ذكريات ستبقى في ذاكرتي

[kamiliya]

عنوان الموضوع : ذكريات ستبقى في ذاكرتي
مقدم من طرف منتديات الشامل

قصة نقلتها لكم من أحد المنتديات وأنا أتجول فيها ولقد قرأتها وأبكتني القصة جداً
تحكي هذه القصة عن فتاه وابنة جارتها

فتقول ابنة جارتهم في القصة من بدايتها

السلام عليكم ورحمة الله وبركاته

أصدقائي قبل ما أبدأ القصه في حاجه أبا أقولها
هذه القصه واقعيه ولم أزود فيها بحرف واحد كل الكلام والأحداث الي فيها حدثت وصحيحه وهذه القصه عن بنت جارتنا الي أحبها مره بس هيا الأن ذهبت عنا جميعا وتركتنا الله يرحمها
كتبت هذي القصه لكي أفضفض ايش في قلبي لأني مكتومه ومقهورة ومو مصدقه أنها تركتنا جميعا
هذه البنت متسجله في منتدى مكسات ومعظمنا يعرفها الله يرحمها ويغفرلها
أخواتي وأخواني الاعضاء ليس احد مجبور يقرأ هذي القصه انما هيا بس كتبتها عن شي مكتوم في داخلي وأبغا أرتاح

أبدأ القصه هذه القصه عن بنت جارتنا اسمها _لينا_ كانت عايشه مع اهلها في مكه وأنا عايشه في جده ولكن قبل سنتين ونص تقريبا نقلوا أهلها من مكه لجده لم نكن نعرفهم طبعا وسكنوا بجانب بيتنا واحببت انا وامي انو نروح نباركلهم ونتعرف عليهم بما انهم جيراننا الجدد كانت أسرت لينا تتكون من أربع بنات وثلاثه اولاد ماشاء الله أكبر واحد في الجامعه وهو ايضا متسجل في المنتدى والباقي كلهم صغار ولينا اكبر البنات والباقي أصغر منها وفي يوم رحنا نبارك لهم على البيت ونتعرف عليهم رحنا عندهم بعد أسبوع من جيتهم لجده اتعرفنا على والدتهم وكانت طيبة جدا اما لينا لم أكن اعرفها بعد ولم أراها حتى كنا جالسين مع بعض نتكلم وفجأه دخلت لينا وسلمت علينا وجلست تتكلم معنا كان يعجبني كلامها حسيتها فرفوشه وتحب تمزح وتضحك حاولت أتقرب منها اكثر فأكثر الين ما اتعرفت عليها واصبحنا صاحبات بل زي الأخوات كانوا أخواتها كلهم طيبين بس لينا لفتت نظري أكثر مع أنها أكبر مني بكتير وهيا كانت كمان تحبني وتتقرب مني وتحب تتكلم معايا كنت لما تصعب علي مساله في الرياضيات أروح عندها وهيا الي تفهمني كانت انسانه أحس انها تفهمني كان أخوي الكبير دايما يقعد مع أخوها الكبير وكمان صارو أصحاب
سوف أحكي أحلى المواقف الي عشناها مع بعض ومنها
مرة كانت لينا وأخواتها وأخوها رايحين البحر يتمشوا ووقتها ما قالتلي دقيت عليها وقلتلها
ايناس(أنا):السلام عليكم لينا فين أنتي
لينا:وعليكم السلام أنا عند لوحه مكتوب عليها كرفت الطعم الذي لا يقاوم
ايناس(أنا):هههههههه لينا بلا هبل بالله أنتي فين
لينا:أنا في البحر
ايناس(أنا):ليش ماقلتيلي أنك رايحه البحر يا حيوانه
لينا:يالهوي لا تكوني أمي وأنا ما أدري ليش تسألي تبغوا تيجو
ايناس:ايوا نبغا نجي
لينا:بالله جايين أجل نحنا راجعين البيت
ايناس:والله شكلك انتي فايقه على الاخر يا بنت انا ما استهبل
لينا:ههههههههه طيب نستناكم
ايناس:يارب أخويا يرضى بس
لينا:لا تخافي دحين أخلي يوسفووه يقنعه مالت عليهم الأثنين قولي أمين_يوسف أخو لينا_
ايناس:امين ياشيخه يلا تبغي شي
لينا:ايوا ابغا شي
ايناس:ايش هو
لينا :أبغا سلامتك
ايناس:أنقلعي يا شيخه والله انك فايقه
لينا:هههه أنقلعي أنتي وجع في شكلك يانحيفه
ايناس:هههههه مع السلامه
لينا:سلملم
هذا الموقف صار قريب في الأجازه
رحنا البحر كلنا وانبسطنا ورجعنا البيت
ومره جا صاحبات لينا على بيتهم فتصلت عليا وقالتلي
لينا:ايناس الحقي صحباتي جاين وماما ماهي في البيت وأخواتي ولا على بالهم تعالي ساعديني شويه بسوي قهوه وأنتي سوي شاي الله يسعدك
أنا:طيب طيب دحين اجيكي بس أقول لماما
لينا:أستناكي مع السلامه
وبعد مارحت لبيتهم دخلنا المطبخ وكنا أنا وهيا مرتبكين وحالتنا حاله لأنو صحباتها في الطريق
لينا:ايناس أنا أسوي القهوه وأنتي سوي الشاي طيب
أنا:أخاف أزود السكر ولا حاجه
لينا:يا أمي مشي حالك وفكينا المهم أنو الشاي يكون لونه أحمر مو لون ثاني
انا:ههههههههههههه طيب
لينا:ايناس بسرعه جيبيلي السكر
وأنا من هبالتي مو عارفه فين حاطين السكر رحت جبتلها ملح والله بالغلط وراحت حطت الملح هيا الثانيه من كثر الربكه مو عارفين نسوي شي حطت لينا الملح في القهوه وبعد ما خلصنا كل شي
لينا:ايناس استوب خلينا أحنا أول شي نذوق البلاوي الي سوينها لا يرحوا البنات يموتوا علينا و أهاليهم يحطوها فينا
انا:طيب يلا انتي ذوقي قهوتك وأنا أدوق الشاي حقي
لينا:طيب
شربت الشاي وطلع طيب وعجب لينا جات لينا بتذوق القهوه ذاقتها
لينا:اتفووووه على وجهك يامعفنه أنتي ايش جايبتلي سكر ولا فلفل أسود>>>>الله يرحمها ما تفرق بين الملح والفلفل أسود><
لينا:أمشي الله يقرفك برجع أسويها مره تانيه
ما انسى كيف كان وجه لينا لما شربت القهوه شكلها موتني ضحك شويه وكانت بتبكي ><
ومره كنا جالسين ولينا قالتلي

لينا:ايناس في منتدى يجنن يسطل بالله اتسجلي فيه اسمه مكسات
انا:ما اعرف أسجل سجليني انتي
لينا:أوكي أنا أسجلك
وسجلتني لينا في المنتدى وعجبني مرره
جا شهر رمضان كانت لينا دايما تسوي حلا على الفطور وترسلنا
كانت تقول قبل لا تاكلوا الحلا اقروا على روحكم الفاتحه ومن جد نقرا الفاتحه لأنو الحلا احيانا البسكوت محروق وأحيانا السكر منشف وحالت الحلا تحزن
وبعد ما ناكله أروح لبيتهم بعد فتره فتقولي غررريبه يا ايناس لساعك حيا من يوم الحلا
أنا:أعوذ بالله هو صح مو طعم بس مرت على خير
لينا:لا ما مرت على خير لازم تموتي
انا:ههههههههه اعوذ بالله منك يا شيخه
لينا:أقولك يا شيخه والله انا لازم اسوي رجيم لأني زد اثنين كيلو في رمضان
انا:مو باين عليكي والله أبدا
لينا :لا بسوي رجيم
انا:سوي أنتي حره ان شاء الله تصيري عامود كهربا مع النحف
لينا:الله ياسلام عامود كهربا
انا :الله يعوض عليكي يا شيخه والله جسمك حلو ما يحتاج تسوي رجيم
لينا:قفلي الموضوع زهقت منو
أنا :طيب
سوت لينا الرجيم وما سمعت الكلام وكانت امها تقولها لا تسوي بس هيا سوت
كانت لينا في كامل الصحه لم تكن أبدا تعبانه بس كانت دايما تسهر وتسوي رجيم أثر عليها هذا فأغمى عليها><
وزي ماسمعت من امها تقول
انها كانت واقفه تتكلم مع أخوها وفجأه ما نلاقيها ألا طايحه عليه ونرش على وجهها مويه وما تصحى
نقلوها أهلها للمستشفى حطولها أكسجين وفحصها الدكتور والحمد الله لينا فاقت من جديد الدكتور صرخ على لينا وقالها لا تسوي رجيم وبطلي سهر ولا حيصير معاكي اغماء مره ثانيه بس هيا عنيده ولا سمعت الكلام وقتها أنا قلت لاعضاء أنو تعبانه ودعولها جميعا والحمد الله قامت بسلامه
رجعت لينا لبيتها مافيها شي سالمه مرت علينا الأيام
جا وقت كنت زعلانه من وحده من صحباتي في المدرسه ومتضايقه منها أمي وأبويا ما كانوا موجودين في البيت وماكان أحد فاضيلي دقيت على لينا قلتلها تعالي شويه
جات لينا وقاعدت تخفف عني وتقولي ايناس لا تزعلى ترى الدنيا ماتسوى>>>>>أول مره لينا تقول حكمه><
وحضنتني وقالتلي انسى الدنيا مزمز ميراند واذا مافي ميراند مزمز بيبسي
خلتني أموت من الضحك ونسينا السالفه
مرت الأيام ودخلت مكسات ألا واحد من الاعضاء يقولي اشبها نينجا_لينا_ زعلانه ومقفله ملفها رحت شفت ملف لينا لقيته مقفل >< وكاتبه في الصفه**ياليتني أموت** استغربت منها ليش تسوي كدا يمكن زعلانه دقيت على البيت ماترد علي حاولت أدق ردت علي أمها وقالتلي لينا مشغوله ما تقدر تكلمك بعدين رحت على بيتهم بعد ساعه لقيت لينا بغرفتها دقيت الباب محد يرد دقيت مره ثانيه محد يرد فتحت الباب وشفت لينا فاتحه صفحة ملفها في مكسات وحاطها راسها على المكتب وقاعده تبكي قطعتلي قلبي وقتها>< قلتلها لينا اشبك أول ما شافتني مسحت دموعها ما تبغا توريني انها تبكي وبعد ما سحبت الكلام منها عرفت أنها تبكي عشان عضوه في المنتدى من صديقاتها ما تبغاها تكلم أحد وتبغا لينا تقفل تعليقاتها
استغربت منها أنا الصراحه ليش تبكي عشان سبب مايحتاج قلتلها طيب أصدقائك في مكسات يقولولك أرجعي كلهم يستنوكي وبعد وقت على ما أفتكر طنشت هذي العضوه وفتحت الملف حقها بس كانت برضها متردده وما تعلق في الملف كثير على زي ما شفت
مرت الأيام وانا قابلت لينا وهيا خارجه مع أخوانها عند الباب قلتلها لينا ألحقي اشتريت تجراف أبغا تكتبيلي فيه قالتلي أوعدك لما أرجع راح أكتبلك كانت لينا تبغا تروح هيا وأخوها الكبير_يوسف_واخوها _عبد الرحمن_ في ثالث ابتدائي كانوا يبغوا يروحوا يشتروا شي لأخوهم من المكتبه على ما أظن ولينا الملقوفه تحب دايما تخرج ماصدقت أخوانها طالعين راحت طلعت معاهم وهما في الطريق وبمشيئة الله عملو حادث في الطريق أدى الى سقوط أخوهم عبد الرحمن من السياره الباب حق السياره ماكان مقفل مزبوط عشان كدا سقط عبد الرحمن لقد توفى عبد الرحمن أما اخوهم الكبير ولينا انقلبت فيهم السياره جرح اخوهم الكبير جرح بليغ أدى لنقله للعنايه المشددة أما لينا >< هيا الي اكلتها تمام انكسرت يد لينا زياده انها جرحت جروح بليغه أدت أيضا لنقلها للعنايه المشدده اول ما سمعت بالخبر انصدمت بقوه ما قدرت أستحمل كلهم راحوا المستشفى ألا أنا ما أخذوني معاهم فتحت وقتها مكسات وقلت لأصدقائها بالي حصل وسوا واحد من الناس؟؟_أحد أصدقائها_ جزاه الله خير موضوع لدعاء لهم قعدت لينافي العنايه المشدده خمسه ايام في غيبوبه اما اخوها الكبير استيقظ قبلها بيوم وخرج من العنايه أما لينا لم تخرج ويوم ماكانت أمها راجعه من المستشفى على البيت راحت امي عندهم وقعدت مع أم لينا كانت ام لينا قاعده تبكي وتقول الدكتور يقول بنتك ما راح تعيش الكلى عندها اتلفت أول ما سمعت هذا الكلام قعدت أبكي مو قادره أسكت حزنتني أمها وهيا تبكي عليها وفي اليوم الثاني طلعت لينا من العنايه المشدده ولكن مازلات حالتها خطره وما ينفع ترجع البيت غابت عن المدرسه أسبوعين صحباتها أخذوا دفاترها وكملوا لها الواجبات الله يجزاهم خير ولكن هيا كانت في المستشفى استيقضت من الغيبوبه والله ما أكذب عليكم من أول ما قامت سألت عن أخوانها الي كانوا معها في السياره قالولها أخوكي يوسف بخير قالتلهم كيف عبد الرحمن كلهم سكتوا محد رد عليها وضيعوا الموضوع صارت تبكي بشده وتقولهم عبد الرحمن ايش صار فيه صارو يهدوا عليها ويقولولها لا تزعلي انشاء الله من أهل الجنه وصارو يخففو عنها بس مره كانت متأثرة الدكتور قالهم خلاص لازم هيا تطلع من المستشفى لأنها طولت بس اذا صار شي لا سمح الله على طول جيبوها رجعت لينا لبيتها وكانت محطمه من سماع خبر موت اخوها كان اخو لينا الكبير يخفف عنها

يتبع الموضوع

>>>>> ردود الأعضـــــــــــــــــــاء على الموضوع <<<<<
==================================
رجعت لبيتها أول ما رجعت ما أدري ايش سوت بس أنا رحت عندها اليوم التاني دخلت غرفتها لقيتها جالسه على سريرها وتبكي خففت عنها وقلتلها لا تبكي وهدأتها لين ما سكتت واتكلمنا شويه راحت قالتلي ايناس أبغا أقولك حاجه أمانه سلميلي على أصدقائي في المنتدى والله عددتكم كلكم وكل واحد أعطيته رابط هذا الموضوع انت من ضمن الي عددتتهم لينا وعدتها اني حقلكم بس اسفه مرره اتاخرت في توصيلكم سلامها >< جلست لينا يومين في البيت وفجأه في الليل اظن الساعه 8 دقت أم لينا على أمي وقالتلها أنو لينا اغمى عليها ومو راضيه تقوم ونقلناها للمستشفى كانت أمها تبكي بشده ورحنا كلنا على المستشفى وحطولها اكسجين وقالوا لازم ترتاح وسمحوا بس لأثنين يدخلوا لغرفه دخلت امها وأبوها عندها وبعد ما طلع أبوها دخل اخوها الكبير وبعد ما طلع دخلت أنا أول ما دخلت شفت لينا في فمها أكسجين >< قعدت أبكي صارت تقولي أبغا أفهم يا ايناس ليش تبكي قلتلها ما أبكي على شي قالتلي طيب سويتي الي قلتلك عليه>>>>>تقصد أني سلمت على الي قالت سلميلي عليهم
قلتلها لا ما قلت قالتلي ايناس لا تنسي الله يخليكي بعدين طلبت مني أني أجبلها قران تبغا تقرأ سورة ياسين لأنها ناسيتها>>>>لينا كانت حافظة القران ما شاء الله لأنها كانت في مدرسة تحفيظ كان صوتها في القران جدا جميل كانت تقلد صوت الشيخ أبو بكر الشاطري ><
جبتلها القران وقعدت تقرا انتهت الزياره ورحنا كلنا للبيت ما عاد امها جلست معها
رحنا لها اليوم الثاني الذي كان موعد فراق لينا لأهلها الموافق ليوم الجمعه الساعه 4 العصر والله كانت لينا ما فيها شي وكانت تضحك معانا وفجأه وكلنا كنا جالسين نتكلم ارتخت لينا فجأه وغفيت على سرير المستشفى أمها صارت تقول لها لينا عدلي جلستك في النوم عشان ترتاحي بس لينا ما كانت ترد كان في الغرفه أنا وامها وامي وأخوها الكبير جات الممرضه تبغا تقيس الضغط أم لينا قالتلها سيبيها هيا دحين نايمه الممرضه قالت لازم نقيس الضغط قالتلها طيب وهيا بتقسلها الضغط ماكانت تلاقي شي نزلت الجهاز وجابت جهاز ثاني برضو ما نفع معاها ام لينا كان باين عليها أنها خايفه كلنا كنا خايفين>< نادت الممرضه الدكتور حقها وفجاه الدكتور طلعنا كلنا بره الغرفه أم لينا صارت تبكي وحتى أنا صرت ابكي كنت خايفه عليها ويوم ما سمح الدكتور لاخوها بس يدخل قعد خمس دقايق داخل الغرفه وفجأه طلع يبكي بشده وحضن امه وصار يبكي كلنا دخلنا الغرفه وشفنا لينا >< مسكت يدها كانت يدها بارده مره كان وجهها والله منور مسكت وجهها لقيته دافي بس لينا ماكنت تتنفس ما قدرت أستحمل بكيت على طول امها صارت تحضنها وتبكي أخوها يبكي امي تبكي الكل بكي
لقد توفت لينا تلك الفتاه الطيبه التي كانت تخفف عني ألامي التي كانت تمسح دمعتي عندما ابكي التي كانت تقولي عندما أزعل انسي الدنيا مزمزي ميراندا التي كاننت تملأ البيت بصوت ضحكتها والتي كانت تجلب السرور على قلب كل أسرتها توفت لينا يوم الجمعه الساعه 6 قبل غروب الشمس بربع ساعه انكسر قلب امها مسكينه الي توفى ولدها وتوفيت بعدها ابنتها بعد ما عملو إجرائات الوفاه وتاكدو انها اتوفت نقلوها عشان يغسلوها ويدفنوها يوم ما غسلوها وجابوها البيت عشان نسلم عليها ونشوفها لأخر مره كان بيتهم مليان ناس كانوا يبكوا كلهم اول ما جات لينا نادوني عشان أسلم عليها قلتلهم ما أقدر اشوفها وصرت ماسكه في الدرج وما ابغا ادخل سحبتني أمي غصبا عني ووقت ما دخلت شفت منظر لحد الان في بالي ولن انساه ابدا شفت لينا متمدده على لوحه طويله كانت لينا ملفوفه بغطاء لونه أبيض وحولها الناس كلها تبكي ما قدرت أستحمل الموقف طحت على الأرض أبكي والناس صارت تسكت فيا قربت من لينا اكثر سلمت على خدها وراسها كان وجهها بااارد مرره وكان أبيض ماشاء الله وعلى الرغم من انها ساكته وماتتحرك ألا انها مازالت حلوه مره كانت أختها جنبي ماسكه يد لينا من فوق الغطاء الأبيض وتبكي وكانت أم لينا تبكي جنب بنتها قالوا خلاص لازم يجوا أهلها الرجال عشان يدفنوها كلهم خرجوا من الغرفه ألا انا واخواتها وامها قاعدين ماسكينها ونبكي خرجونا كلنا وهذه اخر لحظه واخر دقايق أشوف فيها لينا امامي وامسكها بيدي أخذوها وصلوا عليها في المسجد الحرام ودفنوها في مكه المكرمه مكان مولدها الأصلي في>< تلك الأثناء كنا كلنا في البيت وانتهى أخر يوم من العزا يوم الأثنين بعد ما راحوا كلهم طلبت من ام لينا انها تعطيني مفتاح غرفة لينا أبغا أدخل غرفتها أتذكرها اعطتني امها المفتاح فكيت الباب كانت الدنيا ظلمة فتحت اللمبه لقيت غرفة لينا مرتبه>>>>أول مره لينا تترك غرفتها مرتبه><
افتكرت يوم ما كنت انا وهيا جالسين على السرير اخر مره تكلمني شفت شنطة المدرسة حقتها مفتوحه ولقيت جنبها كتاب الاحياء مفتوح ومأشر عليه بالقلم الأزرق شكلها كانت قاعده تذاكر >< شفت مريول المدرسه حقها معلق كان ريحته كله لينا ><شفت كمبيوترها مفتوح على شاشة توقف حركت الماوس لقيتها حاطه خلفيه صورة كاكاشي>< أول ما شفت الصورة قعدت ابكي ما قدرت استحمل هيا كانت تحب كاكاشي شفت ملف ورد على سطح الكمبيوتركان مكتوب عليه مكسات فتحت الملف ولقيت فيلو كلام أظنها كانت مجهزته شكلها كانت تبغا تقولوا لبعض الأعضاء ما أدري كانت بتقولوا ولا لأ كانت كاتبه كلام لمس أنجل وكاتبه فوقه سوكي وكلام لواحد من الناس وكاتبت فوقه واحد ولشقاوه وميرا وسايلنت والريم وكاتبه لعمو مسترام وفارسة النجوم وياقوت وياماناكا اينو وكوكو وفيي كمان بعض الأعضاء بس ما اتذكرهم كلهم
هادولي الي اتذكر كتبتلهم كلام كانت مجهزه لهم كلام طويل ما اتذكره بس شكلها تشكرهم فيه وما أدري رسلتوا لهم ولا لأ قعد أبكي من كل قلبي رغم انها تعبانه وفتره قصيره الي جلست فيها في البيت بعد الحادث ألا أنها دخلت مكسات واتذكرت انها تكتب قبل لا تروح المستشفى مره تانيه كانت لينا انسانه طيبة والله عمرها ما زعلاتني كانت طيبة معايا من بعد ماراحت هيا واخوها عبد الرحمن أصبح البيت هادئ كأنه لا يوجد به أحد ولكنها تركت لنا بصمه جميله في بيتها وفي مكسات دمعي على خدي من الحزن عليهم لن أنساها أبدا وستبقى لي كأخت وصديقه وكل شي بنسبه لي حتى وأن كانت متوفيه ولكن شي واحد محزني أكثر وأكثر
>< أنها ماكتبت لي في تجرافي الجديد كنت أتمنى هيا اول وحده تكتبلي بس >< اتوفت الله يرحمها وما كتبتلي
لن ننساكي أبدا يا Miss..Ninja يا أم الدلاخه سوف تبقين كأنك معنا في بيتك وفي مكسات سنبقى نتذكر مشاركاتك الجميله بين موضوعات صفحات مكسات للأبد لن أنساكي يا اعز جاره عرفتها في حياتي
شكرا لكم على قرأت القصه
في امان الله


انتهت القصة وللأمانه الموضوع منقول


__________________________________________________ __________

الله يرحمهم جميعا ذكريات جميلة ومؤلمة
شكرا للنقل الجميل و بارك الله فيج

__________________________________________________ __________
الله يعطيك العافيه
تقبلي مروري مع زهرة تقدير




__________________________________________________ __________
بارك الله فيكي أختي قصة محزنة
الله يرحمهم ويصبر أهلهم وحبايبهم
شكرا ع نقل الموضوع لنا
سلمت يمناك

__________________________________________________ __________

المشاركة الأصلية كتبت بواسطة اشراقةقلم الله يرحمهم جميعا ذكريات جميلة ومؤلمة شكرا للنقل الجميل و بارك الله فيج

مشكور أخي على مرورك الجميل

الله يرحمها ياررررب