عنوان الموضوع : +|| يعنـــي متى ||+ .. ثــاني رواياتي ! - مشوقة
مقدم من طرف منتديات الشامل

في رواية مملـكة جود ..
لــم يكن حلمي بلوغ القمـر ..
لكننـي كنت احلم .. بإرضاء من يعيش تحت ضوء القمـر ،

وهنـا .. طموحي ،،
أن اكون قمركم المنير ..
في عتمـة زماننـا هذا ،،

زماننا الذي تجرد من الحب الطاهر ..
زماننا الذي أكل وشرب على قلوب المحبين

في وسط تلك العتمه .. وجدنـا بصيص نور ..

لـ نتبعـه واحداث روايتنـا ..

+|| يعنــى مــتى ؟! ||+

روايتي الجديدة .. متمنيه ان تنال على اعجـابكم



-----

الجـزء الأول ..




تعريف بالأبطــال :

عائـلة أبو راشد :
عـائلة مقتدرة محترمه ، ومعروفه بين الناس .. افرادها ناس محترمين ومـلاك لأكثر من شركه بالكويت ، معروفين بالكرم والجود ، ومعروفين بشطارتهم بالسوق .

ام راشد ( مريم ) : الأم .. حنونه وطيبه ، لكـن مع مرور الوقت صارت صارمة .. فكـرها متحجر .. وقاسية .. لكنها احيانا تكون من اطيب ما يكون ويمتلي قلبها رقه وعذوبه ، بس طبعـا يوم يكون عندها حريم اما مع عيالها .. فهي أقسى من الحجر ! ، الفلوس همها الوحيد .. والدنيا تقوم وتقعد إذا الناس تحجت عن فلوسهم .. تحسب الكل يحسدهم !

ابو راشد ( خالد ) : طيب القلب وحنون ، وعكس زوجته تماما اللي كانت متسلطة ولاغيه شخصية الكل بالبيت ، كان اهوا السند لعيالته ، يدير شركته بروحه ومعتمد على ولده الكبير بكل شي ، .

راشد : الولد العـود وريـال البيت بعد أبوه .. ، عمره 24 سنه ، محترم ووسيم .. طويل وجسمه متناسق ، حنطاوي وشعره أسود ، . كان ماخذ من ملامح أبوه وايد ، أبو راشد الكل كان يقول انه بشبابه كان مينن بنات العايلة من وسامته . وراشد طلع على ابوه ، بس في فرق ، انه مو بس مينن بنات العايلة ، مينن بنات الجامعه وياه !

حمد : ثاني أولاده ، عمره 20 سنه ، رومـيو العايلة ، وكل يوم طايح له بحب وحده ، واللي مساعدة ملامحة البريئة وعيونه العسلية اللي نفس لون عيون امه .. كان طايش ومو راكد بتصرفاته ، متهور . لكن تحكم تصرفاته البراءه ، برئ لدراجة السذاجه . لكنه حبوب ومعطي جو بالعايلة يدرس في كلية العلوم الاداريه ومتوفق فيها

فيصـل : ثالث الاولاد ، والرابع بترتيب العيال ، عمره 17 سنه ، دايما هادي ويقلد اخوه راشد بكل شي ، ويحاول يصير مثلة بس اذا عصب ، لحد يحاجيه !

ريما : اسم على مسمى ، سموها لـحسنها وجمالها ، اسمها يعني الغزالة البيضاء ، كانت جميلة .. وجذابه , بشرتها بيضا بس مع التشميس صارت برونزواج ، شعرها أسود وطويل ، عيونها سوده وملامحها عربيه أصيلة ، كانت مضرب للأمثال بجمالها ، وقوامها الممشوق .. اللي يشوفها ما وده يشيل عينه عنها .. عمرها 18 سنه أول سنه بكلية الطب . كانت آيه بالجمـال .. واللي يزيد من جمالها أخلاقها وأدبها .. كاملة والكامل الله . !

**

عائلة ابو عبدالله :
عايلة محترمه .. قادرة ماديا .. وسمعتها طيبة .. وعلاقتهم قوية مع عائلة بو راشد .

أم عبدالله : طيبه .. وقلبها عطوف .. تحملت وايد أشياء بالدنيا من بعد وفاة ريلها .. وربت العيال كلهم ، ام مثالية بطيبتها وتربيتها السنعه . والكل يشهد لها

عبدالله : ولدها العود . اهوا اللي قايم بالبيت .. وساد الفراغ اللي تركه أبوه بعد وفاته . عمره 25 سنه ورفيج راشد الروح بالروح .

احمد : ولدها الصغير عمره 12 سنه .. وحبوب وبشوش .

هيا : بنتها ام الـ 17 سنه .. مع ريما بالكلية .. داشه مبجر لانها مواليد أول السنه . كانت حبوبه وشاطره .. وقريبه من ريما وايد ، مملوحه .. بيضاء وشعرها كستنائي قصير .

:: :: :: :: :: :: :: ::

قبل سنتين في بيت أبو راشد ..
ام راشد كانت قاعدة ويا بنتها ريما بالحديقه ويسولفون ريما كان عمرها 16 سنه

أم راشد : إي يا بنيتي مثل ما قلت لج .. الزواج قسمه ونصيب وانا ادعي لج دايما ان ربي يفتح عليج ويسر لج امرج ان شاء الله ويبعد عنج عيال الحرام .
ريما : آمين يما .. يما بسألج ، لو مثلا اللي تقدم لي ما عجبني .. وما أبيه بتجبروني عليه ؟
ام راشد : لا يا بنيتي أكيد لا .. مافي شي بالغصب .. وبالذاب بهالسوالف ، ما يصير نجبرج على شخص انتي ماتبينه ، الزواج حياة واستقلال ، لازم يكون الانسان مرتاح فيه .
ريما : اشوه يما طمنتيني ..
ام راشد واهيا تضحك وتغمز حق بنتها : لا يكون في احد فبالج .. ههههههه
ريما تضحك ومنصدمه : أعوذ بالله .. يما شدعوة ؟! انتي تعرفين بنتج
ام راشد لمت بنتها وابتسمت برضا وراحه : الله يحفظج يارب ..

ابو راشد يدخل الحديقه ويشوفهم يسولفون وبتسم ..

ابو راشد واهوا يضحك : هههههههه .. انا رحت ورديت ولي الحين انتو تسولفون ؟ هههه صج حريم
ام راشد ترد الضحكه عليه : هههههه .. الله يقطع بليسك لا تعطينا عين اذكر ربك .. الحين ألسنتنا تنربط
ريما : ههههههه .. ربي يحفكم لي يا أغلى ام وابو بالدنيا

------------------------

بعد سنتين ( صار عمر ريما 18 سنه ) ..

على نغمات اغنية تنحط عالجرح مالت راشد الماجد ريما كانت تتمايل واهيا تطالع نفسها بالمنظرة كانت طايره من الفرحة ..
أخيرا تحقق حلمها وتخرجت من الثنويه .. لا وفوق هذا ..! قبلوها بالكلية اللي تبيها ، كلية الطب كانت حلمها من يوم كانت صغيره ، ويوم قبلوها طارت من الفرحه ..

يقطع عليها تفكيرها اتصال .. مع نغمه بنت الإيه لـ تامر حسني ..

ريما : ألو .. هلا والله هلا بالدووبه
هيا : هلا فيج .. مبرووووووووووك يالدكتورة ..
ريما : يبارك فيج ياقلبي .. وانتي بعد مبروك .. يالدكتورة الياهل ههههههه
هيا واهيا تضحك : يبارك فيج ههههه .. يالعيوزة .. شايفه روحج كبيره يعني أقصاها جم شهر هههههههه
ريما : أي والله هههه .. انزين هيون تطلعين اليوم ؟ ودي أطلع لان صج طايره من الفرحه ..
هيا : براحتج بس أكلم امي .. انتي كلمتي امج .؟
ريما بحزن : أمي .. ها . أي ان شاء الله اكلمها .. لا لا .. انا بكلم ابوي .. احسن
هيا : براحتج ريووم .. خلاص انتظرج .. بيباي
ريما : باي يا قلبي


ريما تنهدت وسكرت التلفون .. ونزلت تحت حق امها اللي قاعده بالصالة ..

ريما : يما .. ميخالف أطلع اليوم مع هيون ؟
ام راشد بـحزم : كيفج .. صج .. ما ييتي ابارك لج
ريما بفرحه : ههه .. يالله يما باركيلي يا نور هالبيت .
ام راشد بحزم : مبروك .. ويالله عقبال ما تصيرين اكبر دكتورة ، عاد بعدين معاشج .. وييين .. يوصل وايد
ريما بحزن : ان شاء الله .. بس تره انا دشيت الطب مو عشان المعاش ، انا دشيته وانا كنت أبيه .. هذي رغبتي يما ، واذا عن الفلوس ابوي مو مقـ ..
ام راشد تقاطعها : خلاص خلاص .. سكتي .. لوعتي جبدنا . أبوي مو مقصر وابوي مو مقصر ، وتسوين نفسج مثاليه .. ( تقلد صوت بنتها ) : انا ما دشيت الطب عشان الفلوس !!
ريما تضايقت : يما الحين ما قلتي لي أروح ؟
ام راشد : سألي ابوج .. انا ما عندي شي أعطج إياه .. !
ريما : يما يا بعد عمري ما ابي شي .. صدقيني مابي فلوس ، بس بطلع ميخالف ؟
ام راشد باصرار : قلت لج سألي ابوج .

ريما راحت والدموع تارسة عينها من الضيق ، ليش امها صارت جذي وتغيرت فجأة ؟!
كانت غير كانت حنونه عليهم وما عمرها قست قلبها .. لكن بالسنتين الاخيرتين تغيرت وايد .. شفيها ؟!

راحت ريما دارها واتصلت على ابوها واستأذنته عشان تطلع ..

ابو راشد : إي يا بنيتي بس ها .. ما تتأخرين .. اخاف عليج انا
ريما بدلع : ان شاء الله يا تاج راسي

ريما سكرت التلفون وراحت تدور بكبت الهدوم ماتدري شنو تلبس ..
قعدت تدور لين اختارت برمودا جينز وفلات وبدي احمر .. ورفعت شعرها بشريطه حمرا وخصلات نازله تحيط ويهها .. وحطت شوية لب قلوس وكحل وصارت تهبل ..

مرت ريما رفيجتها هيا وطلعوا .. راحو يتمشون بواحد من المجمعات .. ويسولفون ..
كانت اشكالهم ذربه ومحترمة ..

ريمـا : هيون .. هذا مو فراس ولد عمي ؟
هيا : وانا شعرفني فيه ..؟ مادري عنه
ريمـا : إي امبله هذا اهوا .. شفيه جذي شكله غريب
هيا : هههههه شنو غريب ؟ يعني عنده ذيل بدون ما ندري ؟
ريما تضحك : ههههه لا يالخبله .. مادري ما تعودت عليه يلبس دشاديش .. اهوا العادة سبايكي فجأة تغير شـطاري عليه ؟
هيا : والله يهدي من يشاء ..
ريما : إي والله ..

واهما يسولفون قرب منهم فراس : السلام عليكم
ريما : وعليكم السلام هلا فراس شلونك ؟
فراس : بخير الحمد لله .. ها شـيايبها بنت العم هني ..
ريما مستغربه : هلا .. ؟ يايه اتمشى
فراس : أهـا .. صايره حلوة .. بس لا تخافين مو معجب هههههه
ريما انقهرت : ههه .. !
فراس : شفيها النفسيه ..
ريما بعصبيه : فراااس ؟!!!! وبعدين .. يالله انا استأذن ، يالله هيون ..
سحبت ريما هيون ومشـاو ..

ريما كانت معصبه ومتنرفزة من حركة فراس ، اهيا شنو بينها وبينه عشان يسوي جذي .. وشنو المغزى أصلن من حركته ؟!


فـي نـاحية ثانية ..

دلال : لا حبيبي شوف شوف .. انا مالي شغل قلت لك .. ماراح أقعد وياك
ناصر : دلوله يا عمري والله العظيم انتي تدرين بنيتي .. بس شوي .. بعطيج شغله وروحي ..
وبعدين انا ما بقعد وياج بمكان مسكر .. بقعد وياج جدام الله وخلقه
دلال : لا .. مافي يعني مافي .. ! انزين ما قلت لي شصار على فراس ؟ ما لقا له حبيبه ؟
ناصر : هههههههههه فراس مسكين .. ما يعرف يضبط .. !
دلال تتنهد : عاد اهوا مزيون ..
ناصر بعصبيه : استحي على ويهج .. انا مو تارس عينج ؟!
دلال خافت : اسفه اسفه .. خلاص
ناصر : سديتي نفسي يالله باي ..
دلال عصبت : باااي ..

ناصر .. هذا رفيج فراس من أيام الروضه ويعزة ويحبه وايد ..
لكن .. فرق كبير بين ناصر وفراس ، ناصر أكبر مغازلجي بالديره .. وفراس مسكين .. وما يعرف يحط كلمتين حلوين على بعض !

دلال .. هذي حبيبه ناصر .. يحبها ويموت عليها .. لكنها ميننته لان عينها زايغه .. لكنها بنفس الوقت تحبه ببساطه البنت متناقضه !

------------

بالسوق .. ريما وهيون توهم يركبون السيارة بيردون البيت .. وريما كانت حدها متضايقه ومتنرفزة من حركه فراس .. شفيه هذا ؟! من صجه يعني ؟!!

طول الطريج كانت ريما تسوق واهيا ساكته .. ما نطقت بـ ولا كلمه .. لكن قطع عليها اتصال من اخوها حمد ..

حمد : هاااااااايز .. قوووه يالطالعة
ريما بابتسامه : هلا والله .
حمد : هلا فيج .. شلونج ؟
ريما : زينه .. وانت ؟
حمد واهوا يضحك : انـا نحــوول ههههههه
ريما : يا ملقك عالمـغرب
حمد : مغرب ولا عصر .. هههههههههه
ريما : يالله باي باي ..
حمد : وين وين يالقمر .. خلاص يمعوده .. إلا زعلج .. إلا أقول .. الحلوة وياج ؟
ريما : أي حلوة ؟
حمد يتنهد : ااااه .. حبيبه القلب بعد منو ؟ السحتتتتتته هههههه
ريما : اقلب ويهك تراك لوعت جبدي .. أي وياي شتبي انت بـ سحوت ؟
حمد : أي والله شنو أبي بـ سحوت ، يع .. هههههههههههه
ريما : حدك عاد حدك ..
حمد : اقول .. انتي منو ؟ ريمـا .. وي اسف داق غلط ههههههههه
ريما : ههههههه يالله باي باي .. الله يكملك بـعقلك


حمـد كان مستهتر وخفيف دم .. ومينن البيت كله .. واكثر شي أخته ريمـا اللي رفيجتها هيون ..
هيون كانت مملوحه وتعجبه .. بس اهوا يحب يعاند نفسه ويعاندها لانها ثقيلة ومو معطيتها ويه !

هيـون : ريمووو .. شفيه المينون ؟
ريما : ههههههه منو حمود ؟
هيون : وفي احد غيره يعني ؟
ريما : ما في شي .. يسلم عليج
هيا ترفع حاجب : أكيد ؟؟
ريما ماتت من الضحك : إي اكيد .. هههههه


ريما قطـت هيون البيت وردت واهيا فرحانه .. كان يومها حلو ..
وتناست اللي صار ويا أمها .. واللي سواه فراس .. ودخلت البيت ..

الكل كان قاعد بالصالة ، والجو مريب ..
الام والابو واخوانها الكبـار .. اما الصغير .. فـ اكيد يلعب بلايستيشن كالعادة

ام راشد بابتسامه عريضه على غير عادتها : هلا والله بنيتي .. هلا بالغاليه ..
ريما فرحت لكن بنفس الوقت خافت من الوضع الغريب ونظرات ابوها الحزينه : هلا فيج يما هلا والله
وراحت باست راس امها وابوها ..
ام راشد : يما بغينا نكلمج بموضوع .. وان شاء الله تسمعينه للآخر ..
ريما : امري ..

--

فـ بيت ابو فراس ..

فراس كان منسدح عالفراش ويفكر باللي سواه ..
من صجه يعني سوا هالحركه ..
يعني ما فكر باللي ممكن يصير .. أو يخرب خطته !
اهوا مو ياهل .. ومو من طبعه هالحركات .. بس ليش سوا جذي ؟!

:

فـ بيت أبو راشد ..

ام راشد : يا بنيتي سمعيني عدل .. وابيج تفهمين كلامي زين . ..
ابو راشد : بس يا ام راشد .. احنا قلنا مو وقته ..

ريما خافت : شسالفه ؟ ..
ام راشد : ...



تم الجزء الاول ..

الجزء الثاني .. ان شاء الله باجر ان ربي أحيانا ..

اتمنى أشوف منكم تفاعل مثل اللي صار بـ رواياتي السابقه


شكرا



نونيـ !!


---------------------------------------------------------------------------------------
روايـه ( يعني متى ) بكـل أجزاءها محفوظة لـدى ( نونيـ !! ) ومن أراد النقل فعليه نقلها بأسمي .. ومن تعدى ذلك فعند رب العزة والجلال تسترد الحقوق !


>>>>> ردود الأعضـــــــــــــــــــاء على الموضوع <<<<<
==================================



:
.
.

مساء الجوري

سيدة القلم

نونيـ !!

.

.

وقفة أخرى ،، مع رائعه من روائع

قلمكـ ..

بصيص نور / لا يخفى !.

حقّ له ان يستمر ..

كنت حالمة - رومانسيّة - متعقّلة - محتوية الحدث بـ المام متكامل ..

و أحسبكـ هكذا هنا ..

.

.

سيري غاليتي

ونحن من ورائكـ ،، نحفظ

[ خُطاكِـ ]

!!

.

.

متابعه أولى

و تثبيت



:
.
.

لكـ خالص الود

نانا

__________________________________________________ __________
المشاركة الأصلية كتبت بواسطة _nana_


:
.
.

مساء الجوري

سيدة القلم

نونيـ !!

.

.

وقفة أخرى ،، مع رائعه من روائع

قلمكـ ..

بصيص نور / لا يخفى !.

حقّ له ان يستمر ..

كنت حالمة - رومانسيّة - متعقّلة - محتوية الحدث بـ المام متكامل ..

و أحسبكـ هكذا هنا ..

.

.

سيري غاليتي

ونحن من ورائكـ ،، نحفظ

[ خُطاكِـ ]

!!

.

.

متابعه أولى

و تثبيت



:
.
.

لكـ خالص الود

نانا


أهــلا بالعذوبه ..

وأهــلا بالثنــاء وأصحبابه ..

أهلا بك غاليتي ..

شكرا على التثبيت ..

شكرا من الاعمـاق ..

: )

لكِ خالص الود ..

ومن أجلك ..

الجزء الثاني ..

شكرا

نونيـ !!


__________________________________________________ __________
أبطــالنا يتقلبون بين الواقع والخيـال ..
إذا بدأت قصتنـا لابد لها من الاستمرار ..
جزئـي الثاني .. فيه أحداث وايد ..

اتمنـى يعجبكمـ .. وووو .. متـــّــع عيونك !





الجزء الثـاني ..



فـ بيت أبو راشد ..

ام راشد : يا بنيتي سمعيني عدل .. وابيج تفهمين كلامي زين . ..
ابو راشد : بس يا ام راشد .. احنا قلنا مو وقته ..

ريما خافت : شسالفه ؟ ..
ام راشد بابتسـامه : شوفـي ريمـا .. انتي الحين وصلتي عمر الكل يبيج ، والكل يتمنـاج .. وانتي ما شاء الله مافي شي ناقصج .. فـ .. !
ريمـا عيونهـا امتلت دموع : شنو يما ؟؟؟ شوي شوي .. خليني استوعب وليش كل هالكلام ؟
ام راشد تغيرت ابتسامتها لـصرامة : شفيج انتي .. غشيمه ؟ المفروض تفهمينها واهيـا طايرة .. يالعروسة
ريما بصدمه ودموعها على خدها : ش .. ششش .. شننووو ؟؟ ! شنو عروسة .. يما انتي تدرين بوجهه نظري من هالناحية ، انا توني صغيره وما أفكر بهالسوالف . وبعدين يما انا توني داشه الجامعة ، مالي بعوار الراس الحين .!
ام راشد بعصبيه : شنو عوار راس ؟؟ أي عوار راس هذا اللي تتكلمين عنه ؟ وبعدين ابوج راضي .. خلاص
ابو راشد بحزن وابتسامه : ريوومه حبيبتي انتي اول شي لو تعرفين منو بياخذج والله انا متأكد بترتاحين .. فراس ولد عمج يابنيتي ..
ريمـا بقمه الصدمة وقعدت تبجي من قلب : لا .. لا يبا انا مابيه .. وما أتزوجه .. انت تدري .. انا مابي من اهلي مابي ناس اعرفهم .. وانا للحين صغيره .. يبا تكفا لا تجبرني عليه .

ريمـا قعدت تبجي وما عطت اهلها فـرصه يردون عليها وصعدت غرفتها ..
قطت نفسها على السرير وقعدت تبجي ..
تذكرت اللي سواه فراس بـالسوق .. عشان جذي سوا جذي فيها ؟!
يعني كان قاصد يبي يعرف ردة فعلي تجاهه ..

ماحبه .. أكرهه .. واليوم كرهته زيادة .. ياربي انقذني منه ، احس ان موتي على ايده !

واهيا تبجي ، ابوها طق الباب عليها ..

ابو راشد : فتحي الباب يابنيتي .. لاتسوين بنفسج جذي مو زين والله
ريما ببجي يقطع القلب : يبا ما ابي اكلم احد .. اسفه .. بس مابي
ابو راشد وقلبه ذايب على بنته : فتحي الباب يبا .. فتحيه .. انا ابوج
ريما قامت فتحت الباب وعيونها متورمه من البجي .. : تفضل يبا
ابو راشد : قعدي يا بنتي .. خليني أفهمج ، شوفي .. ، زواجج من فراس صدقيني تره مكسب لج .
هذا ولد عمج وشاريج .. ومافي احد بيحافظ عليج كثــره صدقيني ..
ريما : يبا بس امي قالت لي مستحيل تجبرني على احد انا ما أبيه .. وانا فراس مابيه .. مابيه نهائيا .
ابو راشد : يبا فكري عدل .. فكري زييييين .. وان شاء الله ربي يفتح بصيرتج . واذا ما قدرتي تتقبلينه فحاولي تقنعين نفسج حتى لو عشان امج لأن ..
ريما بدموع وخوف : لأن شنو ؟
أبو راشد بارتباك : لا لا يبا مافي شي .. بس انتي فكري .
ريما واهيا تمسح دموعها : ان شاء الله

طلع ابو راشد من غرفه بنته بعد ما باسها ، وقعد يدعيلها ..


ثاني يوم الصبح فـ بيت ناصر رفيج فراس ..
اتصل ناصر على دلال يراضيها عن اللي صار .. وبما ان دلال فيها شوية غرور
فمن سابع المستحيلات انها تعتذر له ..

ناصر : قوة يالدلوعه
دلال بنفسيه : هلا ؟
ناصر : وي .. شفيها الدلوعه ؟
دلال : مافيني شي .. امر ؟ في شي .؟
ناصر : دلول شدعوة يا عمري ؟ انتي بعد تنرفزين .. حبيبتي تره انا ريال . والريال يغار ..
دلال : بس ما كان له داعي .
ناصر : حياتي .. بس مابي تقولين جذي .. لاني صج اغار عليج .. وما احب هالسوالف .. ماشي ؟
دلال : ان شاء الله حبيبي ..
ناصر : عفية على الحلوة اللي تسمع الكلام
دلال : تسلم حبي ..
ناصر : دريتي .. فراسو هالقبس بيتزوج ..
دلال بصدمه : هااااااا .. شنو .. ؟
ناصر مستغرب : شفيج ؟؟؟؟
دلال : ها .. لا مافي شي .. بس استغربت .. يالله مبروك . منو بياخذ ؟
ناصر : ست الحسن والدلال .. جميلة عايلتهم .. الانسه ريما بنت عمه .
دلال : أها .. إي زين الله يوفقهم
ناصر : علامج شكلج ما استانستي .. ؟
دلال : لا عادي شدعوة .. بس مالي شغل فيهم
ناصر : اوكي يالعسل .. انا بعد شوي ادق عليج ..
دلال : اوكي باي


فـ بيت ابو فراس

فـراس راح حق امه يسألها عن موضوعهم .. اهوا وريما ..

ام فراس : أنا كلمتهم خلاص .. وان شاء الله خير يارب
فراس : يما تهقين ريما توافق ؟
ام فراس : ريمـا خوش بنت وبـطوع اهلها واكـيد راح توافق
فراس بتوتر : ان شاء الله .. انزين ما قلتيلي ابوي شرايه بالموضوع .
ام فراس : رايه من رأينـا .. مو معارض على شي
فراس : أشوة يا معودة .. مابي شي يخرب ..
ام فراس : هههه .. ان شاء الله مافي شي يخرب


فـ بيت أبو راشد ..

التوتر كان بكـل أرجاء البيت ..
والام كانت تنتظر رد بنتها على احر من الجمر ..
ولو ان الرد ما راح يأثر بشي .. لان الأم مصره على هالـزواج ..


أبو راشد كان منكسر داخليا ، ماكان يبي يكسر كلمه مرته .. لأسباب خاصه ..


ريمـا كانت منهاره .. لكنها حست ان هذا الحل وما بيدها حيلة غير انها تتقبل هالزواج .
فـكرت تروح تكلم راشد ..

دخلت الدار عليه .. واستقبلها باتسامه عريضه وكان عنده اخوه فيصل ..
أشر عليه عشان يطلع بره ..
وطبعا فيصل بشطانته ما طلع بالساهل .. وأذاهم لين قرر يطلع

ريما بضيق : راشد متضاايقه .. اهلي بيزوجوني غصب .. مابي راشد
انا توني صغيره لي الحين ما تفتحت عالدنيا ما فهمت الحياة اكثر ، مابي اتقيد .. احس اني ماراح اكون قد المسؤولية .
راشد : شوفي ريما اذا السالفة على الكبر والصغر ، فـ وايد بنات تزوجوا واهما كبرج ، لا وبعد عندهم عيال .
أمـا الحياة فهي تجارب وان شاء الله تتعلمينها وتفهمينها مع الايام , وانا متأكد يالغالية انج قد المسؤولية .
متأكد وواثق من هالشي ، لانج أصيلة .. ومو مثل أي بنت . صح ولا لأ ؟
ريما ارتاحت من كلام اخوها : تسلم يالغالي .. بس . !
راشد يقاطعها : لا بس ولا شي .. انا قلت كلامي .. وانتي ادري فيج فطينه وراح تفكرين فيه . والحين يالله .. ضكي يالعروسة . ..

ابتسمت ريما ابتسامه راحة من كلام اخوها .. صج راشد اسم على مسمي ..


بعد شهر ..

كانت ريما تتجهـز حق المـلكـة .. وافقت ريما على الزواج من ولد عمها ..
وسلمت امرها لله ، واللي كان يشجعها راشد اخوها ..

ريما : ألو هلا هيون ..
هيا : هلا فيج يالعروسة . ها شلونج ؟ زهبتي نفسج ؟
ريما : أي الحمدلله
هيا : أي عفيه .. تره ما باقي شي كلها اسبوع ونفرح فيج .
ريما بضيق : ان شاء الله
هيا : انا اول مرة اشوف عروسه تزعل وتتضايق
ريما : شسوي هيون قوليلي .. ترى ماني حابته كلش شسوي .. ؟
هيا : لا تقولين جذي ، ان شاء الله راح تحبينه .. وانتي من زمان تقولين .. انا راح أحب بعد الزواج ، مو هذا كلامج ؟
ريما شوي وتبجي : أي عدل .. بس مابيه هذا مابيه
هيا : يالله عاد لا تقولين جذي .. بعد شتبين اكثر .. ولد عمج .. وما شاء الله ووسيم .. وان شاء الله يكون خلوق
ريما تضحك بـضيق : هههه .. ان شاء الله

ريمـا ما كانت مرتاحه من هالزوج ، وما كانت قادرة تتقبل فكرته
فراس مختلف عنها تماما ، شخصيته غير .. وحتى فارس أحلامهـا ماكان بهالمواصفات

ريما تكلم نفسها : إإييييييييييييه يا فراس .. والله اني انقردت فيك .. بس الله يقدرني واحبك يا زوجـ .. زو .. زوجـي !!

قالت هالكلمة وخنقتها العبرة ، ما كانت متقبلة واقع زواجها ، لكنه مثل ما يقولون شر لابد منه

راشد اخوهـا كان بنفس شعورها كان يحاتي هالزواج ، لان يعرف فراس توه ياهل صج انه كمل الـ 23 سنه لكن ما يحس انه قد المسؤولية ، بس للأسف فـ بيت ام راشد .. وبعد شي غريب صار لهم تغير كل شي .. وصار مافي كلمة بعد الام .. حتى ابو راشد صار يطيع مرته لأسباب خاصه مثل ما اهوا يقول

يدخل حمد على ريمـا واهوا يضحك ..

حمد : ريووووووم .. كلولولولش هههههههههههه صرت حرمه عشانج بعد شتبين ؟
ريما تضحك عليه : هلا والله حمد .. شفيك اسم الله عليك
حمد : مستانس باختي ، مو انا مقرود الحض صار عمري مليون وما تزوجت شسوي يعني .. ؟
ريما : انت بطل خرابيطك وهالبنات اللي تكلمهم راح تتزوج ..
حمد : بتزوج السحت رفيجتج ههههههههه
ريما : أقوووووول .. نجوم السما اقرب لك ههههههه
حمد : وانا شفيني ان شاء الله .. احلى من السمن على العسل ..
ريما : ههههههههه ،، روح روح الله يستر عليك .
حمد : خلاص انا بروح .. بس قولي للسحت انها أسحت ما خلق ربي ههههاااي
ريما : الله يستر عليك .. هههههههه


اخوان ريما كانو مصدر سعادتها ..
حمد كان يدخل الفرحه بقلبها ، و راشد كان يطمن قلبها .. اما الصغير فيصل فـ دايما ويا البلايستيشن .


بعد اسبوع

ريما بدت شوي شوي تتقبل فكرة زواجها وخصوصا ان موعد الملكة صار قريب ..
وما بقى غير يومين .. واهيا تقريبا تجهزت تماما

فراس .. كان متوتر .. لكنه بنفس الوقت كان مستانس ..
لانه حقق اللي فـ باله وان شاء الله كل شي يمشي تمام

اما نـاصر فكـان بقمة الضيق .. لان دلال صار لها اسبوع ما ترد عليه ، ولا حتى ترد على مسجاته
كان ناصر محتار ، يعني شنو مثلا مزعلهـا ؟ شسويت لها انا ؟ يالله مادري شسوي ويا هالبنت !

بعد يومين ..

يوم المــلكة .. الكــل كان متوتر ، وبنفس الوقت الكـل فرحان ..
زواج ريمـا شي الكل كان يتمنى يشوفه ويعيشه ..
بمـا انها ملكه فـ كانت صغيرونه ومحفوفه ..
سووها بصــالة من صالات البيت ..

الكـل كان لاهي .. والكـل فرحان ..

هيون كانت شايله العرس شـيل .. لانها كانت مستانسه حق رفيجتها .. رفجه دربها ..

ريما تستاهل .. وهذا يومها ، الله يسعدها ..

الكــل كان ينتظــر لحظه دخولهـا ..

والكل كان متلهف لـ شوفتها .. وخصوصا أهلها البـعاد .. اللي ما يشوفونها الا من فترة وفترة ..
كانو ينتظرون شوفتها ، لان جمالها يسلب العقل ..

الساعه 10.25 الكـل كان مترقب دخلتها ، ام راشد صعدت فوق .. تشوف بنتها ..
ريما كانت خايفه ..

ريما : يما خايفه .. في ناس وايد تحت ؟
ام راشد : لا يا قلبي لا تخافين .. وحتى لو وايد ما راح ياكلونج هههه
ريما : ان شاء الله .. انزين يما خلج وياي
ام راشد : لا انا الحين أصعد هيون ونوره اخت فراس حقج واخليهم يساعدونج .. لان انا بجابل المعازيم
ريما : خلاص .. ماشي انتظرها ..

نزلت ام راشد .. وقالت حق هيــا وريم يصعدون حق ريما ..

بعد ربع ساعه .. ومع انغام الموسيقى :

https://gulf.salmiya.net/songs/rashed/ram/rashed244.ram

يا شيخه البيض من مثلج ومن قدج
كم غارن الغيد من عينج ومن خدج
واليوم كل العذارى بقربج احتارون
من حطت ام الشيوخ الدبلة بيدج

اناملج لي خذت من الورد ملمسها
واللي تمنى الزهر والغيم يلمسها
هذي كفوف الفخر صارت تلبسها
من هانت الشمس دبلة فرحج وسعدج

لو غارن البيض منج صدق نعذرهن
مادمتي اجمل واحلى منهمن كلهن
وارقهن يابنان الحسن واعذبهن
حتى البدر من جمالج كم خطب ودج

يا دانه الكويت شوفي الكويت محلاها
من نور سعدج طوا واشرق محياها
زانت بنور اللفا من درته جاها
واتبسمت من معاي مجده ومجدج

يا شيخه البيض من مثلج ومن قدج
كم غارن الغيد من عينج ومن خدج
واليوم كل العذارى بقربج احتارون
من حطت ام الشيوخ الدبلة بيدج




دخــلت ريمـا الـ صالة ..
دخلت بخطوات ثابته .. وبنفس الوقت فيها رهبه وخوف
الحضور كلهم انبهروا بجمالها ، كان جمالها خلاب والكـل كان يطالعها ويذكر ربه

كان جمالها خلاب .. وكانت تداري دمعات عينها بابتسامتها الجذابه

ام راشد وام فراس وام عبدالله اللي اهيا ام هيوون كانو طايرين من الفرحة وواقفين يم بعض
ويسولفون ..

الحضور كلهم كانوا فرحانين .. لان الحفلة كانت راقيه وعلى مستوى ..
عايلة بيت أبو راشد .. غنية والكل يتمنى قربها .. وشي طبيعي يكون العرس هذا مستواه

مراسيم الملــكه انتهت .. والمعازيم بدوا يروحون .. ويا الوقت اللي تقعد فيه ريمـا مع فراس زوجها ..
ريمـا كانت خايفه من هالـيوم وتحاتيه وخايفه من قعدتها وياه .. ماتدري شنو تسوي وشنو تقول ..

لكنها اقطعت واسوسها بالاستعاذة من الشيطان .. وقررت تخلي الامور تمشي مثل ما تمشي


بناحيه ثانية ..

دلال كانت تسولف ويا اختها عايشه ..

دلال : عواش .. فراسو تزوج .
عائشه : وخير يا طير ، شسوي له ؟
دلال : اقولج رفيج نصورو تزوج
عايشه : وانتي شكو فيه .. الله يوفقه .. واكيد ملكه جمال مرته ههههههههه لانه اينن اهوا
دلال : انتي ما تفهمين ؟ ولا شنو .. !
عايشه : شنو ما افهم ؟ انتي تقولين الريال تزوج خلاص .. انتي شكو فيه ، مو مكفيج ناصر .. ولا شسالفتج يعني ؟
دلال تبجي : مالت عليج .. انتي ما تدرين انا ليش احب ناصر أصلا .. انا احبه عشان فراسو .. والحين راح مني
عايشه بصدمه : هاااااا ؟؟؟ انتي مينونه تلعبين بقلب الصبي ؟ مينونه ولا صاحيه انتي ؟ شسالفتج
دلال تبجي وتصرخ على اختها : طلعي بررررررا .. بغيتج عون صرحتي فرعون طلعييي خليني بروحي
عايشه : انا بطلع دلول .. بس انا اقولج .. تره قلوب الناس مو لعبة
دلال تبجي : ماراح اخليه .. والله ما اخليه ،، وانتي هين .. طلعي بررررررا
عايشه : انا بروح وانا حذرتج .. خلي الصبي بحالة وحياته


بالعــرس فبيت ابو راشد ..


ام راشد : يما بنيتي .. فراس وصل .. والحين بيدخل .
ريما بخوف : هاا .. ان شاء الله يما ،،


5 دقايق .. ويدخل فراس الصالة ..

دخل بهيبته وطوله .. وجسمه الـمتناسق .. يبتسم بشموخ وكبرياء ..
وصل لين الكوشـة اللي قاعده عليها ريما وابتسم ..

فراس : مبروك ريمـا ..
ريما بحيا وخوف : الله يبارك فيك ..

ام فراس وام راشد : الف الصلاه والسلام عليك يا حبيب الللللللللله محمد .. كلوووووووولووووووووووش ،،

المعازيم اغلبهم راحو .. وما بقا الا اقرب الناس للمعرس والعروسة ..
وصــارت القعدة اكثر مريحة .. وقل التوتر اللي فيها

نوره اخت فراس : يالله فراسو امسك مرتك وطالع الكاميرا .. وقول CheeeeeeeeS
فراس : اوكي
فراس كان وده يطق نوره على حركاتها المحرجه قام وقف ومد ايده حق ريما عشان توقف ووقف يمها واهوا ماسك ايدينها الثنتين وصوروو .

نوره بشطانه : انزين فراس بوسها هههههههههههههههه
فراس تخسبق : هاا ؟
نوره : بوسها على يبهتها بصور يالله ههههههه
فراس : وقت ثاني ..

ريما كانت غارقه بحياها .. كانت منحرجه من اللي قاعد يصير وودها تذبح نوره هالشيطانه
بهاللحظات دخل حمد الـصالة ووياه اخوه راشد وفيصل ..

راشد راح سلم على فراس واخته وبارك لهم ووياه حمد وفيصل طبعا

راشد : أي فراس والله وتزوجت .. يالله منك المال ومنها العيال .. وبالمبارك
فراس مرتاح : الله يبارك فيك ياخوي .. والفال لك
راشد : لا وين .. انا تو الناس ههههههه توني صغير
فراس : ههههههههه

حمد شاف الكاميرا عند نوره راح وخذاها منها بحركه سريعه

حمد : Catch it ههههههههه خذيتها منج يالياهل يا ام الـ 19 سنه
نوره : لا كلش يعني انت اللي كلش اقصاك 20 ههههههههه
حمد : صايرة حلوة ..
نوره استحت : ادري ههه

حمد مسك الكاميرا وقعد يصور المعاريس بأكثر من لقطة .. كان حمد شاطر بالتصوير ..
فكان يختار الصور بعنايه .. مرات تكون عفوية .. ومرات تكون حركات يقولها حق فراس وريما انهم يسوونها
بس بالحالتين كانو الصور حلوين

كان يطالع هيا بطرف عينه ..
كانت حلوة .. وبأجمل صورها ذاك اليوم

حمد يكلم نفسه : فديتها هالمغرورة .. شحلاتها اليوم .. اخ بس لو اقدر على قلبها

حمد : هيا .. شلونج ؟
هيا بحيا : هلا .. الحمدلله بخير
حمد : منورة بيتنا .. انا اشوف ليتات بره ههه
هيا ودها تقطعه من ملاقته : هههه .. نورك ياخوي
حمد لاعت جبده من كلمه اخوي وقال بقلبه أوريج : تسلمين ..

كان الجو عائلي ..
وابو فراس وابو راشد قاعدين يسولفون على جنب ..
الهدوء النفسي كان مخيم عالاجواء .. والكل مرتاح

بعد ساعة الاهل كلهم طلعوا من الصالة وخلو ريما وفراس يقعدون مع بعض ..
عشان ياخذون راحتهم بالسوالف ..

فراس : مبروك يالغزالة
ريما بحيا وخدودها توردت : يبارك فيك .. تسلم
فراس : انا مستغرب من شي
ريما خافت : خير ؟
فراس : مستغرب .. شلون القمر نزل الارض اليوم وقعدت يمه ؟
ريما ذابت بالحيا .. وسكتت
فراس واهوا يرفع ويه ريما : والحلوين جذي يستحون من ريلهم ؟
ريما ابتسمت له وردت نزلت راسها ..
فراس : ان شاء الله بإذن الله اقدر اسعدج .. بس اعذريني انا فاشل بالغزل ههههه
ريما ما قدرت تمسك ضحكتها وضحكت عالخفيف : هههه .. كل هذا وفاشل ..
فراس : مو حافظ غير اللي قلت لج إياه .. فـ الله يعينج علي هههههههه

ريما انحرجت وبنفس الوقت حست بشعور حلو داخلها .. حست بالراحه تجاه هالريال اللي كانت رافضته بالبدايه ، بس بنفس الوقت كانت خايفه لانه اهيا توها بأول يوم .. وخافت لا يكون يقص عليها بالكلام ..

فراس : الحلو وين سرح عني ؟
ريما : هلا ؟؟ كاني ..
فراس : مابيج تسرحين بشي وتروحين بعيد عني .. حياتي
ريما ويهها صار اشارة مرور يوم سمعت حياتي : ان شـ .. ان شاء الله


بجهه ثانية ..

دلال راحت حق اختها عايشه ..

دلال : عايشو .. سمعي .. انا قررت ..
عايشه : قررتي شنو ؟
دلال : قررت ان ..

وقطع كلامهــا اتصال من ناصر ..

ناصر : ألو .. قوة عمري
دلال : هلا .. هلا فيك يا روح دلال ..
ناصر : أووووه شسالفتها الحلوة نفسيتها اليوم عسل ..
دلال : سلامة عمرك حبيبي .. ميخالف ادق عقب شوي .. لان شوي مشغولة .
ناصر : انتي تامرين .. خلاص ناطرج حبي
دلال : اوكي حياتي باي


سكرت دلال التلفون وضحكت بخبث ..

عايشه بخوف : دلال شناوية عليه ؟
دلال : ولا شي .. بس هذا حبيبي .. وبس !
عايشه : انزين شنو قررتي ..
دلال وعيونها تمتلي دموع وبنبره حادة : انا مستحيل اتخلى عن فراس بهالسهولة ..
ومستحيل اهدم حبي اللي بنيته على ظهر ناصر .. لاني كل حبي لناصر كان بهدف الوصول لفراس ..
فـ قررت اني .. ......
عايشه : ....



شنــو قرار دلال ؟
وهل راح يتطور شي بين نوره وحمد ؟
وشنو راح يصير بين فراس و ريما ؟

تم الجزء الثاني ..

الجزء الثالث باجر بإذن الله

__________________________________________________ __________
مساء الورد مساء الاحساس والطيبه
اهلا بك في روايتك الجديده
تأكدي نونيــ
انني من المتابعييين لك
سأكون معك في كل جزء
روايتك مملكة جود كانت أكثر من رائعه
وها انت قد نورتنا مرة أخرى بروايتك الجديدة
اسعدني رواايتك
بس ها مو تتغلييين >>>>>>>>وش فيها البنت قلبت مرررره وحد
انتظرك يالغلا
وتسلمييييين

__________________________________________________ __________
المشاركة الأصلية كتبت بواسطة شهد الحلا
مساء الورد مساء الاحساس والطيبه
اهلا بك في روايتك الجديده
تأكدي نونيــ
انني من المتابعييين لك
سأكون معك في كل جزء
روايتك مملكة جود كانت أكثر من رائعه
وها انت قد نورتنا مرة أخرى بروايتك الجديدة
اسعدني رواايتك
بس ها مو تتغلييين >>>>>>>>وش فيها البنت قلبت مرررره وحد
انتظرك يالغلا
وتسلمييييين


هلا والله شهد ..

شكرا يا قلبي عالـمدح ..

وان شاء الله اكون عند حسن ضنكم ..


انا تو اشف انك منزله جزء جديد وردي كان على الجزء اللي قبله بس اخلص قراية الجزء وأقولك توقعاتي
بااااااااااي
مشكوووووووووووره كثيييييييير على البارت
وتسلم لي عيونك.........