عنوان الموضوع : كذبه
مقدم من طرف منتديات الشامل

من الشمال هضاب ..
و من الجنوب وادي ..
و ما بينهم ( كذبه ).. القرية العذبه..
طين و نخل و قباب ..
سورٍ بلا ابواب
و أظن ميلادي .. ماله زمن و كتاب ..
لكن ولدت فـ يوم .. و ولادتي صعبه ..
قالوا سنة ما غاب .. مات .. أو رحل ( شرشاب )
ترف الشفاه مثل الجناح ..
و يطير الحكي .. يطير
فـ الاعياد .. يقولون :
كان يحرك الناس عرايس ..
بقطعة خشب و خيوط ..
يشعل المعارك .. و يرتب الأعراس ..
ينهي الجدل .. و يعلق الأجراس ..
يتعب الأنداد .. متبعثر الأبعاد ..
و يجمع عيون الناس فـ احداقه
و يعزّي في الموتى .. و يبارك الاولاد ..
يكتب لكل طفل ورقه ..
و يغطيه بلحاف ..
مثل الكهوف مظلم .. و مثل الغدير شفاف ..
يصهر حديد البنادق ورق .. و يبري خشبها اقلام ..
و يحرق البارود .. ند .. و خشب صندل ..
و يبدا من الحنظل .. و ينتهي في الشهد ..
بعض الليالي عبد .. و باقي الليالي طيف ..
كذبه .. مثل سوالف الجن .. ما لها آخر
و مثل البحر زاخر .. بالحقيقه و الخيال ..
ايام تحملها الجمال .. شمال ..
لجبال .. تكسيها الثلوج ..
وين المروج .. و عرايش العنب ..
و ايام ينهكها التعب ..
و تجلس على اطراف الدروب ..
و تقابل الصحرا جنوب ..
تعد أعواد النبات الناحله ..
في السراب ..
وين اختفى شرشاب ؟
في الليل و اجساد الحطب ..
تلوى .. و تصرخ .. و يجلدها الحطب ..
يصبح كلام الليل غير ..
و ترف الشفاه لكن .. يموت الطير الأول ..
و يظهر بداله طير ..
و شرشاب يرجع .. من عج الاساطير ..
و ضباب القوافي ..
لا هو مريض .. و لا متعافي .. مثلنا ..
لحم .. و عظم .. و عيون ..
و اسمعهم يقولون : لو هو حرير و خزّ ..
أحيان .. يهتزّ ..
مثل انعكاس الغصن ..على الما الجاري ..
و ترتعش كفّه .. وسط العواصف ساري ..
و ما يحرّك الاّ .. حجانه الكثّه ..
تظهر .. و ترشح .. اوجاعه الرثّه ..
على سطح الجديد من الثياب ..
تنشب حروفه فـ الضروس .. و تنقطع انفاسه ..
ذكرى الجنايز و العروس .. تتقاسم احساسه
يرجع لنا من كل الدروب دخّان ..
و من العزايم دله .. و شظايا فنجال ..
مشوّش ٍ .. كلهّ .. كلهّ ..
عجّ .. و دموع .. و مناديل ..
في الريّح .. قبل الغروب بشوي ..
يطيح العجّ .. و تهدا الهبوب ..
( و كذبه ) .. تجلس على الساقي ..
تغسل الترّاب .. عن وجهها الطيّب ..
و عن قلبها الباقي ..
و تناظر الشّمس اللي تغيب شوي .. و شوي ..
و الما يترقرق صافي .. فـ ضلوعها ..
بين ضلوعها .. و بين النخيل
و تتذّكر ايام الرّحيل .. و تسترجع اوقات الغياب ..
شرشاب ..
كان المصابيح في السوق .. و المدفأة في البيت
و ما يحرق الكبريت .. من تبغ .. و من عود ..
يخيط .. جناح الفراش الأبيض المحروق ..
بسلوك الرماد ..
كان الخضار .. لزرعنا .. و كان الجراد ..
كان الوله .. و عطر المكاتيب .. و وشوشات النبات ..
يرمي الحصاة .. قبل الغدير ..
و يجني الرّطب قبل اللّقاح ..
و لا تطعن اطراف الرّماح .. الاّ ما يصيب ..
كان الغريب .. الليّ يعلمّنا الوطن ..
( كذبه ) .. تظهر عليها الشمس من كل الجهات .. في الصيف
ما هي شمس وحده .. تقول الف شمس و نيف ..
بس الغريب .. ان ظلالها داكن و مظلم و عميق التجاويف ..
مثل صدور أهلها ..
و وقت السوالف و الحكي .. اطفالها شيبان ..
و هذي عجوز ترتكي .. على ظلّها ..
يوم ابتعد عنها الجدار ..
قالت و انا من هالنهار .. هارب للظل ..
الله المستعان شرشاب
اتذكره و أنا شباب ..
يعزف الرّباب ..
و يحفظ قصيد بني هلال ..
و يرقص بمطرق خيزران .. وسط الحفل ..
ثوبه نظيف لو هو عتيق ..
و ما في الجيوب .. ( لو بيزه ) وحده ..
يبيع الحطب .. و يشعل قناديل الدُّروب ..
قبل الغياب ..
و دايم تشوفه جالس لوحده ..
و في يوم جا خطّاب .. قالوا يبي ( مزنه ) ..
نقول : هذا خطيبك في الحفل .. يرقص بمطرق خيزران
الله المستعان ..
و الى متى الكذبه .. يا ( كذبه ) .. و الحكي في الغياب ..
وين ادفنوا ( مزنه ) .. و متى رحل شرشاب ..
فوقي يمر غراب .. و تحتي كسر من طين ..
اطلال هالمسكين .. و ملامحٍ لبيوت ..
كانت غتر و بشوت .. عطر و كحل و شيال ..
حضر الزّمان و غاب .. و الليّ عرف شرشاب ..
ما انصف الرجال .. لكن ظلم ( كذبه ).



>>>>> ردود الأعضـــــــــــــــــــاء على الموضوع <<<<<
==================================

عبد الله البشري
.
.

أهلاً وسهلاً بك
مساؤك سكر

نفحات روحانية
ورؤى وجدانية
تعانق الخيال
ولا تبرح القلب

سلمت للنقل الجميل
والطرح العذب

تحية تليق بك


__________________________________________________ __________
عبدالله البشري

اسعدني جداً التجوال حيث نقاء اختيارك
رائعة وبعمق
احترامي وتقديري


__________________________________________________ __________
عبدالله البشري

اسعدني جداً التجوال حيث نقاء اختيارك
رائعة وبعمق
احترامي وتقديري


__________________________________________________ __________
لونا السعدي
حسين القضاه1977
*عاشقة البحر*

شكرا ًلكك

دمتم بخير


__________________________________________________ __________
طرح راائع ويعطيك العاافية ياذووق وفي انتظار جديدك المميز