عنوان الموضوع : نبضات انكسار للرجل
مقدم من طرف منتديات الشامل

أسعد الله صباح ومساء الجميع بكل خير

رجعت مره ثانيه لـكم بمووضوع منقول زي العاده

بس وربي اعجبني جد فيه شي يجذب المهم

موضوع النبضات الواقعيه اللي نعيشها بـ مجتمعنا

يتكلم عن واقعنا بس بطريقه هستريه شوي عشان مايكون

الموضوع ممل ومثل غيره

وأكيد بيكون فيه خطمات وانبراشات مالها دخل بالموضوع

وبعدين نجي الى ارائكم اودمي<<جمع ادم<<مس نذله جد


>>>>> ردود الأعضـــــــــــــــــــاء على الموضوع <<<<<
==================================






بداية المواضيع

شركة الإتصالات السعوديه

تحت شعار ولم فلوسك وسدد فاتورتك واذا سددت بدري ترانا نبي نفصل عليك

المودم

الاتصالات السعوديه ماشاء الله عليهم ترا اذا اتصلت عليهم مايخلونك تنتظر 10 دقايق

بعدين يقفلونها ,

معاناتي مع الاتصالات السعوديه معانات كبيره يعني واحد بالويك آند مقطوع عليه

النت وش يسوي بالله !

واللي يقهر تتصل على الشركه اللي مشترك عندها يقولون لك ان العطل من

الاتصالات وتتصل على الاتصالات يقولون لامستحيل العطل عند الشركه يعني يالله

خلك مثل الكوره

وبيمزعونك يمين ويسار

لاواللي يقهر اكثر شي بالدنيا اذا كان عندك جهاز الدريم بوكس اللي يفتح القنوات

الرياضيه بدون ماتدفع ويشبك على المودم ولازم المودم يكون يشتغل وتكون فيه

مبارات نهائيه بين المان والبرشا ويجيك صديقي النت يفصل علينا بالله وش تسوي

اللحظه هاذي

...!



لاواللي أشد من هاذا كله يكون فريقك طالع من بطوله قبلها بيوم ومن بكره يفصل

عليك النت ياويل حالي بس ,,

يوم دقيت على الأتصالات وجلست ساعتين وانا منطق على التيلفون قالو لي ان فيه

تحديث بالكيابل اللي

بحارتكم قلت ايوه متى يضبط قال بكره او اليوم قلت زين وبأخر شي اكتشفت ان

الأتصالات مايداومون

الخميس والجمعه يعني يافيصل<<فيصل اسم صاحب الموضووع اللي نقلته منه

أمش تحت شعار ويك آند بدون نت احسن

الله يصبرني الى مايضبط الاتصال وعقبال مافتح مقهى نت انام فيه


ومدري تعامل الاتصالات السعوديه الى متى بيكون كذا ؟

~


__________________________________________________ __________




الموضوع الثاني

ناس تقبلو فكرته وناس رفضوها

اللي هو شغل السعوديات في المستوصفات الخاصه والمستشفيات ,,

بالموضوع هاذا الناس اللي رافضين الفكره يقولون ان مابي مثلاً بنتي او زوجتي او

اختي تختلط مع الرجال

سؤال منبرش /

يعني بنتـه ماتروح السوق لحالها مع السواق او مع امها !! طيب السوق مافيه

رجال ,,,!!

غير السوق نقول ماتروح مستشفيات تعالج ويكون الدكتور رجال موب حرمه !!

أنا عارف ان فيه كثير بيجي في باله لوقلنا لك يافيصل ترضى أحد خواتك او حرمتك او

بنتك تشتغل الشغله هاذي ؟

بـ جاوب عليه عادي ايه تشتغل اذا كانت محتشمه ولبسها مافيه غلط ومحترمه

نفسها اما اذا لبسها موب محترم وشغل خرابيط مالها الا تنطق بالبيت ,,

شفت اصناف كثيره بالمستوصفات الخاصه سوا من الصالح والطالح اخرها مره يوم

وديت أبوي

للمستوصف اللي عندنا قبل اسبوع ونص تقريبا شفت العجب العجاب هناك أنواع

التميلح وقلة الحياء

يعني تقريبا تقريبا 99 بنت تشتغل هناك اللي لقيتهم محتشمات ومحترمات ثنتين

والباقيات نص لفه

والله ومافيه الاقوة كركره بالغرف اسمعهم تقل قايلين لهم تراكم بمستوصف

أبوكم !!

انا ماقول انهم ماينفعون بالعكس اكيد ينفعون بس المشكله اذا كانت البنت ماهي

محترمه نفسها هنا البلا


انا صحيح اني ماقدر أغير عقول البشر بس الموضوع كان فاش خلئي شوي وحبيت

أتكلم فيه ,,

__________________________________________________ __________




نبضات انكسار أو عفواً إنبراشات انكسار /


* آه منك يابـونوره تغنيت بـ جده والرياض ونسيت باريس السعوديه ( الشرقيه والقصيم ) الشرقيه بـ طبيعتها والقصيم بـ جوها .


* أعربت الفنانه العصلا شاكيرا عن اعجابها الكبير بـ شخصي الكريم وطلبت مني اني اصور معها فديو كليب لـ أغنية مكرينا مكرينا مكرينا الجزء الثاني .


* مازالت قناة Mbc تعرض المسلسلات القويه بـ الأفكار امثال مسلسل أسوار والساكنات في قلوبنا تحت شعار مخربين بزرانكم مخربينهم بالطيب بالغصب مخربينهم .


* أشين شي بالدنيا سواقة السواقين الجدد يعني تحصله يمشي 120 وبلحظه من لحظات الدلاخه يجلد الفرامل جلد ومن قوي دعسته للفرامل تحس ان رجله تحك من تحت واذا كان معه حريم ورا وبزارين تحصل روسهم تصك بالقزاز اللي قدام .


* الى متى والأفلام الهنديه يعيشون بـ دلاخه يعني مدري هم يحسبون انهم بيعرضون افلامهم على بزران اجل احد المقاطع بـ أحد الأفلام حصان يجي طاير ويدخل تحت قطار مدري شاحنه .


* أنصح سكان الرياض بـ مغادرة العاصمه بعد ماكتشفو مرض انفلونزا الخنازير بالتخصصي يااوتس والله يااسم المرض يكره الواحد بنفسه الله يعافينا ولايبلانا .


* أثبتت الفحوصات الطبيه أن الحارس جالويجي خان يتعـآطى المنشطات وسيتحول الى المحكمه غداً صباحا مع العلم ان الحارس هو حارس العماره اللي بحارتنا .


* شوارع الرياض ماينفع فيها الا سياكل والا بتخرب سيارتك يعني شوارع ماهي قد سياره بـ مليون ريال .


* من جنون البقر الى انفلونزا الطيور الى انفلونزا الخنازير والله يستر لايطلع لنا مرض جديد من الحيوانات والظاهر والله اعلم يقولون الأطباء ان فيه مرض جديد بيطلع اسمه عطست بعير .


* نوال الكويتيه صح انك عجوز بس صدقيني انتي فنانة العرب وعندي اقتراح وراه ماتتطلقين من العروج وتاخذين ابونوره عشان تجيبيون لنا كتاكيت صغار ونسميهم فنان وفنانه .




__________________________________________________ __________



~


الموضوع الثالث



زواج البنت بالغصب يعني ياتاخذين فلان بالطيب والا غصبن عنك لابوك لابو من جابك ,,

كثييييييييييير نسمع بالقصص اللي مثل كذا يعني اذا البنت ماعجبها فلان او ولد عمها

وقالت لـ أهلها مابيه يزوجونها غصبن عنها وبكل بساطه عندهم عادي بنتهم تنقلب

حياتها جحيم ..!

صاحب الحركات هاذي فكره من العصر الحجري مافيه مخ وان سئلته ليش تسوي كذا يقولك

البنت ماتعرف مصلحة نفسها .. يعني بنت عمرها 20سنه وأكثر ماتعرف مصلحة نفسها مدري

هو جنون والا عباطه !!

ماقدر اشبه الحركه هاذي الا بـ ؤد البنات أيام الجاهليه بس بطريقه ماهي مباشره

مايبي بنته يرميها على واحد هي ماتبيه عشان يفتك منها مثل الجاهليه اللي يدفن

بنته بالتراب عشان يفتك منها سبحان الله والله لايبلانا بالعقول السقيمه ذي .

انا مايقهرني الا اذا قالو لـ الأب ليش زوجت بنتك بالغصب يقول ماتعرف مصلحة

نفسها ؟

أوكي نقدر وعارفين انها بنتك وتبي مصلحتها بس ماتسوي فيها كذا ترميها بالشارع

مثل الجزمه القديمه والجميع بكرامه طبعاً ,,,

البنت اذا ماتزوجت ماراح تصير عار عليك ولاهو حرام اللي كاتبه الله بيصير سوا

تزوجت بعد الـ 60 سنه مافيها شي ولاهو عيب أصلن اما انك تغصبها على واحد

ماتبيه وتقلب حياتها جحيم هاذي اللي حرام لاوالزواج يكون بالحظوظ يعني اذا كانت

البنت تدرس وودها تكمل دراستها وطلع زوجها نجس خلاص تمسح الدراسه من

راسها اما اذا كان كويس فـ الحظ ماشي معها ..

سؤال دايم يدور براسي ليش بـ مجتمعنا البنت مالها راي بالذات بزواجها للبعض

طبعاً ؟

أغلبنا أو كلنا نسمع بالطقاق اللي يصير بـ ليلة الدخله يعني البنت اللي متزوجه

غصب ماتبي زوجها وزوجها يبي شي منها وهي رافضه فـ يقوم الطقاق بينهم على

أتفه الأسباب ,, وش ذنب البنت بالزواج هاذا ؟

ليش بـمجتمعنا غلطة الولد عن وحده وغلطة البنت بـ ألف ...؟

سالفه صغننه /

وحده من أقارب خويي تزوجت من واحد عنده فلوس طبعاً بالغصب من ابوها وامها

وليلة الدخله المفروض تكون سعيده بس للأسف كـ عادة زواج الغصب انقلبت الليله

الى جحيم يعني طقها زوجها ومابقى بجسمها عظم صاحي كله مكسر وبـ أول ليلة

زواجها نامت بالمستشفى مرقده ..!

الله يصلح حالنا ويفك ربعنا من التفكير العقيم هاذا


__________________________________________________ __________
الله اخيرآ خلصت المهم وربي بغيت اغير في الموضووع

واضيف لمسااتي عليه بس قلت لا اخليه لكم وابغى رايكم

في كل موضووع من مواضيعه ابغى اعرف افكاركم انا خليته

لكم كذا من دوون تغير علشاان تشووف ولد سعوودي عنده ذي الافكار

انتم معه او لا

واسفه على الاطاله


وربي مقهوووووره من الاتصالااااااااااااات مثل صاحب الموضوع


حسبي الله عليهم


<<عصبت


والله ذكرتني بالمشكله اللي عندي وعصبت على الاتصالات هع


الله يعطيك العاافيه عالموضوع الراائع