بالحلمنتيشي ( ج2 )
اليوم هرجنا بالكورة ياعباسية = فتحي اذانيك للهرجة ديه
الله يازمان والملاعب الترابية = اللعب مافيه خشونة ولا اذيه
واليوم تكسير وسب وعصبية = ويتباع اللاعب باسعار خياليه
كانه بسوق العبيد بالحميدية = سيارة كشخة وملابس حريريه
زمان نتقاسم اللقمة والهدية = والاتوبيس بقرشين نركبو ياوليه
قالت يا ابويا شوف بدريه = تقول انا الزعيمة الهلاليه
جوابت اختها تقلي اتحادية = ياكلك شوك البرشومي يابهيه
وقامت المصارعة بقذائف محلية = قدور وصحون ارضية وجويه
وجا الواد كملها يارشدية = قال اهلاوي انا من السعوديه
بس كان انتي وهيا = فين التربية واخلاقنا الاسلاميه
تعليمات : مالحقتو اكسرو بهمجية = فين الاخلاق والروح الرياضيه
مسكين مانفعتو الاسعافات الاوليه = كسر مضاعف نقلوه للصحيه
قالو يلزمو راحة علاجية = افتقدو النادي والاعفاء هديه
وصل التعصب لحياتنا الاسرية = تتطلق البنت وتنضرب يازكيه
هيا هاذي اخرتها ياصبحيه = زعيق الجماهير باصوات تنديديه
والقوارير يقذفوها كالقذايف الصاروخيه = الدم يفور والتصريحات ناريه
مابين ظلم واتهامات وانفعالية = حالة كورتنا اليوم العصريه
اسماء الاندية واللاعبين حفطوها = وحضرو الملاعب من العصريه
ماحفظو جزء من القران = وحضورهم للملاعب بالالاف وحصريه
ما اجتمعو مثلها بمحاضرة دينية = ولا ادو الصلاة بكثافة حضوريه
هاذي حال كورتنا يابرنجية = تتطنيش لفروض وهروج صحفيه
زعلتو مني لهرجتي النكدية = اسمعك ياواد هروجي تخريفيه
كدا علموك الهروج الشواريعيه = راح الادب وراحت الحميه
الله يازمن وايام العموديه = كان اولادنا في البيت من المغربيه
الفلكه والباكورة في الحنيه = كانت طريقة ابائنا التأديبيه
نقول مرحبا وعيوننا مرخية = واليوم الشيب ما احترموه ولا المحسوبيه
خلاص انفضت الهرجة التيوهيه = قلتها بالحلمنتيشي وطولتها شويه
اترككم بحفظ العناية الالهيه = من كل شر ومكروه واذيه
رد مع اقتباس
