عنوان الموضوع : ماليزيا 2017 - رحلتي الى ماليزيا (تصوير ومجهود شخصي) لعشاق السياحة
مقدم من طرف منتديات الشامل

••
بسم الله الرحمن الرحيم
ياهلا ومرحبا بالجمييع ,, الله يحييكم بموضوعي
الموضوع راح يكون عن رحلتي الى ماليزيا بالعطله اللي فاتت
كانت الرحله بعد العيد ,جلسنا 15 يوم, عن طريق طيران الإمارات كان رائع جداً
ماشاءالله اول مره اروح لمطار دبي مو مطار والله مدينه ماشاءالله من كبر فيه تعبت وانا امشي وعندهم ترتيب ويخدموونك بيعيوونهم مو مثل اللي عندنا الله يعين بس
ويكفي عطونا عربيه اطفال لولد اختي اهم شي والله خاصه ان عربيته شحناها

وفيها سوق الحره والمطاعم مو عندنا بوفيه مدري شيبي من الدنيا للي حالتهم مثل حالة ابووي الله يطول بعمره لايزم نرووح بوقت قبل الاقلاع اقل شي ساعتين
يعني لازم يكون فيه مطاعم شي يضيع الوقت بس جد استانسنا بالمطار راح الوقت ماحسينا فيه
بدأنا من سيلانجور 3 ايام ثم لنكاوي 3 ايام وثم بياننغ 3 ايام كذلك و كوالامبور 5 ايام واليوم 15 تم الرجووع الى ارض السعوديه
راح ابدا بتنزيل الصور والحديث عن كل صوره
التصوير من كميرة سوني Cyber-shot وCanon وجوال نوكيا n96

سيلانجور فندق صن واي لاقون

اتعب وانا اقول انه راااائع من كل نواحيه
هذي واجهة الفندق


وهذولا اللي عند الباب ياحليلهم والله ودي كل شوي اطلع وادخل ههههههه يكفي ابتسامتهم وترحيبهم انت طالع وداخل



وهذا اخوي حمودي عند التمثال الفيل اللي عند بوابة الفندق



وهنا عند الغزلان



وهذا مسبح الفندق



وهوون في بلكونة الغرفه ((البرندا^-^))




وهنا صور تبع الفندق







وكان عند الفندق العاب مائيه ومسابح وملاهي روووعه







حموودي يلعب متحمس



وهذا وااحد ودي اني قاابصه خدووده يدنن الدبيبه ماشاءالله





عاد هذا شي ثااااني هذا الجسر اللي عند الالعاب المائيه والمسابح هو مو يخووف مرره بس يمكن لانه خشب وشوي مفتح
هذا اللي خوفني فيه وانه يروح يمين ويسار وطوويل >-<
امي كانت متحمسسه ويوم وصلت نص الدرج اللي يطلع عليه وانه مرتفع رجعت وحمود بعد الخواف ^-^
واشوف فيه العاب يرمونهم من فوق الجسر لتحت بس يوقع ع اوراق انهم مو مسؤلين اذا صار له اي حااجه>>كأنهم يوقعون ع شهادة وفاة
طبعا انا لعبت بس قبل شربت ديو قووي قلبك >>والله من التسذب

وكان بجانب الفندق سووق رااائع نروح له في الليل وناكل عسكريم من
Hagen-Dazs




طبعا هناك لازم الواحد يقوم بدري كنا نقوم الساعه 6 او 7 عشان نفطر
كان فطور الفندق اقل مايقال عنه انه رااائع من جد احسن فطور
رحنا بعد الفطور الى شلالات تمبلر بارك
حـمودي مستانس يشرب





اخــوي الكبير



وكان فيه قروود كنت خاايفه بس الحمدالله ماتتعرض لأحد











والله ياأني تعبت تعب وانا امشي الدرج رقيت فووق يوم باقي شلال واحد ماعاد قدرت ابوي واخواني الثنين رقو اما البقيه رجعنااا
والله رجلي صارت تنافض من المشي
يوم جينا نطلع صادفنا واحد يبيع عسكريم ولزم حمود يشتري وللأسف ماكله رماه



وبعدها قال السواق نروح للمعبد الهندي اول شي ماكنا موافقين بس بعدين قلنا نروح نشوف خرافاتهم اللي اختلقوها
هذا هو المعبد يقولون انه اكبر تمثال بس مدري صدق او لا جعله يطيح ان شاءالله ^-^



اول ماشفت الدرج كنت بتراجع بس تحمسست ورحت انا و اخواتي الثنتين وابوي واخوي الكبير اما امي وحمودي والصغيرون جلسو
اخواتي الثنتين يوم ماباقي كثير تعبو ورجعو الخبلات واما البقيه كملنا
بس ياهو تعب من جد الدرج تمشي ع اطراف اصاابعك مرره مصغرينه مدري ليش يالله يالله وصلت لا يوم وصلت ع بالي جوا مافيه درج اثاري باقي بعد داخل الكهف



وعاد ريحتهم يوووووه خياااس بخورهم اللي يحطونه وفيه مويه تقطر من فوق الكهف مدري ووشي انا امشي وادعي عليهم وكل ماشفت واحد يصلي جلست اشوفه واضحك
يعني صلاتهم موب صلاة رقص ههههههه ويالله ذا الدراهم اللي يحطونها الحمدالله بس ع نعمة الاسلام
هذا اخر شي في الكهف الحمدالله الهتهم جنبها قرود صدق صدق الإسلام نعمه


هذولا جالسين يتباركون مدري وش يسوون بالنار



هذي جواا المعبد شكلها حلوو



ويوم جيت انزل بغيت اتدحرج اسرع
رجعت الفندق ورجليني رايحه وطي من كثر مامشيت


حمودي بماينز وندر لاند






وهذا الشي يبيع اكلهم مدري وشو الله يديم النعمه عاد تدرون انا ابي اللي يبيعون صوارير وطقتها بشوفهم صدق او لا بس ماشفت عنده




••


>>>>> ردود الأعضـــــــــــــــــــاء على الموضوع <<<<<
==================================

••
وبعد الثلاث ايام اللي قضيناها في سيلانجور اتجهنا الى جزيرة لنكاوي المعروفه بجمالها وهدوئها
هذا ماك في المطار مع اني ما احبه بس صورته

عن طريق طيرانهم اير اسيا الاقتصادي

الاكل عندهم بفلوس




شاطىالمنتجع اللي اخذنا فيه








هذا اسمه اسماعيل ياحليله يقول كلو نفر سعودي يدخل جنه ماشاءالله عليه !!
عاد ابوي يقول له واثنين ماليزي بعد هع


ومن بكره اتجهنا الى عالم ماتحت البحار راائع بس للأسف الصور كلها محارمنا ^-^




وطبعاً اللي يروح لنكاوي لازم يركب التلفريك





كان يوقف في مرحلتين الاولى للي مايبي يروح للجسر يرجع
والثانيه الجسر
بصراحه في البدايه كنت خايفه خااصه شفت سعودي معه بناته ثنتين يسحبوونه الايمشي وهو ياعمري خايف
يقول شوفووه يتحرك خبلات انتن تبيعون اعماركن
عاد هنا خفت اكثر بس الحمدالله هي مره وحده هالتجربه ومشيت وانا ماسكه الطرف هههههه بس والله
انه يتحرك البلاط قلت برجع بس ابوي يقول لا اذا وصلنا اخر شي بننزل مع درج وانا صدقت ويوم
وصلنا بعد مامشيت حبه حببه قال يالله نرجع بغيت اطب احسن حل ويالله نرررجع بس اشوا الخوف قل عن اول






وبعد مانزلنا من التلفريك
قررو اخواني يركبون فيل مدري وش هالمسكه


وهنا صور لحديقة الفواكه اغلب الصور محارمنا بوه




هذي فاكهه استوائيه اساساً اغلب او كل الفواكه هناك استوائيه
طعمها مثل الكيوي



هذي ترنجه للي يعرفونها !!




والله ياعليه طعم حقهم الجح ((البطيخ - الحبحب))
تدرون اختي كل مامرت من عند اي كشك يبيع شرت طاحت طيحه فيه اووب صاحيه
ومن بعدها بيوم رحنا رحلة لنهر المانغروف رحله ولا اروع مرااح انسااها والله تقريبا اخذنا ساعتين وشوي اتذكر اسم راعي القارب انس
خذينا نفس كذا



اطعام النسور


-









وكان فيه حيوانات خطيره ثعابين وتماسيح بس يقول ان التماسيح حول ماتنقرض


هنا فيه هالحيوان مدري وش قال اسمه نسيت

ومرينا حول جزيرة الغوريلا ياسبحان الخالق


ودخلنا بالكهف الصغير كان يوجد داخله خفافيش



و وقفنا في مكان ثاني فيه خفافيش واشجار غريبه الدخول يمكن الواحد 2 رجنت بس صدق مايسوى من يتعب نفسه ويدخله خيااااس ريحة الخفافيش





وبعدين رجعنا للقارب واتجهنا الى مكان فيه مزرعة اسماك

هنا قال المسوها ماحد لمسها الا حمود واختي الصغيره وفيه كثير من انواع الاسماك
وبعدها رحنا ع مطعم مأكولات بحريه sea food

وهذي الجلسات تبع المطعم


وبعدها توجهنا الىنصب النسر


وهذي ابار حاره بس مابعد خلصو منها يوم نروح







••


__________________________________________________ __________
••
وبعد الثلاث ايام توجهنا الى بياننغ عن طريق سفينه

قبل لانركب طبعاً لازم اخوي حمود واختي اذا مرو من عند محل يشترون

كانت حلووه والله السفينه

هنا بانت لنا جزيرة بياننغ


اتذكر الفندق اللي خذنا فيه اسمه بارك رويال كله عوائل سعوديين
حسيت اني في الخبر >_<
بس كان حلـــو
شاطئ الفندق
1-115



يادلبووو يانااس الصوه مااطته مط هع >>اتحداكم اذا فهمتو كلمة ماطته

هذي وانا افطر صورتها

شووفووني راكبه ^-^
لاتصدقون ههههههه تخيلو اركب قوويه لو طحت في البحر يمااامي والله ان يغمى علي من الروعه لاني شفت كم واحد طاحو بالبحر
واللي يتقلب اذا نزل
اخوي واختي كانو بيركبون خلاااص بس اخر شي تراجعو =(


مسبح الفندق



وكانو يسوون حفلات حسب الطلب
هذي اتوقع كانت حفله بس مدري وشي اشوفهم يسوون
وتحمست ويوم رجعت من السوق بشووف وشي الا هم شايلين كل شي ومخلصين =(


كان جنب الفندق السوق الليلي والله يافيه عماله تخــوف من قلب ماعندهم تفاهم وسخين
رحت له مره وتبت يعني ياتشتري مني ولا لاتشوف الشي بكم سعره كان يقول لـ اخوي كيف الحال وكيف المال !
وطبعاً عندهم نصب السعودي والخليجي يدبلون له السعر والاجانب لا عيني عينك


رحنا لمتحف الالعاب بصراحه شي رااائع واحسن شي مايبيعون العاب ههههههه عذبو اخوي واختي ^-^
كان حاطين مجسمات لأغلب الشخصيات المعروفه من افلام الكرتون والسوني








حديقة التوابل
كان فيها مرشد يتكلم اللغه العربيه الفصحى ^-^


هذي اتوقع كان اسمها قرفه بس سامه

وهذي الشجره لونها اخضر بس اذا صورتها بالفلاش تطلع فضي


كنت تعبانه كانت فيني كحه ومزكمه شافني اكحكح قالي هل انتي مريضه ؟
قلت نعم =(
قال سأعطيكي ورقة شجره بإذن الله ستشفين بعد 5 دقائق
عاد انا يوم كلت الورقه يوووه طعمها بس اهم شي اطيب ان شاءالله بصراحه ماطبت مثل ماقال بس خفت علي

وهذي صورتها من حديقة الفواكه بس عجبتني حديقة الفواكه اللي في لنكاوي اكثر


وشفت هالعقرب السوداء


ورحنا لسوق المشكله ما اتذكر ولا اسم ماعرف وش اسمه نسييت
المهم بعد ما اخذنا لنا فره جلسنا نتعشى بمطعم هندي
كل واحد طلب له وجبه وانا طلبت لي وجبه
شوفو وجبتي !!

انصدمت ع بالي معها بطاطس صلصه فوقها اي شي مافيه الا فخذ دجاج طبعا كلت مع اللي جنبي ^-^


هنا حديقة الثعابين

شفت عندهم ثعبان تفااحي !!

وودنا السواق لمحلات لبيع القهوه والعسل والشكولاطه
العســـــــــــــــــل

حديقة الطيور






وفيها قرود بعد


وهذي برا يبيعونها
تبون لكم وحده عاد انا شفت وحده في لنكاوي القاروره لونها زهر حلووه هههههههههه


واخر يوم اتذكر رحنا لمصنع الألماس وشريت لكل العالم اللي اعرفه وما اعرفه >>والله من الصزز ههههه
وهذا الشي سدهم ماشاءالله وش زيينه موب اللي عندنا يرووع وكله يصيدون سمك هههههه





••


__________________________________________________ __________
••
وبعد بياننغ توجهنا الى العاصمه كوالامبور
عن طريق طيران اير اسيا القبيييييح صار لنا موقف معهم عمري ما أنساه كان الجو مغيم وبرووق حسيت اني فلم الطياره تهز هز يخوف والبرق صقع فيها لدرجة ان النور دخل عندنا الله لايعيد هالتجربه علينا جميعاً كنت جنت امي متمسكه فيها وهي تقراا قرأن علي واخواتي اسمعهم يقولون بصوت عالي الله اكبر استغفر الله
جلسنا لمدة 4 ايام في العاصمه والخامس توجهنا الى دبي ثم الرياض
اخذنا فندق بوسط شارع العرب بس ماعجبني الفندق خدماته ولا فطوره احسن مافيه موقعه كل شي جنبك مطاعم واسواق
صحينا الصباح وتوجهنا الى منتجع افاموسا تقريبا يبعد ساعه ونص مادري كم بالظبط
كانت فيه عروض واحلى شي كان فيه طلاب صغيرين جايين مع المدرسه حضرنا عرض الكابوي والحيوانات المتنوعه والطيور وركبنا سياره وطبينا ع الحيوانت المفترسه
الروحه والرجعه 500 غير الدخول تقريبا دخلنا بــ800 وشوي احس فيها نصب !

اول مادخلنا كان فيه هذولا الاثنين للي يبي يصور
انا قلت بصور اخواني الا هم طابين ويصورون بكميرتهم عشان ياخذون فلوس ولا اللي طالعه يده يبي يغطي عشان ما اصور عاد انا وصلت معي وقلت والله لا اصوره وصورته ولو انها مو باينه بس عناد

عرض الكابوي

هذي اخر شي للي يبي يصور معهم

147
الحيوانات اللي دخلنا لها عن طري السياره
ركبنا نفس السياره الصفرا

شوفو الاسد عند السياره السوداء





عرض الطيور
كأنك في حلم الطيور تدخل عندك يعني اقل مايقال عنه جنآآآن
هذي الصوره لحمودي وقف ومعه 10 ريجنت عشان يجي الطير يوقف عليه وياخذها
منه ويعطيه رسمته اللي رسمها الطير والى الان محافظ عليها الرسمه


عرض الحيوانت المتنوعه كان فيه قرد وسنجاب ودب صغير وقطاوه ومدري وش بعد
يشرب ببسي

حمودي يعطي الخرفان اكل وهو ميت خوف

وهذا القارب ركبناه عشان يودينا لمنطقة القرود


ورجعنا العصر للفندق نريح

كان فيه سوق جنآآآآن جميع الماركات العالميه من قوتشي وفرزاتشي وغيرها فيه ينغع للبنات اللي يحبون هالحتسي ^-^


كان فيه عرض من باريس هيلتون

وهذولا بشارع العرب عند السوق الصيني
تصور معهم وتعطيهم فلوس قبل , تخيلو مصنميين مايتحركون ولا يلتفتون اببد كأنهم تماثيل بس حلوه حركتهم

وهنا حمودي مصور جنب التكسي





وبكذا تكون رحلتي خلصت وان شاءالله انها نالت ع اعجابكم
والله الله بالردوود الحلوه والتقييم

لكل من مر هنا

••


__________________________________________________ __________
رحلة موفقة ان شاء الله
وتصوير وتوثيق جدا رائع
يكفي الطبيعة بس!
دمتي بخير

__________________________________________________ __________
الله يعطيك الف عافيه على التصوير امتعتينا وذكرتينا بـ ماليزيا
طبعن ماطلعت عندي الصور لاكن طلع لي مطاردبي
وصوره فندق صنواي لاجون معك حق اختي الفندق روعه وخيال
نمت فيه تقريبا 20 يوم وافضل الخدمات توجد به
ان شاء الله استمتعتم ووخساره ماطلعت لي الصور الباقيه تمنيت اشوف اماكن سياحتكم لن الاتصال عندي ضعيف شوي وانا مو في البيت
تقبلي ودي وردي وتقديري + تقييمي

روووووووعه الصراحه
انا رحت تايلند احس معالم ماليزيا وتايلند
قريبه من بعض....يسلمو يعطيك العافيه