوطر سمن كنها صرة ددسن تسعة وسبعين
ماحسيت بنفسي لا وانا اتفلت على عمار واقوله :الله يلعنك انت وابوك ما امصل منك الا ابوك هو خرب علي في أول القصة وانت في اخرها .
الفائدة من القصة :
أذا سمعت نور الشريف يقول (هو احنا حيلتنا ايه غير الشرف ) فقل له يجيب الله مطر!

>>>>> ردود الأعضـــــــــــــــــــاء على الموضوع <<<<<
==================================

وقالت: اخس يا مقطع السمكة وذيلها ! قلت تعرفينه ؟ قالت ايه وانت تعرفه عاد ؟ قلت ايه هذا اللي بيثبت موضوعي بعد شوي
استانست انا وانبسطت انها في دايل يعني قريبة لأننا حنا يالدلوخ ماطعنا ندل في الشمال ماندل فيها الا جامعة الملك سعود بس! لا واذا بتل الي على يسارك
واجبرك تبتل معه فالله يعينك على الضيعة!!

هههههههههههههههههههههه

الحنونه يسلمو
واتوقع يثبت موضوعك مقطع السمكه

يسلمو على القصه لو عندك قصه غيرها خليها بيني وبينك هع هع هع


__________________________________________________ __________
هههههههههههههههههههههه

تقبلي مرورررررررررررررررري

__________________________________________________ __________
هههههههههههههههههههههههههخخخخخخخخخخخخخخخخخخخخخخخخخ
تقبلي مروري

__________________________________________________ __________
هههههههههههههههههههههههههههههههههههههههههههههههههه هههه

ابــداع خيتوٍ حنونـــه،، بنتظـار جــديدك

__________________________________________________ __________
ههههههههههههههههههههههههه

مشكوره