عنوان الموضوع : عزمت واحد لعشى وتوهقت !! مضحكو جدا
مقدم من طرف منتديات الشامل

!!..عـزٍمت وآحد لعشـى وٍتوٍهقــت..!!

السلام عليكم ورحمة الله وبركاته

صبآحكم عســل ومسائكم بصل
طبعا السالفه قديمه وحبيت اقوله لكم

آخواني وآخواتي الانتــرنتيين الاعزآء .. وقسم بالله كنت داخل من مقهى انترنت وفيه فلبيني جالس يسولف بالمايك بالجهاز اللي قدآمي عليــه ضحكــه لو تسمعونها تكرهون الضــحك كله
.. المهم اخبآركم آنتم آدري آني واحشكم موت لاحد يحلف والله مصدقكم بس تعرفون الضروف تخلي الانسان يبعد عن اغلى احبابه وانتم احبابي << ياشيخ والله المدرس اللي نجحك بالتعبيــر ماعنده ذمه ولا ضميــر

المهم آنآ والله قلت لازم آكتب الموضوع ذا على شآن تاخذون العبــره منـــه

نصيــحه من آخوكم نوفي لاحد يعزم وهو طفــرآن

في ذآك اليوم وفي الصبآح الباكر صحيت من النوم ورحت للعــمل وانا بالطريــق بنشــرت علي السياره عاد مابي آقولكم وش سيارتي منعاً للآحرآج المهم خفت آني آتآخر عن دوامي

قلت ياولد خلني اروح للعمل وانا طالع اصلح السياره .. المهم جلست آنتظر تكسي عاد تعرفون التكاسي بالرياض ياكثرها والله مره طبيت سووق انهبلت التكاسي اكثر من الناس اللي بالسوق

المهم آشرت لتكسي ولا يوقف واحد دوب لابس نضارات يشبـــه هزار اللي بطاش ماطاش
ركبت معه ووداني للعمل وجلسان نسولف ونضحك المهم قبل لانزل قالي ممكن رقمك << والله لو قال عشان ماتقولون انا رقمته هو رقمني

المهم عطيــته الرقم ودي آكتب الرقم اللي عطيته بس آخآف يطردوني من المنتدى

المهم له يومين مادق علي آمس بالليل وانا راجع للبيــت بنام ولا يرن جوالي ورد عليه وياليتني مارديت الانسان له غلطه وحده بالعمر وانا غلطتي اني رديت على هذا الشخص

قالي وينك قلت والله رايح للبيـــت قال وش رايك تجيني في حي الخزامى تتعشى معي
قلت له والله مآدله حي الخزامى ذا بس تعال انت وانا اللي بعشيك << مابي اقول اسم الحي حقنا تعرفون انسان مشهور وله معجبين وخايف يلاقيهم عند بيته

المهم قالي خلاص بجيك بس العشى على حسابك قلت تم انا على بالي يمزح وحتى لو مايمزح قلت يمكن يتعشى 40 ريال وبس

المهم لما وصل لحينا قال وينك قلت انا انتظرك عند هرفي قال لالا فيه مطعم النافوره حلوو خلنا نروح له قلت اوكي نتواجه هناك

المهم انا معي 180 ريال يوم وصلنا للمطعم ونادي حق الطلبات قلت له اطلب قال لا اطلب انت قلت له انا متعشى والله بس باخذ لي عصيـــر كوكتيل .. قال اوكي حق الطلبات اعطاني مينو مدري منيوو اللي فيها الطلبات اعطاني ورقتين وحده للمآكولات العربيه ووحده للآسماك والاكل الصيني .. المهم شوفو الطلبات اللي طلبها

آول شي طلب شوربه بالخضآر .. قلت بقلبي ياحليله الظاهر انه يسوي رجيم .. المهم قال عطنا صحن سلطه مشكل يوم قالها حسيت اني فقيــر على طول .. قال عطنا صحن مشكل مشويات صغيــر قلت بقلبي لعنه تلعنك انت ماخليت شي خلاص آطلب كبيــر
وطلب عصــير رمان واحد وقالي وش تبي عصيــر قلت اطلب وخلص وبعدين انا بقوله
المهم انا اخذت نفس الورقه اللي معه بشوف السعر بكم بصراحه حسيت اني بموقف محرج

شوي ونزل الورقه انا استانست قلت زين يمكن الحساب 50 ريال او اذا طار 70 ريال

المهم بس نزل الورقه اخذ ورقة الركن الصيني والاسماك .. وقصم بالله يوم اخذها حسيت بقشعريره مدري خوف من الحساب وفلوسي ماتكفي ولا جتني حاله اسطره كف

انا مستحي منه اول مره ولا اقدر اتكلم ولا اقول شي

قالي جربت الروبيان مع الصلصل قلت جربتها مره وحده وجاني مغص ابيه يكرها
قالي حرام عليك انا دايم اكله رهيبــ قلت بقلبي يلعن شكلك ماتمرض انت

المهم طلب روبيان بالصلصل .. وشوربة اسماك ... وقطع سمك مع ايدام صيني

المهم جا الطلب هو يسولف علي وانا جالس احسب اشوف كم الحساب فلوسي تكفي ولا لا

حتى والله العظيم طلبت بدال العصيــر كوكتيل سفن اب

المهم جالس يبلع الدوب احسه يآكل الاكل على طول بدون مايمر على اسنانه

المهم انا جلست اوسوس قلت بقلبي لا اكيد ماطلب الاطلبات ذي الا هو بيحاسب

وشوي اقول بقلبي لالا عيب انا لازم احاسب ذا ضيف المهم بالاخير قلت ان شاء الله هو يحاسب يوم خلص من الاكل قال كثــر الله خيـــر انا في هذه اللحظه حسيــت بدوخه بس الحمد لله عدت على خيــر

دخل دورة المياه الله يكرمكم بيغســل انا على طول رحت للمحاسب وقلت بقلبي اذا الحساب فوق الفلوس اللي معي والله بطلع وشغل سيارتي ونحاش مايعرف الا رقمي خله يدق مآرد عليه
واذا الحساب اقل من الفلوس اللي معي لاوالله بحاسب

المهم يوم قلت الحساب كم قالي 174 ريال يعني لو اني طلبت عصير كان توهقت بس الحمد لله اني طلبت سفن آب

اول ماطلعنا من المطعم وكل واحد ركب سيارته فتحت جوالي وحفظت رقمه بآسم (( لاترد آبد ))


رجعت للبيت وانا اجر اذيال الهزيمــه وقول ليتني شاري بطاقة شحن بس ولا راحت الفلوس ببطن الدوب ذآ

وسلامتكم
تحياتي لكم ::: كان معكم نوفي اللي قالت له لميس الدرباويه اروح لك حمضيات حار




>>>>> ردود الأعضـــــــــــــــــــاء على الموضوع <<<<<
==================================

ههههههههههههههههههههههههه هع
فطست من الضحك

وبنتظآر جديدك


__________________________________________________ __________
هههههههههه

عاد يوم قال كثر الله خيرك
هههههههههههههه


القهر انك حاسبت وانت ماكليت
هههههه


يسعدك ربي
ويعطيك الف عافيه
تقبل مروري ودمت

__________________________________________________ __________
هههههههههههههههههههههههههههههههههههههههه
لو رحت حي الخزامي ذا كان ماصار الي صار وعشاك
على حسآبه ههههه منجد قهر حآسبت وانت ماكلت
وبعدين وش ذي الطلبات كلها كيف قدر يآكل كل ذا /:
اهم شيء انك اشتريت سفن عشان منجد ماتتورط ههه
وبعدين تعآل وش قصتكك مع لميس ع قوله عيون ماتت
شبعت موت هههههه , ربي يسسسعدك ع الموقف الطريف
لاتحرمنا جديدك

__________________________________________________ __________
لبى قلوووووووووبكم نورتو خلاص توبه اعزم واحد دب مو ناقص خساير ^_^

بالنسبه للميس شوفو المواضيع اللي طافت هي ناشبه لي من زمان هههههههههه
احلا مرور من اجمل اعضاء ^_^

__________________________________________________ __________
هههههههههههههههههههههههههه طحت ومحد سمى عليك

يعطيك العافيه

هههههههههههههههههه

ليتك م عطيته رقمك من البدايه

قسم ضحكتني

يعطيك العافيه "