( لبى قلبك ) مره حلوه "سعوديه" - مشوقة

عنوان الموضوع : ( لبى قلبك ) مره حلوه "سعوديه" - مشوقة
مقدم من طرف منتديات الشامل

السلام عليكم ورحمة الله وبركاته ..


هــــــــذي ثاني رواية انزلها لآن شكلها روايتي الآولى ما عجبتكم ...


وان شالله تعجبكم هـذي زي ماعجبتني ..

للكاتبه .. (ريمي) ..

وهي شكـــل اجزاء وسعوديهـ ...
.............



ما راح اطول عليكم وهاذي شخصيات القصه:
******************************
الجده(فوزيه) الجد(فهد)
عيالهم:
عبد العزيز أكبر عيالهم متزوج ساره ويشتغل في شركه ابوه هو مع اخوه عبد الرحمن عيالهم:
عبدالله:27 سنه موظف مع أبوه في الشركه وخاطب بنت عمه ندى ويموووت فيها من يوم وهي في المهااد<<<يعني لازم المبالغه
نوره:24 سنه متزوجه ولد عمها فهد وتوها والد(دحومي)
محمد:23 يدرس في الجامعه قسم( ادارة اعمال) هو وسلمان عمه الي ما يفترقون عن بعض (روح وحده في جسدين) هو مملوح طويل وضعيف بس ضعف حلو أسمر مايل للبياض أحلى شي فيه عيونه واسعه عسليه <<نظراته تذبح
العنود:18 اخر سنه ثانويه عامه أدبي رجه من الدرجه الاولى بنت ما عليها طولها متوسط جسمها حلو مو ضعيفه مو دبه يعني نقدر نقول دبدوبه بيضه وشعرها بني الى كتوفها (طبقات)
ريم:17 ثاني ثانوي علمي حبوبه وعسل بس دائما مناقر (هواش)ويا العنود

عبد الرحمن الولد الثاني متزوج فاطمه أخت ساره <<يعني أخو وأخو متزوجين أخت وأخت <<لغه هنديه هههههه معليه عيالهم:
فهد: عمره27زوج نوره
طلال:25سنه يدرس بره في بريطانيا باقي له 2 ويخلص
ندى:21 البنت العنيده المكابره بس قلبها طيب هي مملوحه وأحلى شي فيها بياضها الصافي الي مثل الحليب فيها غرور بس في محله صديقتها الجازي مرره معاها
الهنوف:18 سنه ثالث ثانوي مع العنود وتوأوم روحها بنت جميله هي طويله نوعا ما شعرها طويل أسود ونااااعم جسمها حلو رشيقه فيها هبال بس اركد من العنود بشوي
نايف:أول متوسط اخر العنقود ومدلع عند امه وابوه ودووم مناقر مع الهنوف

عبدالله :ولدهم الثالث زوجته خلود توفى (الله يرحمه)قبل خمس سنوات في حادث سياره وهو كان يحب امه أو بالاصح متعلق في أمه واااجد فكان ساكن جنبها جدارهم واحد وبينهم باب داخل الحوش فيطلعون ويجون بدون عبايات وغطاوي وعنده أربع بنات متعلقين في جدهم وجدتهم واااجد المهم بعد ما توفى ابوهم جدهم كان لهم الابو وما قصر عليهم بشي:
منى :22 سنه تدرس بمعهد وهي أقرب وحده لعمتها بدور على ان شخصياتهم متناقضه منى وحده رزينه وهاديه وبدور....هههه
دلال : كبر الهنوف والعنود علمي وهي 24 ساعه على اللبتوب حقها تحب تسوي تصاميم وخاصه التراثيه وهي هاديه ومنطويه وكانت اكثر وحده متعلقه بابوها وهو الشي الي خلها تتعلق بجدها وجدتها اكثر
دانه:ثاني ثانوي أدبي مع ريم دوم الدوم هي الوحيده من خواتها اللي مفرفشه وهبال حبوبه ولسانها مافي مثله ترد الكلمه بعشره وراعيه طناز بس على مزح
شهد: اخر العنقود في اول ابتدائي دبدووبه وخدودها الورديه تهبل مسويه جو في البيت ومتعلقه في جدها كثيير

منيرة:البنت الاولى لهم متزوجه خالد وعندها:
ناصر:ثاني متوسط تعرفون العيال في السن هذا مو لازم اشرح.
رزان:ثاني ابتدائي وهي وشهوده كأنهم خوات كل شي عند هاذي لازم الثانيه عندها

سلمان:23 بالجامعه واحد بايعها هبال على مستوى ما بقى بنت ما كلمها وجريئ درجه اولى بس وااحد يوسع الصدر مابينه وبين محمد الا شهور

بدور:أحلى شخصيه رجه وهبال ولسانها متبري منها بس طيبه وعلى نياتها طبعا هي وسلمان توم وجيري ما يسكتون 21 سنه في الجامعه وااااااخر العنقود

انتهت الشخصيات الاساسيه في القصه طبعا مليتو من كثرهم في شخصيات ثانيه بس بتتعرفون عليها وسط القصه..
في بيت عبد العزيز بعد ولادة نوره باسبوع كانوا مسوين التمايم وعازمين الاهل وحوسه وخبصه
في غرفه العنود
ريم تفتح الباب بقوه وتدخل :وجع سنه اناديكم يلا المعازيم بدو يجون وانتو الى الان ما خلصتوا
العنود :يوجعج ان شاء الله ما تعرفين تدقين الباب قبل
ريم :ويوجعج معاي يلا امي تبيج تنزلين الحين الحين
الهنوف : هنود نزلي خلاص أنا دقليق ونازله
العنود :اوكي يلا مو تطولين
ونزلت هي ويا ريم شوي الا يطلع محمد لان بغى ياخذ شي من غرفته خذ الي يبغاه وطفا(بند)النور وتوه بيطلع الا يشوف باب العنود الي قدام غرفته على طول بس بينهم الدرج ينفتح الهنوف وهي تدندن حطيتك في بالي واشغلت بك حالي ..ألين انا اصبحت في قلبك الغالي وتمد يدها وتطفي النور وتنزل تحت وهي وسط الدرج
العنود تناديها :الهنوف هذا الي تقول دقايق
الهنوف :هذاني نزلت يمه منج
محمد لى الان في مكانه ما تحرك هو كان خايف لا تشوفه فما تحرك ولا خطوه لين ماراح صوتها هي والعنود وتحرك وباله مشغول بالي شافه ..
العنود والهنوف ودلال مسوين فيها سنعات يدورون بالحلاو والفطاير والخرابيط والقهوه والشاي مخلين مسؤوليته على ندى ومنى وبدور
أم بدر تكلم فوزيه <<هاذي صديقتها وجارتها وحبيبتها وكل شي :والله ماشاء الله كبرو البنات ما صرت افرق بينهم
فوزيه :هو شدعوه عاد هم كل وحده شكل
ام بدر : ايوالله ماشاء الله الي قمر والي غزال كل وحده احلى من الثانيه ترى باخذ وحده منهم لودي بدر
فوزيه:انتي تنقي واختاري تراهم مثل ماهم بناتي بناتج
ام بدر تسلمين يالغاليه وانا وين القى احسن منكم نسايب
ومجلس الحريم كأنه حراج الكل يسولف من جهه <<عاد انتو اخبر لا تجمعو الحريم ما في قوه في العالم تسكتهم حتى لو كانوا في عزى اللهم ياكافي
وعلى الساعه 9ونص حطو العشا الرجال والحريم تعشو وعينو خير وعلى الساعه 11 الكل كان طالع الا الاهل
البنات في الصاله
الهنوف :حرام عليج مو لهالدرجه
العنود :مالت عليها شايفه روحهاعلى قل سنع والله بطت كبدي
الريم:وانتي شنو حارج كيفها
بدور:أي والله محتره على شي ما يسوى
العنود: وه هذا الي ناقص احتر عشانها مالت عليه
دلال وهي داخله الصاله: بسكم حش من هاذي الي ماخذه كل حسانتكم
العنود :تخسى الا هي
الهنوف تكلم دلال:نوف
دلال وهي تكشر بوجهها:ويي مالت عليها قلو البنات عشان تسولفون عنها
بدور: حتى انتي
العنود :قلت لكم هالبنت ما احد يحبها
دلال :المهم يلا ترى الحين بنطلع جدتدي تقول تجهزو
بدور:سلمان موجود
دلال:والله ما ادري بس بنرجع مع جدي
دانه :بتكفي السياره
ريم :لا ما تكفي خلاص خلو دانه عندنا توسع عليكم
دانه : الحين انا الي بضيق عليهم
دلال: صدق انج مب كفو الواحد يعزمج
الريم :أي والله (وتكش على دانه)هذا جزاي ابيج تقعدين عندنا انا ما صدقت القى عذر
دانه:عاد انا ما اعرف بالالغاز لازم تشرحون
**********
في مجلس الرجال
سلمان:محمد ..محمد ياهووووووه
محمد :هااااا شتبي
سلمان :سلامتك سنه اناديك وين سرحان
محمد:أنا وياكم من قالك اني سرحان
سلمان يطالعه بنص عين:أي أي ويانا صح
محمد:تطنز
سلمان:لا افاا انا اتطنز على محمد ..
محمد:بعد توقعت
سلمان:أقول قوووم يلا
محمد :على وين
سلمان :توه داق علي رااشد الشباب متجمعين عنده
محمد: يلا مشيننا
الجد (فهد):سلمان رايح للبيت؟
سلمان: لايبى تامر بشي
فوزيه الي كانت قاعده معاهم:وانت ما تقعد في البيت كله هايت في الشوارع
محمد عرف انهم راح يلقون محاضره من جدته فطلع على طول
سلمان:يمى الله يسلمج اقعد في البيت شسوي انتم بترجعون وتنامون
فوزيه:أي حتى انت ارجع ونام ريح بدنك
الجد(فهد): خليه الي يشوف يقول هاذي ما تطلع كله قاعده في البيت حتى انتي ما تقصرين قهوة الضحى ما تفوتج ولا يوم عند الجيران
فوزيه:قول ماشاء الله الحين بطيح طيحه ما بقوم منها
الجد: الحين انا بعطيج عين يا حافظ وعلى وشو ياليته شي سنع
الكل :يضحك
بدور الي كانت واقفه عند الباب:انتو لاهيين بالضحك وسلمانو شرد
عبد الله : والله مب هين عرف شلون يلهيكم ويهرب
بدور:افا عليك وهو اخو بدور
الكل:هههههههههههه
***************
مر الأسبوع بشكل طبيعي بس الهنوف والعنود ودلال كانو في حالة توتر عشان الأختبارات

السبت في المدرسه الساعه 6ونص أول يوم في الأختبارات
العنود :بنااات والله خايفه
الجازي : العنود والي يعافيج اللي فيني كافيني لا تزيدين خوفي
الهنوف وهي خايفه بس تبي تهديهم:يوووو بنات والله ما يسوى هالخوف كله اختبار دنيا
العنود أي والله صدقتي
أسيل تمر عليهم : السلام بنات
الكل :وعليكم السلام
أسيل : هاه عسى ذاكرتوا زين
العنود : الحمد لله الله يكون في العون
الهنوف : بنات احمدوا ربكم احنا الادبي كذا اجل العلمي مساكيين شمسويين
العنود:والله كلنا زي بعض احنا حفظ وهم فهم على الاقل هم ما يستهلكون طاقه كثير
الجازي : لاوالله اتذكر اختي العام ما نشوفها كله في الغرفه هالرياضيات بروحه مصيبه غير الكيميا والفيزيا
أسيل :وجع يوجع الدراسه وطاريها اذا تخلي الواحد كذا تصدقون اني جايه مواصله أنا الي ما اقدر على النوم ماني مصدقه نفسي
الهنوف وهي توقف:عن اذنكم
العنود :وين
الهنوف:الغختبار بعد ربع ساعه وانتو قاعدين تقانون بين الادبي والعلمي صدق خبلان
أسيل : أنا الي راعية السوالف بروح أحسن لي
دخلو القاعات ووزعت الاوراق والحمد لله كانت الأسئله مو صعبه مرره
مر الأسبعين أثقل من الصخر على البنات بس الحمد لله كل شي عدى على خيير
اليوم الي قبل الأخير من الإختبارات( الثلاثاء)
الساعه 11 ليلا
ريم تطق الباب على غرفة العنود
العنود:أدخل
ريم: السلام عليكم
العنود: هلا وعليكم السلام رجعتي
ريم :أي توني راجعه
العنود :ياحظج خلصتي عقبالي يارب
ريم :يلا هانت مابقى الا بكره
العنود:الله يعيين
ريم:خلصتي
العنود :باقي لي فصلين
ريم: اوكي اخليج الحين يلا تصبحين على خيير
العنود: وانت من اهله
العنود خذت جوالها ودقت على الهنوف :يووووووو شفيها ما ترد .....توت،توت.....لا يكون نامت
سكرت الجوال وخذت الكتاب وقامت تحفظ
الساعه 1 بعد منتصف الليل
العنود جاها النوم وقالت أقوم أسبح عشان اتنشط
محمد توه داخل البيت طلع فوق وشاف غرفه العنود نورها مفتوح قال:خلني أروح أشوفها
دق الباب ما احد رد عليه فتح الباب وما لقى أحد راح لعند سريرها وأخذ كتابها وقام يفر فيه :الله يعينج يالعنود
وتذكر يوم راح للاختبار وهو مو مذاكرالا فصلين بس الحمد لله البراشيم انقذته من الورطه وقام يضحك الا يدق جوال العنود يشوف الاسم الهنوف يتصل بك ...ابتسم ابتسامة خبث ورد
الهنوف: سنه ما بغيتي تردين
محمد وخر السماعه عن اذنه: هاذي من أولها كذا
الهنوف :الو...ألو
محمد:ايوه نعم
الهنوف وهي مرتبكه:هـ..هذا مو جوال العنود
محمد: إلا جوالها ..شدعوه ما عرفتيني أنا محمد
الهنوف انقبض قلبها :أي هلا
محمد فيه الضحكه لأن مبين عليها خايفه:هلا بج
الهنوف: ......
محمد:شفيج ساكته
الهنوف :لا ولاشي بس العنود موجوده
محمد أي بس قاعده تسبح
الهنوف :اوكي شكرا
محمد:هيييييي تعالي شفيج باكلج أنا
الهنوف:........
محمد:الووووو
الهنوف:الو
محمد: ههههه _تغيرت نبرة صوته الى الأهدأ_شخبارج
الهنوف قلبها زادت سرعته : بخير
محمد :عسى قدمتي زين في الإختبارات
الهنوف:الحمد لله
محمد:أوكي الله يعينكم
الا تدخل العنود :حموود تكلم منووو؟
محمد يشهق وهو فاتح عيونه وطار الجوال من يده على السرير
العنود ماتت من الضحك على شكله
محمد :وجع الناس يطقون الباب
العنود قاطعته :هذا الي ناقص أطق الباب وهي غرفتي
محمد:يتنحنحون
العنود حتى..بس عن خاطرك احم احم
محمد :مالت عليج بعد وشو ..خرعتيني بغى يوقف قلبي
العنود :اسم الله عليك بعدين وين ألقى محمد ثاني ...تعال مين كنت تكلم
محمد :يووووو نسييت خذ الجوال ..ألو
الهنوف وهي تضحك :ألو
محمد عرف انها سمعت كل شي :باي هاذي العنود معاج
العنود: منو؟
محمد:الهنوف
العنود: هلا والله تو الناس أدق عليج ما تردين وين كنتي
محمد يقول في قلبه:سبحان الله نفس الطبع ..وقعد فوق الكرسي
العنود:احلفي ...وين وصلتي..لااا زين ...أنا باقي لي فصل ...لاتنسيبن ترى بكره بتجين عندنا من الصباح ..بتنزلين معاي..ززمالي دخل جيبي ملابسج معاج ..عشان نروح مع بعض عند سهى ..أوكي..يلا باااي
العنود فعت عيونها الا محمد قاعد قدامها على الكرسي:انت الى الحين هنا
محمد :وييييي طرده محترمه_ وهو قايم_ خلاص بطلع
العنود تروح عند وتمسكه من يده وتجره عشان يقعد:أقول اقعد عن الدلع أنا ما صدقت أشوفك تقولي بطلع
محمد:يعني اشتقتيلي
العنود وتسوي حركه في وجهها يعني انها تفكر: يعني مو مرره
محمد وهو يبتسم :مالت عليج
العنود :ههههههه الا اشتقتلك موووت هالاختبارات لوعت كبدي
محمد: يالله هانت ما بقى الا بكره الله يعين
العنود :أي والله فكه
محمد: متى تطلعون بكره
العنود:على التسع تسع ونص تقريبا
محمد:اممممممم
العنود ليه تسأل
محمد يبتسم:بس أسأل ..يلا تامرين بشي
العنود :تو الناس
محمد:باقيلج فصل روحي ذاكريه أحسنلج أنا ما وراي شي
العنود : وانت شدراك
محمد:سمعتج وانتي تكلمين الهنوف
العنود :اييي صح انت شكو ترد على جوالي
محمد :توها تتذكر ههههههه لا بس شفت اسم الهنوف قلت خلني استهبل
العنود بطناز: ياحلوك وانت تستهبل
محمد وهو طالع :أدري باااااي
العنود : با ااي
محمد :ذاكري زين
العنود : ان شاء الله


وان شالله إذا شفت حمااس وتفااعل اكملها لكم يالغالين ..


ودمتم بود وحب ,,

<center> >>>>> ردود الأعضـــــــــــــــــــاء على الموضوع <<<<<
================================== </center>
لا تحرمونــي مـن ردودكم مثل الروايـة الآولــى تكفـــــــــــــون...!!https://chamil.xplainer.net/images/s.../2009/t123.gif
تــحــياتــــــــي

&...شموخــــــه...&

https://chamil.xplainer.net/images/s.../2009/t133.gif

__________________________________________________ __________
ربي يعطيك العافيه على ماقدمتيه لنا من ابداعات ...

اشكرك على طرحك الراقي والمميز ..

بانتظار ماتقدميه لنا من ابداعات ...

تقبلي مروري ...

كذآ من ربي حبيتكــ~


__________________________________________________ __________
يسلموووووووووووووووووووووووووووووووووووووووو

__________________________________________________ __________
ننتظر جديدك
يسلموووووووووووو

__________________________________________________ __________
ننتظر جديدك
ربي يعطيك العافيه

يسلمووووووو