عنوان الموضوع : رواية سهام الأيام...للكاتبه:شخصيه خياليه
مقدم من طرف منتديات الشامل
رواية:
(((ســـهـــآم الأيـــــــــــام)))
.....بعالم كبير وواسع..أمضي به وحيده دونما سند..
وحيده واظن ان ليس لي أحد..
غير وجه أمي كل صبـاح لم ترى عيناي من الأقارب أحد!!..
كان الوطن يكاد يضيق بي كلما اتذكر مرضها الذي يأخذ من صحتها ونشاطها كل يوم ..
كل يوم أراها تذبل أمام عيّنيّ...
ولضيق ذات اليد..تركت مقاعد الدراسه بعد سنه قضيتها في التمريض!..
أصحو على أمل وأنام على أمل...
ومع مرور الوقت...يتضاءل الأمل ولا يزيـد...
كنت ومازلت متفاءله...رغم ما اتعرض له من صعوبات في وظيفتي التي تحتم علي الإحتكاك بالرجال,
في مجتمع يحب المرأه ولكنه لا يُرحب بعملها مع الرجال!!!!!
تعرضت للتحرش.وسكتت من اجل لقمة العيش ومن اجل أمي المريضه فقط...
ومازلت رغم الألم أحمل أملاً وحُبـاً..وتفـاؤلاً بأن غداً سيكون أفضل..
ومازلت أُكافح من اجل أمي ومن أجلي...
,...
>>>>> ردود الأعضـــــــــــــــــــاء على الموضوع <<<<<
==================================
#الـسهم الأول...
<< القووي فقط بهالدنيا يعيش>>
........
في حي من احياء العاصمه الشعبيه~
تسكن أم مريضه بمرض خطير ويهدد حياتها ومعها بنتها(سهام) وهي وحيدتها بهالحياة...
سهام هي إحدى صديقاتي أو قريباتك أو ربما احدى جاراتك وبتفاصيل حياتها كفتاه تتكرر مواقف ربما مررنا بها أو أحد ممن نعرفه..
سهام هي موظفة استقبال في مستشفى خاص وكثيراً ما تستقيل وتنتقل لمستشفى ثاني لنفس السبب..
هذي باختصار بيئة بطلة الروايه والبقيه تعرفونه لاحقا وبوقتها~~
##الاحداث السرديه##
استيفضت كعادتها الساعه 8 واتجهت لدورة المياه وكانت مستعجله/يا ربي تأخرررت..
رن جوالها وكان السايق وما ردت عليه..
أم سهام دخلت تستعجلها/ي سـهاااام ي بنتي تأخرتي ع الساايق..فضحنا في الحاره..
سهام تكلمها وهي بدورة المياه/يماااه انا ما تأخرت بس هالحيواان يجي ياخذني بدري قبل دوامي بنص سااعه..
ام سهام/عااد وش نسوي به مضطرين نتعامل معه
سهام طلعت وهي تلف شعرها بمشبك كبير وتوقف عند المرايه وتزين بلوزتها وبطلونها/الله يلعن الحاجه اللي اضطرتنا نتعامل مع هالاشكال..وش فيها لو اننا نسوق
أم سهام وهي تبسم رغم ملامحها اللي اذبلها المرض/اقوول ابلعي العافيه..حتى لو بتسوقين..من وين لك فلوس تجيبين سياره
سهام اخذت عبايتها وززينت نقابها/هههه صاادقه..
أم سهام/ما اوصيك يا بنتي انتبهي لنفسك
سهام باست راس أمها وهي طالعه/يلا سلام يمه
أم سهام لحقتها/والفطووور
سهام نزلت ركض من على الدرج/مافي وووقت
أم سهام كحت وطولت بالكحه/آآآه يا بنتي والله موب هذا قدرك ولا مستوى عيشة أهلك..حتى أنا بعمرك ماتبهذلت مثلك..لكن حسبي على من كان السبب..
[[يبدو أن أم سهام تخفي سِرّ عن ابنتها...إن كانت كذلك حتماً سنعرفه...تُرى..ما هو سِرّك يا أم سهام]]
ِ
/
/
في الشارع:
طلعت سهام ووقفت ع الرصيف وتلفتت مالقت السايق وعصصصبت/الله لا يوفقك من سايق..راح وخلاني..
وقفت عندها سياره ددسن نيسان 2009 وهي تعرف صاحبها من كثر ما يضايقها..
*شاب اشهب لابس ثوب اسود وطاقيته مغطيه جبهتهوشعره طويل بشكل بشع* معروف بالحاره بأسم"ابوحبتين"/توصيله ي عسل
سهام سفهته ومشت وهي تمتم/يــاصبر الأرض عليك وعلى أشكالك
ابوحبتين/وش عليه يالمززه..نعديها علشاان الزين بس
فحط بددسنه ومشى...
سهام وهي متجهه لبيت جيرانهم "طَلّعت جوالها واتصلت على منال رفيقة دربها وبنت الجيران اللي تربت معها/ألـوووه منااال ...
منال في الجوال/هلا سهامو
سهام/مناال الحقيييني هالسايق التبن رراح وخلاني..
منال/ انا ابي اعرف وش مصبرك عليه..لا وياخذ منكم اجره كل شهر...اللي يشووفه يقول يوصلك صدقه
سهام/الله لا يوفقه...مناال بليييززز تكفيين تعالي
منال/أنا ماعندي دوام الصباح انتي عارفه دوامي ليلي اليوم
سهام بتملل/أوكي شسوي
منال شافت أخوها زيد يأشر لها/سهام ..زيود يقول فاضي و يبي يوصلك..لو حابه
سهام فرررحت/طيب خليه يجي..اكيد ابي اداوم قبل لا يكتبون لي تأخير وخصم انتي عارفه الراتب كله 3500
منال/اووكي خليك جاهزه..اللحين طالع لك..
/
/
لحظات وطلع زيد وهو يتبسم من بعيد ويأشر لها تجي..
سهام راحت له وتعتبره مثل أخوها لانهم متربين سوى وبينها وبينه فرق سنتين بسس/صباح الخير زيد
زيد نزل نظاراته/ صباح النوور ..
سهام/اسفه بثقل عليك اليوم
زيد/ولا يهمك أركبي بس..
سهام ركبت معاه/
[[سهام ومنال وزيد متربين مع بعض..وفي بنت أخرى أسمها"سَحَاب" قوية شخصيه وبالعاميه(شقرديه)ولها دور باارز...وهذوول سهام تعتبرهم أخوان دنيا]]
/
/
*نرجع للأحداث السرديه*
المستشفى:
في مكتب المشرف ع القسم..
سهام في خاطرها(يارب صبررررني ..ماني قادره اتحمل هالإنسان)
رجل في الأربعينات من العمر وملتحي وباينه عليه علامات الإلتزام/يا أخت سهام..مايصير كل يوم تتأخرين بهالشكل
سهام/أسفه استاذ مصعب..لكن ظروفي ..
مصعب قاطعها/يا أختااه أي ظروف اللي تخليك تداومين بمكان يعج بالرجال ومختلط هالشكل..
سهام في خاطرها من الهم جبل وهو يسألها وش ظروفك/أستاذ مصعب البيوت اسرار
مصعب بدون تفاهم وبعقليه متحجره/البيوت هي المكان الطبيعي للنسااء...منتي ملزومه تطلعين و..
سهام بعصبيه ماعاد قدرت تتحمل تهزيئه واسطوانته المشروخه اللي يسمّعها كل يوم قاطعته/بسسس...ولا كلمه انت ماتززهق ماعندك احساس..على بالك بطلع من بيتي كل يوم 8 ساعات يوميا وبراتب 3500 وما أخذه كامل بعد..علشان طفشانه من البيت وابي اتسلى!!
مصعب تفاجأ من ردها لأنها دائما تسكت له/..
سهام كملت/أنا وحيده مع أمي المريضه على الله ثم راتبي.. ماعندنا رجال ..ماعندنا عزوه..لكن نفوسنا عزيزه ماتطيق المذله..يا أننا ناكل من تعبنا وشقانا..ي نموت بكرامتنا..مو مثلك..متعين بالواسطه..ومامعك غير شهادة المتوسطه..في وظيفه المفروض اللي يكون فيها جامعي ..ولا تكذب...ترى عرفت كل شيء من ملفاتك بالأرشيف..وانت تتكلم عن الأخلاق والقيم..!!
مصعب تلعثم/لو سمحتي لا تتعدين حدودك..
سهام/انت ماخليت فيها حدود...وادري بتطردني من العمل لكن قبلها أنا من اللحين اقولك بستقيل..يا مُدعي القيم والأخلاق..
طلعت وسكرت الباب بقوه..
مصعب كان متفشل ويحمد ربه انه محد سمعها...
/
/
/
/
آآه يا دنيـا الشقى...وش باقي ما حصل...
/
/
وقت العصر"
منال طالعه من بيتها ومتجهه لبيت سهام...وهي خايفه..
رنت الجرس بقوه/
شويات وفتحت أم سهام الباب/هلا منال
منال وباين على ملامحها القلق/خالتي العنود..وين سهام؟..شصاير عليها
أم سهام ببتسامه/ماعليك..لا تخافين..تعبها اللي انتي عارفته..تدرين هي عصبيه واذا عصبت تتعب من القولون
منال/ادرري..ابي اشوفها
ام سهام/تفضلي
بغرفتها:
منال بعدما عرفت السالفه/الله يصلحك وبعدين معك متى بتثبتين بوظيفه
سهام بفقدان أمل/متى ما لقيت مكان محترم اشتغل فيه
منال/أقووول اسكتي..اللي يسمعك يقول الشغل عندنا مقطع بعضه...ومن زين شهادتك بعد
سهام التفتت عليها/منال ان ما سكتتي صكيت راسك بهالكاسه
منال بعناد/ماني سااكته..ي بنت انتي عارفه مجتمعنا كيف صاير ..ووضعك انتي وأمك صعب لازم تتنازلين شوي علشان رزقك..انا اتكلم علشان مصلحتك..
سهام بلعة ريقها وصدت/تدرين مديريي هاللي تهاوشت معه وش شهادته؟...متووسطه..يعني انا اعلى منه شهاده بالله مو ظلم مووظللم
منال/هذا انتي قلتيها...عالم الواسطات مالنا فيه نصيب...حنا ناس عايشين في الظل..نكافح
سهام كتمت غيضها...وسكتت
منال/أسمعيني زيين ترى بقدم لك في المستشفى اللي اشتغل فيه محتاجين موظفة استقبال ..لان زميلتي خطبها وتركت الوظيفه قبل لا يدري انها تشتغل بالاستقبال ويكنسلها..
سهام خافت/استقبااال!!!
منال/إيه استقبال..وتباشرين وظيفتك من الأحد
سهام بنص عين/وانتي خلاص قررتي من عندك هااه
منال/ايييه كلمت مديري بو عيسى عنك قبل لا اجي ووافق..بس تكككفييين لا تفشليني..
سهام وكأنها رضت لأنها ببساطه مضطره/ما اضمن لك اني بسكت على احد يدوس لي على طرف..
منال/ ومن قالك اسكتي..لا تختفين من ناحية مديرنا..طيووب ورجال كبير ومحترررم..ادعي يطوول بمنصبه..لي 5شهور متوظقه عندهم و عمرره ما حط عينه بعيني حتى وانا اكلمه بموضوع.
سهام ارتاحت نوعاً ما/الله يكتب اللي فيه الخير..
منال/أمين..
/
/
بزاويه أخرى من نفس المدينه...
في صالة البيت..
سيدة مجتمع خمسينيه انيقه تُدعى نوره جالسه تتقهوى وكأنها تنتظر أحد/...
نزل من أعلى السلم "راكان" شاب عمره ببداية الثلاثينيات..مثقف ورجل اعمال كما العائله/مساء الخير يا أحلى بنوته بالدنيا
نوره نزلت فنجانها وهي تضحك/هههههه
راكان جلس قبالها وهو يناظرها باهتمام/شفيك عمتي ماقلت نكته
نوره ناظرته بنص عين/أنا بنوته يا بكااش
راكان/وأحلللى بنووته بعد..آآآمرريني عمتي طلبتي تكلميني بموضوع مهم
نوره بشوي جديه/أي فديتك...بصراحه..عمك بو راشد الله يسلمه لمّح لي أنك ترى مصختها..متى بتخلص موضوعك مع "ريم"
راكان قاطعها وهو يناظر ساعته/عن اذنك عمتي تأخرت على رجال مـ...
نوره قاطعته/راكان حرام علييييك
راكان وهو مستعجل/أوكي بعدين نتكلم بهالموضوع...سلااام
طلع مستعجل ...
نوره جاها إحبــاط/الله يهديك يا هالولد..
/
/
/
الساعه 10 ونص بالليل..
راجعه من العمل وهي مجهده وصلت الباب ووقفت علشان تطلع المفتاح من شنطتها...
فاجأها صوت خشن وأرعبها/أخيــراً رجعتي بيتك..يادااافع البلاااا
سهام حطت يدها على صدرها وهي تسمي على نفسها/بسسسم الله الرحمن الرررحيم..أنت منييين طلعت لي..ماتخلي طبايعك يا هالشااايب
رجل في العقد الخامس من العمر"صاحب وايت نقل ماء" أسمه"مفلح"/ليش شايفه جني الله يكفينا البلا...انتي اللي منين جااايه تووواالي هالليوول..؟!!!
سهام متعوده على لقافة اهل الحاره/وااااانت وش دخللللك فيني..وش هالديره اللي كلها فضوليه.وكلن يتتبع الثاني...شتبي يا مفلح؟
مفلح بلهجه جنوبيه/خذوا عقلش..فيه بنتن ترجع لبيتها في تيه الوقت المتأخر هاااه!!!
سهام فتحت باب بيتهم/ياليل مطووولك..أقوول انقلع ماني فاضيتلك..اذا بتكلمني جنوبي طس وراك
مفلح/لحظه يا سهام لحظه...تبين تنسيني اللي جاي علشانه هااه
سهام ارتفع ضغطها منه/نعنبو بليسك انت اللي تهذر أنا ماقلت شيء...يلاا تكلم وش عندك
مفلح/وين قيمة الماء ؟
سهام/يا ررربي موعد السداد مو يوم الخميس
مفلح/إلا يوم الخميس..
سهام/أجل انقلع وكل تبن وانتظر لين يوم الخميس...بتجيك فلوسك لا تقعد تطامر كل شوي عند باب بيتي..
مفلح/أفااا ياذ العلم..عيييب عليك
سهام تركته ودخلت البيت وسكرت الباب....
دخلت داخل وهي تتسحب ماتبي تصحي أمها...وتفاجأت بأمها طايحه على الأرض ولا تتحرك وصرخت/يماااه شفييك ؟..قووومي يماااه
أم سهام بدون حركه/............
سهام صرخت/يماااااه
/
/
يتبع
((قراءه ممتعه))
__________________________________________________ __________
يعطيك العافية حبيبتي وأشكرك من كل قلبي ع الدعوة
ولي الشرف حقيقة أقرأ الرواية ,, وأتمنى قريبا أقرأ رواية
من كتابتك
نجي للرواية ,,
باين عليها جميلة ,, وراح يكون فيها مواقف صعبة تقع فيها
البطلة ,, ومادري ليش قلبي حاس إنها راح تلتقي ب راكان .
بالنسبة لبطلة الرواية سهام ,,
صراحة صراحة ,, أخلاقها ما عجبتني ,, حقيقة ,,
يعني أسلوبها بالكلام مع مفلح ,, صحيح إنه عاملها بطريقة سيئة
وكلمها بأسوب سيء ,, بس هي بعد كان لسانها طويل ,,
يعني أحس فيه ,, تناقض بين أخلاقها وتعاملها مع الناس وبين
طبيعة الحياة اللي تعيشها ,,
بما إنها تعيش حياة كلها كفاح لأجل والدتها ,, وعندها هذا القدر
من التضحية بحيث إنها تترك دراستها من أجل تصرف على
نفسها وعلى أمها ,, المفروض إنها راح تكون إنسانة متزنة
أكثر ,, مؤدبة في الكلام مع الآخرين ,, حتى لو أساءوا لها ,
المفروض تربيتها تمنعها تسيء الأدب مع رجل في الخمسين .
وهذي عموما وجهة نظري ,,
بإذن الله راح أتابع الرواية غاليتي
ربي يسعدك ويوفقك ,,
ودي لك ,,
أختك / شمــــوووع
__________________________________________________ __________
شكلها حلوه ياليت اتكمليها
__________________________________________________ __________
المشاركة الأصلية كتبت بواسطة شمــــوووع 
يعطيك العافية حبيبتي وأشكرك من كل قلبي ع الدعوة
ولي الشرف حقيقة أقرأ الرواية ,, وأتمنى قريبا أقرأ رواية
من كتابتك
نجي للرواية ,,
باين عليها جميلة ,, وراح يكون فيها مواقف صعبة تقع فيها
البطلة ,, ومادري ليش قلبي حاس إنها راح تلتقي ب راكان .
بالنسبة لبطلة الرواية سهام ,,
صراحة صراحة ,, أخلاقها ما عجبتني ,, حقيقة ,,
يعني أسلوبها بالكلام مع مفلح ,, صحيح إنه عاملها بطريقة سيئة
وكلمها بأسوب سيء ,, بس هي بعد كان لسانها طويل ,,
يعني أحس فيه ,, تناقض بين أخلاقها وتعاملها مع الناس وبين
طبيعة الحياة اللي تعيشها ,,
بما إنها تعيش حياة كلها كفاح لأجل والدتها ,, وعندها هذا القدر
من التضحية بحيث إنها تترك دراستها من أجل تصرف على
نفسها وعلى أمها ,, المفروض إنها راح تكون إنسانة متزنة
أكثر ,, مؤدبة في الكلام مع الآخرين ,, حتى لو أساءوا لها ,
المفروض تربيتها تمنعها تسيء الأدب مع رجل في الخمسين .
وهذي عموما وجهة نظري ,,
بإذن الله راح أتابع الرواية غاليتي
ربي يسعدك ويوفقك ,,
ودي لك ,,
أختك / شمــــوووع
هلا وغلا..
متابعتك أســـعـــدتني..وردك الوافي نور متصفحي..
تدرج الأحداث سيكشف مزيداً من الظروف ومزيداً من الصعوبات التي ستتعرض لها سهام وصديقات سهام..
لكن السؤال اللي يطرح نفسه..((سـر أم سهام))
وليش هي وحيده اصلن
__________________________________________________ __________
المشاركة الأصلية كتبت بواسطة انا سر الجذبيه
شكلها حلوه ياليت اتكمليها
ابشري ..راح أكملها باذن الله
والله حماس جدا رووووعه ..
يعطيك العافيه متابعه بصمت
رد مع اقتباس
