عنوان الموضوع : ياقاعد القعدان جيناك زوار جيناك يابن الشيخ مافية منة
مقدم من طرف منتديات الشامل

السلام عليكم ورحمة الله وبركاته
صباح/مساء الشعر

يا قاعـد القعـدان جينـاك زوار
جيناك يابن الشيخ مـا فيـه منّـه

جينـا وجابتنـا لديرتـك الاقـدار
حيثك حبيـب وللنشامـى مظنّـه

جينا على صنعة أمريكا مع القـار
نعطيهن البنزيـن وهـن يشربنّـه

صناعهن في صنعهن نافعٍ ضـار
فيهن ومنهن خير والمـوت سنّـه

لا روحن من دار يبغن لهـن دار
مثل السهوم اللي هدفهـن رمنّـه

تلقى رفارفهن بها طيـن وغبـار
من كثر عـجٍ خلفهـن يزعجنّـه

وهذي حلاة العمر سجه ومسيـار
وشمة ذعاذيـع الهـوى فوقهنّـه

مشوارهن يسوى ثلاثين مشـوار
واللي مثل شرواك مـا يسهجنّـه

وعرف الرجال اللي لهم فعل وأذكار
شرواك وإلا اللاش مـا ينحرنّـه

بيتك لهن مارد ومنهـل ومصـدار
يا ما مشـن يمـه ويامـا نصنّـه

بيت الأمير اللي على الطيب مغوار
حـرٍ صواريـم الحـرار جذبنّـه

من ماكر طيره يشجع إليـا طـار
يتعـب صقاقيـرٍ تبهيـن مغـنّـه

ذبّاح ما وقّـع ولحـاق مـا نـار
أقطع من البالود مـا بـه محنّـه

ضاري على دوس الطرايد بالأقفار
واللي تعب بغـذاه ماخـاب ظنّـه

هو الأمير اللي لهن يشعـم النـار
ياسعود لوهـو بالبحـر ياصلنّـه

عاداتنا ياسعود ندلـه مـع الجـار
وعاداتنـا لطـن الوجيـه المدنّـه

وعاداتنا دق المعادي على الـزار
نطويه بأحزانه تقـل طـي شنّـه

ماهي سواليفٍ بها كـذب وقمـار
سوالف اللـي فيـه بغـض يكنّـه

ما ودنا يا أمير في كشف الأسرار
وإلا السوالـف عندنـا مثلهـنّـه

خذ ردها يا أميـر والثـار بالثـار
شاربك مما حاشـت يديـك حنّـه

أميرنا ماهوب راعي علـى حمـار
تقول رديتـوه فـي وجـه هنّـه

ياكبرها يا أميـر ماهـي بالأذكـار
حكيك يا ليت سموعنا ما سمعنّـه

قايد سرايا حرب دوّاس الأخطـار
كـل البيـارق والعطـف يتبعنّـه

لا جاء يخليكم وقاري على الـدار
تونون من ضربـه ثمانيـن ونّـه

في قارة الأسلاف يوم الدخن ثـار
عينت وين البيت مـن ضربهنّـه

جابوه ربعي فـوق حثـات الازوار
وعجز السوالم فوق ربعـي بننّـه

جابه لنا مانع على غيـر تختـار
هو وأهل العرفاء على غير سنّـه

غصبٍ عليكم ما بهـا رد معـذار
قولٍ عليه شهـود ماهـوب أظنـه

ماهـي سواليـفٍ تعلـق بشنكـار
من قـول نايـل حجتـي مستعنّـه

والبيت الآخر راح بيدين الأحـرار
يـوم الخناجـر فوقكـم شقّقـنـه

بيت الأمير اللي عليه الدهر جـار
أمير برقـا اللـي سنينـه طونّـه

ذي العلوم اللي بها العيب والعـار
المعجـزات السـود فـي وقتهنّـه

واليوم سلم وراعي الحـق يختـار
يأخذ ورى حقه ويضحـك بسنّـه

هذي علومٍ دونها ستـر وأستـار
نسولف سوالفهم وهـم بالمجنّـه

ما يعقبن غير الفضايح والاشـرار
وإلا ترى اللـي راح مـا يلحقنّـه

واليوم حنا بوقـت تاجـر وتجّـار
نركض وراء الدنيا وهي مرجهنّـه

ماهمنـا غيـر نتسمـع فالأخبـار
ونتابـع الأسعـار وش سعرهنّـه

بيني وبينك نرفع السـور بجـدار
حتـى نعيـش بعيشـةٍ مطمئنّـه

ولا انته مروّح بأول الجيش سبّار
ولا انته محول بالخطـر قفوهنّـه

في حكم أخو نورة تساون الأشبار
والذيب ليت الضـان مـا يأكلنّـه

لارواحكم احترامي
اسرار


>>>>> ردود الأعضـــــــــــــــــــاء على الموضوع <<<<<
==================================

صح لسااان من قاال


وتسلم يمناك ع الطرح والانتقاء الرائع

دمتي بود ..

__________________________________________________ __________
أنا أتوقف ولالي بالمقاومه
وأكون بالصفحه هذي مغرز

فكل الحروف ببداعه سوامه
يعني هو القلم المطرز


مودتي لمن كتبه
وأشكر من نقلها

__________________________________________________ __________
ابيات راقت لي ...
يحميك ربي ,,,

__________________________________________________ __________
يعطيك العافية
وصح لسانك ولسان الشاعر والنعم بقاعد
ابيات جميلة ومعبرة وتحاكي الواقع

تحياتي

__________________________________________________ __________
~[ نص يعكس ذائقه راقيه ..
يسلملي أحساسك ي خيتي !