رواية ماتغير شي بس هالمكان صار فاضي - مشوقة
عنوان الموضوع : رواية ماتغير شي بس هالمكان صار فاضي - مشوقة
مقدم من طرف منتديات الشامل
..((ما تغير شي..بس هالمكان سار فاضي))..
كنت انا وياه سوا وكان مايفارقني لدرجة إذا حس يوم بوحده حتى عند باب الحمام ينتظرني..
كان شريك شقتي وغرفتي وكان بصدق شريك قلبي..
كنت طفران وجا حبيبي طفرني
كان شافط فلوسي بمصاريفه الكثيرة..
كنت اصرف عليه واصرف على نفسي..كان حبيب قلبي وروحي كان مخزن اسراري واعجز عن وصف حبي له..
تجذبني دايم شخصيته وطريقة كلامه وتفكيره..
كان لاشفته لقلبي دوا..سبحان اللي خلاني اعشق هالانسان وكل يوم يزيد حبي له واشتاق له وافقده حتى لوغاب عني مجرد دقايق..
ولا تلـــــــــــــــــــومـــــــــــــوني فــــــــــــي حــــــــــــــــــــــــبه...!؟
كنت قبل لا اعرفه عايش في سكن عزاب قريب من جامعه الملك فهد للبترول بالدمام وكنت جاي من الرياض..
وماكنت اعرف احد بالسكن..
وفي يوم كنت طفشان طلعت اتمشى بالممرات شفت واحد شكله مضيع كان معه شناط وواضح انه جاي من مطار..
مسوي كوبرا وكاشخ ويعاطس من كثر العطر اللي باخه..
مريت من عنده سلمت وقلت له:بتسكن جديد هنا
رد وهو معصب:يعني وش رايك!؟
قلت :طيب هديّ وراك معصب..مشيت ونا منقهر من ردة فعله ورحت مشي لسوبر ماركت قريبه وظفيت لي خرابيط بعد ساعه رجعت لقيته مازال موجود..
ضحكت من قلب عليه لان الكشخه راحت وطي الشماغ ساير حوسه وكمومه مرفعها ويتهاوش مع حق الاستقبال ونا جاي ابروح لغرفتي نادان:هيييييييه..
لفيت عليه ونا رافع حاجبي ومعصب منه لان ما احب حد يقولي هيه قلت:اظن لي اسم..
رد:ووشلون تبيني اعرفه..!!
قلت:طيب وش تبي!؟
رد:ماتعرف سكن قريب من الجامعه هنا بذي المناطق..
قلت:دخت انا من كثر مادورت..ماظنتي تلقى..
قال وهو متحطم:يووووووووه لاتقووول
رحمته وقلت:اللحين اطلع لغرفتي ريح شوي وبعدين ربك يسهل
طار الرجال فرح قال:جد والله!!ياحبيلك تشيل معي الشناط؟
قلت:امري لله..وعطان شنطتين كبار مع كيس السوبر ماركت واخذ هو شنطه صغيروونه
عصبت انا وقلتله:انا قلت ابشيل معك ماقلت عنك
قام يضحك من قلب وقال:طيب هاتها
قلت:لا خلاااص
قال وهو مازال يضحك:ياحبي لك..
ونا منقهر منه في قلبي اقول ياكرهي لك..
رقينا للغرفه وحطيت شناطه ع جنب كان فيني حراره واول مادخل هو شغل المكيفات حقت الشقه..
قلت الشكوى لله بس هي كلها دقايق والرجال يروح..
جلست بالصاله الصغيره وكان قدامها مطبخ سيرفس يطل عليها
دخل الرجال وكان البيت بيته للمطبخ ونا فاتح فمي مستغرب من جرأته..
ناظرني وهو مبتسم وقال:وش تحب تشرب..!؟
سكت شوي ولا شعوريا قمت..وقلت لو سمحت اجلس انا الي ابسوي القهوه..موب شغلك ذا
قال:تسلملي والله ..وراح ع جنب ونا اناظره وقام يفتح في اكياس السوبر ماركت اللي جبتها معي..وهو مشغول
يفتحها قال:اسمع حبيبي مانبي قهوه نبي شاي...شكلك جايب بسكويتات حلوه..!
انا بصراحه ماتوقعت ان فيه احد بهالعالم فيه هالجرأه..ووقفت مكاني متنح..
لف عليّ وقال:تبي اساعدك..؟!
قلت: لاشكرا..وشغلت الكافتيرا..وقمت اطلع الكاسات ومن ذا الخرابيط..
راح هو وشغل التلفزيون..وحط على سبيستون..وقام يتابع وهو متحمس افلام كرتون اظن اسمه (ناراتو)..
استغربت من شخصيته واحد بيدخل الجامعه يتابع افلام كرتون!!!
كملت شغلي ويوم قضيت جبت معي الصينيه..لقيته منسدح ع الكنبه ويتابع وهو متحمس ويوم مريت من التلفزيون..
قام يهاوش..
ارتعت منه صراحه..قلت وش يبي ذا؟؟؟
رحت جلست بجمبه ع الكنبه نفسها عند رجله لانه الاخ كان منسدح,,إلا وشوي يقوم ويحط راسه ع رجلي..جاني ضحك وانقهرت منه بنفس الوقت ومدري وش جاني ماقلت ولا شي..
قربت صينية الشاي..
وبديت اصبب.. ونا مو قادر اتحرك بسبب هالعله اللي نايم فوقي..
وفجأه قطع الارسال وسار يشوش التلفزيون
قام الولد..وهو متحمس نقز وقام يخبط راس التلفزيون ويقول:يااحماار ذا وقته تنكت..!!
هالمره ماسكت قلتله:هييه ارفق ع التلفزيون ذا جلست شهر اوفر من مصروفي علشان اجيبه,,..
لف عليّ وقال:اسف ماقصدت..,,وطفى التلفزيون والرسيفر..وقام يغمس البسكوت بالشاي..حامت كبدي ونا اناظره,,البسكوت يطيح بالشاي ويجي يطلع القطعه اللي طاحت بحبة بسكوت تجي وتطيح الثانيه يجيب ملعقه يحاول يطلعهم يتفتتون ويحتاس الكاس..
رحت للمطبخ وجبت كاس جديد صبيت له شاهي واخذت الكاس حقه وكبيته بالبلاعه..وهو متنح يناظرني..
ويوم جلست..قلت له:خذ اشرب في ذا
قام يصارخ(ونا الظاهر بديت اتعود ع الوضع):هييه يالدلخ وش سويت..؟!
قلتله:وش سويت..؟؟عاجبك القرف اللي انت فيه..!!
قام يضحك وقال:لو سويت كذا ماراح تخلص..
استغربت منه بس طنشته..
وشوي اسمع اصوات تصقيع الملعقه بالكاس..وكنت اتجاهله واناظر جوالي..بدا الازعاج اكثر..وكل شوي يجر بسكوته من قدامي..
رفعت عيني..وبغيت انهبل..لقيت الكاس سار عصيد من جديد..
قمت اضحك بشكل هستيري لين سالت الدموع من عيني قلتله:وشفيك انت وش المشكله معك..!!
رد:تدري وش الحل..
قمت اناظره يعني كمل..ورفع الكاس اللي لو شفته تمغصك بطنك..وفيووو,,شربه في جغمه وحدهـ .. وخرت عيني خفت لا انظله وقمت اناظر الساعه..لقيتها 12..والرجال جاي من 10 ونص..وقلت شكله مطول..ونا فيني النوم
قلتله:يااحلوو..متى رايح..!!
قال:مسسسرع مليت..
قلت ونا ارقع:لاموب قصدي تسذا..بس يعني..
قاطعني:يعني قصدك انام اليوم..معك
من الوهقه قلت:اييه..اجل اخليك تروح كذا..
قال:طيب متى العشى..؟؟
قلت ونا مستغرب :عشى..؟؟ انا دايم ما اتعشى..اكل أي شي خفيف يعني زي ذا اللي تو اعتبره عشى..
قال:اممممم..اليوم ابمشيها بس بكرا عاد ابي عشى..
قلت:طرار ويتشرط..
قال وهو يضحك:شفت كيييف..حظك طحت مع واحد زيي..
بديت اهضمه شوي واتقبل وجوده..قلتله هذي غرفتي..
قال:امم مافيه الا سرير واحد؟؟
قلت:ايه اجل..
قال:اممم اجل ابنام الصاله..
قلت:اجل..
قال:اممممم..يالله ابمشي حالي اليوم دام بكرا في عشى..
قلت:مصدق انت اللحين..منين اجيب لك فلوس عشى؟؟
قال:عادي اطبخ لي مو مشكله..
قلت:المووهم..بتنام هنا..ولا تقوملي بدري تسسبب ازعاج خلاص..وذي اسبايستوون حقت الورعان اصح تشغلها..فاااهم..
قال وهو يهز راسه زي البزارين:ان شاء الله..
وحط راسه ع الكنبه ولفــ تحته شماغه,,وبسرررعه غريبه نام لدرجت شكيت فيه متى مداه حط راسه..ضحكت ع شكله لان شعره حوووسه..ويرفس المخدات برجلينه..
رحت لغرفتي..وصكيت الباب..وماقدرت انام جالس افكر في ذا الضيف الغريب اللي لحد الان ماعرفت اسمه حتى..
وجالس افكر متى بيروووح..!؟
وشووووي..شوووووي..ماحسيت في نفسي..ووخوووووخخ ششششش
..((حسيت ببكوس في وجهي..ومن تحت فكي..قمت فتحتي عيني..وقلت شكلي احلم..جيت بالظلام ابسحب الشرشرف ماينسحب..!! ابي اجرهـ..دووووف دججج..احد يدفني ع الارض واطيح طيحه حسيت ان ضلوعي تكسرت منها..قلت معقوول ذا حلم))..
قمت فتحت اللمبات ونا مرتاع..إلا اسمع صراخ اذني تعودت عليه..
"ميين ذا الحمار اللي شغل النوور"
بغيت انقز من الروووعه وقلبي طار..ناظرت..ركزت..عرفت مين هو..
كان ودي اقومه اصفقه ع الحركه السخيفه ونا افكر وش جاب هالدوبي هنا..كان هو نفسه اللي نايم بالصاله..قلت ياشيخ تحمل
وشلت شرشفي ونمت بالصاله..وشووي شووي كنت تعبااان..
نممت من جدييييييييييييد..
..((احس فيه احد يدفدفني..ياهوو ماهي بشغله وش السالفه))..
قمت ونا معصب.. لقيت الولد نفسه بغيت اصيح من القهر لانها الساعه ثلاث ونا مانمت..
رحت صحيته..قلت:هييه..هييه انت..؟؟ وش قصة ابو اهلك تلاحقني من اليوم..!!
رد وصوته مليان نوم:ما احب انام بالحالي..
قلت:هه لا يكوون تخاف بس..
قال:لا متعود انام جمب اخوي..
قلت:ياديين الله..وحاولت انام واكلم ذا الدلخ بكرا..
..قمت الساعه وحده ونص..مو من عادتي لاني دايم اقوم تسع..
فتحت عيني لقيت المكان مرتب وهادي..
رحت قضيت الفجر والظهر..
وشوي تذكرت ان فيه شخص اختفى.. إلا وينفتح باب غرفتي.. ويطلع الولد..وهو مبتسم و يأشر بأيده:صبااح الخييير..يالحلو..
قلت:صبااح النوور...وقمت اروح للحمام علشان اغسل وجهي..
وناجالس قدام المرايه افرش اسناني..
جا الولد وتركى عالمغسله وقام يسولف..قال:وش تبي فطور..؟!
قلت ونا فمي كل ابوه رغوة معجون:مووب شغلك ذا..
قال:اجل افطرك ع ذوقي..
عصبت:قلت لك انا اللي ابسوي الفطور..
قال:طيب وراك معصب ماقلت لاء..
قلت:كل ذا وماتبيني اعصب..!!
تنهدت ونا احاول اهدأ..طلع الولد من الحمام..وجلس بالصاله..
طلعت والمنشفه ع كتفي..ووجهمي مويه..مانشفته لاني تذكرت شي خطير..
قمت اناظر للخشه اللي قدامي..حاط رجل ع رجل..ولابس جينز..وبلوز سودا..
ارتعت وقمت اصاراخ فيه:هييه انت من وين جايب هالبلووزه..!!
الولد:شفتها بالدولاب عجبتني خذتها..
هنا حست اني ابنفجر منه..قلت:تستهبل انت ووجهك..
قال:هههه لا امزح..كنت ارتب غرفتك..وشفت ذي البلوزه وكانت نفس بلوزه عندي تذكرتها ولبستها..."لاحظوا كان يرتب"
شكيت في كلامه ورحت الغرفه اتأكد..لقيت بلوزتي موجوده..ارتحت..
اما الولد فطس ضحك علي وحسيت اني تفشلت..قام قالي:بتسوي الفطور ولا اقوم اسويه..
قلت:لا اللحين ابسويه..ونا اجهز الفطور..جلس ع دكة المطبخ..
ويحرك رجلينه ويلعب بها تقل بزر..
ونا جالس اقلب البيض ع الطاوهـ .. جا من وراي وخمني من ظهري.. تفاجأت من حركته ولفيت راسي اناظره..
ناظرني وقال بصوت واطي: احبـــك..
ابتسمت..وكملت شغلي..وشوي فكني وقام يطلع الصحون وشكله قام بدري وعرف اماكن الصحون وكل الاعراض..
بديت احب هالانسان واراقب حركاته..كان كل ما اناظره يبتسم.. او بالأصح القاه مبتسم..طفيت النار ع البيض لقيت كل شي جاهز..
اول مره من جيت الرياض افطر مع شخص غيري..
سويت الشاهي..وحطه ع الصينيه..وفرشنا في الصاله وشغلنا التلفزيون..وكان حاط ع سبيتون يتابع تاما..ضحكت عليه في قلبي..
وقمت آكل..وشوي وقف هو عن الاكل..ناظرته مستغرب..
قال: تصدق..!!
قلت:وشو..
قال:لحد الان ماعرفت اسمك..
قلت:هه تو تلاحظ..!!
قال وهو يضحك:لا من اليوم ونا افكر..بس كل ما اجي ابسألك تكون معصب..
قلت في قلبي "اعصب منك"قلتله:وانت ماقلتلي اسمك..
قال:عبدالعزيز..وانت
قلت:عاشت الاسامي ياعزو...معك..ناصر
قال:عاشت الاسامي يانصووور..
قلت:هاه ماودك تكمل..
قال:افا عليك..ونا اقدر اذوق بيض نصور و اخليه..
قلت:تسلم والله حبيبي..
قال:جد والله!!
قلت:ليه تحس اني اكذب..!!
قال:انا حبيبك خخ.."وناظر الارض"..احسك تكرهني..
عاد انا توهقت لان اللي يشوفنا يقول كذا..قمت ظربت كتفه,,قلت: يارجااال..هو في حد يقدر على قلب عزوووز...
قال:ياهوو ع الرومنسي..يعني ماتمزح
قلت:قصدك ما اجامل.."وفعلا وقتها حسيت اني بجد حبيت هالآدمي بكل ماتعنيه حروف هالكلمه"..
قام وقف..ورفع الصينيه..قال:خلاص يكفي بلع...وانحاش
قلت:هييه خييير ابي اكل جوووعان كافي امس مانومتني..
وقام ينحاش ويركض بالصينيه..قلت:انهبل علينا الرجال...
مات من الضحك..وقال:خلاص لاتسمن علينا بعدين مايكفينا سرير واحد..
قلت:ياحليلك ومين قالك انك بتجلس ..انا قلت تريح ماقلت تقلط..وقمنا نظحك سوا..
وبس هنا وقفتـــــ .. جلست افكر فاللي كنت اقوله من شوي..!!
عــــــــــــــــزوووز بــــــــــــــــيـرووح..!؟
لاء ماصدقت اندمج معه..يعني انا بجد حبيته..لا ذا الانسان بيسبب لي مشاكل..بس شكله طيب وحبوب وينحب..بس راح يضايقني كثير..بس بعد ماسوا جو في البيت..بقدر اجلس لحالي..!؟
::
كل يوم بنزل جزء
ترى القصه جنان واحداثها حمآآس لا تفوتكم
انتظروني بووكره بالجزء الثاني
<center> >>>>> ردود الأعضـــــــــــــــــــاء على الموضوع <<<<<
================================== </center>
هلا وغلا فيـــــــــــك أختي مملوحـــــــــه
أيش الروايـــــــه الحلوه هذي .. حسيتها كانها تسولف معي ^ــ^
ننتظـــــــــر منك البارتات الجايـــــــــــه
ماننحرم من أبداعك يالغلا ,,,
تحياتي
*برســـــــــــــوجــــــــــــــــــــه*
__________________________________________________ __________
__________________________________________________ __________
روووووووووووووووعه حمآس وربيـ حسيت اني دخلت جو ويآهمـ هههههههههههههههه
أختي ويآجعلكـ تعرسين يآربـ>>>وش درآكـ انهآ بنيهـ مو متزوجهـ!!!هههههههههههه
ننتظر البآقي بكل حماس ارجوووووووووووك
تسلم يدينك ياعمري
أختكـ //أحزآآآآآآآآآن
__________________________________________________ __________
روايه حقا ممتعه
ترانا بالانتظار
سلمت يمناك
__________________________________________________ __________
كلمات رائعه وجميله
اهنيك علي الاحسااااس الراقي
تسلم اناملك علي الابدااااااااااع
تقبل مرررررررررروري
اسيررررر زمااااااااااااااني
اللــــــــــــــــــه يطيتكـــــــ الف الف الف عا فيــــــــــــــــــــه
على القـــــــــــصه الجمـــــــــــيله لكـــ الشكر
يـــــــــــــــــــــلـــــــــموووووووووووووووو
لكــــــــ تحياتي/ولــــــــد كاش؟:15:
