عنوان الموضوع : قصة خوينا في البر مع البنت المزيونه الله يستر عليها - قصة رائعة
مقدم من طرف منتديات الشامل

قصة خوينا في البر مع البنت المزيونه الله يستر عليها

هذا واحد الله يستر عليه حصلت له قصه في البر يعلمني فيها يقول.... أسمعوا وش يقول:

>في ربيع العام الماضي 1437-1436 هـ أتفق الشباب في الاستراحة علي طلعت بر .. وقالو لي ..... نبيك معنا فيها قلت والله ياجماعة الخير أشتريكم وأشتري أمخاواكم بس عندي شرطين ولا تضحكون علي .. قالو هات ما عندك ........... قلت الأول أم أعيالي أبشاورها .. والثانية أبروح في سيارتي ولا أبي أحد معي ... قالو أفاااا ليه قلت من غير ليه .. قالوا أبشر والوعد بكره في ( أم أرقيبه ) الساعة 12 الظهر عشان ندخل الصمان بدري قبل تظلم العين .... شاورت أم العيال ولا مانعت .. حملت كل شي أشوفه في وجهي من عزبة وعدة وحطب .. صليت الفجر ومشيت وصلت أم أرقيبه قبلهم صليت الظهر والحمد لله مافيه أحد تخلف من العيال .. دخلنا الصمان ويازينه من صمان أرض خضراء ودفء وناسه .. جلسنا في أم أرقيبه ومشينا فيه الين (مناخ ). قضينا في الصمان عشرة أيام راحت كنها ليله .. أنا أنشغل بالي مع أم العيال والعيال وأمي .. قلت للربع أنا أبمشي للديره .. قالوا أن مشيت مشينا .. قلت هذا المقصد يوم أجيب سيارتي معي .. أنتم وسعوا الصدر وأنا أبقطع النفود يم ( القاعية ) ثم أتوجه يم الديرة .. قالو ما نقول شي خذ راحتك بس خل الكنود شغال وبرمج( القاعيه) علي الماجلان والله يوفقك .. توادعت معهم ومشيت الظهر ودخلت النفود مع العصر كل شي ماشي تمام إلا أن ريشة الكنود تعطلت .. قلت يالله دام الماجلان شغال الله الموفق مافيه غيره .. من دخلت النفود والسماء تمطر .. قلت في نفسي مافيه وقفه ولا نوم الآ في السيارة أن أضطريت له ,, قطعت النفود والحمد لله قبل نصف الليل بشوي .. بانت علي أنوار القاعيه وكلش تمام بس أنا أبي (تمير) ومنها إلي(روضة التنهات) عشان أختصر المسافة .. بس الأمور ماجت علي الكيف .. السماء مطر والأرض تمشي سيل .. قلت الأمر بيد الله .. وصلت


( الأعصل ) وادي شرق تمير عرفته من الطلح يوم كنا نصيد فيه ..


>الوادي يمشي مشي ضعيف والمطر وقف قلت هذي ساعتك ياالنشمي شب علي الدله والقدر .. الساعة قاربت الواحدة والنصف صباحا .. واليوم هذا هو يوم الخميس .. شبيت النار وبهرت الدله وأشوف القبله على مغيب النجوم برق قلت الله العالم هذا رزق ساقه الله علي هالديرة ..


>الله يعطيهم خيره ويكفيهم شره وشر البرد اللي فيه .. الدنيا سكون وأنا جالس أشرب القهوه فاضت قريحتي علي الشعر وقلت هالأبيات ..


>غاب القمر يا ناس والراس محتاس .... في وسط وادي كل أرضه حصاني


>لا جيت أنا أمشى فيه والموتر شاص .... قـام يتمايــل فوق رمـث حدانـــي


>شبيت ناري واعتلآ النار محماس .... لعل ضيفي شــم ناري وجانــي


>هبت جـنوب فوقها الـبرق رقـاص .... برق حـقوق أرتـفع لـي وبانـي


>


>وأنا أنشد هالقصيد وأتحرى للخير من مطر وأرجي الله أنه يرزقنا من خيره .. سمعت سيارة تحن وهي في مكانها وأسمع صوت صياح وكنه صياح بنت أو ولد صغير قلت يمكن هذا بدو أو ناس كاشتين ..


>بس الصياح كنه أرتفع وأرتفع معه أزعاق وكن أحد يحاول يسكته بالقوه ......


>الساعة قربت علي الثلاث الصبح .. وصوت السيارة ما أنقطع من الحنين .. جمعت العزبه وقلت يا ولد أروح أشوف وش القصه .. لأني خفت يكون أحد متعطل والبرق قرب علينا .. مشيت مع الوادي ... إلى أخر وادي الأعصل .. رفعت النور وأشوف سياره يوكن حمراء وسط الوادي غاطس في الطين .. يوم شافني قربت منه طفى النور وجلس في السيارة بدون أي طلب مساعده .. السيارة مظلله .. ضربت بوري وأشرت بالنور مافيه فايدة وكنه ما يبيني أساعده .. قلت في نفسي علي هواك .. تركته ومشيت مطلع شمس يم التنهات .. بس قلبي ما طاوعني لأني أشوف البرق قرب وبرقه شديد .. خفت أن صاب السحاب هالوادي أن تروح هالسيارة بما فيها من ناس .. رجعت يمه ونزلت وأصيح عليه يالغشيم أنزل نسحب السيارة قبل السيل .. أنا بيني وبينه قرابت العشرين متر ... بس الظاهر ما سمعني .. أشرت بيدي يم السماء وكنه فهم بس ما يبي ينزل من السياره .. فتح القزاز .. شوي وقلت له يا أبن الناس السيل في الطريق أما أنزل نسحب السيارة أو أبعد عنها لا تروح معها .. أنا قلت هالكلمة ولا الصياح يوم طلع من السياره .. فتح الباب ولا وش أشوف أربع بنات في عمر أقل من 25 سنه ولا رجال معهم ولا سواق .. يوم شفتهن قلت أجلسن في السيارة .. يا حيلة الله حظي وجابني للغربلة .. سحبت السلسله من صندوق السياره وأخذت واير الونش معي وطبيت في الطين الين وصلت سيارتهم ربطت السلسله في اليوكن والونش وقلت لها أسمعيني سيارتكم مافيها دبل وتماتيك يعني أذا سحبتك لا تلفين يمين ولآ يسار .. قالت أبشر .. سحبتها ونقطع الواير ورجع علي سيارتي وكسر قزازة السياره القدامية ودخل علي وسط الغمارة بس فكني الله منه .. نزلت وهن أنزلن وطبن في الطين خايفات علي من السلسلة والواير .. قلت سلامات ما صار الآ الخير .. شبيت النار وقلت لهن أجلسن حولها ولا عليكم من شي الآ شي واحد أنكم تسكتون اللي تصيح لأني ما أقدر أسوي شي وفيه أحد عندي يون أو يصيح .. قالن ما عليك تامر أمر .. وأنا أحاول أركب البكره في سيارتهم الآ والسواقه طابه معي في الطين قلت يا بنت الناس استريحي ما عليك من شي أذا أحتجتك ناديتك قالت عيب علينا حنا بنات أرجال ... أنت ما قصرت أتعبناك ودمرنا سيارتك .. قلت أبد ما عليك الغريب للغريب نسيب ..


>وأنا أحاول اربط السيارة والسواقه بعيده عني شوي قلت هالقصيدة بيني وبين نفسي ..


>


>أوا هني اللي علي النـفد نايـم ... أمجاور نار الدفا من غضاها


>قناص أو كشـات فوقـه عـزايم ... ربعـه يدلـونه الي هو نـواها


>تركت أنا الصمان والجوغـايم ... قاصـد أبي الديره اللي قلبي نواها


>لقيت أنا المزيون والقلب صايم ... عن الحرام اللي أبعد هواهـا


>


>.. ربطنا السياره وقلت لها هالمره لا تركبين في السيارة لأني أخاف الواير ينقطع عكس .. بس خلي الموتر فاضي وثبتي الدرقسون واتركيه .. أنا الحين مركب البكره والبكره تزود القوه .. السماء أمطرت والبرق فوق الرأس وأنا أتوكل علي الله وأسحبه والحمد لله طلع ومن يوم طلع وركبن في موترهن والبرد يطيح علينا .. وأنا صرت في حوسه .. القزاز مكسور والبرد دخل علي في الغماره .. بس الحمد لله أن السحاب عنا جنوب شوي ولا طول المطر .. كل أجهزتي راحت من ماجلان وكنود وغيره من المطر والطين بس الحمد لله أن الجماعة أطلعوا .. قلتلهن الحين طلعتو وقولولي القصة قالن حنا كاشتين مع أهلنا في شعيب (الشوكي) ورحنا أنتمشي بالسيارة نحسب الدعوى تمشي وضعنا ولا درينا الا وحنا في هالشعيب من العصر أمس ..


>قلت ورطنا .. قالت السواقه ليه .. قلت الله يستر ما يكون الشوكي ماشي قوي من ها لسحابة .. لكن مافي اليد حيلة مشينا .. قلت أنتم وين من الشوكي .. قالن ما ندري حنا في الشوكي وبس .. قلت حولكم شي غريب شي يلفت البال قالت اللي تصيح أيه حولنا ( غار عليه باب مفكوك ) قلت بس عرفته مشينا .. المسافة ماهي بعيده لكن المصيبه طين وسيل والسواقه أعليميه والسياره تماتيك .. وصلنا الشوكي علي طلعت الشمس والحمد لله يمشي ومشيه ردي يعني الواحد يقدر يمشي فيه .. يوم قربت من أهلهم قلت لهم أهلكم باقي عليهم قرابة 500 متر الله يوفقكم .. أنا بروح مع درب ثاني سبحان الله الواحد يخاف من الظن لا قدر الله ..


>قالت السواقه ما قصرت الله يعافيك بس أبي رقم جوالك قلت ليه قالت بس .. وأقوم وأعطيها أياه ونتفارق .. أنا من التعب والجوع وقفت في وحده من الشعيبات وجلست أشب علي فطوري مع طلعت الشمس .. ما دريت الآ والجيوب والصوالين اللي جايه يمي .. وقفو ونزلوا خمسة شباب وقالو لي أنت من طلع اليوكن قلت نعم .. قالو أمش معنا قلت وين قالو هناك تعرف .. ركبوني معهم .. وفيه واحد منهم جمع أغراضي وساق سيارتي الين وصلنا .. نزلوني ثم دخلوني في وحده من الخيام فيها شايب عليه أثار الخوف .. قال يا ولدي أنت من طلع بناتي وبنت أخوي قلت نعم .. قال وين قلت في المكان الفلاني .. قال يعني هن صادقات قلت نعم .. قال وأنت سيارتك تدمرت من السحب والبرد قلت نعم .. قال وش تبي المكافأة قلت أبي سلآمتك بس .. قال لا .. أنت مثلك في هالديره قليل .. قلت لا بل كثير قال تقول( لا) من أنت يا لوح علشان تقولي لا .. مسك الدله وضربني بها على راسي ( وأنا أقوم من النوم وأتعوذ من الشيطان وأنقلب علي جنبي الثاني وأنام)



>>>>> ردود الأعضـــــــــــــــــــاء على الموضوع <<<<<
==================================

● ● السُلَاٍمِ َعلٍيِكْمُ ٌوْرحِمُهِ ْاَلله وبْرُكَـِاٌتْهِ~


,’




||أهٌلُاٍ||
وربي يعطيك العافية
أبْدَعْتْ فِـيْ طَرَحَكْ صَرَاحَـةْ.. (:

أحداث مثيرة ترغم القارئ على الاستمرار
أبدعت

تِسْتَأهلْ الشـكر عَلَىَ إبدَاعٍكْ ,،
يِسَلُم لنا ذوُقِك وأخَتِيارِك الرائع
الفَ شكراً لك عِ تميز طرحَك
باقَاتِ الجَوُرِي لِـ طهرِ قَلِبَك


,‘





~فِمٌاَنٍ الله●●


..|[َ! الدَلـووعَـہالمَزيُونَـه !]|..


__________________________________________________ __________
والله انسجمت معها على بالي حقيقه
بس فعلاً قصه رائعه جداً استمتعت بقرائتها

يعطيك العافيه

__________________________________________________ __________
قسم يبي يجلس في بطنك
انا عشت الجوء مع القصه
ما شاء الله حتى في نومه شهم. ههههههههههههه
يقطع شررررر ابليسك بس والله استمتعت شكررررررا كثثير بحجم سماااااا ءءء

__________________________________________________ __________
ههههههه ياخي حراام عليك وش ذاا المزااج^_^
منججد انت رااائع وبقوووهه..
استمتع جداً ،،بحق الف شككر لسمووك

__________________________________________________ __________