عنوان الموضوع : كنديشن .... ( بس ) للعوائل فقط - قصة رائعة
مقدم من طرف منتديات الشامل

السلام علاكم



كنديشن .... ( بس ) للعوائل فقط
مساء الخير لكل شب وكل فتاه
وعلى طاري كنديشن رحم الله من اخترع المكيف ولا كان خسنا بهالحر وفاحت ريحتا لايران والله إن تحسب امريكا اطلقت نووي وتعجل تخصيب اليورانيم لين يلقح
حسبي عليهم من يوم بدو هالتخصيب ارتفعت الاسعار ولقوها التجار علثة
لاهم اللي امريكا خلتهم وارتاحوا
ولاهم اللي خصبوا ولقحوا
ماغير علقونا ارتفاع حرارة وارتفاع اسعار
<<< كني طلعت عن الموضوع
المهم ان الكنديشن اختراع يبرد التسبد بكل ماتحمله الكلمة من معنى
الموضوع :
يوم كنت صغير قرر رجل عمتي المكافح انه يطلع بعثة دراسة للخارج ولكن في حركه غير مفهومة جدع ولده الاشهب واللي يفشل عند جدي ... أخف وأريح .. من وجهة نظره
جدي ماعترض الظاهر حن لايام تلزيخ الاطفال بعسيب النخل وتلزيخ العسيب هذي من الاشياء اللي مبلشنا به أبوي وكل ماسويت شي قال منول أبوي يسوي ومنول أبوي فعل ... طيب أبوك وهو حر فيك أنا وش أسوي لك الحين .. وكله كوم وسالفة التمر كوم مادري وش تبي يعني لو أني أخطيت في شي قال منول فسحتنا بالمدرسه ثلاث حبات تمر ماكان عندنا شي ناكلة .. طيب ماشالله عليكم وش دخلني انا ووش دخل التمر بالسالفة ...
ماعلينا المهم انه رجل عمتي جدع ولده عند جدي
وبحركه خيانة جا ابوي الله يجزاة الجنه وجدعني ببيت جدي عشان اوسع صدر ولد عمتي ويقولن ان أسمه< يوسف > وانا براي لله
مع أنه مهب ناقص لأنة في بيت جدي فيه بنت مربينها يوم توفوا اهلها وعشان ترتاح من قولة تغطي ولاتغطين قامت جدتي وخلت هالبنت تمر على كل صدر من مرتادي البيت الكبير ماعدا عمتي ام المتخلف < يوسف > اللي رموه وابلشوني فيه
يعني هالبنت وأسمه < نهى > صارت اختي من الرضاع بس ماتصير اخت يوسف
أيام الطفولة قضيناها حنى الثلاثة مثل أفلام الكرتون يعني خنقول البنت هايدي وأنا بيتر ويوسف برنارد
تعودنا على بيت جدي واستمرينا عايشين معهم مع ان عمتي وزوجها رجعوا لكن خلاص حبينا عيشتنا في ذاك البيت القديم اللي مافيه اي شي من مظاهر العولمة
نسرح ونمرح بالمزارع اللي حولنا لين كبرنا انا طلعلي شنب والبنت طلعله عدة الحريم ويوسف طلعله قايوق أو دميجة أو مادري وش تسمونه المهم إن راسة صار متوازي أضلاع
وفيه غباء لايشق له غبار وجهه كنه سيكل مافيه كفر قدام << مادري وشيبي هالتشبية بس مشوها
بعد مرحلة البلوغ أنا اكثر واحد مبسوط بينهم إن صارت نهى نايمة أو مشغولة سهرت مع يوسف وإن صار يوسف مشغول ولا نايم سهرت مع نهى بينما هم مايتلاقون لانه بينهم غطا ومايجوز
وفي قهوة الضحويه مع جدي وجدتي نقعد أنا ونهى نسولف ونضحك معهم ويوسف يروح يتقهوا مع علم ويدخنون تتن ملفوف بورق عنب
وهذي أحد الأشياء اللي قومت سوقي عند الشيبان يرفعون بي ... أنت رجل مهب مثل ذاك المارج يوسف يتتن عند الهندي
الين في يوم راح يوسف لجدتي وصارحها بحبة لنهى وإنه يبي يتزوجها وقال أنا رجال تركت التتن وعقلت
وفرحت فرحا لايوصف وزغاريت تصن الاذن حتى قبل مايشاورون البنت
بس قالوا تراها تستحي ولامن احد مدحها تحتر وتبدا تعرق قال مافي مشكلة لاجيت امدحها اجيب معي مهفة <<< انتبه لاتجمر <<< < صورة واحد مهملينة في ظل التطورات وقاعد يذب >
قرب يوم العرس ومع إني مارضيت بهالزواج وودي أصارخ وأجمع رابطة نقول زواج ابوقايوق من نهى باطل
إلا إني تحاملت على نفسي وقلت ابفرح لهم وبدا يلمح لي يوسف عن هدية العرس
ففكرت وش أحسن هدية عرس أقدمها لهم عندها ولعت فوق راسي لمبة صفراء
قلت بس نظرا لحالت زوجتك لقيت أحسن هدية تنفع لكم وهي تعتبر احسن اختراع للطبقة اللي فوق خط الفقر بسطرين ألا وهو < الكنديشن > ... بس صحراوي .. أبو كفرات
اغلبكم يعرف طريقة بيوت الأولين 70 % أو 80 % منها حوش والباقي غرف مع أن الغرف كثيرة لكن مادري ليه تحس إن البيت كله حوش
وبما انها خالية من الكنديشنات لامنه صار الصيف فلوا فرشتهم بالليل بالحوش ورشوه عشان البراد
أنا فكرت بالهدية ذي كنديشن صحرواي بكفرات لاقعدتوا بالحوش بالليل وتخلل القعدة تدليع دف هالكنديشن خله يبرد عليكم ويخفف من حياء و عرق زوجتك.. والله انه صادق من قال الطيور على اشكالها
طبعا انقلبت الآية وصاروا هم يسهرون مع بعض وأنا اللي أكلتها ماغير أسهر مع علم الهندي حق المزرعة وكل ليلة أشوف يوسف يدف الكنديشن للحوش صار صوت الكفرات مثل التنحنح يعني يامعشي لامنك سمعت صوت الكفرات ترانا بالحوش اقضب غرفتك وخم المخدة ولاتقطع خلوتنا
استمر الحال على هالحال .. وبعد فترة صار الكنديشن مركون في ربعة بالحوش لين تجمع عليه الغبار وأشوف يوسف لاجا تالي الليل لبس المقوصر والفنيلة العلاقي والطاقية المشوخلة وفل الفرشة ورش الحوش ومعه مسجل حقات أول اللي يشتغل على بطاريات ومافيه الا سماعة وحدة يطول الصوت وينسدح وكانت أغنية مشهورة هاك الوقت مطلعها يقول :
انتظر أحباب قلبي بالمحبة وما إجونا
على الطاري .. هذي الأغنية للفنان الشعبي عبدالله الصريخ وكان في وقتة مشهور جدا .. المهم في أحد حفلاتة دخل وهو سروال السنة اطول من الثوب ومن شدة تعلق الجمهور فيه < زي مهند الحين > صاروا يروحون لمحلات الملابس ويقولون للهندي عطنا سروال عبدالله الصريخ الله يالفرق بينه وبين طيحني ههههههههههههههههههههههه ولا معليش بابا مدري وش موضتهم الحين
نرجع ليوسف والظاهر احباب قلبة ماهب يمه طفش من هالحالة وباعني الكنديشن بمبلغ زهيد
اخذته للدكة اللي نقعدبها أنا و< علم > أول ماشغلناه طلع عاصفة غبار وصار شكل علم كنه هايلكس مغبر لكن بعد مالفحني هواه جاني احساس إني ودي اعرس
وعلم يناظرني نظرة الشايب اللي توه بالعن حبة مرسيدس أو عفوا أقصد ... فياغرا الصراحة ..خفت ..قلت علم ماتبي إجازة تروح تشوف زوجتك وعيالك تراك مبطي عنهم <<< خاف تجي الحره فية ركض ضف أغراضة وبلاوية ورطقته للمطار ورجعت للمزرعة بسرعة الصاروخ الصراحة شد فضولي هالكنديشن وجا في بالي بريدز < بريق > الشاهي لانه بعد فترة من الاستخدام يمسك نكهة الشاهي لو تحط فيه موية بس طلع لك شاهي خادر قلت يمكن مثله هالكنديشن عودوه على شي وبتل علية وصار يعطي براد ويعطي قوة عزم مثل المرسيدس لا دعستلها بنزين
بس لابد نتأكد ونجرب في احد فخطر ببالي جدي هو اللي مافي أمل يجية براد لو يشري مصنع مرسيدس ... رحت لمة وهو عند السادزي الشرقي وقلت له خذ يابوي هالكنديشن جربه اليوم شف هو يبرد ولا لا أباخذ قشلة من المزرعة أبيعها بالمقاصيص إن كان مافيه رجوا علمني قال خلاص لاجيت تروح علمني أبيك تشري لي < المونس > .. يقصد الرادو
قلت ان شالله أنت بس شف عن هالبلية ويصير خير ,يوم قمت الصبح وأشوف جدتي بالحوش تحني شعرها دريت إن الكنديشن أثمر ونجح باللي عجز عنه الألمان في تكنولوجيا المركبات
بعدها فتحت ورشة للسمكرة الزوجية .. لا مرسيدس.. ولا بانوراما.. ولا غيروه .. كنديشن ابو كفرات صديقك بالطرقات الوعره
وكل من جاء أجرت علية هالكنديشن لين يمسك جادة ويستمر عليها بعدها يرجعه وترا كل كيلو محسوب ولو تفصل العداد عليه تأمين
لكن تذكرت إن الهدية لاترد ولا تباع وأنبن ضميري قلت لازم أرجع الكنديشن ليوسف وأحل مشكلتهم .. لازم أشوف ليش خلا المكيف مركون بربعة مدامة يعطي مفعول للحين ويوم سألته عن سبب تركك الكنديشن قال بعد ماطاحت الميانة بيننا وصارت ماتحتر وتستحي لامني دلعتها قلت وشوله نصرف كهرب ونشغل هالكنديشن لكنه مع إنه طاحت الميانة صارت ماهب تحب القعدة معي ..... اهااا <<< ولعت نفس اللمبة الصفراء قلت لا اليوم خذ الكنديشن وشغلة حتى لو ماهي تحتر وبتدعي لي
ومن بكرا صبح بوجهي وهو يقول معشي أنت < ماي هيرو >
وعرضت عليه مبالغ لبيع هالكنديشن ورفض وصار محسود من كل الناس وكل قرايبنا رجعوا للعيش في بيت جدي وكل ليلة واحد داف هالكنديشن للسطح وصاروا يسوون جدول كل واحد له ليلة
ولصقوا علية ورقة مكتوب فيها للعوائل فقط ..يمنع منعا باتا دخول العزاب .. والكلاب .. والكلام لك ياجارة .. ورا ماترجع لبيت اهلك انت عزوبي واخذ غرفة على الفاضي خل غيرك يستفيد
وبديت اقفل على نفسي الباب تجنبا للمضايقات ومحروم من دخول المطبخ ومحروم من الجلسة بالحوش ومحروم من الكنديشن وممنوع .. ممنوع .. ممنوع
ولو يمديهم كان ختموا في جبهتي كلمة ممنوع باللون الاحمر
سعادتي الوحيدة اني اروح اقعد مع علم وادخن معه الدخان اللي ملفوف بورق عنب يعني صرت مارج بسبة اضطهاد أهل البيت << صورة شيعي
واجلس تالي الليل افتح الدريشة واسمع صوت هالكنديشن رايح جاي وانا ....
أنا
ملحط لين الله يفتح علي وأشتري كنديشن
الغرض من هالقرق
1 - استأجر بيت وحط فية كنديشن خاص فيك وأفتك من المضايقات والغمز واللمز
2- المكيفات نعمة فلا تسرف بها
3- يازين بيوت الأولين ويازين عيشتهم
4- خذها مني .. أخوات الرضاع أحن وألطف من الشقيقات الصدزيات ... ياهل ترا ليه ؟
العذر والسموحة تراي من أمس مانمت
تحملوا الملاغة أو المصالة أو البثارة <<< حدد منطقتك بأختيار أحدا الكلمات
سلام

منقوووووووووووول

>>>>> ردود الأعضـــــــــــــــــــاء على الموضوع <<<<<
==================================

مشكور على الموضوع
تحيااتي

__________________________________________________ __________
مشكورة على المشاركة
لاعدمناك تسلم يمناك

__________________________________________________ __________
يسلمووو نبض المشاعر على النقل الرائع

__________________________________________________ __________
يسلموووووو
يعطيك الف عافيه
تحياتي وننتظر جديدك

__________________________________________________ __________
هههههههههههههههههههه
مشكووووور وتقبل مروري..