بسـم الله الرحمن الرحـيم #
يومكم جمال.. بذكر الرحمن *
هدوء .. وتفكير بحياة معينه .. تجذب قلمي آن يلقي حبره
بَ ثاني ورقة لدي .. بعد روايتي السابقة التي كانت تتحدث عن
حيآة زوجيه وحياة خمس بنآت كل منهم قصة ودنيا غريبة
لااعلم بماذا ابتدي ، وبماذا انتهي
سٓ اختصر كلمآتي بعنوآن رواية من نسج الخيآل ..
... لااعلم بمآذا سَ القي لـ روايتي اسمً
رواية بٓ اكملها .. لديها من .. فرح , حزن , تعثر , تفاؤل ..
من ملتقى حياتنا .. ولاكن اردت ان تكون هذي الرواية مختلفه عن السابقه
واخيرآ سٓ اخط بـ قلمي في اول سطور ورقتي بعنوآن :
رواية :" : فبغير حبـكِ لااكـون جـميلا ..
ياجمـيلة ، ياتقـيه ، يانـقاء ،
يامن لسـآنها لاينطقُ إلا إحـساناً /
ارتويني , علمـيني , اسـعفيني #
فَ يداكِ أنتي .. هيَ من امسكت بي ..
التمـست بي _ أحـستُ بي
يامـن ابقيت وحيدـاً أُنادي
ولبــيتي ندائــي ..
يامن افتـحتّ شبآكَ مسـكني
فدخل ضوء الشمـس وعما بي الامـلُ
امسـكتي بـي ! أريتيني كيفَ الطيور ابتهجت
والسـماء صـفت , و الورود تفتحـت
أخـبرتيني ان الأمل بـاقيا
وان الله عـزيزً مقـتدر ,
..
البــارت الأول #
.. في أحدا احياء مدينة الريآض ، يقآم حفل زفاف.. بقصر ....... ..
في غرفة العروس ،
،،: والله خاااايفه
..: وش فيك يابنيه ! اذكري الله
،،: لا إله إلا الله محمد رسول الله ... سلمى يارب تتزوجين بكرا عشان تحسين بشعوري
سلمى : ههههههه نوف ماتتوقعين وش قد شكلك يضحك !
نوف : الحين أمي ليه مخليتك عندي !! اطلعي عن وجهي
سلمى : طيب طيب >> اتجهت للباب
نوف بترجي : لالا سومااا حبيبتي امزح معك تعالي
سلمى رجعت لااختها وبضحكه طويلة وحظنتها : هههههه حبيبتي وانا اقدر اخليك .. الله يوفقك
بقسم الرجال ..
فيصل مصور محترف وطايح بَ الشعب تصوير ( اخ سلمى و نوف ،، ،، )
فيصل بَ اناقه وشخصية جدا رآقيه وبيده كاميرا كانون ويصور : ههههههه لف شوي !
علي بوقار ويبتسم : طيب
عبدالعزيز ( اخوهم الكبير ) : هههههه خلاص ثبتنا ؟
فيصل : ايييه ......... ايواا وصورنا اجمل عريس ونسيبه
عبدالعزيز : الله ياالي طالع منها !
فيصل : ههههه اثقل
علي ( العريس ) يهمس لعبدالعزيز : باقي ظيوف ؟
عبدالعزيز بنفس الصوت : اعقل العروس مو طايره
...
نوف بخجل : الله يبارك فيك خالتي
ام علي : الله يوفقكم يابنتي
نوف : امين
سلمى ب استعجال : يلا بيدخل العريس !!
نوف ، وتضاعف ارتباكها وجلست ..
' دخل ابو عبدالعزيز وبيده يد علي ،، و وراهم فيصل وعبدالعزيز ..
نوف بكل حياء وارتباك حبت راس ويد ابوها ..
وقف قبالها علي وبداخله تتضاعف الفرحة ، وحب رأسها : الف مبروك يااجمل عروس
نوف بصوت ماينسمع ومنزله رأسها : الله يبارك فيك
أم علي متغطيه وجنبها ام عبدالعزيز : كلللللللللللللللللللللوش ( زغروطه -__* )
وقف عبدالعزيز وحب رأس أخته : مبروك يااحلى اخت
فيصل جاء بعده مسك يد اخته : ومبروك ( همس ب أذنها : بنفقد صراخك ياالعجوز
نوف مسكت ضحكتها وبأدب : الله يبارك فيك
فيصل : بلغني رب الكون اهنى واهنيك ياأخت عمري نوف وشمعت حناني شفتك يانوف وفرحة العز تكسيك وحقق دعائي بسجدتي في صلاتي .. يانوف ماتدرين وش قد نغليك ياصورتي واسمي وروحي وذاتي ..
نوف استحت :
ابو عبدالعزيز : صح لسانك
فيصل : ههههه طبعاً هذي كلمات اغنية حبيت القيها لـ اختي العزيزه بشعر
عبدالعزيز همس لـ اخوه : يازينك وانت عاقل
فيصل : احم مبروك مره ثانية
علي : ههه الله يبارك فيك
ابو عبدالعزيز : يلا نلبس الدبل !
،، وقفو المعاريس .. وغيرو اماكن الخواتم من اليمين لـ الشمال ،، ولبسها ذهبها ،، وأنزفت له قدام الدنيا كلها ,
وبعد انتهاء الزواج ..
فيصل ينتظر الاهل برا بسيارته ،
فتحت الباب سلمى ووراها بنت ..
سلمى واهي تلهث : هلا فصيل
فيصل : ههههه وش فيك تلهثين مثل الكلب
سلمى رمت عليه علبة المناديل : احترررم نفسك ياقليل الحياء
فيصل : هههه انا ماسبيتك ! شبهتك لااكثر ولااقل
سلمى نفخت عليه : لالا والله ! اقول بس اعقل .. وترى حبيبت القلب معنا
التفت فيصل وبذهول : هلا هلاوالله باالزين
افنان بحياء : هلابك
سلمى بصوت عالي : هيييه استح على وجهك ترى معك مراهقين !!!
فيصل : وش دخلك تراااها زوجتي مو صاحبتي
سلمى : زوجتك ماقلنا شيء بس ترى حنا بعد عندنا مشاعرررر
فيصل : الله ياالمشاعر .. ايه زوجتي وعلى سنة الله ورسولة بس باقي حفل الزواج
سلمى : وش فيك قلتلي قصة حياتك ؟ كأني مو اختك ولاني معك في البيت ! ادري انكم متملكين ومتزوجين وخالصين واهيييي على ذمتك ! بس عيب يعني تتغزل فيها قدامي هاااو
فيصل : ياشيخه اسكتي بس
افنان : ههههه خلاص وش فيك على البنت كأنها مو اختك
فيصل : ايييه طيب طيب كلكم عللللي الحين !
سلمى : اوص بس خالتي لما جت !
فيصل يتحلطم : ياليل
لما فتحت الباب : اووه المعاريس الجدد مع بعض
سلمى : اييه واخت المعرس معهم بعد
لما : اا ( قاطعتها )
سلمى : ها خااالتي بتركبين معنا ؟؟ ولا بتروحين مع ابو عيالك !
لما بتكشر : لابروح مع زوجي بس حبيت اسلم عليكم
سلمى & فيصل : وعليكم السلام ورحمة الله وبركاته
لما سكرت الباب ..
فيصل بغيض ويعض اصابعه : وش اسوي بذا المالغه !!!!
افنان : فيصل اتركها ليه تحرق نفسك عليها !! وصراحة مانبي نذمها
سلمى : ايه خلوها على جوها
فيصل : امي وخالتي مع عزوز ؟
افنان : اييه امي وخالتي ام عبدالعزيز مع عزيز
فيصل دنق رأسه يشغل السيارة _ رفع رأسه بسرعه وبهواش وفجعهم بصوته المفاجئ : الحين ليه وحده منكم ماتركب قدام معي سوااااق عند ابوكم انا
سلمى & افنان : هههههههههههه
افنان : يازوجي العزيز المعذره بس بجلس مع سوما بنسولف
سلمى بدلع : سوااالف صبايا وش عليك
فيصل يقلد سلمى : سسسسوالف سبايا ،، هين اوريك لولا زوجتي معنا كان رجعت عليك وبقستك
سلمى : هيييه كأنك طفل بذا الكلام سبحانه كأن عمرك مو 26!
فيصل : سكتوها هذي لااصوطرها ...
...
هيا بكل فرح : صراحة الزواج الي حضرناه مره حلو .. وام عبدالعزيز بَ وقارها وهيبتها مره تلفت
مها : ب العكس احسها شوي قويييه .. ومو متكبره بس مدري
هيا : لاتحكمين على الناس ب اول نظره ! بعدين ماشفتيها شلون تناظرك .. شكلك عاجبتها
مها : فكييييني بس
هيا : انتي الخسرانة
مها يدها على خدها : متى بس اتزوج سامي وافتك !
هيا : لوو سااامي مستعجل على زواجه منك ويبيك كان ماجلس هل فتره الطويلة دون وظيفه
مها : اهوا يدرس !!!
هيا : يابنت الحلال خلي عنك يدرس ومايدرس !! محد قاله يوقف ثلاث سنوات بعد الثانوي مايدخل الجامعة والحين بسنة الرابعة من الجامعة واااجلسي انتظريه لين يخلص ! ولين يدور العم وظيفه بعدين يتزوجك ويترك عن الخطبات ! والتحجيز
مها بغيض :انا ابيييه ومااابي غيره ! وصحيح ماتربطنا مكالمات وكذا ولاكن يكفي قلوبنا تبي بعضنا من الطفوله !
هيا : ياااختي اسكتي بلله عليك لايسمعك اخوووك
مها : وهذي مشكلتنا ب الحياة ااخوي !! اااخ ياابوي رحت وصار رائد غثه بحياتنا
هيا ساهيه : لهدرجة معيشنا برعب ! ليه اخوي مايحبنا مثل اي اخ يحب اخته لدرجة اليوم يقول ،، اي رجال بيتقدم لوحده من خواتي بزوجها اياه غصب طيب !
مها بخوف : لايابنت الحلال !! تكفين الا هذي !!
هيا : والله هو يقوله
...
أروى بخوف : ياربيه ليييه تأخر راكان
عمة أروى ..) : يابنتي استهذي بلله الحين بيجي
أروى : ياعمتي من المغرب طالع والحين بيأذن الفجر وماجاء !!
ام صالح : قلتلك يابنتي اذكري ربك ان شاءالله انه بخير. !!
( رن الجرس .. ركضت أروى بكل خوفٓ ولهفه .. فتحت الباب : راااكان وييينك ياابوي
راكان ب حزن دخل مع الباب ومشى ولانطق اي حرف ..!
أروى بكل خوف مسكت كتفه : حبيبي قولي وش فيك لاتعور قلبي
راكان بحزن : خلاص خالتي مافيني شيء !
أروى بتوتر دخلته جوا البيت سلم على العمة وودخل غرفته ..
أروى بملامح شاحبه وانشغال بال : يارب وش فيه ذا الولد
ام صالح بحزن : خليييه وانا عمتك
أروى : شلون اخليييه ياااعمممتي وهذا ولدي واساس اهتمامي ولهفتي
( طقت الباب أروى عليه ،، راكان بكل عجز : ادخل
أروى بهدوء وقلبها يحتررق تبي تعرف وش فيه ولد اختها .. جلست جنبه وبكل حنيه : عيوني راكان ! وين كنت اليوم ... شغلت قلبي عليك
راكان بحزن : كنت مع عيال الحارة ! رحنا المطعم وبعدها رحنا الاستراحة
أروى التفتت عليه بجزع وصدمة وانفعال : راااكان وش هذااا !! شلون تسوي كذا ! حبيبي ااانت بحياتك ماطلعت الا لما تقولي وتقولي المكان الي بتروح له ! وعمرك مارحت لستراحات وخرابيط , انت ياابوي بعمر الزهور انت وخيك وردة حياتي اذا ذبلت الورده انا اموت ! ياابوي انت ماتدري بنوايا بعض الشباب الي اكبر منك !
راكان وقف وبغيض وبصوت عالي : ممممالكم دخل فيني اطلع ادخل على كيفي انا كبير واسوي الي ابي لاتتحكمين فيييني وتمشيني على كيفك وش هذا الخوف الي مايخلص يعني الواحد ماينبسسط فكيني منك ومن هذا الخوف !!
أروى مصدومة من كلام ولد اختها الي دخل بصدرها مثل السكين !
غصت بكلامها ماقدرت ترد .. اخنقتها العبره مو متصوره الولد الي افنت عمرها تربيه وتعتني فيه وتهتم له وصار ولدها واغلى من حياتها .. يجي اليوم ويتطاول عليها
ويرفع صوته ويجرحها .. قامت أروى ودموعها مبينه بعيونه متحجره ابتسمت ومشت وسكرت الباب بخيبه .. راحت لصالة وخطواتها بطيئه جلست جنب عمتها وارتمت بحظنها دون بكي ولاتكلمت وعمتها تعبت تسئلها مو راضيه تتكلم !
ام صالح : يابنتي وش فيييه راكان ؟ ضايقك بكلامه ، ؟
صوته طالع ليييه !! يابنتي جاوبيني
أروى بألم : راكان توه 15 سنة بعمر الزهور ياعممتي مابي احد يضره !
ام صالح ازداد خوفها : طيب يابنتي وش صار ؟؟؟
طلع ريان اخوه الصغير على كرسيه المتحرك بكل خوف على خالته : امي أروى ! وش فيك
أروى رفعت رأسها وبشكل سريع مسحت دموعها بشكل سريع وفوضوي ..
التفتت على ريان وببتسامة
أروى : هلا حبيبي ! لييه صاحي هل حزه !
ريان بتلعثم : فقدتك في الغرفة ابيك .. ماما أروى انا خايف
أروى راحت لـ ريان بلهفه نزلت على ركبها وحبت يده وحظنته ..: تعال حبيبي بنام معك
.. أروى دخلت ويا ريان وساعدته على نزوله من الكرسي وسدحته
وغطته بَ البطانيه وسمت عليه وضلت تقرأ عليه المعوذات ومما تيسر من القران الكريم ..
.. الساعة 5:30 ص
بعد صلاة الفجر .. وبدأ نسيم الصباح يهب وبدت الشمس تضيء ..
ام عبدالعزيز تبكي : والله فقدتهاا
ابو عبدالعزيز بحيره : يابنت الحلال البنت راحت بنصيبها وش له البكي الحييين !
ام عبدالعزيز : شسوي بنيتي ""
ابو عبدالعزيز : اهو ماقلنا شيء بنتك وبنتي ولاكن مو لهدرررجة البكي يابنت الحلال تعوذي من ابليس وادعي لها بتوفيق بحياتها وعساء ربي يسخر علي لها !
...
مها بخوف: رائد انت ليه ماتحس فينا ترى والله تعبنا
رائد بعصبية : انتي وش جلسك قبال وجهي !! يلا فارقي عن وجهي ولاوالله قمت عليك وذبحتك
مها : بسس ارجوك لاتجبرنا على شيء مانبيه انا ابي اكمل تعليمي
رائد بعناد : بجبركم واولهم انتي ! ويلا طسي لغرفتك ..
وقولي للي علمتك هذا اكلام حسابها عندي اذا صحت من النوم ،،، بصوت حاد : يلااا انقلعي
مها بحسره ونار تحرق صدرها ،، مشت بألم .. شافتها امها ومنزله رأسها : يابنتي تحمليه ، هذا اخوكم ويحبكم
مها بحسره : يمه لو يحبنا ماجبرنا على شيء مانبيه وما وقفنا عن دراستنا وانتي سامعه كل شيء قاله لو يحبنا كان اهتم لنا ولمستقبلنا كل هذا ! ويحبنا ؟؟؟
ام رائد .. احترامها ودلعها الزايد لرائد خلته يتمادا اكثر .. ومالها حيله .. كسرهم بجبروته وقوته ولاكن ( الله اقوى)
...
أروى جاللسه جنب ريان وتهوجس ،تقول بنفسها : يارب احفظه لي وابعد عنه عيال السوء .. توه بعمر الزهور وهذي اولها يرفع صوتتته علي ..
فتح الباب ،
أروى رفعت رأسها !!!
أروى برهبه وصوت مخفوت : راكان وش فييك ؟؟
راكان بحزن وندم : أروى تعالي شوي..
أروى غطت ريان زين واتجهت لباب الغرفة .. طلعت ومسكت راكان ودخلو الغرفة
أروى : ليه مانمت للحين !!!
راكان منزل رأسه وبحزن : أروتي انا اسف جرحتك اليوم وقلتلك كلام انتي ماربيتيني عليه .. واوعدك والله مااطلع دون علمك ! ولاراح اروح لـ استراحات ثاني مرة ، بس لاتزعلين
أروى ابتسمت وبداخلها فرحه مست يده : ياعيون أروتك انت .. خلاص حصل خير وأنسى اصلا انا مازعلت !
راكان بفرحة : يعني مازعلتي ؟
أروى بضحكة : لا مازعلت ! بعدييين قايلتلك لاعد تسميني خالتي ! أروى وبس !
راكان ببتسامة : ان شاءالله
أروى التفتت تزين فراش سريره : يلا نام سهرتَ كثير
...
الساعة 9 ص
.. طق باب الغرفة
سلمى على الابتوب ..: هلا
فيصل بستعجال : افتحي
سلمى بصوت عالي. : هذاا ااانت !! اجل مافيه ماني فاتحه
فيصل : افتحي بسرررعة
سلمى بعناد : مممافيه
فيصل يطق الباب بشكل مجنون ..
سلمى : لو ايش مافتحت
.. سلمى قامت من مكانها ووقفت خلف الباب ..: اسمع لو تموت مافتحت لك اجل تحطمتي ياقليل الادب قدام حبيبت القلب والزوجه العزيزه
فيصل : ههههههه افتحي طيب
سلمى : لاااا
فيصل .. سكت شوي ، شكلة راح ..
سلمى تتحلطم عليه
فيصل بصوت يفزع. : خذي
سلمى انفجعت.: وجع استغفرالله وش فيييك انت مطفوق ؟
فيصل دخل ورقة من تحت الباب ..: اقريها ياالعجوز لو يهفك الهواء طرتي
سلمى كاتمة ضحكتها بس ماتبي توخر هيبتها ونزلت رأسها وفتحت الورقة مكتوب : افتحي جايب لك شيء والله
سلمى .. فتحت الباب بقوه. : ها وش جايب
فيصل : توقعي
سلمى : فطور ؟
فيصل : لا
سلمى : اجل ايش .. فطور صح !
فيصل : ايييه صح
سلمى : اها ... ( سلمى قالت اها ولاكن مو مصدقه الي تسمعه ( فيصل يجيب لها فطور معجزه )
فيصل سحبها مع يدها وطلعو في صالة الدور الثاني !
سلمى جلست تاكل وبداخلها تقول : ياالله اخوي يحبني وجاي يراضيني
فيصل : بالعافية بالعافية سوممما .. احم ابي جوالك يااختي الحنونه
التفتت سلمى وصرخت بوجهه : كااان كملت معروفك ياالمصلحجي
فيصل : ههههههه تكفين جوالي خرب مدري وش فيه وابي اكلم زوجتي العزيزه
سلمى : مير والله مااعطييييك ويلا وخر عن وجهي ( شالت الصينيه الي فيها الأكل واتجهت للغرفة )
فيصل قام من مكانة وصار يتضارب مع أروى ( بخفة دم طبعاً )
سلمى : مافيييييه
فيصل : يلا ياالعجوز اخلصي
سلمى : كل خواتك عجز انت!
طلع عبدالعزيز من غرفة المكتب : سلامات ؟؟؟
سلمى انفجعت : بسم الله !!! مانمت انت وش جايكم اخواني وش ماكلين !! كأن البارحه مو زواج اختكم وسهرتو
عبدالعزيز رفع حاجبه وبدون انفعال : روحي نامي
سلمى رفعت حواجبها كلها وسكتت من شخصية اخوها المعروفه بَ الرزانه والثقل .. عكس شخصية فيصل تماماً
فيصل يوجه كلامه لسلمى : ههههههه ياالتزغه ياالعجوز ازحري تراااني جايبه بفلوسي
سلمى وبفمها الاكل تتوعده بيدها ..
عبدالعزيز التفت عليه : تعال شوي
فيصل :
( دخلو في غرقة المكتب )
عبدالعزيز : وش تبي من سلمى ؟
فيصل : هههه كنت ابي جوالها بكلم زوجتي
عبدالعزيز : ههههه الله يهنيكم ( اخذ جواله من فوق المكتب ومده لفيصل : تفضل كلم الزوجه العزيزه
فيصل سحب الجوال : الله يرزقك مثلي ياالمثقف ياالثقيل
عبدالعزيز : لالا فكني من الزواج مو الحين
...
الساعة 9 مساء ..
أروى تكلم بجوالها : ايه ياخيتي ابي ادخله عشان ياخذ تمارين ويكون عند مدرب واستاذ ودكتور شاطر .. عساء يشوف الامل بحركة بجزء من رجله .. , ايه صحيح .....، الله يوفقك يارب اكون شاكره لك
..., حاضر راح اكون قريبة لم الجوال .. الف شكر حبيبتي , استودعتك الله
ام صالح : ها ان شاءالله راح تدخله بسرعة بواسطه !
أروى بفرحة : ايه وبمدينة الامير سلطان الطبيه للخدمات الانسانية ..
اهي طبيبة هيناك والأطباء شاطرين وان شاءالله بتوفيق الله راح نسعى بدعم ريان .. واعاقته الي رافقته منذ الولادة بأذن الله راح يكون احسن
ام صالح : مالهم غير الله ثم انتي .. انتي صرتي لهم الأم والاخت والصديقه
أروى : الله يرحم والديهم ويجمعنا فيهم في جناته على سُرر متقابلين
ام صالح : امين يارب ..
..
ام عبدالعزيز : والله ياولدي انا مااعرف رقم ام رائد صديقك .. على شان كذا ابيك انت تكلمة ب الموضوع
عبدالعزيز : يايمة والله مابي اتزوج الحين
ام عبدالعزيز بنفعال : طيب ليييه ياولدي اخوانك الي اصغر منك بسم الله عليهم تزوجو وباقي سلمى وهذي توهااا عمرها 17 وماراح ازوجها بهل عمر وراح تكمل دراستها لين تبني مستقبلها مثل ماتبي يعني لاتنتظرها !
ارجوووك ياولدي لاتخلي ذيك البنت تروح ! والله ان فيها جمال ماشاءالله وهذابه وهدووء واحترام ..! شكلها اصغر خواته
عبدالعزيز : يمه ياالغاليه الله يخليك لي .. افهميني انا مو مابي البنت لاوالله يشرفني اناسبهم رغم ان رائد مو صاحبي مره بس نعرف بعض ب الاخلاق ! ولاكن انا شخصياً مابي اتزوج .. ولاتخافين مافي بالي احد وتعرفين ماني من ذا الحركات !
ام عبدالعزيز طاحت دموعها : يعني ايش ؟ ماراح تخليني اشوف عيالك !! الحين عمرك 28 والله بيروح عمرك
عبدالعزيز مايحب يشوف امه تبكي وتأثر بكلامها وشافها على حق : ياابعد قلبي ياميمتي انا اسسف ( حب يدها ) خلاص بسوي مثل ماتبين وبكره ان شاءالله بكلمه
ام عبدالعزيز بفرحة ومو مصدقه الي تسمعه : صصدق ياولدي !!!
عبدالعزيز ببتسامة : ايه ياالغالية صدق .. طيب ابوي عنده خبر ؟
ام عبدالعزيز : اييه ياولدي اهوا اولهم .. بس مابي اجبرك يعني مقتنع ب البنت !
عبدالعزيز ببتسامة : انا على أمرك يااجمل أم .. شورك وهداية الله
سلمى دخلت عليهم : فرحوني معكمممم وش السالفة
عبدالعزيز : هههه من اللقافه
سلمى : يلا يلا قولي !
.. دخلت عليهم نوف وببهجه : السلام عليكم
الكل تفاجئ بجيت نوف وطمر لها ..
نوف دنقت على يد امها ورأسها : يممه حبيبتي وحشتيني
سلمى : اخخختي فقدتتتتتك
عبدالعزيز بعد سلامه على اخته والسؤال عنها وعن حالها طلع واتجهه لمجلس الرجال ( فيصل وابو عبدالعزيز وعلي )
ام عبدالعزيز : يااافرحتي فيكم ياعيااااالي شلونك يابنتي ؟؟ وكيف علي معك !
نوف ببتسامة: الحمدلله بخير يايمة ادعي لنا
ام عبدالعزيز : الله يوفقكم ياعيالي والله اسعدتوني .. واخيراً اخوكم قرر يتزوج
الكل بصدمة : عزوووز !!!!!!
ام عبدالعزيز : ايييه وبعد ماقنعته ب اخت صاحبه رائد الي البارح جو في الزواج ! ثنتين وامهم
سلمى بحماس : ايييه عرفتهمم بس اي وحده ؟
ام عبدالعزيز : الصغيرة ! اظن مهااا
...
بعد يومين ..
.. مها وبصوت مبحوح وشكل يحزززن : تكفى يااخوي تكفى مابي اتزوج
رائد بصوت عالي : بتتزوجيييينه وغصب عنك .. تجلسين ليييه ؟؟ تبقين عانس مثل اختك
هيا خززت بخاطرها ولاقدرت تتكلم ..
ام رائد : ياولدي اهدى ! الزواج مو ب الغصيبه !!! و الولد قالك اخذ رأي البنت ماقالك اجبرها علي
رائد : يايمه انتي ماعليك انا اخوهم واعرف مصلحتهم
مها : تكفى تكفى مممابي اتزوووج !! توني صغيره وبكممل دراستي الله يعافيك أبوس يدك ( دنقت على يده تبوسها .. وفلت يده منها : بتتزوجين لو تحبين رجلي عمممرك بيتم الـ 19 وبتجلسين على كبدي مثل اختك
هيا بألم سحب اختها من يدين اخوها ودخلو الغرفة .. وامهم تتفاهم مع رائد ومعند ومصرر أن مها تتزوج صديقة عبدالعزيز ...
مها ب الغرفه منهاره بحظن هيا وبألم : اااخ يااختي بيجبروني على واحد ماقد شفته ولاابيه حراااااام والله ..
هيا تتحسر على اختها : ياوخيتي ماتدرين يمكن الولد خيراً لك
مها : لااا ممابي احد غير ولد خااالتي سامي ياحسرت قلللبي بنزززف لواحد غيرك ياولد خالتي
.. بعد ساعتين ..
انهز البيت من طق باب الشارع ورنات الجرس وبجنون وبصوت عالي : رااااائد افتتتتح افتح
الكل بفجعه ..
هيا طلت مع الشباك ومصدومه : يمممه هذا سامي ولد خااالتي !!! لايكون عررف
ام رئد بخوف : انا كلمة امه على أساس اقولها عن الرجال الي تقدم لبنتي !! ويمكن خبرت سامي ! انا مصدومة من ردت فعله ووش فييه لايكون بينه بين اختك علااااقة !
هيا : لااااوالله بسس تبين الصدق ... يحببببها واهي تحبه وهذا سبب انهيارها ب البكي
سامي زااد صراخ وطق ب الباب !!
نزلو كل البيت ومها يدها على خدها خوف ..
فتح رائد الباب وبكل عصبية : خييييير وش جايبك هل حزه
دخل سامي مثل المجنون في الحوش و بنهيار وعصبيه ............
يتبع ...
اعذروني يمكن البارت قصير ! ولاكن هذا الي قدرت اكتبه اليوم .. وان شاءالله الرواية نالت أعجابكم ..
وراح اوفيكم ب البارتات الباقية .. وانـتو لا تحـرموني مـن انتقاداتـكم وتعليقاتكم وتوجيهاتكم ووجة نظـركم
وخلكم على يقين اخـواني أني احترم كل وجة نظر وكـل تعلـيق .. وبلعكـس هذا اسـاس نجاحـي ..
ولكم أطيب التحآيـا ..
مني أنـا أختكم : بنت فهٓد
لا إله إلا الله محمد رسول الله ##
رد مع اقتباس
