عنوان الموضوع : سعاد من الواقع
مقدم من طرف منتديات الشامل

[BACKGROUND="100 #999999"]


ذات يوم طلبت مني الوالده الذهاب الى الجاره للمباركه لزواج ابنها
بحكم انها لاتستطيع المشي الى جارتنا
اعطتني الهدايا وذهبت
طبعا ولدها جارتنا عمره 37 سنه او 38 عاد فرحنا لفرح امه بأنه استقر وتزوج
طبعا اتصلت فيهم وقلت فاضين نبي نزوركم نبارك لكم
قالت حياكٍ الله
رحت مع زوجة اخي استحي اروح بروحي
سلام وعليكم السلام
الام - يالله حيهم كيف الحال وكيف الوالده
انا - طيبين جعلك طيبه ^_^
وبدأت النساء يسولفن وفيه وحده عمرها 9 سنوات تدخل
وترجع وتجلس تلعب بشعرها >حركات حياء البنات
شويات تدخل ومعها شباصات وتسوي في شعرها
عاد انا من الميانه قلت حياتي تعالي اسويها لك
ابتسمت وجت
وزوجة اخي تدق فيني انا حسبتها تقول يلا روحنا
وتسولف اطالع ماكلمتني تسولف "(
سويت لها تسريحه بسيطه بشباصات
وزوجة اخوي شغاله دق فيني
قلت وش فيك يلا
قالت ابعد عن الحرمه ^_^
قلت وووه اي حرمه وينها
عاد النساء طالعن فينا
سكتنا
جت ام تسع سنوات وجلست بجنبي
قالت تعرفين تسوين الشعر
عادابتسمت ^_^ قلت ياماما اذا تبين تروحين عزيمه
او شي وتبين اسوي شعرك حاااضرين ^_^
وش اسمك ياقلبي ..قالت انا
قلت ايه حياتي -سعاد
قلت يسعد ايامك ياقلبو
وش تدرسين حياتي
سكتت
وزوجة اخوي شغاااااااله دق يابنت الناس اوجعتيني
قالت لاعاد تسولفين معها
قلت ليه ؟_؟
سكت
قالت سعاد قومي اوريك غرفتي
قلت لا ياقلبي بروح اللحين
بعدين اذا جيت مره ثانيه اجي معك ^_^
قدمت هديتي لوالدة العريس
قلت وين العروسه اعطيها هدية الوالده ^_^
قالت كانت هنا نادت عليها
ياسعاد ياسعاد
اقول لزوجة اخي ياربي وراء العروس ماجت ابي اروح
شوي سعاد جت
نعم ياعمه
عمتها تقول تعالي يبون يعطونك هدية الزواج
جت عندي
وانا احس باني تـــنـكه "( مصطوله
وش دخل ذي في السالفه وليه اعطيها الهديه
يعني العروسه ارسلتها تاخذها ولا كيف "(!!!
عطيتها وزوجة اخوي تدق فيني قولي مبرررروك
قلت هاه
قالت زوجة اخوي مبروك يابنتي الله يوفقك يارب
اخذت الهدايا سعاد وجلست في اخر مجلس وفتحت الهديه
الله حلوه شكرا
وانا جالسه اناظر مومصدق وش في السالفه
قامت زوجة اخوي قالت يالله الله يحفظكم
ومبروك ماسويتوا
جت سعاد عندي قالت تجينا مره ثانيه
سكت كيف اكلمها
بانها زوجه او طفله
قلت اذا راد الله
خرجت وانا ضاربه الفيوز عندي ام سعود العروسه هي سعاد
قالت-ايه وش فيك كانك اول مره تشوفين عروسه كلن يناظر فيك
يحسب في خاطرك شي عليها
قلت - ام تسع هذه عروسة ابو 37
قالت ايه
وتضرب الفيوز جيت للبيت اخبر امي
قال اخوي -وراء ضاربه اليوم وشف فيك
قلت ماشفت شي شفته
قال لاتقولين حللللوه
قلت- تراء ياشين مو سالفة حلوه سالفة صغيره في السن
قال ليه كم عمرها عشرين تشل البيت كامل مو صغيره ابد
قلت - تراء طلبتك تسكت عمرها 9 سنوات
قال كذابه تمزحين وربك
قلت والله واللي خلقك شحم ولحم انها تسع سنوات
قال مو صاحي وش جاه <<مستغرب
قلت - عاد النساء شافوني اسوي لها شعرها واللعب معها طلع تفكيرهم شااااطح

قال وربي مادري كيف تعيشين مع هالنساء لو مكانك احذف نفسي من فوق السطح
قلت بسلامة راسي وليه احذف بنفسي
قال وربك صادقه بالعمر
قلت وربي صادقه
قالت امي وش عليكم من الناس الله يوفقها ماعند الا فرحة ام سعد بدنيا
تعزها وتحبها كثير
المهم جت ام سعد لي وقت ظهر وانا في شغل عظيييم وقت اسوي الغداء
قلت تفضلي يالله حيها
قالت الله يسلمك
والله جايه يابنتي ابي استشير امك بشي
قلت تفضلي كلمت امي
اسمع امي تقوووول
قالت امي ابشري

شطحت ودخلت وشو ابشري
قالت ابي اسوي عزومه بسيطه افرح قلب البنت سعاد ابي اخليها تفرح
ابي احسسها انها عرووووس
قالت امي ابشري طيب وش اسوي يعني قولي ابي كذا واسويه
قلت طيب اعزمي قريابها في استراحه وسوي لها زفه
(حالة ام سعد شوي صعبه وزوجها قااااااااسي ومايتفاهم ولدها مع الخيل ياشقراء )
بنتهم زوجها عمرها11 سنه وراحت
قالت مايمدي
ققالت امي طيب انا بسوي لك اللي بقدر عليه بس عليك تعزمين النساء وتجيبون عشاء
والباقي انسي همه
قالت طيب
راحت واجتمعتنا مع اهلي وعلمتهم السالفه قال اخوي اعطيك الدي جيه قسم لايخرب
قال الثاني وانا علي الحلويات
قال الثالث وانا وابوي العشاء
قال الرابع اذا تبون خيام او نفتح قسم الرجال حاضرين
اتفقنا خذيت من النت زفات وموووووضي تنكس
جمعتها في اللاب في حافظه علشان ماتخربط
طبعا اتصلت على ام سعد قلت
الو
قالت هلا
قلت ارسلي لي العروسه اكشخها واسوي تسريحاتها
تراء ماعندي احد كلهم براء ماغير امي معي
قالت طيب بنتي
جت العروسه وربي احترت اسوي لها شي
قلت ياعروسه ياجميله جلست تضحك
اخذت فستانها من قسم الاطفال وربي "(
طلع على مقاسها وشوي كبير
لبست سويت تسريحه بسيطه ومكياج يناسب سنها ياقلبي
قالت - اللحين انا عروسه
سكت
قلت سعاد
قالت نعم
قلت تعرفين انك عروس اللحين
قالت ايه
قلت يعني خلاص امور الطفوله تنسينها وتبدين الجد
بيت وعيال وزوجك
قالت عادي
(اللي فهمته منها ان حياتهم قااااااسيه حيل وان ابوها متسلط مايهمه العمر
واللي تخرج من بيته ماعاد لها رجعه ابد يعني يزوجهم وينساهم
وان امها جالسه تبكي عليها بس ربي حظظ لها ان العمه هي خالتها
بتهتم فيها وتراعيها مثل بنتها )
جلست قالت انا فرحانه اني تزوجت وانفكيت من ابوي وظلمه وضربه
قالت شفتي هذه في يدها علامه سوداء كبيره مزرقه
قلت ايه قالت منه رمى علي حجر وانا ماشيه "(
قلت كم مهرك قالت 130 الف
قلت هااااااااااااااااااه وشو!! كم؟؟؟ وربي ضرب مخي
قالت وش فيك تخرعتي
عادي هذا مهرنا
قلت 40 وصعببببببببببه حيل تكاليف كثيره
قالت انتوا غير احنا غير
هذا غير الذهب اللي جابه
قلت غيييير 130 قالت ايه
قلت مالوم ابووك اذا ماعرسكم بدري يتاجر فيكم حسبي الله عليه
قالت ربي فوقه
قلت ماعلينا خلي يولي وانتي ابدي حياتك
وانسي همك وعيشي دنيتك وخليك مع خالتك تراء طيبه
قالت ايه هذا اللي بيصير
قلت طيب تحبين اسوي لك طرحه او بس تسريحه
قالت لا كذا حلوه
صورتها كم صوره لها بكامي وطبعتها بالفتوشوب وحركات ^_^
اعطيتها اش كثرفرحت
قالت بيفرح سعد فيها
قلت معليه بالعافيه
روحنا لبيتهم الساعه 8 مساء تجمعوا النساء كلهم قطع"(
شغلت تنكس موضي في الدي جيه والعروسه خليتها
مخشوشه في الغرفه ^_^ هديه وانا مدري
رحت اساعد ام سعد وبعد العشاء
خذيت المجلس صغير بس خذيت انتريه وكم شيفون على ورد وعلى حركات كوشه من عندي
بسيطه وحطيت صورتها على الطاوله البنت غير شكل ^_^
وحطيت زفة هب السعد يابنت الناس طويله يبي لها صاله ومسافه بعيده
قالت لا ابيها
قلت اسمعك ايها بس ماتنزفين عليها
قالت لا ابيها شفت ان جاء بخاطرها
قلت ولايهمك وهب السعد لعيونك
قلت شوفي كثر ماتبطين ابطي بحركتك
طلت علينا وبكاااااااااامل حلاوتها وهي حييييل
(سبحان الله على كثر فرحتها - الا ان النساء فيهم
شي رفع ام ضغطي وطفر اعصابي الكل يضحك وغمز ولمز يارب علشان انها صغيره)
زفيتها وهي بكامل فرحتها قامت عمتها مدري خالتها ترقص لها
وقامن بعضهم يرقصون لها المهم انتهى العزومه الصغيرونه
بفرحه كبيره بقلبها - بدت حياتها الزوجيه صارت تستشير في اشياء
مضينا سته او اكثر اشهر
يدق علينا الجرس الباب فتحت سكت الباب بقوه وجت تركض
الحقي علي
قلت وش فيك
قالت عمي يضرب من في البيت وانا اخاف يضربني وانا حامل
قلت ياربي حاااامل مبروك حياتي
قالت ايه حامل بس عمي يضرب خالتي في البيت
(هذه الرجل ربما مختل عقل او به حاجه لايمر يوم الا ويضرب من في البيت جميعا
وضرب وضرب يعني خروج دم "( ولده عسكري ويمشي الحال
يرحم القلب
- مره جاء ل اخوي يشتكي من ظلم ابوه
وضربه وضرب امه وزوجته وانه مو راضي على الزواج
ويتصرف اشياء لايصدقها العقل ولايقدر يخرج من البيت ولايسوي عليه شي )
سكتت قالت بجلس هنا لين يجي سعد طبعا يجي الساعه اربعه العصر منهمك متعب
وبلقى الطاغيه -قلت خذي راحتك اهم شي انتٍ
رحت كلمت اهلي وعلمتهم السالفه
قال الوالد حسبي عليه مو صاحي ذا الرجال
اجل حضري لها الغداء وخليها عندك لين يجي زوجها
ياقلبي عليها تبكي بكى موطبيعي
جيت وضميتها قلت صلي على النبي
قالت قولي امين
قلت لا ماراح اقوله
اعرف تدعين على نفسك
ربك يسهلها سعاد واذكري ربك
اللي اكتشفته انها ماتعرف تصلي ولاتعرف القران لن مادرست
وتجهل امور كثيره في الدين -
جاء سعد زوجها يدق الباب
من ؟؟
السلام عليكم
قلت وعليكم السلام
زوجتي سعاد عندكم
قلت ايه
قال الله يبشركم بالجنه
خليها تنزل علي
قلت طيب
خبرتها ونزلت وهي خايفه واقف عند الباب نزلت ومسكته وتبكي
قالت خايفه ارجع البيت اخاف من ابوك
قال انا معك
راحوا
ومرت الايام مره يضرب ومره يعقل
مرت اياااام وشهور سعاد حامل في الشهر السابع
المهم في ليل من اليالي كنت جالسه على التلفزيون
وفص فص شاي انتظر اخواني يجون الساعه كملت الواحد ه صباحا
طبعا قبل لايجون بربع ساعه ارسل رساله
لكل واحد منهم
جب بطاطس - والثاني جب شاني معك وهكذا اضمن اربع اغراض تجي ^_^
الكل يجي يسمر شويات ويروووح المهم جالسه
الا وصرااااااخ وضرب وحذف
وانط على غرفت اخوي وادق الباب
اخوي هاه
قلت يمكن الجاره بتولد وزوجها مستلم بالعمل
نزل يشوف الوضع خرج جميع اخواني وابوي
(هذا المجنون قام من النوم واخذ عصا مادري وش يسمونها
المهم واضرب لاتضرب قام الحريم يصارخن وتجمع العالم
الساعه 2 في الصبح
هربت سعاد من الضرب ولاادري وين راحت
ياحسرتي وش السواة
جاء اخوي واتصل في زوجها ياقلبي
الحق ماتلحق امر في بيتكم اسرع
جاء سعد تخيلو ان ابوه قام يضربه ضرب
عاد مسكوه الرجال وسحبوا العصا جاء حريم الحي ودخلوا على الام
والرجال يدورون سعاد
يدقون علي قلت ماجت عندي
جاء اخوي لمي قال بذمتك عندك
قلت وربي ماجت عندي نهائيا
عجزت افكر وين تروح
طبعا انتشروا يدرون عليها الحي عندنا في بيوت شعبيه كبيره ومهجوره
همهم الوحيد انها حامل وخافوا عليها اذن الفجر مالقوها
وامي تدعي لها يارب تحفظها
وانا من شباك لشباك يمكن اشوفها
جاءت الشرطه اخذوا الاب وعالجوا الام ويدورن على سعاد
جاء الصباح ماجات ولا طلع لها خبر
وينادي زوجها ياسعاد ان هنا تعالي ولاخبر
اشرقت الشمس وكلن يدور عليها
قمت في الصباح في الحوش عندنا انزل على اخواني انادي عليهم
امي مانامت قلقانه عليهم
فيه في الحوش بدروم يعني غرفه نستخدمها للاشياء مانبيها
دفايات الفحم يعني مستودع وفيه حركه وبكاء
عاد انجنيت وش ذا قمت انادي على اخواني قلت هناك حركه
دخلني اخوي البيت ونادى على الشرطه باقي يبحثون عليها
لقوا انها سعاد جت تبي تدخل البيت لقته مسكر الباب انخشت في المستودع
يالله حالته مره تفزع
جاء الاسعاف وشالوها
طبعا فقدت الجنين حسبي الله ونعم الوكيل
وفي رضوض كثيره في جسمها
زرتها في المستشفى ياقلبي عليها
وربي ترحم من بكاها
قالت راح النونو
قلت الله يرزقك بغيره فيها خيره
جلست تبكي كثير انا ماقدر اجلس اكثر من كذا
خرجت وقلبي معتصر عليها
رجعت البيت المسكينه وصرت نجتمع انا ويها مع الوالده ونتعلم القران
واشياء بسيطه المهم مرت شهور والوضع تمام
يعني يضرب لكن على الخفيف
بعدها بشهور ولدت سعاد ومعها النونو سمو بسم ابوهم المجنون "(
مرت شهور كثيره وانا جالسه احني يد امي
صراخ وطق الباب وصياااااااح ومضاربه وعلووم كبيره
جلس يضرب ولده ضرب مو طبيعي اغمى على الولد جاء اخوي يسحب
ابو سعد من سعد مسك السكينه وضربها في يد اخوي
اتصلنا بشرطه وجاء اسعاف
جاء نائب القريه مع ابوي ورفعوا قضيه عليه
بسبب مدة السكين على اخوي وجرحه اخذ سبع غرز
عاد انا انهبلت ولاعلمت امي وكل من جاء يبي يخبرها
لاتخبرونها اخاف عليها من الفجعه وهي عندها السكر
اتصلت فيه قلت انت طيب قال ايه بس الم بسيط
قلت اذا خلصت تعال
امي ماعندها خبر تعال
قال جاي
وحبسوا الرجال والاسعاف يعالج الولد سعد والحريم المصابات
يقول راعي الاسعاف وش عنده ذا كل شوي يفلخ روس هالنساء
وحنا نربطها يمكن فيه شي "( او شارب
قال اخوي والله مدري عنه لكن بنخليه يطلع من الحي بالمره
طبعا خوف الوالد على عياله طلعه من البيت وقال مسموح لك في الاجار اطلع وبس
حزنت كثييييير على سعاد وجاء بخاطرها
قلت اطلبي سعد يجيبك عندنا كل فتره قالت ان شاء الله
طبعا مرت سنين راحت فيها الوالده لجوار ربها
جت العزاء انسانه ماعرفها ابد ولامرت بي
تحتضن فيني وتبكي ومعها خمسه اطفال
بعد العزاء بشهر جت تزورني
قلت مرحبا فيك تفضلي
قالت وش قيك ماعرفتيني
قلت لا بسلامتك ماعرفتك بس حياك الله
قالت يوووه انا سعاد
عاد انا من هول الصدمه قلت كذابه
قالت يوه مره نسيتي
قلت سعاد وجه بري يعني ملامحها تاخذ العقل قمر
بس لاالمواخذ ماتشبهينا
كان وجه سعاد شبيه القمر حواجبها ربي رسمها رسم
عيون سوداء دعج واسعه وشعر ناعم وطويل بس خفيف
يعني كانت في حياه يعني جسمها مربرب شوي
اللي قدامي سمراااااء ونحييييييفه وشعر خفييييييييف
ونحيييييييف جسمها
قالت اااه لاتقولين وربي تعذبت عذاب
قلت ليش المجنون
(بعد ماراحوا تقول مره تعذبنا بالمعيشه تقول يستلم الراتب حق سعد ولايشتري شي
للبيت العيال يبون اغراض يقول لاتقول هب لي رح دور
قال راتبي
قال ماعندي شي
يروح يتسلف يشتري لعياله ويضربه اذا شراء شي
اذا شافه يجلس معي ياخذ
العصا ويضربه ويضرب امه ويضربني تقول مع الايام جاء وصارت هوشه
اخذ العصاء وضرب ابوه في سعد على ظهره وضربه على الرقبه وعلى راسه
اغمى على سعد قمت اصارخ وجاء اهل الخير وشالوه وراح المستشفى
لقوا حالته مرره خطيره
اتضح ان ان سعد انشل شلل كامل - وهي لابيدها لاحول ولاقوه
وتقول باقي بضربه وجبروته ضيع مستقبل زوجي وضيعني معه
سكتنا قلت مالك الا ربك والدعاء
مرت كم شهروسمعت بخبر افجعني كثثثثثثثير
رحت اشتري بعض الاغراض والهدايا على نية المرحومه
واهديها لهم جيت لهم وسمعت الخبر اللي افجعني
اخبرتني عمتها تقول
قامت بطعن ابو زوجها بعد ضربه لطفلها حسن
علميني القصه تقول جالسين تقول دخل كالعاده ضربني وضرب
ولده المشلول وضرب سعاد جاء عند الولد صغير وضربه فخرج دم من راسه
وجلس ينزف مابيدها شي تسويه اخذته وقفت على الخط وداها راعي خير
مات الولد في يدها تقول رجعت البيت واخذت ( قطعة حديد وضربة راسه
تفلت عليه "( وجلست تبكى على ولدها
تقول سعد ماقال شي تنازلنا عن الرقبه وعن الديه بس نتظر حكم الشرعي في السجن
وعيالها يااااااقلبي عليهم
وربي انها ترحم طلبت اهلي ازورها رفضوا كل الرفض البته
الممنوع كان الله بعونها
وقفه
ماذنب الطفوله تدفن ..وماذنب الحياه الزوجيه تسوده المشاكل
وماذنب الابن وماذنب زوجته وذنب ام سعد علشان اب قاسي
لامشاعر والااحاسيس
دمعه
فارقت لكٍ وفارقت لبسمتك وانتٍ بعيني اجمل عروس
واجمل ابتسامه
لم انسى نظرة الخجل بعينها
لم انسى بسمتها الخجوله
لم انسى فرحتها بصورتها
حسبي الله على كل ظالم في حياتك دفن بسمتك
وقتل برائتك واسدل الحزن على حياتك
لكي من قلبي الوفاء لكٍ ومن دعواتي تحفك بان الله يكون معك
قد تكفل اهل الخير واتوا بشغاله ومصروف شهري ومسكن مجان
لهم اشرقت شمسهم بعد القضاء على الجبار ابوهم الطاغيه
دمتم بخير
بقلم مشاعر مبعثرهـ
[/BACKGROUND]

>>>>> ردود الأعضـــــــــــــــــــاء على الموضوع <<<<<
==================================



__________________________________________________ __________
قصه رائعه
سلمت يداك ع ماقدمتي
الله يعطيك العافيه
ودي ,.

__________________________________________________ __________
قصة أكثر من رائعة..يعطيك العافية

__________________________________________________ __________
قصة رااائعة وحزينة
واها على الطفولة تدفن بالحجارة

__________________________________________________ __________
اخخخخخخخخخخ يااختى صعبه كتير هالقصه
تعرفى هيك بيحصل بيحصل كتير هيك بالذات عندنا
ودى لكى اختى
(رنيم الحب الابدى)

قصة تنير زوايا القلب

تحياتي وسلامي