عنوان الموضوع : البنات والعبايات حوار حر
مقدم من طرف منتديات الشامل

اسلوب جديد فى الطرح اعجبنى ونقلته لكم

واريد تعليقاتكم على الموضوع

عندي موضوع والله انه يا جماعه فاقع مرارتي ,, مضيق صدري وفي نفس اللحظه ظاغط على مخي !!


أبي طرحه قدام حضرتكم ,, وأنتم براحتكم, , إن بغيتوا اطرحوه أرضاَ أو ثبتوه جواَ أو دحدروا به على الصرقــعه (( رجعت الدعايه انتبه له يا مشرف ))



موضوعنا هو : العبايات ,,, عباية المرأة ,, وآآه يا أخواني من سالفة المرأة وعبايتها لأن موضوعها ذو شجووون والمثل يقول: الشجووون ملعوووون



تكفون لا ينط لي واحد منكم ويقول: وش عليك منهم؟ وش دخل أم اللي جاب مندوبك ؟

لأني وقتها راح أقول له : دخلني الباب وألحس كفر الدباب


ولا يجيني واحد ثاني مطفي النور وداعس ثم يخش فجأة في عيني وهو يشربك ويقول: موضوع مكرر ,,

لأني وقتها راح أظطر أسدد له طراقيــن . الأول صدقي والثاني مكرر


من جد يا جماعة الخير ,, هل اللي حاصل حالياَ في الأسواق والعروس والشوارع .. اسمه عبايات ؟ ويسمى ستر وحشيمه ؟


سؤال أطرحه لكم ياحضرات القضاه والساده المستشارين وأبي منكم إجابه ..



أنا كـ شاب شبه كبير ابيض حبوب ما قد شفت الا شغالتنا الاندنوسية .. فجأة تشطفني في الشارع بنت عليها عباية أضوق من ثوبي !!!!! وش موقفي ؟ أكيد بأعض الأرض وأتمتم قائلا : ألعن أبو الصيده يا شيخ


أنا كـ شاب أفكر كثيرا في الجنس الآخر ولا قد شفته .. أجي السوق وألقى ثلاث بنات مروا من جنبي عليهم اسم طرحه والأكمام كأنها كراسيدا باكستاني أنواع الزخارف ,, وش ترجون مني ؟ أكيد ابليس بيدق علي بيجر ويقول: دز وراهم يا مال السيل


أنا كـ مواطن متحمس و لي حق العيش في هذا الوجود المنتعش ,, أروح المدرسة أبي أداوم واكسب علمي لاكمل به حياتي ,,

ثم تصادفني في ممر المدرسة فتاة عليها لثمه كأنها ناوية تسرق وعيونها كحل في كحل رايحه للمدرسة وش أسوي ؟

أكيد راح أنســي المدرسة واضيـع مستقبلي وحياتي والسببه عابه بنت الاجواد


لا والمشكله ,, تلقى البنت شينه وشيفه وكأن وجهها قوطي داعسه موستانج بس بالعبايه قسما بالله ماتقوم معها حلا شيحه


شغالتنا مثلا .. اسمها ( ايتي ) .. وجهها كأنه مفك بيبسي .. وفي الليل أتجنب رؤيتها لأنها تذكرني بسوالف الجن الله يقاصرنا ويقاصرهم بالاحسان .. مرة لبست نقاب حق جدتي العجوز ,, ماعرفتها ..

قمت ألاحقها في الحوش وأقول: يا لبى قلبك يا المبرقع انت

يوم استانست وشالت البرقع وناظرتني بإبتسامتها الخاليه من الأسنان ..ضاعت علومي و قلت :


يالله روحي مطبخ جيبي مفاتيحي (( من زود الشين اللي فيها لخبطت بين غرفتي والمطبخ ))

يعني شفتوا كيف ان العبايات والبراقع قد إيش ملاعين خيـّـرررر ؟

لحظه لحظه ,, كأني أشوف الأخ طخطيخ راز سبابته اللي كنها عصا موكلي ,, تفضل اسأل يا طخطيخ :


والله براافو عليك ,, سؤالك جدا في محله .. نعم أحسنت من المسؤؤل ((
صفقوا كلكم لطخطيخ الدافور ))


دايم أسأل نفسي وانا من النوع اللي أحيانا في المغربيه أجيب ترمس شاهي ومكسرات وأتقهوى انا ونفسي وندردش


بس الغريب ان نفسي من النوع الحياوي . تصدقون ماقد قالت لي ولا مرة: صب لي بياله


قبل فترة كنت جالس مع نفسي وحصل موقف رهيييب .. , سألتها : من المسؤؤل عن هالعبايات السامجه اللي انتشرت ؟ وين اخوانا اللي في الهيئة أو شااابين على مندوبنا حنا بس يا الشباب ؟ وينهم عن عبايات هالغزلان ؟


المشكله أن نفسي ما ترد لأنها مو لاقيه اجابه ..


سألت نفسي ثاني مرة : اعنبوا بليس هذولي ما وراهم أهل يقولون: هالعبايه عيييييييييييييب حراام !!

للمرة الثانيه تلتزم نفسي السكوت ولا ترد ,,


سألت نفسي ولثالث مرة : طيب وين الحمية ؟ وين أخوانهم الكبار عنهم ؟ أو بس جيدين في تحويم الحمام في السطوح؟

وللمرة الثالثه مارست نفسي السكوت وعطتني بالخامس !


سألتها لرابع مرة : طيب هالبنات وش هدفهم من عبايات الخصر واللثمه والدانتيل والزخارف؟ معقوله يبون لفت انتباهنا وفعلاَ راضين بالترقيم وتحرش هالمراهقين اللي أنا زعيمهم ؟

كالعاده لم ترد علي نفسي للمرة الرابعه وحقرتني !!!



عصبت انا ,, طنقرت ,, وأنا من النوع اللي إذا عصب على طول يحمق قلت :

مو معقوله يانفسي .. ياختي قولي شيء ,, بالله عليك مو حرام اللي نعيشه في الشوارع والاسواق والمحلات وعند الاشارات ,, ياهوووه تكلمي انطقي بالله مو ظلم مو حرام هالعبايات تلعن جدفنا كشباب طموح . ردي ي


وفجأة .. وبدون مقدمات .. طار الحب والفستق وانكبت زمزمية الشاهي وقامت نفسي علي وسددت لي ذاك الكف وشالتني ومحطت بي ثم انفجرت تصارخ علي تقول:


يااخي أزعجتني ياخي من يوم طبيت الخمستعشر الين الحين في السباتعشر من عمرك وانك مزعجني بهالاسئله .

نعنبوا من جابك 3 سنين وانت شغال تجلدني بأسألتك لابوك لابو مخك لابو هالعبايات والبنات اللي تقول .

ياابن الذين آمنوا شغل مخك خلاص وقتك تغير .. هذا زمان البنت مو زمان الولد .. انت اللي تستحي وهي لا .. هي الجريئه وانت الحياوي ..
ياخي عاصر زمانك وخلك جنتلمان او ياخي انطق في بيتكم لااعاد تطلع ,, انثبر في غرفتك الله ياخذ شكلك وفكني .,,

لاعاد تتمشى بسيارتك ولا عاد تروح دوامك ولاعاد تطب الاسواق وكل تبن واقضب ارضك ,, جعلك الماحي قل آمين تكفى يا طخطيخ أشطب يوزره والله انه ابلشني))



مرت خمس دقائق وانا فاقد الوعي وخايف من نفسي وقعدت أفكر في كلامها وبالذات كلمة :



((اقتباس من مشاركتها))
ذا زمان البنت مو زمان الولد .. انت اللي تستحي وهي لا .. هي الجريئه وانت الحياوي ..
(( اقتباس من مشاركتها ))


قمت ,, عدلت الزمزمية ,, جمعت الحب والفستق والقريض اللي طاح ,, والتفت عليها وحبيت راسها وقلت :

سامحيني والله انك صادقه ابشري من اليوم ورايح ما هنا طلعه ووالله صدقتي في كل كلمه ,,


ضحكت وقالت لي : هههههههههه أعترف صح جلدتك ؟ صح أنا أخوف لما أكون عصبيه ؟

قلت: لا وفوق هذا والله انك حكيمه بعد .. الله لايحرمني منك ..

قالت : ولا يحرمني منك بعد أنت يا بعد روح روحي ..

قربت منها وقربت مني .. وصار مشهد رومنسي قطعه إياد مدني مهوب أنا



السؤال : هل تتفقون مع ما قالته نفسي الحكيمه ؟ أم يا هل ترى بالغت وشطحت قليلا (( ماخذين بالكم من الفصحى ؟ ))


ولو الواحد منكم يا الحبايب شاف عباية أخته مخصره ومزخرفه كأنها هوندا حقت خال .. وش موقفه . يرضى ؟


وإذا - لا قدر الله - وحصل ما لايحمد عقباه وتحرش في البنت أي شاب مفتووون ,,

ليش اللوم والحكي كله على الشاب والبنت طالعه منها براءة ؟ ليش ؟ ليش؟
(( وجه واحد منهار في المحكمه ويقول: اغيثونا ))


اللي بيجاوب ..يجاوب ,, واللي مهوب يجاوب لا يجاوب ., والمثل يقول: اللي على راسه بطحاء ابن أمه يواسيها


منقوووول ماعدا العمر والملامح

والله يكفينا شر العبايات المخصره


>>>>> ردود الأعضـــــــــــــــــــاء على الموضوع <<<<<
==================================

اخوي ايمن


تسلم على الطرح


وفعلُ هالشباب مساكين كل الأغراء من البنت

وهو يتبع شهواته .. والحمد لله في الشباب العاقل

الي يخاف ( كما تدين تدان )

والصبر زين

والعبايات هذي انا الحمد لله ماشوفها الا جان بالشهر ولا الشهرين مره وحده

لأني ما اروح لهم بالأسواق ولا اطلع واجد

اقبض ارضك وخلك في بيتك وبعملك احسن لك

مدام فيك شهوه وتبي تحفضها


اخوك

محمد مبارك

__________________________________________________ __________
السلاااام عليكم

..aymo0o0on

مشكوور اخووي على هالنقل المميـــــز جدا لهذا الموضوع المتميز فعلا بطرحه ومن كتب الموضوع كتبه بطريقه فكاهيه سلسه لكن تحمل الكثير من التساؤلات المهمه...

بالنسبه للفتاه والعباءه ..

فقد ظهرت بالفتره الاخيره العديد من العباءات المطرزه والضيقه وسميت باسمي غريبه جدا..كل ذلك من اجل ارضاء الفتاااه .. لكن بشكل خاطىء

سأصدقك القول اخي ... ان من تشتري هذه العباءه هي لا تقصد الستر ولا تنشده .. بل تحاااول جذب اعين الشباب لهااا حتى يبدأون بملاحقتها ومعاكستها ثم تصرخ في وجيههم حتى تبعدهم ليس لانها تريد فعلا ان تبعدهم
انما حتى لا يشك بها من حولهااا ... بل انها في نفسها تضحك سرورا بهذا الانجااز من وجهة نظرهااا..

وكم هي من مرات اشاهد فيها احدى الفتيات تصرخ بوجه شاب حتى يبتعد عنها وحين اقف لارى ماذا حدث اشااهد عيوونا لا ارى مثلها الا بالمجلات او حفلات الزواج ... فأردد في نفسي مسكين انت ايها الشاب ..

وللاسف الشديد هذه الايااام كثرت هذه الفئه من الفتيات ممن يلبسن الضيق ويضعن العطور والمكيااج ويخرجن بكامل زينتهن الى الاسواق .. ومن لا تفعل ذلك فهي بنظرهن تقليديه معقده ..!!!

وانا اتسأل احيانا هل الذهاب الى الاسواق لشراء غرض معين يحتااج كل هذه الزينه..؟؟؟!!!

وفعلا صدق الكااتب حينما قال "هذا زمان البنت مو زمان الولد .. انت اللي تستحي وهي لا .. هي الجريئه وانت الحياوي .."

اسفه على الاطاله والف شكر لك اخووي مره ثاانيه على النقل

__________________________________________________ __________


__________________________________________________ __________


__________________________________________________ __________