عنوان الموضوع : الخيانه الزوجيه في أروع صورها - قصة خليجية
مقدم من طرف منتديات الشامل
بدايه القصه
ناصر وأحمد ... بالاول هم زميلا دراسه قبل أن يكونا صديقين التقى أحدهما باول سنه دراسيه لهم
بالجامعه , ومع مرور الايام أصبحت هذة الزماله صداقه لانه كل واحد منهما وجد غايته لدى الاخر
فبينهما قاسم مشترك قبل قاسم الوظيفه كان يجمعهما الرعونه , والاستهتار والعربده
وآخرها المجون يعنى ان صح القول نقدر نقول واااافق شن طبقه
بس فيه شى تغير ناصر دخل القفص الذهبى وعقل شوى للحين سهر وعربده لكن أخف بكثير من احمد
اما احمد فما زال يصول ويجول في ما يسميه مغامرات .. لا يتورع فيها عن فعل اى شى
وفي احدى المرات ....التقى الاثنان
أحمد : ناصر
ناصر : هلا
أحمد : بطلب منك شى .... لا تردنى
ناصر : آمرنى وش تبى ما عاش من يردك
أحمد : أبيك تساعدنى .... انا تعرفت على وحده ... ( يضحك ) يااااا رجال يا هيى جمال
ياااااا هووو ... ويلاه بس
ناصر : أوف أوف الظاهر حلوه هذى الى خلتك مثل المهبول هههههههه طيب وأنا وش دخلنى
أحمد : أبيك ... اممممم ( ويسكت)
ناصر : قلى وش تبى آمرنى .....؟
أحمد : أنا بواعدها اليوم ووو أبيك تراقب لى الوضع
ناصر : الوضع ؟ أى وضع ... ووين أراقب لك وليه أراقب لك منت ماخذها .. معك اجل ..؟
أحمد : لا البنت متزوجه وأنا أبيها وانا ميت عليها وهى مواعدتنى أشوفها اليوم في شقتها
ناصر : امممممم طيب وانا وش أراقب أستناك تحت لا جا الرجال أناديك ...؟
أحمد : لا لا مو كذا أنا أقول لك
ناصر : قول
أحمد : شف صراحه الى حبيتها وبغيتها هى .......... زوجة الامام
ناصر : الامااااااااام ( متعجب ومندهش)
أحمد : إيه إمام المسجد الى جنب بيتك
ناصر : ( يضحك بقوه ) ..ههههههههههه ما لقيت الا هذى لعنبوا إبليسك زوجه إمام
هههههههههه وكيف طحت عليها ... ووين شفتها والمطوع وينه منك ووينه عنها ( وهو مستمربالضحك)
أحمد : أول قلى تساعدنى والا لا
ناصر : ( يمسح عيونه من كثر الضحك ) كيف أساعدك مانى عارف ...؟
أحمد : هى مواعدتنى أجيها على صلاة العصر وانت تعرف المطوع يلقى محاضره بهالوقت بعد الصلاة
يمكن ساعه كامله
ناصر : طيب وانا شنو دخلنى كيف أساعدك ( متحمس)
أحمد : أبيك تراقب الامام لا شفته خلص محاضرته أتصل علي اطلع من الشقه
ناصر : وبعد في شقتها وليه ما تاخذها مكان ثانى أبرك تاخذ راحتك معاها ( يضرب كتفه ويغمز)
أحمد : لا هى توها متزوجه وشقتها فاضيه ما فيها احد بس هالمطوع وبالمسجد ... تكفى
والله أغطى لك بعدين
ناصر : وش تغطى لى انا لا بغيت وحدهأعرف أتصرف ما عليك ولا أبغاها العصر مثلك انت ووجهك
أحمد : المهم ريحنى تبى تساعدنى والا لا ( متاكد انه يبى يساعده)
ناصر : مع انى من زمان ما دخلت مسجد .. يلا نصلى بالمسجد على شانك
( احمد يطيح عليه بووووووس )
ناصر : بس ... بس خلاص ...اجل هي مزيونه للدرجه هذى ههههههههه يا ويلى على شوفتها
احمد : تشوفها لا لا محارمنا محد يشوفهم ( يضحك ) دقيقه اتصل عليها واعلمها انى جايها اليوم
ناصر : اليوم ....؟
احمد : ايه عندك شى انت اليوم ... تبى تروح مكان ...؟
ناصر : لا أبد ما وراى الا انت
ويروح احمد بعيد شوى عن صاحبه يكلم حبيبه القلب ويتفق معاها على كل شى ويرجع وهو طاير من
الفرح
احمد : وووناسه بشوفها اليوم أخيرا ... الله .. شي ... شي
ناصر : كل هذا ههههههه شوقتنى .... الظاهر برجع للعزوبيه وبقوه
احمد : احلى حياة أسهر على كيفى ووووو وانام على كيفى واصحى على كيفى اللعب
أعشق .. ارقم ههههههههه علىىىىىىىى كيفى
ناصر : بس خلاص تحرنى انت هذا انا اسويه مثلك وانا متزوج بس للثلاث الفجر بعدها لاااااا
( يضحك بسخريه ) كم الساعه نسينا الوقت
احمد : وحده خلص الدوام ههههههههههه
ناصر : بروح للبيت اتغدى وانام شوى لا بغيتنى أراقب مطوعك اتصل على
احمد : وانا بروح اخذ شور واتكيف بانتظار اللحظه الموعوده
يفترقان
يصل ناصر للبيت والا زوجته في كامل زينتها له والغدا مزينته ومتعطره في انتظاره
ناصر : سلاااااااام
الزوجه : هلا وغلا
ناصر حطى الغدا ترى جوعان حدى
الزوجه : ان شاء الله الغدا جاهز غسل وتعال
ناصر في بيته تلقى عنده كل انواع الجمود , ساكت لا ضحك ولا مزح ولا سوالف
أكل الغدا وقام يبى يغسل التفت عليها وقال لها لا دق جوالى صحينى لو تصبين فوق راسى ماى زين
الزوجه : ان شاء الله
راح للغرفه ينام وهي بالصاله ومعاها هالريمونت تقلب هالمحطات الى كل محطه تجيبالسلال اكثر
من الثانيه
الزوجه : ناااااااااصر ... يا نااااااااااصر قوم الساعه الحين ثنتين ونص
ناصر : هاااااااا شنو تبين
الزوجه : جوالك يدق قوم شوقه ولا تبلشنى اذا ما رديت تبى تسوى لى سالفه قوووووووووم
ناصر : طيب انطمى هاتى الجوال ...الووو .. هاه ....منو .. ايه احمد .. أفيه لا لا ما نسيت كم الساعه معك
على الطرف الثانى .....
احمد : الحين 2 ونص وشوى بعد قم يلاااااااا
ناصر : بصوت خافت طيب ...زين ما لقيت الا زوجه مطوع ما ينام بالقوايل كان دورت زوجه مهستر
والله لاسهر معاه للصبح مطوع عااااااااد
احمد : المره الجايه اخلص بس انا ابى هذى قم يلاانا انتظرك تحت
ناصر : طيب اغسل واجيك
يغسل وينزل ويشوف خويه لابس وعلى الاخر
ناصر : كانك معرس ههههههههههه
احمد : مشكور اخلص اركب يلا
ناصر : وليه مااروح على سيارتى
احمد : وليه سيارتين انا اوديك للمسجد ولما يخلص المطوع اتصل وارجع عليك
ناصر يركب مع احمد وتمشى بهم السياره للمسجد وفي الطريق
ناصر : قلى ما عندها احد بالبيت هى
احمد : لا لحالها وزوجها بالمسجد وانا ابيها وابيك تغطى لى هالمره والمره الجايه نحلها بعدين
ناصر : مره جايه ...؟
أحمد : ايه المطوع يصلى كل وقت يا ولد ههههههههههه
ناصر : قلى من متى تعرفت عليها وشفتها والا لا
احمد : من شهرين تذكر يوم تصادفنى بالمجمع هذاك اليوم يوم انت وحرمتك معك
ناصر : ايه يوم قمت تخبط ما تدرى وش تقول
احمد : ايه هذاك اليوم اول يوم شفتها فيه ويوم كلمتها عليها صوووت يا رجال يجنن ملائكى
ما فيه مثله ابد... بعد هالمره مرتين شفتها ...بس هذى اول مره اجيها لحالها في شقتها
( يبتسم بخبث )
ناصر : لا تنسى تعلمنى بالتفاصيل الممله ههههههههههههه
وصلووووو المسجد
احمد : هاا ما اوصيك ... لا تخلينى ..لا شفته طلع من المسجد اتصل على اطلع منها اوكى
ناصر : اوكى يا الخبيث يلا
احمد : يلا تشاوووو اشوفك بعد الفاصل هههههههههههه
وينزل ناصر متجها للمسجد والاذان ينادى للصلاة دخل ووقف الناس يصلون الامام ما بعد اقام
وش يصلون هذلى ياااااااااااا ربى تحيه المسجد ايه يبتسم والله زمان عن المسجد
ما صلى التحيه وقف يراقب الامام
استووووووا .... اقيموووو صفوفكم يرحمكم الله الكل وقف للصلاه .... وين اروح لازم اوقف معاهم
وقدام عينى المطوع ... وقف ناصر بالصف الاول واخذ يتابع الامام ... كبر الله اكبر
قرأ ... ركع..سجد ... الكل يتبع هذا الامام ذو التلاوه الحسنه التى صداها يتمركز بالقلب
(ناصر يحدث نفسه .. مسكين هالمطوع الله بلاه بوحده خاينه ... كيف يصلى وعرضه ينداس
حسبى الله عليك يا احمد ما لقيا الا زوجه هالمطوع وانا واقف في بيت الله أراقب امام يصلى العصر
مع هالجموع كلها ... والكل واثق من هالرجال باكر لا انكشفت زوجته الله يعينه يبى يصير علك
بافواههم....قلبه ......ضميره ..... الامام يركع ويسجد والكل معاه .... الا ناصر يتبعه فطريا
ولاشعوريا .......لكن قلبه وعقله في وادى ثانى يغليان ...... يفوران.....لااااااا يا ناصر قلنا انك
فاسد ..... ماجن مستهتر لكن تراقب لك معصيه في مسجد الله عليك تغطى على فعل حرام في بيت الله
نيران تشتعل .... وتلاوه الامام تدخل قلبه وعقله ... سلم الامام وسلم الجميع ووقف ناصر واتجه الي
الامام ..... واذا بالامام يعتدل فى مجلسه ينتظر جموع المصلين ليفرغوا حتى يلقى محاضرته
وجده بشوش الوجه سمح المحيا رأى ناصر يتقد اليه أبتسم الامام ابتسامه الداعى لعمل الخير
ناصر يحدث نفسه من جديد ....( يا ويلها من الله كل هالسماحه وهذا الوجه الى منور بنور القرأن
وووو تخونه صدق الحريم كلهن ما فيهم خير اذا زوجه المطوع كذا اجل حنا ويننا وبينما هو يحدث
نفسه وصل الى حيث الامام
ناصر : السلام عليك يا شيخ
الامام : وعليك السلام ورحمه الله وبركاته اهلا فيك حياك تفضل سوف نبدأ الدرس بعد دقائق
ناصر : يا شيخ ابيك بموضوع ابيك بكلمه راس لو سمحت لى
الامام : تفضل يا اخى الكريم
ناصر : لااااا ابيك لحالك .... ارجوك المساله مهمه
الامام : ما عليك ....هون عليك... خلينا نطلع من المسجد اذا كان يريحك
ناصر : اى والله يا شيخ ابيك في شى مابى احد يسمعنى
( أخذه الشيخ وطلعوا في فناء المسجد )
الامام ينتظر ..... يفكر ماذا يريد هذا الرجل
ناصر يتلعثم وده يتكلم ولا وده يتكلم رفيقه من ناحيه وهالمطوع الغافل من ناحيه
ناصر : اممممم يا شيخ ...وا ..... والله ماادرى من وين أبدأ
الامام : وسع صدرك وانا اخوك قول الى في خاطرك انا اسمعك خذ راحتك
ناصر: ابى اقول لك يا شيخ لا تفهمنى غلط والله ما جيتك الا وانا واصل حدى
الامام : عليك دين ترى اعين واعاون واخوانك المسلمين ما يقصرون
ناصر : لا لا يا شيخ انت الى وسع صدرك وافهمنى اسمعنى للآخر
الامام : قول يا اخوى علامك شكلك متضايق وشايل لك هم الله يفرجها عليك
ناصر : يا شيخ اسمع انا عندى سالفه بقولها وانت كيفك المهم بقولها ان ما طلعتها تبى تطلع منى
روحى سالفه تبى تذبحنى
الامام : قول انا اسمع
ناصر : ياااااا شيـــخ زوجتك خاينه
( الامام يضحك من هالمزحه الثقيله دم )
ناصر : انا اتكلم جد زوجتك الحين مع واحد
الامام : يا اخوى زوجتى الحين في بيتها وعندها درس دينى ولا هو مخلص الا على المغرب
ناصر : يا شيخ انا متاكد زوجتك مع رجال ... المرة تخونك والرجال رفيقى صدقنى
الامام : انت الي صدقنى المرة عندها درس كل يوم هى كذا
ناصر : يا مطوع انا هنا من شان اراقبك واشوفك لا طلعت من المسجد اتصل على خويى يطلع من بيتك
الامام: ( مندهش ) تراقبنى ....؟؟؟ تتصل على من ...؟
ناصر : على رفيقى الحين مع زوجتك وقايل لى راقب المطوع لا طلع اتصل على اطلع من بيته
الامام : اخوى ترى والله زودتها زوجتى في بيتها صح بس معاها حريم
ناصر وانا اقول معاها رجال وانه والله لو ما قلبى وضميرى هالى ما ادرى كيف صحى ما علمتك
مع اننا والله نعملها كثير مع المتزوجات ونغطى على بعض بس انت ما قدرت ماااااااااا قدرت
انت الله معك لازم اعلمك زوجتك معاها واحد صدقت صدقت ما صدقت انا بلغتك وانت كيفك
الامام : استغفر الله يا اخوى والله عندها درس منت مصدق تعال معى وشوف
ناصر : لا مانى مصدق ولانى متصل على خويى انت رح للبيت وشوفها هي وياه
الامام : لا تتصل زين زين وبرح اشوفها وانت تعال معى ونشوف منهو الصادق فينا
ناصر: لا مانى رايح أنا جيت أبلغك بالى يصير ورا ظهرك وبس
الامام :لااااااا...لا مثل ما اتهمتها تعال شوف برائتها والله ما تروح الا رجلى على رجلك
ناصر : يا ويلك يا مطوع من الثقه الي تبى تذبحك
الامام : وانت ما سمعت قول الله تعالى >> ولا ترموا المحصنات الــ...<<
وقبل لا يكمل قاطعه ناصر
ناصر: اى محصنات والى يرحم والديك يا شيخ اقول لك رفيقى معاها
مسك يده الامام وقال له
الامام: البيت قريب تعال معى دقايق وتشوف بنفسك
ناصر يبى ينفجر من الغيظ وذابحته ثقه الامام ويقول في نفسه صدق من قال الاعمى اعمى بصيره
ما هو اعمى بصر مااقول الا الله يعينك يا شيخ على الى تبى تشوفه
ناصر : يلا يا شيخ والله ماادرى كيف تكلمت ولا ادرى كيف مشيت الى ان وصلت لك لكن والله العظيم
الى اقوله صدق.......صدقنى يا شيخ والله ما قصدت اخون صاحبى لكن الله معك انت
الامام : ( يحاول يمسك اعصابه ) زين زين يا اخوى الحين تشوف بعينك
في الطريق لبيت الامام ناصر يحدث نفسه مره اخرى مسكين هالمطوع وااااثق بالمرة
يقول درس ما يدرى شنو هالدرس
وصلوووا للبيت وصعدووا الدرج ووقفوا امام شقه الامام رفع الامام يده لضرب الجرس
مسك ناصر يده وقال له
ناصر : ما عندك مفتاح .......!!!! ( مستغربا)
الامام : الا معى بس البيت فيه حريم المرة عندها درس ما اقدر الا لما استئذن
من الجهه الاخرى من الباب صوت الزوجه
زوجه الامام : من بالباب ......؟
الامام : افتحى ... سالم
زوجه الامام : سااااااااالم شنو تبى جاى الحين .....؟؟( مستغربه)
الامام : معاى ضيف افتحى
زوجه الامام : لااااااا ... لا ما اقدر وانت عارف عندى حريم
الامام : مانى ماكل الحريم عندى ضيف بدخل معاه المجلس
زوجه الامام : مانى فاتحه والحريم شنو يقولون عنى انا مقلطتهم بالمجلس ما دريت انك بترجع
مبكر اليوم
الامام : ما عليك خليهن بالمجلس وبروح مع الضيف للصاله شوى ونطلع
ناصر يتابع الامام وزوجته هو يصر على الدخول وهى تحاول تصده
الامام : اسمعى انا بدخل مع ضيفى قولى للحريم يتغطن ثوانى بس بدخل عليهم وبطلع والا بفتح
الباب ولانى مستئذن
زوجه الامام : أمرى لله دقيقه بس اقول لهن
تغيب ثوانى وترجع تفتح الباب ووتوقف وراه
المجلس على يمين باب المدخل
الامام : تفضل تعال وانا اخوك
وادخلوا ووقفوا عند باب المجلس
ناصر في اشد انواع الدهشه والاستغراب والاحراااااااااج ما يدرى شنو يقول فعلا
المجلس فيه اكثر من ثمان حريم وكل وحده معاها مصحفها
يقول بحاله من الذهول الدهشه والعصبيه المختلطه بالاحراج
ناصر :.... أجل احمد ويـــــنه .......؟؟؟؟؟؟؟؟؟؟؟
التفت الامام وقال لناصر
الامام : شفت يا اخوى قلت لك عندها درس دينى بس انت رووووح لبيتك ترى صديقك ما خلاك تراقبنى الا يبى يبعدك انت عن بيتك.....!!!!
انتهت وتمت القصه بعون الله
>>>>> ردود الأعضـــــــــــــــــــاء على الموضوع <<<<<
==================================
يسلموووووووووووووووو
__________________________________________________ __________
حسبي الله ونعم الوكيل
حسبي الله ونعم الوكيل
بارك الله فيك ياخوي
__________________________________________________ __________
المشاركة الأصلية كتبت بواسطة معشوقة بلا قلب 
يسلموووووووووووووووو
مشكور اخوي على مرورك الجميل
__________________________________________________ __________
سلمت يداك (بحر العذاب)
حسبي الله ونعم الوكيل لاحول ولاقوة إلا بالله العلي العظيم
يعطيك الف الف الف عافيه
__________________________________________________ __________
حسبي الله ونعم الوكيل
لا حول ولا قوة الا بالله
يعطيــك العافيــه
رد مع اقتباس
