عنوان الموضوع : مذكرات الطفولة (بالدارجة المغربية)
مقدم من طرف منتديات الشامل
الحلقة رقم 1 : حوميدي داكْ البرهوشْ الصغير
الجزء الأول : مين الحوميدي أفْتاخرْ بيه أبّاهْ
حوميدي ادْزادْ فلوْقيتة ديال البردْ.كان بالضّبط يوم 4 يناير.حتى واحد ما عاقْ بيه باللي راه خْرج للعالم من غير الوالدة ديالو والطبيب وجوج فرملياتْ.حاجة طبيعية حيت حوميدي من القلائل اللي شافو النور فالسْبيطار.ديكْ لوقيتة كانو الأغلبية ديال لعيالات كيْجيبو القابلة للدار.هاد القابلة هي مْرى كْبيرة فالسن كانت تمشي لدْيور وهي اللي تتكلّفْ بلوْلادة ديال نْسا الحوامل.
مع ديك الجوج و30 دقيقة حوميدي غوّتْ بحالْ لبراهش كاملين اللي يكونو عايشين 9 ديالْ الشْهورى فالضّلْما.
الواليد ديالو كان فالباب ديال قاعة الولادة كينتاضر وبالطبع انتوما عارفين بأن الأباء ديال بكْري كانو كيبغيوْ غير لولاد .الى سمعو خْبار المزيود بنت ، راهوم يْكَحْلو بْلعْمى.زعما لبنات ما فيهوم فايدة.
المهم الواليد غير سمع الحوميدي غوّتْ ، قال مع راسو : صافي هاهو ولدي جا!
هي هاديك دخل للحجرة وبْحال جميع الآباء هزْ ولدو وباسو وقال لمّو : غادي نْسميه عبد الحميد ومن بعد مينْ يكبر غادي يرجع الدكتور عبد الحميد.
الواليد طْراسا(سَطَّرْ) لي المستقبل ديالي من اليوم الأول ديال الخروج ديالي للعالم الجديد.مسكين هاد الواليد ديالي كاين يحلم يكون فالعائلة ديالنا طبيب ولكن ما تمشي غير فين مشّاكْ الله.واخّا هكْدا الواليد مين سمّاني دكتور ما غْلطشْ بزاف.غير أنا بدَلْ ما خاصني نقرى 20 عام وناخودْ الديبلوم ديالي ، خوكم الحوميدي مين كانت عندو يا الله 8 ديال السنوات كانو أصحابو يْعيْطولو الدكتور.
لمساخيط ديال ديك لوقيتة كانو يطلقو كلمة الدوكتور على كل واحد كيْديرْ النْضاضرْ ديالْ الشوفْ.
دازت الأيام وخوكم الحوميدي دوّز الحياة ديالو بْحالْ جميع المّومّوياتْ ديال خوتنا المغاربة.
لكن كاين حاجة مهمة اللي لاحظتها فلكْبرْ ديالي من خلال الصور (بالأبيض والأسود) اللي الواليد أخْداها لي وهو أن الأب ديالي كان مْهلّي فيا مزيان وكنت ما كنتفارقش مع واحد لبْنيتة شْحالْ غزالة كانت فرنسوية وكانت تسكن معانا فنفس الدار.هاد الدار كبيرة غير الجردا ديالها تقدر تصلح ملعب ديال الكرة.الواليدة من بعد قالت لي كانو كارْينْها 40 ريال.يعني غالية فديك لوقيتة بزاف.
هاد الدار ما زال كنْدوزْ عليها بعض المرات وفيها زادْ خويا جمال الله يرحمو .
الجزء الثاني : حوميدي يتْعرّضْ على صغْرو لْأوّلْ حادثْ
واحد الحادث وقع لي مين كنت باقي صغير يمكن 3 ديال السنوات .كانت الواليدة تْحطْني فالكرّوسة وتمشي تقضي شْغالاتها.كانت الجدة ديالي الله يرحمها هي اللي تْقابلْني ولكن كانت تتحرّكْ بزاف.على داكْ الشّي ، الواليد ديالي عيّطْ على واحد الأخ ديالو كان ساكن فلعْروبية باشْ يْجي يسكن معانا.مَنْها يدخل للمدرسة ومنها يساعد الواليدة ديالي.
هاد عمّي كان في عمرو ديكْ لوقيتة 12 عام والواليد دْخلو ديريكت للقسم الثالث حيت كان حافظ الحروف وكيقرى مزيان حيت كان يتعلّم فْلمْسيد .
المهم هاد عمّي كان يبغي يقرى .فالماكلة راه يقرى ، فالفراش راه يقرى ، يتمشى وْراهْ يقرى...خونا بالله مبْلي بْلقراية.
واحد النهار كي العادة جاتْ الواليدة وقالت لو ، انا غادية للحمّام ، قابلْ مزيانْ عبد الحميد.الى فاقْ أعطيهْ البيبْرونْ(biberon) ديال لحْليب.
عنْداكْ تسمح فيه!
عمّي قال ليها : غير سيري ونْتي مْهنْية
اللي كان ان الحوميدي كان يبغي يكتشف المحيط ديالو.شي وقيتة دخّلْ يدّو فرْويضة ديالْ الكرّوسة.العم كي العادة حادرْ راسو كيقرى شي كتاب.واحد لوقيتة الحوميدي غوّتْ.العم يسْحابْ ليه راه الحوميدي فاق ، بْقى يْحرّكْ فالكرّوسة .
الكروسة قطْعات الصبع ديال حوميدي وزاد مسكين غوّتْ.العم ما داري بْوالو وباين عايش مع البطل ديال القصة ما مْسوّقْشْ لغْواتْ ديالْ حوميدي
الحمد لله دخْلاتْ الواليدة وشافت المنظر وبْداتْ حتى هي تْغوّتْ : ولدي قتلت لي ولدي
العم مسكين عاد عاق باللي راه مْقفّرْها.حتى هو شاف المنضَرْ.
الواليدة هزّاتْ الحوميدي الصغير من الكروسة وما قدْراتشْ تشوف يدّو .الصبع ديالو ديال اليد اليمنى ما شاد غير بْخيط صغير .
الواليدة مسكينة كانت غادي تموت بالخلعة .من الزهر لمْكفَّسْ ، الواليد كان مسافر حيت كان فالبوليس والبوليس ديال الخمسينات والستيناتْ كانو ديما يتحركو وقليل فين يْباتو فالديور ديالهوم.فهاداك النهار الواليد كان فالرباط.الواليدة تلْفاتْ ليها الجرْية .عمّي حتى هو بْقى غير واقف ويْشوفْ.
الحوميدي كالبْ الحارة بلغْواتْ
فْديك لوقيتة دخْلاتْ النصرانية وشافت اللي كاين .هزّاتني بالزربة ودّاتْني للمستعجلات .تّما خَيْطو لي صبعي .
من بعد رجْعاتني الجارة ديالنا لدّار وْأنا ناعس.قالت للْواليدة ديالي ما تْخافيشْ ولدك راه مزيان وراني لقيت طبيب معلّم راه صبعو غادي يرجع كيف كانْ .دابا راه ناعس حيت راه مْبنّجْ.
دازت أيّامات وجا الواليد .الواليدة مسكينة ما لْقاتْ ما تْقول للواليد حيت هو غير دْخلْ شافْ الفاصْمة على صبعي.
المهم الواليدة أحكاتْ لو كولشي.الى ما خفتْ نكدب عمّي مسكين كْلا وفرّقْ من لكْرافاشْ(le fouet) ديال الواليد.
أول حاجة دارْ الواليد شدْ لكتوب ديال عمّي ورْماهوم فالشّيميّلي (المدفأة ديال الحطبcheminée) وقال ليهوم : من اليوم نْشوفك تقرى لكتوب غادي نعْطيك سلخة ونْصيفطَكْ لعْروبية ترعى لمْعيزْ.
عمّي كان مْسيخيطْ.واخّا التهديداتْ ديال الواليد كان يشْري لكتوب وكانْ يْخبّيهوم فلبْلاصة اللي حتى واحد ما يْشكْ فيها : تحت لفراش اللي كنت ننْعسْ عليه.باينة خوكم الحوميدي كان يْشوفْ لكتوبْ وباينة كانْ يسمع الواليد ديالو يْغوّتْ على خوهْ : فينا هوما لكتوب اللي شْريتي يا المسخوط؟ ولكن ما يعرفش يتكلّم باشْ يْورّي لبّاهْ فين عمّي خبّى هادْ لكتوب.
المهم دازت أياماتْ وشْهورا وخوكم الحوميدي حيّدْ الفاصمة ولكن ما بْقاشْ يستعمل اليد اليمنى ديالو .كان كياكول باليد اليسرى ويلعب ديما باليد اليسرى...كولشي باليد اليسرى ، حيت الصبع فالأول كان يْضرّو بزاف.
مع السنوات حوميدي أصبح كيستعمل يدو اليمنى لأن الصبع ديالو رجع كيف كان ولكن ما زال واحد علامة ديال لخياطة الى الآن كتذكر خوكم الحوميدي بالحادث المأساوي اللي وقع ليه هادي دابا 52 عام.
الى اللقاء مع الحلقة رقم 2 : حوميدي عند الأخوات الراهبات (les soeurs catholiques)
موعدكم مع هذه الحلقة يوم الإثنين .لا تنسوا أن تعلقوا على الحلقة الأولى
<center> >>>>> ردود الأعضـــــــــــــــــــاء على الموضوع <<<<<
================================== </center>
ولكن الحفلة ديال نهاية الدورة كانت رائعة .كانو يلبسونا الكسوة ويعطيوْنا الكادوياتْ.باقي عاقل كانو أعْطاوني قْنيَة (أرنب)مصاوْبةْ بلْكبْصْ .كنت محتافظ بيها سنوات حتى تقريبا مين وْصلت للمستوى الخامس ابتدائي.الحلقة رقم 2 :حوميدي داكْ البرهوش الصغير
الجزء الأول : حوميدي عند الأخوات الراهبات
فلوقيتة ديال حوميدي كانو لوْلاد الصغار كيمشيوْ لْمْسيد باشْ يتعلمو ويقْراوْ القرآن.الواليد حيت كان باغيني نكون دكتور دخلني عند الأخوات الراهبات باش نتعلم لقرايا باللغة الفرنسية.
نْسيت ما قلتشْ ليكوم أن أخي جمال (الله يرحمو ) ادْزادْ مورايا بعام و3 شْهورا.هي هاديك بْجوج بينا خْدانا الواليد للكنيسة باشْ يسجّلنا .استقبلتنا واحد النصرانية شارفة.الواليد شْحال أُهو يشرح ليها الظروف ديالو .من بعد ، هاد المديرة تْفاهْماتْ مع الواليد باشْ يْخلَّصْ 45 درهم فالشهر علينا بْجوج بدل 50 درهم.كي ما لاحظتو النصرانية ربْحاتْ الواليد 5 ديال الدراهم .هاديك لَمْية دورو (ريال) راها كانت عندها قيمة كبيرة .تصورو انّ بيها تقدر تشري 25 كيلو بطاطا أو 10 ديال العلب ديال السردين .يمكن ليك تشري بيها 10 ديال الكوميرات ونصْ ديال الخبز؛ مع العلم أن الخبز ديك لوقيتة كنّا نْسمّيوه البولانْجي وكانت توْزن 900 غرام.أما الموز يمكن كان هو أغلى فاكهة على الإطلاق ، ما كان ياكلو غير البورجوازي .تصورو أن الثمن ديالو كان 45 ريال للكيلو ؛ أما الجورنال ما كانشْ يتعدّى 25 سنتيم.
المهم بقيت أنا والأخ ديالي كنقراوْ عند الأخوات مدة جوج ديال السنوات .كنّا نمشيو فالصباح مع التْمنية .كانت الواليدة هي اللي تْوصّلنا.مع لحِْداشْ و30 دقيقة كانْ العمْ مولود هو اللي يْجي باشْ يْرجّعْنا للدار.
لعشية كان الدخول مع الجوج ونْساليوْ مع الخمسة.
أخي جمال ما كانشْ معايا فنفْسْ القسم .حيت هو كانت عندو يا الله اربع سْنينْ.بالنسبة للدراسة باقي عاقل كانو بزاف ديال الأنشطة :بالنسبة للقراءة ، كنّا نقراوْ بالبطاقات والمكعبات ونكتبو فْدفاتر شْحالْ فيهوم رسومات وتْصاورْ. زيدو عْليها الأناشيد والمسرحيات والرسم والتلوين .
مع ديك العشرة كيخرجونا للساحة باشْ نستْراحو وكانو يعطيوْ لكل تلميذ كاسْ حليبْ مع ميلْفايا (millefeuilles)
مع لعشية ، كانو يْسدّو السْراجم ديال القسم ويقولو لينا : نَعْسو ! زعما لاسْييسْتْ (القيلولة) .المشكل ممنوع الهضرة ، ولكن واخّا هكّدا كنّا مْحمْقينْهومْ.غير بيناتْنا نبْقاوْ عاطْيينْها لتْكركيرْ .العجيب فالأمر ما عمْرو ما تْقلْقو منّا.
مع ديك الثْلاثة والنّصْ ، نفيقو زعما من النعاس واخّا حْنا ما ناعْسينْ والو .كيْخرجونا للساحة ويعطيونّا كاس حليب مع حلوى ومن بعد نْرجعو للقسم باشْ نلعبو بالمكعبات والأشكال الهندسية .
الصراحة على حسب ما قال لي الواليد كنت نتكلم الفرنسية بطلاقة.
واحد الحاجة مهمة اكتاشفتها فهاد الروض وهو ان هاد النّاس كانو حريصينْ على حضور الأباء أو أولياء الأمور .مثلا شي أب ما جاشْ ياخودْ ولدو ، اوى هاد الولد يبقى فالمدرسة .
ولكن كانت مزيانة للولد حيت كانو يعطيوَهْ يتغدّى ويمكن هداكْ لغدى ما عمرو ما كْلاهْ في حياتو.
انا شخصيا والأخ ديالي شْحالْ كلينا معاهوم.ديك لوقيتة ما كنّا نعرفو لا حْلالْ لا حْرامْ.خوكم الحوميدي كانت تعجبو الماكلة ديال
النصارى .في نظرْكومْ شكون السبب اللي جعلنا نستافْدو من هاد الخير ؟ عمّي مولود ! هادْ العم المتمرد والمشاكس كان شْحالْ من مرة ما يْجيشْ ياخودنا للدّار حيتْ كان يتلاقى مع صْحابو .ولكن كان يْجي مع الخمسة.هي هاديك يشري لينا المسكة والكاطو ويقول لينا : شوفو الى سوْلاتْكومْ ماماكوم عْلاشْ ما جيتوشْ مع لوقيتة ديال لغدا ، قولو ليها راهوم شدّونا فالمدرسة.انا غادي نتْهلّى فيكوم مزيان.
العم مسكين ما كانْشْ عارف باللي أنا وخويا جمال كانت عجْبانا الماكلة ديال المدرسة
الجزء الثاني : تصرفات غريبة عند الأخوات الراهبات
هاد الأخوات كانو الصراحة غريبات فالتصرفات ديالهوم وكانو يْحاوْلو باشْ يْردّونا نْصارى.انا الصراحة ما كنتشْ نفهم والو .بْحالي بْحال الدراري الصغار كنت نْديرْ داكْ الشّي اللي يْآمْرونا بيه.باقي عاقل كنا نخرجو لْواحد الجهة من الساحة كان فيها صنم كبير هو إمرأة فْيدْها ولد صغير وحْداها صنم آخورْ ديال واحد الراجلْ شعرو طويل ومربوط بواحد جوج خشْباتْ (من بعد عرفت باللي كان مصْلوب)
كنّا نْوقفو حْداه وكنْدوزو يدينا على الجبهة ديالنا ومن بعد على الصدر ثمّ على لكتف ديال ليمَنْ (اليمين) وعادْ لكْتفْ ديال ليسَرْ(اليسار).زعما كنا نرسمو علامة الصليب
ولكن شكون اللي كان عارف باللي راحنا كنّا كنْديرو الطقوس ديال المسيحيين.هاد الشي ما عرفتو وفهمتو حتى كبرت وكنت نقرى فالقسم الثالث.
هاد النصرانيات دابا كنتخايلْهوم كانو لابسين لبيض مع لكحلْ ، كانو يْشبْهو لْتيفْليلَّسْتْ او ما يعرف باللغة العربية بطائر السنونو وبالفرنسية (l'hirondelle)
https://www.profvb.com/vb/data:image...AHbc+poUKFAH/Z
https://encrypted-tbn1.gstatic.com/i...YXEiQYbS6SBhhA
كانو كيسْتدْعيوْ الآباء باشْ يْشوفو اوْلادهوم يْغنّيو ويرقصو .المهم كان داك الشّي رائع بمعنى الكلمة.
الى اللقاء يوم الأربعاء مع الحلقة الثالثة : حوميدي والدخول المدرسي (التعليم العمومي)
__________________________________________________ __________
مذكرات الطفولة : حوميدي داكْ البرهوشْ الصْغيرْ
الحلقة رقم 3 : حوميدي والدخول المدرسي (التعليم العمومي
الجزء الأول : الحوميدي فقسم التحضيري
حوميدي مين دْخلْ للمدرسة كانْ قاري بزّاف لفْرانسوية ولكن بانْ باللي هو قبْ فالعربية.فلكتابة لقى صعوبة حيت كان موالف يكتب من اليسار لليمين ، ماشي من اليمين لليسار.المعلم ديالو حار فالأمر ديالو .باينا يكون يكول فْراسو : هادا خاصّو يقرى عند النْصارى ماشي هنا عند لعرب.
باقي عاقل على هاد المعلم سْميْتو سّي المختاري.كان طويل وكانت عندو رْجلْ طْويلة على خُتْها.كان الله يستر عندو مَشْية غريبة .اللي شافو كانْ يحسْبو غير دْريويشْ ولكن اللي كانو يَقْراوْ عندو هوما اللي عارفين سرّو : كان واعر لدرجة أنّك غير يتكلّمْ مْعاكْ الرْكابي يَفَّشْلو ليكْ وماشي بعيد يسْحابْ ليكْ راكْ فالمرحاضْ ودّيرْها قَدْ راسكْ.خوكم الحوميدي ما كانشْ من هاد النوع اللي يْخافْ.على كل حال ماشي فالمدرسة حيتْ علْمونا النْصارى قول الحقيقة واخّا ماتْكونْشْ فالصالحْ ديالنا وقالو لينا ما كاينشْ الخوف.رغم هذا الحوميدي كان يْخافْ من الواليد ديالو .كان عندو كْرافاشْ يْعصّينا بيه الى درْنا لبْسالاتْ.الحمد لله كنت نادرا فين كنَكولْ منّو ولكن الأخ ديالي حسن ، هادا كان يوميا كانتْ عندو حصّة منّو.
نرجعو لسّي المختاري .كان عندو عْمود طْويلْ مْلوْنو بلحْمر .اللي شافو يْقولْ هادي مسطرة ؛ ولكن فالحقيقة راها أداة ديال العقوبة.كانْ يْهزْ التلميد اللّي ما حافضْشْ الدروسْ ديالو أو كان كيْبرْزطو فالقسم ويْحطّو من فوق رجلو الطْويلة.من بعد يْعَلّي رجلو ويبقى يعطيه للْمؤَخّرة ديالو بْحالْ الطْبَلْ ديالْ كْناوة.التلميذ كيْغوّتْ على فورْ جهْدو : مسكين من جهة راهْ مْقَسّحْ بْلعْمودْ ، ومن جهة تانية خايف يْطيحْ .سّي المختاري كان يغني شي غْنى فْشي شْكلْ .فالحقيقة ما ما عمرو ما سْمعتو ولكن من بعد فالشباب ديالي عرفت باللي خونا بالله كان عندو مع الموسيقى لكْلاسيكية اللي فيها غير لغْوات : هوووووووووووو هييييييييييييييييييي هآآآآآآآآآآآآآآآآآآآآآآآآآآآآآآآآآآآآآآآآآآآ.
الحمد لله خوكم الحمد ما عمرو طْلعْ فوق الركبة .يمكن خونا بالله كان عارف باللي الواليد ديالي فالبوليس.ماشي بْعيدْ كانْ عاطيني التيقار ولكن الدفاتر دياوْلي كانو في حالة ما يمكنش نوصفها ليكوم .ربما بْحالْ شي خليطْ ديالْ الشينْوية والعربية .واخّا هكْدا كان الاستاد كيعْتابرْني من المجتهدين حيت خوكم فالشفوي كان يعقلْ مزيانْ وعندو ما يْكولْ.ربما هدا هو السبب اللي خونا بالله نجَّحْني للمستوى الثاني ولكن قال للواليد خاصّو يْدخّلْني لْشيم ْسيدْ فالصيف باشْ نتعلّم نكتب.
جمال خويا الله يرحمو هو اسْتافد بعام فواحد المدرسة ديال لفلوس كانو يَقْراوْ فيها التلاميد ويْخلْصو 100 دورو (ريال) فالشْهر.
الواليد راه استافد من التجربة ديالي وما بْغاشْ يْطيحْ في نفس الغلطْ.
الجزء الثاني : حوميدي والمستوى الثاني
المعلم ديال البيتْ الثاني ما عمّرني شفْتْ بْحالو .هادا كان سابق العالم كلّو فْطرقْ التدريسْ.تْصَوْرو هاد خونا بالله ما كيسْتعملشْ لعصا وموحال الى عندو فالقسم .اسميْتو مولايْ رْشيدْ وطويل تبارك الله بْحالْ شي ألماني.باقي عاقل عْليهْ عينيه زرْقينْ.كان يعاملنا يْعاملنا بْحالْ وْلادو.اللي كان عاجبني فيه هو أنه كان يْشجّعْ التلاميد : اللي جاوب جواب صحيح عندو قالب طباشير .قبل ما نخرجو كان يشْري علينا الطباشير بْدورو للْواحد .انا شخصيا كنت دايرْ مْعاهْ لاباسْ حيت كل يوم كانت عندي ما بين 4 و10 دورو .كنتْ نشْري بها نصْ خبزة كَرانْ ب4 دورو وشي مرات حلاوات لوْليداتْ.هادا واحد السيد كان عندو بيدو (سطل) كبير كيْديرو من فوق ضهرو.هاد البيدو من الفوق ديالو مَغْلقة فيها الأرقام وفوسْط منها آلة صغيرة فيها عْمود كيْدور على الأرقامْ.الرقم اللي يوقفْ فيه يعطيهْ لكْ حلوى.الغريب فالأمر كان مْكثرْ تقريبا غير 1 أو 2 وبعض المرات كاين 3 أو 4 أو 5. ولكن الصفر ما كانْشْ عندو
خوكم الحوميدي كان غير يلعب يْطيح ديما فالربْعة .على داكْ الشّي كانو صْحابو يبْغيوْ يتْرافْقو مْعاهْ باشْ يتْبرْعو بْأكْبرْ عدد من الحلويات.هاد الحلويات ما زال عندي فالداكرة : طْويلة بْحالْ الشجْرة ديالْ الصفصاف ونقدر نْقولْ ليكوم باللي تشبهْ للشجرة ديال بابا نويلْ.كانت هاد الحلويات فيها ألوان متنوعة ها الحمرا ها الصفرا ها الخضرى ها البرتقالية ها القهوية ها الباكورية......
كان واحد البائع آخور عندو عْمود طْويل فيها شي حلوى كَتْمَلْصَقْ .اللي بْغى منها كيعْطيه مورْصو يْقطْعو بالموسْ.هادا حتى هو فالذاكرة ديال حوميدي ونقدر نوصفو ليكوم.كان كلّو ْمْبرّصْ ويلبس طابْلية بيضا وديما يقول : جبانْ كولوبانْ
بالطبع لبنات ما كانوشْ يقراوْ مْعانا ولكن كانت عندْهومْ مدرسة ديالهومْ حْدى المدرسة اللي نقرى فيها.كان حتى هوما يْجيوْ عندهوم البيّاعا ولكنْ كان واحد كيبيع غير لبْناتْ غزالْ البناتْ.الصراحة شْحالْ كْليتْ منّو ومن بعد عرفت باللي لبنات كانو يْموتو عليه حيت حلو وساهل فْلمْضيغْ.
نرجعو لمولاي رْشيد ، خوكم الحوميدي كان يْعاملو معاملة خاصة .تْصَوْرو كانْ مْخصَّصْ لي دفتر ديال الدعم .الصراحة بالفضل ديالو أصبحت كنكتبْ مزيان اللغة العربية.
هاد المعلم كي ما قلت من قبل عندو طرق عجيبة.كان عندو كل وسائل الإضاح فواحد الخزانة.مثلا الى قْرينا على التفاح ناكْلو التفاح التلاميد كاملين.جاتْ الهضرة على البنانْ ، اوى أرى ليك التبْريعة مع البنانْ.
كانو عندو ألعاب يَعْطيها غير للتلاميد المتفوّقين باشْ يْلعبو بيها.
ولكن الحاجة الجميلة عندو مين هو يشرح الدرس ويكْتاشف شي تلميد ناعسْ من فوق الطَّبْلة.زعما يْفيقو ؟ لاّ .يضربو بْلعمود ؟ لاّ. كان هاد خونا بالله يشوف فينا ويقول لينا غير بالإشارة : حتى واحد ما يتْكلّم أوْ يْديرْ الحسْ.هي هاديكْ يمشي للخزانة ويْخرَّجْ منها الألعاب والمجسمات ديال الحيوانات والخضر والفواكه والطوموبيلات ...المهم لحْوايج اللي تْكونْ فمتْحف القسم.هادْ الأدوات كيْدَوَّرْها على التلميد الناعس.من بعد يْجيبْ كاسْ ديالْ الْما ويبْدى يَهْرقْ غير بشْوية على راس التلميد الناعس.شي شوية خونا بالله يْحلْ عينيه وبالطبع غادي يْبانو ليه المناظر الجميلة ويسْحابْ ليه راه باقي فلمْنامْ .هي هاديكْ يْغَمَّضْ عينيه.ولكن مولاي رشيد يْعاودْ يْر َشّو بالما باشْ زعما يْفيقْ .واخّا هكْدا باقي مسكين ما عاقْ بالمَقْلبْ ، عاودْ تاني يرجع ينعس.حْنا نقَّلْبوها تْكرْكير.اوى خونا بالله عاد يْعيقْ بْراسو ويبقى مسكين يبكي .مولاي رشيد ديما حْنينْ فْهادْ المواقف .أولا كيمْسح ليه دْموعو ويْجيبْ لو كاسْ حْليبْ.من بعد يْقولو : يا الله اخْتارْ شي لعبة من هادو.
حاجة أخرى اكتاشفناها فمولاي رشيد أنه كان لاعب كبير ديال كرة القدم. واحد المرة المعلمين بْغاوْ يْديرو ماتْشْ ديالْ الكرة.كانت عندنا ساحة كبيرة ديال الرياضة الطول ديالها فايتْ 100 مترْ.كان فيها التّيرانْ متْراسي باش نلعبو فيها كرة القدم. اوى تْقاسمو المعلمين لْجوجْ فْراقي بعدما زادو شي تلاميد فالخامس .للإشارة فقط التلاميد فالخامس ديال ديكْ لوقيتة كانو كْبارْ .كاين اللي كان يسكن فالخامس حتى ل3 ديال المرات.شْحالْ من واحد فيهوم كانْ مْربّي الموسطاشْ ولكن سبحان الله العظيم كانو يحتارمو المعلم واخّا يْشبّعْهوم عْصا.
المهم مولاي رشيد اختار باشْ يْكونْ حارس المرمى .حْنا التلاميد ديالو كنّا هوما المشجعين ديالو .هي هاديك مَلّي بْدى الماتشْ وحْنا نْغَوْتو : مولاي رْشيد مولاي الرشيد ...... الماتش كان فيه الحركة ولغوات . التلاميد اعجبهوم الحال حيت اول مرة كيشوفو معلمين يْشاركو التلاميد ديالهوم الألعاب.
شي وْقيتة شي واحد من المعلمين بْغى يْمارْكي إصابة حيت كان غيرْ هو والكولْ .الكول هو مولاي رْشيد.المعلم ديالنا هزْ المعلم والكرة وٍرْماهوم بجوجْ لتّوشْ.
داكْ النهار شْحالْ ضْحكنا .المدير كان حاضر ، هو ماشي غير ضْحك ، راه كانْ يتمرّغْ بالضحك.هاد المدير كان قْصير وكانت عندو لحية طويلة ومْلوْية بْحالْ الدالية.مسكين كيدكّرني بْقصة الأقزام السبعة ديال سانْدريلّا
مولاي رشيد شدْ الكرة باشْ يرْميها للوسط ديال الملعب.آهْ يا خوتي مين رْماها خرجات من الملعب .غير باشْ جابو ها التلاميد اللّعّابة كولهوم بردو .وانتهتْ المقابلة وعاد التلاميد الى اقسامهم .من بعد عرفنا باللّي الضربة ديال مولاي رْشيد هرْساتْ الضّو ديال شي طوموبيل ومول الطوموبيل ما بْغاشْ يْرد لتّلاميد الكرة حتى يْخلْصو الخسائر.الحمد لله المدير سلّكْ الجرّة وخَلَصْ مول الطوموبيلْ.
الى اللقاء مع الحلقة الرابعة من مذكرات الطفولة : ذكريات مع عمّي مولود يوم الخميس
__________________________________________________ __________
- مذكرات طفولية : حوميدي داكْ البرهوشْ الصغير
الجزء الأول : ذكريات عمّي مولود والحمّام
سبق لي وتْكلّمت ليكوم على عمّي مولود.هاد العمْ تقريبا تْربّينا مْعاه .الصراحة أنه كان نِعم الصديق والناصح وعشْنا مْعاه مغامرات كثيرة ولكن هادا لا يمْنع أنّ خونا بالله كانتْ فيه شوية ديال التّاحْراميات وكان يضربْ يدّو مع الواليد.
باقي عاقل كنت أنا وجوج خوتي كنمشيوْ مع الواليدة للحمّام .فْديك الساعة أنا لكْبيرْ فخّوتي وكانت عندي 6 سْنين.كانت فالحمّام واحد لمْرى غْليضة وكحْلة وشْحالْ واعرة.خوكم الحوميدي وخوتّو كنّا ديما كنضّحكو عليها .شْحالْ من مرّة مسكينة نَبْنيوْلْها شي منْداف.نْشوفوها وحْنا فالبيت الباردْ.تْكونْ جايا مسكينة وتَنْهَتْ حيتْ هازّا سْطلْ ديالْ الما سْخون.واحد الأخ ديالي مْسيخيطْ مع راسو ، يمشي دغيا ويسْرق للواليدة الصّابونية ويرميها فالطريق ديالْ خوتنا بالله.المسكينة يا الله تزْطمْ على الصابونية تمْشي زالْكةْ بْحالْ داكْ الشّي ديالْ أسْكي (التزحلق فوق الثلج) آه يا خوتي المنظر ديالها كيقتل بالضحك.خوتنا بالله ديما لاقيا راسها غادية مع الما وبعض المراتْ كتَصْطادَم مع شي مْرى ناعسة أو تدخل فْشي سطلْ عامر ما.المهم خوتنا الطّيّابة طيّبْنا ليها قلْبها وكرْهاتنا.غير تْشوفنا تْكحّلْ بْلعْمى.
واحد النهار قالت للواليدة غير فاشْ دخلنا للحمّام:
_ الشريفة الله يرحم الوالدين ما تبقايش تجيبي اولادك مْعاكْ
الواليدة جاها لعجبْ : عْلاشْ أختي عيدة ؟ ياكْ راني نْخلّصْ عليهوم بْلاصة لْكلْ واحدْ
عيدة ما بْغاتْشْ تقول ليها بأنّ وْلادها راهوم بَهْدلوها ولكن لْقاتْ سبب آخور : شوفي الَالّة ولادك راهوم كْبارين ما خاصهومش يكونو مع لعيالات
الواليدة ما جايبا خْبار : ولكن هدا (تقصد أخي الأصغر) يا الله عندو 3 سْنينْ.
شافت الطّيّابة فْخويا حسن وقالت للواليدة : هاد ولدك واخّا يْبانْ صغيرْ راه عقلو كبيرْ.كونْ شفتي فعايْلو غادي تحّشمي.
عْياتْ معاها الواليدة ولكن خوتنا بالله ما بْغاتشْ تقول شي حاجة .بالطبع راكو عارفين باللي ماشي فالصاليحْ ديالها.
المهم فالدار الواليدة تْكلْماتْ مع الواليد.الواليد تْكلّمْ مع خوه.خوهْ اللي هو عمْنا قالْ لينا : من اليوم أنا اللي غادي ندّيكوم للحمّام.
فعلا عمّي خْدانا أول مرة بعد ما أعطاه الواليد 80 ريال فيها الثمن ديال الدخول للحمّام وثمن المونادا .الواليد كان ديما مْهلّي فينا مزيان وما كانْشْ خاصنا مْعاه حتى شي حاجة. ما زال عاقل كانو الدْراري الصغار كيْخلْصو 10 درْيالْ ولكبار درهم واحد.هاداكْ اليوم ، غيرْ وصلنا قال لينا عمّي : يا الله حيْدو الكسوة وسيرو عمْرو السْطولا بالما.هو كان يبقى مع مول الصندوق.شي شوية يلحق بنا ويقول لينا : يعجبكوم الما ؟
حْنا كلْنا نْردّو عليه : ياكْ أعمّي خلينا نْديرو زلّيكَة فالما ؟
عمّي داك الشي اللي كانْ باغى .من بعد ما يْسالي من النظافة ديالو ، يْعيّطْ علينا ويْكبْ على كل واحد فينا سْطلْ ديالْ الما.هي هاديك يْغطّي كل واحد فينا بالفوطة ويقول لينا يا الله تبعوني اوليداتي راني غادي نشري ليكوم المونادا.حْنا فرحانين ، نخرجو دغيا باشْ نلبْسو الكسوة ديالنا .هو يمشي عند مول الصندوق ويقول لو : شوفْ أسّي محمد هادْ لوْلادْ راهوم ما غسلو ما والو ، كانو غير يلعبو.
مول الحمّام يقولو صافي أخويا خلَّصْ غير لبْلاصة دْيالك.
عمّي حيت ذكي يقول لو : جيبْ لينا شي قرعة مونادا وْأجي تشربْ معانا.ديك لوقيتة المونادا ما كانْشْ الثمن ديالها يتْعدّى 50 سنتيم.
من بعد ما نشربو الموناضا نمْشيوْ للدّار .العم كان يربح من هاد العملية 50 ريال كان يشْري بيها لكتوب والكارو خيتْ كان مبْلي على صغرو.
ولكن شي عام أوْ عامينْ دازو والواليدة بالصدفة لْقاتْ خويا الصغير ما زالْ بْوسخو.هي هاديك قالتها للواليد.الواليد عيَّطْ لعمّي ويمكن سخْسْخو بالمعقولْ.هي هاديك قال لينا : انتوما كْبارْ عْلاشْ ما تمْشيوْشْ للحمام غير بوحديتكوم؟
فعلا بْقينا نمْشيوْ ولكن مع أصحاب الدّربْ وهاد المرّة كنّا كنغْسْلو بالمعقولْ
الجزء الثاني : عمّي مولود والسينيما
عمّي مولود كان مبْلي بْأفلام الويسْتيرْن.كانو عْزازْ عليه بزّاف ولكن خوهْ ما كانشْ يبغي يعطيه لفلوس حيتْ عارفو كيْضيّعْهوم فلخْوى الخاوي.ولكن هاد العم الدكي كان يقول للْواليد ديالي لوْلاد بْغاوْ يمْشيوْ لسّينيما.الواليد حيت كان مْهلّي فينا كان يعطيه 5 ديال الدراهم ويقولو : شوف ليهوم شي فيلم مزيان وما تنساشْ تشْري ليهوم كَرانْ.
المهم هاد عمّي كان فاللّوّلْ يدّينا لواحد السينيما فيها غير لغْواتْ والصْداعْ ولمْدابْزة.الفيلم اللي كنّا نتفرجو فيه يمكن الى قديم حيت كانو يْبانو شي خطوط فالشاشة ديال السينيما.حْنا حيتْ كنّا صْغار ما كنّاشسْ نفهمو ولكن العم الدّكي كان يقول لينا : راه عندهوم الشْتا.بالطبع صدَّقْناهْ
اللي كاين هو أن عمّي مين يْقطّعْ لبْلايصْ يقول لْمول الصندوق : هادو كولهوم غادي يكَلْسو غير فكرسي واحد .المهم كان يقطّعْ جوج بْلايصْ وحدة لينا وحدة ليهْ.ولكن فالقاعة كان كل واحد فينا عندو الكرسي ديالو.بعد نهاية العرض الأول كان يشري لينا كَرانْ وبعض المرات الزريعة والكاطو باشْ الواليد ما يْعيقْشْ بيه.
للمعاومات ديالكوم كان ثمن التذكرة فالسنيما ما يتْعدّاشْ 150 سنتيم ولكن عمّي كان ديما يختار السنيما اللي فيها أرخض ثمن .هدا للوجديين لقدامْ
نقول ليهوم أن جوج سينيمات فوجدة كان الثمن فيهم رخيص بزاف : سينيما المغرب (التدكرة كانت فقط 60 سنتيم) وسينيما الفتح (ثمن التذكرة فقط 30 سنتيم.هاد الجّوج سينيمات ما بْقاوش شْحالْ هادي من عامْ
واحد النهار خويا حسن قال لعمّي : أنا غادي نكولْ لَبّا باللي راكْ تدّينا للسنيما اللي فيها الصداع وفيها هادوك اللي يشربو الشْرابْ
عمّي كانْ باغي زعما يْدوّخنا بالهضرة : هاديك راها الموناضا .ياكْ حتى انتوما راكو تشربوها ؟
رد عيه خويا حسن : هداكْ الشراب يشربوه غير النصارى
صافي خونا بالله عاق وعرف باللي راحنا فقْنا بيه.هي هاديك قال لينا غادي نمشي لواحد السينيما فيها أفلام واعرين بْحالْ ماسّيسْتْ .هاد الأفلام أول مرّة كنشوفوهومْ والصراحة عجبونا ولهادا بْقينا نفرْضوهوم على عمْنا الثعلب.
من بعد لقى باللي راه خاسر معانا حيت ما كانشْ يبقى لو شي رْيالْ باشْ يشْرى الكارّو .هي هاديك ، قال لينا عاود تاني : انتوما راكو كْبارْ خاصكوم تمشيوْ لسّينيما بوحْديتْكومْ
فعلا بْقينا نمشيوْ ولكن مع الواليد. كانْ يْوصّلْنا ويقطع لينا التداكر ويشري لينا ما ناكْلو ويمشي بعد ما ندخلو للقاعة .
يتبع غدا الحلقة رقم 5
__________________________________________________ __________
مذكرات Houmidi59 : حوميدي البرهوش الصغير
الحلقة رقم 5 : حوميدي فالمستوى الثالث
الجزء الأول : أستاذ مْوسْوسْ بالنظافة
خوكم الحوميدي طْلعْ للْبيتْ الثالثْ.دابا هْنا الحوميدي غادي يلْقى راحتو وغادي يلعبها كبير على كل التلاميد.راكو عارفين عْلاشْ ؟ حوميدي قاري الفرنساوية وكيكتبها بكل سهولة.ما زال باقي حافضْ حتى الأناشيد.هاداك العام دوّزْتو على أحسن ما يرامْالمعلم ديال هاد اللغة كان جد أنيق مْهلّي فْ راسو ولكن كانْ مْوَسْوسْ بزاف في كل ما يتعلّقْ بالنظافة ما شي غير النظافة ديال جسدو ، هادي حاجة أخرى .كان خونا بالله عندو طوموبيل .باقي عاقل سيمكا 1100 بيضا كي لحليب.خونا بالله غيرْ ينْزلْ منها، يْدوّزْ عليها بالمُشْوارْ(المنديل).ولكن الغريب أنه كان يمسح حتى لبْناواتْ ديالْ الرْويضات ويْردهوم يشّعْلو بْحالْ الى ما عمْرو هاد السيارة كانتْ تتمشى.هاد خونا بالله ما كرهْشْ الطوموبيل ديالو تتمشى فوق الزربية.المهم دائما كاين تلميذ يحْرسها فلوقيتة ديال الدخول ديال التلاميد وحتى الخروج ديالهوم.كان هاد الاستاد يدخل للقسم ويبدى يْشمْ .زعما كانت عندو حاسة الشمْ قوية.هي هاديك يقول لينا بالفرنسية : شْكون اللي كْلى لعْدسْ؟المشكل كانو بزاف ديال التلاميد ياكلو فالمطعم المدرسي.المطعم ديال ديك لوقيتة كان يقدّم وجبات سخونة بْحال لعدس والحمّصْ واللوبيا.خوكم الحوميدي استافد شي 3 ديال الشهورا او هو ياكول بْحال التلاميد المساكين.هادي قصة غادي نحكيها لكوم من بعدنْرجعو للمعلم ديال الفرنسية .ما كانْشْ يتْكلّم كلمة وحْدة بالعربية فالقسم.ولكن فالاستراحة كنّا نحْضيوَهْ يتْكلّمْ مع المعلّمين بالدارجة.الصراحة كنّا نتْعجبْو عْلاشْ هاد المعلّم ما عمرو ما هْضَرْ معانا بالدارجة ديالنا.تْصوْرو حتى الى زْعفْ أوْ غْضبْ كيتْكلّم بالفرنسية.حْنا كنّا لابد نتْكلْمو مْعاه باللغة الفرانْسوية.الحمد لله خوكم الحوميدي ما كانْشْ عندو مشكلْ فالتواصل مع سّي قلفاطي .هاد المعلم كان يستعمل لعْصا مع اللي ما يحفضوشْ الحروف او اللي يتْهجّاوْ فلقْراية.الصراحة بالفضل ديالو زادت لكْتابة ديالي تْحسْناتْ وكنتْ نحصلْ على معدلاتْ عالية .فْديكْ لوْقيتة كنت نقرى بزّاف مجموعة ديال الكتب المصوّرة .حْنا كنّا نْعيْطو ليهومْ ليزارْتيساتْ(bandes dessinées)هوما قصص ديال الرسومات وفيهوم حوارات بين شخصيات القصة.باقي عاقل كنت نقرى مغامرات زومْبْلا(zembla) .هدا يشبه طرزان .كنت نحلم نْعيشْ بْحالو فْشي غابة مع الحيواناتْ.
الجزء الثاني : حوميدي والمطعم المدرسي
حوميدي حتى هو استافد من المطعم المدرسي وخّا هو فالحقيقة ما خاصّوشْ يكون مع التلاميذ اللي غادي ياكْلو كل يوم.اللي وْقعْ نكتة واشْ من نكتةواحد النهار دْخلْ علينا معلّم يْقرّي فالخامس باشْ يْسجّلْ التلاميد اللي غادي ياكْلو فالمطعم.بالطبع خاصّو يعرف الحالة ديالْ كل تلميد من خلال المهنة ديال الأب ديالو .هي هاديكْ بْدى يْسَوَلْ كل تلميدْ :_ آشْ يخدمْ أبّاكْ ؟كل واحد كيفاشْ كانْ يْجاوبو .ها اللي بّاهْ حمّالْ ، ها اللي بّاهْ يْبيع النعناعْ ها اللّي بّاهْ ما خدّامشْ ها اللي بّاهْ ميّتْهادو كولهومْ كان المعلّم يْسجّلْهومْ فالمطعم الدراسي.جا الدَّورْ ديالي باشْ يْسَوّلْني.يا خّوتي الى قلت ليكوم أن الحوميدي حتى للمستوى الثالث ماكانْشْ يعرف بالضّبْط الخدْمة ديالْ الواليد ديالو.اللي كان يعرف أن أبّاه كيمشي للقهوة ويبقى فيها تقريبا النهار كامل .كنت شْحالْ من مرّة كنْرافقو انا وجمال وحسن .كان الواليد يْجيبْ لينا اما ما ناكلو بْحالْ ليبْروشيتْ (les brochettes)او موناضا أو كاسْ حليبْ.من بعد ياخودْنا لواحد الكشكْ(kiosque) باشْ يشري لينا القصص المصورة .هي هاديك يقول لينا : يا الله سيرو للدار وعنداكومْ الطريقْ.كانْ ديما يقول لينا : قولو لْماماكوم ما غاديشْ نْجي بكْري غير تْعشّاوْ.خوكم الحوميدي جاوبْ المعلم : فالقهوة.المعلّم بْدى يضْحك وقالْ لي : آشْ كيْديرْ فالقهوة ؟جاوبتو : ما يْديرْ والو_ واه ما يمكنشْ .يمْكن يْسرْبي القهوة؟خوكم الحوميدي ما عْرفْ ما يْردْ.ولكن هادْ السؤال بْحالْ الى ساعدني شْوية باشْ نتْكلّمْ: بّا مينْ نْكونْ فالقهوة يعطيني لحليبْ والموناضاصافي المعلّم اقتنعْ باللي الواليد ديالي ما يْكونْ غيرْ كارْصونْ(نادل).العجيبْ فالأمر أن السّي قلفاطي تبْهاضْ مين سْمعْ هاد المعلومة اللي باينة جْديدة عليه.خونا بالله ما كانْشْ يْضَنْ باللي حوميدي القاري المتعلّم ينتمي الى الطبقة الفقيرةالمهم خوكم كْلا لعدس واللوبيا والحمّصْ .وتْبرّعْ بالحوت ولحليبْ والفرماج.الأخ ديالي حسن هاداك هو العام اللي دْخلْ فيه للقسم الأول .هو كان عارف الخدمة ديال الواليد .يا الله سوْلو المعلم المكلّف بالمطعم المدرسي ، رد عليه بوليسي .بالطبع بوليسي راه موظف يعني عندو راتب قار إذن ما يمكنشْ ليه يستافد من المطعم المدرسي.من بعد الأخ ديالي عْرف باللي راني ناكولْ فالمطعم .بْقى يْسْتانّاني حتى نخْرجْ حيت كنتْ نْخلّيلو حقّو وإلّا يقدر يفْضَحْني مع الواليد.والى قالها للواليد حوميدي غادي ياكول سلخة بوليسية دايزْها لكلامْ.واحد النهار حسن قال مع راسو .هادي ما قالْها ليشْ._ عْلاشْ حتى أنا ما ناكولْشْ فالمطعم المدرسي بْحالْ خويا
حميدْ ؟هي هاديكْ خلّاني حتى دْخلْتْ ، جا تابعْني.الحارسْ حيتْ حافضْ التلاميد اللي ياكلْلو عنْدو ، قال لْخويا حسن: سيرْ أولْدي فْحالك .أنتَ ما مْسجّلْشْ .خويا حسن باغي يدخل باشْ مّا كانْ ، ردْ على خونا بالله : أنا خو حميدْ_ شْكون حميدْ ؟_ هاداكْ اللي عندو النْضاضرْ_ هاداكْ خوكْ ؟_ والله الى خويا_ ولكن هاداكْ بّاهْ مسكينْ قهواجي.انْتَ بّاكْ فاشْ خدّامْ ؟_ بوليسي_ ما يمكنشْ اولدي.هاداكْ موحالْ الى خوكْ_ اوى عيّطْ لو !!!!!
داكْ الشّي اللي دار خونا بالله.فعلا جيتْ لْعندو وكنْتْ يا الله فاشْ كْليتْ لمعلْقة اللّولى ديالْ اللّوبيا._ بّاكْ يخدمْ فالقهوة ، ياكْ أولْدي ؟_ نْعمْ أعمّي الحارسْ_ هادا خوكْ ؟آه يا خوتي غير شفتْ حسن ، قلتْ مع راسي صافي حْماضتْ علي.بالطبع خوكم الحوميدي خاطيهْ لكدوبْ_ نْعم عمّي الحارسْ .هدا خويا حسن_ إوى بّاكْ ماشي بوليسي_ ما عْرفتْشْ
خويا حسن بْغى يْبانْ_ والله الى أبّا بوليسياللي كان أن الحارس قال لي : ولدي انت ما خاصّكشْ تاكول فالمطعم حيت انت ما شي فقير.زاد قالْ ليا : انا ما غاديشْ نعلم بيك الادارة حيتْ انت ما كتكْدبشْ.العجيب فهاد الحارس اللي سْميْتو حمّو كانْ مرّة مرّة يْبرّعْنا أنا وخويا بالخبز والحوت
الجزء الثالث : مين المعلم ديال العربية جابْ مسعودة
هاد المعلم ديال العربية كان غْليضْ وقصيرْ .واخّا كانْ يضْحكْ بزّافْ ولكنْ كانْ واعرْ.النهار الأول جاب لينا واحد لعمود يشبه للمسطرة وقال لينا : نْقدّم ليكوم بنتي مسعودة.هادي ما عمرو ما فارقاتْني.شوفو فيها مزيانمسعودة بْداتْ تتْحرّكْ فْيدّو الله يستر بْحالْ شي كوبْرى (أفعى).ابتاسمْ وقالْ لينا : مسعودة ما عندْهاشْ مع الكوسالى.هي كتْشمْهومْ وكتْحسْ بيهوم.باينة كولكوم كوسالى.التلاميد صافي دخْلاتْ هومْ الرَّعْدة .كل واحد كانْ يقول في راسو "صافي المعلّم راهْ عْليا"أسّي مومني شافْ باللي راه يمكن قفّرْها حيتْ بانو لو تقريبا كل التلاميد دخْلاتْهومْ الخلعة.هي هاديك قال لينا: ما تْخافوشْ من مسعودة راها واخّا هاكْدا راها حْنينة .شوفو اللي عندو شي ضربة فْيدّو يْقرّبْ منّي .تقْدرْ مسعودة تْشوف من حالو.واحد المجموعة ديال التلاميد قَرْبو من المعلّم .اللّولْ قالْ لْسّي مومني : عنْدي فْيدّي جرحة كبيرة._ فينْ أولدي_ فْيدّي ليمنة (اليمنى)مسعودة شافت التلميد.شي شوية كانت تْخبّر المعلم فْودْنيهْ.المعلم ضْحكْ وقالْ للتلميذ : ولدي مسعودة ما غاديشْ تضَّربكْ فهاديك اليد....التلميد المجروح فْرحْالمعلم زادْ قالْ ليه_ ... ولكن غادي تضَّرْبكْ فاليدْ ليسْرى (اليسرى)شي مجموعة ديال التلاميد غير سمعو الجواب رجْعو لبْلايصْهومْ ، حيتْ عرفو باللي راهوم واكْلينْها واكْلينْها مع مسعودة : الى ما كانتْشْ اليدْ اليمنى غادي تْكونْ اليدْ اليسرى والى ما كانتشْ اليدْ اليسرى غادي تْكونْ اليد اليمنى.بقى واقف حْداهْ غيرْ تلميدْ واحدْ.شافْ فيهْ سّي مومني:_ أنت ولدي ياكْ ما يدّيكْ بْجوجْهومْ معطوبينْ؟التلميد بيَّنْ الفرحة ديالو وردْ بسرعة : نعم يا معلّم يدّيا بْجوجْ مْراضينْ وما نقدرشْ نكتبْ بيهومْ._ أنت يا ولدي ما غاديشْ تضربك مسعودة فْيدّيكْ ولكن اصْبرْ نسْمع آشْ باغيا تقولْ لي.فعلا مسعودة تْكلْماتْ معاه شي 4 مينوتْ (دقائق).من بعد المعلّم ضْحكْ وقالْ للتلميدْ : ولدي ما عندك زْهَرْ.مسعودة غادي تضّربك ولكن هنا.غادي تعْطيكْ شي غرداتْ للمؤخرة ديالكْ.كولنا ضْحكنا .التلميد اللي ما عندو حضْ مع مسعودة قْلبها بْكى . هي هاديكبْدى يْزاوكْ: معلم غير ضْربني لليدْ .غادي نصبرْالمعلم ما مْعاهشْ اللعب ، قالْ ليه : لّا ولدي .مسعودة ما كتضْلم حتى شي واحدْما كان على التلميذ المنحوس الا أنْ رْجعْ لبْلاصْتو بعدْ ما تْأكّدْ باللي مع مسعودة موحال الى غادي يخصّو شي خيرْ.
الحلقة رقم 6 : الحياة مع النصارى وليهود ولمغاربة في درب واحد(1)
غادي تشوفو التعايش اللي كان فلوقيتة ديالنا لا مع النصارى او اليهود
حياة عائلية محضة بين هاد الأجناس
غادي تقراو قصة موموت وليهودية
غادي تقراو قصة موموت وليهودية
موعدكم مع الحلقة رقم 6 يوم الاحد
__________________________________________________ __________
مذكرات الطفولة : حوميدي داكْ البرهوش الصغيرْ
الحلقة رقم 6 : ذكريات لا تنسى (1)
الجزء الأول : صباط الشّيكولا شْحالْ بنينْ
هادْ الدرب اللي كنت ساكن فيه كان نْقي وساكنين فيه النصارى وليهود وحتى لمغاربة.سبحان الله العظيم كان واحد التعايش ما تقدروشْ تتْصوروه.باقي عاقل واحد ليهودية كان عندها حانوت .كنت أنا وخويا حسن نمشيو لعندها باشْ نشريوْ عليها النّوكا (nougat) .هادْ خيّتْنا ما كانتشْ تحل الحانوت .كنّا نْدقّو عندها فالدار.هي هاديك تخرج وتقول لينا : واشْتي (أشنو) بْغيتو ؟ نقولو ليها بْغينا النّوكا.
تدخل وتْخلّي مسكينة الباب مفتوح .
واه ياخّوتي كنت نْشمْ الله يستر شي ريحة عندها خانزة فالدار.شي مرات كيْبانْ لينا واحد الشيباني فالكرّوسة ديالو .
المهم غير ناخْدوالنوكة نمشيوْ دغيا باش ناكلوها .
بالنسبة لنْصارى كانو جيرانّا .باقي عاقل واحد الشينوي متزوج فرانسوية.هدا كان يتْهلّى فينا مزيان .واحد النهار عيّطْ على واحد الأخت ديالي .فْديك لوقيتة كان فعمرها يمكن 6 ديال السنوات واعطاها صبّاط .بالحقْ غير فردة وحدة .الاخت ديالي لبسات الفردة ديال الصباط جاتها كبيرة ولكن لفْصالة ديال الصبّاط عجباتها بزاف.المهم بقات تلعب بيه.شي وقيتة خْداهْ خويا حسن وبْغى يضْربها بيه أُو هو يتهرّس على جوجْ
فاتحة شْحالْ بْكاتْ.هي هاديكْ مْشينا للدار باشْ زعما أختي تشكي للوالدة.من الزْهر كان عمّي مولود فالدار .قال لأختي : أرايْ الصباطْ غادي نْردّو ليك جديد.
يا الله خْدى الصبّاط ، بْدى يضْحكْ وقال لينا : شْحالْ تْخلْصوني الى كْليتْ شْوية من الصبّاطْ.
فعلا عضْ عضّة كبيرة.فتيحة زادت فلبْكا.من بعد قال ليها عمّي : البَهْلة هدا راه صباط ديال الشيكولا.
المهم تْقاسمناه وكْلينا.كانت شيكولا رائعة ما عمرو ما ننْسى المذاق ديالها.
كانت واحدة الفاسية جارتنا من الجهة التانية.كانت مسكينة ساكنة غير بوحديتها.هادي كانت تْسخّرْنا للحانوت باشْ نشريوْ ليها التْقَضْيا اللّي تحتاج.الصراحة هاد خوتنا بالله كنت ديما نسبق باشْ نتْسخَّرْ ليها ، حيت كانت تتْهلّى فيا مزيانْ.تْصورو الصرف اللي يْشيطْ كانتْ تقولْ لي غير خودو .كل نهار برزقو : مرة دورو(ريال) ، شي مرات جوج دورو وكان الصرف يقدر يكون 4 دورو !!!!!
الجزء الثاني : شْكون هْرفْ على الحوتة
من ذكريات هاد الدرب أن البيبان كانو النهار كامل مفتوحين.تقدر تدخل لْأَيْ منزل ، تلقاهوم مثلا يشَّربو أتاي ...إوى تشرب وتاكول معاهوم بْحالْ الى زعما راكْ فْداركومْ. باقي عاقل واحد النهار دخلت لْشي دار كانت محلولة .وْصلت للكوزينة وما لْقيتْ حتى واحد.هي هاديك شمّيتْ شي ريحة عجْباتْني وْأنا نمشي ديريكتْ لواحد الطبسي مْغطّي .حَيَّدْتْ لغطى وْأنا نلْقى حوتة كبيرة كتعوم فالرْوى ومْغطْية بلبْطاطا والزيتون.خوكم الحوميدي بْيدّو خْدى طرف كبير ديال الحوتة وهْربْ قبل ما يْفيقو بيه .يا الله خْرجتْ طْلعتْ لواحد الشجرة باشْ نْزرّدْ بالمورْسو ديالْ الحوت ، لقيتْ خويا حسن كان سابقني للشجرة.المهم اعطيتو شوية باشْ يْدوقْ .هي هاديكْ ، قال لي : هادْ الحوتْ بْنينْ.واشْ الواليدة راها دايْراتو لغْدى ؟
قلت لو : لّا ولكن راها عْطاتو لي واحد لمْرى كنت تْسخّرْت ليها.
خويا حسن ما تاقْنيشْ: ما تكدبشْ علي .الفاسية هي الوحيدة اللي تتهلّى فينا مزيان.
المهم أخبرتو بالدار وقلت لو : راه الطبسي فوق البوطاجي ديال الكوزينة.
فعلا رْجعنا للدار.كانت الباب باقية محلولة .خويا حسن دخل .دازت 10 مينوت خويا حسن ما بانْشْ.قلت مع راسي : صافي راهوم شدّوه وما يْكونو غير يعْطيوهْ فالغَرْدْ (العصا)
هي هاديك مشيت لْدارنا باشْ نخبر الواليدة باللي كاين.يا الله فاشْ وصلت ، قالت لي الواليدة : فينْ مْشى خوكْ حسن ؟
بْغيتْ نقولْ ليها : راه محبوس فواحد الدار ....
جا داخل حسن يضحك .سَوْلاتو الواليدة : تْبانْ فرحانْ
ردْ عليها : واهْ أمّا راني كْليتْ الحوتْ حتى شْبعتْ
الواليدة ما عجبْ هاشْ الحال: يا داكْ المسخوط واشْ ما بْغيتْشْ تْفارق التْشَمْشيمْ على الطناجرْ ؟
من بعد واحد من أصحاب الدرب قال لينا : واحد المشْ سرق لينا حوتة كبيرة .
بالطبع راكو عارفين المش .أنا غير شفت فيه وقلت لصاحبنا : واشْ كْلاها بالخبز أو بْلا خبز ؟
ضحك خونا بالله وردْ عليا : واه هادي ما طاحتْشْ لي على البال.والله الى عندك الحق .جوج خبزات حتى هوما ما لْقيناهومش .
شوفو بنادم شْحالْ نية .خونا بالله ما نْوى والو .
الجزء الثالث : سباق الدبّانْ
من مغامراتي مع خويا حسن .هادي فلوقيتة ديال الصيف.باقي عاقل يا الله فاشْ نتغدّاوْ ، الواليد يمشي ينعس .كان تقريبا يْفيق مع ديك التلاتة والنَّصْ باش يمشي للخدمة.الواليدة كانت حتى هي تمشي تسْتْراح.خّوتي وخْواتاتي كانو يمشيو لْبيتهوم باشْ يلعبو ولكن غير بالسْكات ، حيتْ الى سْمعهومْ الواليد راه غادي يجْبدْ
لكْرافاشْ ويبْدى يضرب فين مّا جاتْ الضربا.
خويا حسن وْ أنا كانت عندنا هواية فريدة من نوعها.كنّا نْصيْدو الدّبّان .نْحَيْدولو الجْناحْ ديالو باشْ ما يْطيرْشْ.من بعد كل واحد يْحطْ الدبّانة ديالو فالحيطْ .شي شوية الدّبّانة تبْدى تطلع الحيط .باغية مسكينة تهرب للفوقْ.حيتْ هوما جوج دبّاناتْ غادي وحدة تسبق صاحبتها.بالنسبة لينا أحْنا هدا راه سباق الدّبابْ.
المشكل خويا حسن كان غشّاش كبير.بعض المرّات الدّبّانة ديالي تسبقْ الدبّانة ديالو .حسن يْجيبْ شي سرْبيتة (قطعة توب) ويرمي بيها الدّبّانة ديالي.بالطبع يْطيّحْها.خوكم الحوميدي حتى هو يْديرْ بْحالْ خوه.الدّبّانة ديال حسن تلْقى راسها فالأرض.
هاد خويا حسن كان غْواتو يتسْمع على بعد مئاتْ الأمتار.يا الله يسمعو الواليد يْجي يجْري.انا دغيا نسلت ونتْكمّشْ فْشي قُنْتْ ونْديرْ راسي ناعسْ.خويا حسن (كان سمين) ما يقدرشْ يهرب .هي هاديكْ يلحق عليه الواليد ويبْدى عليه فالمسْلوتْ : هاكْ ، هاكْ ، هاكْ.
حسن زايد فلغوات .الواليد يسمح ويمشي في حالاتو.
يا الله فاشْ الواليد يْسد الباب ، يْجي عندي حسن : يا الله نْكمْلو السباق ديال الذّبّانْ
نْعاودو السباق ولكن عاود تاني نْصيْدو جوج دبّانات حيت هادوك يْكونو هربو وما بْقاوشْ يبانو.
الجزء الرابع : ليهودي وموموت
من قبل تكلّمت ليكوم على ليهود .كانو حْدانا مجموعة كبيرة .الصراحة تقال كانو مْعانا مزيانين.واحد من هاد ليهود كان الهضرة ديالو تقتل بالضحك.هادا مسكين تقدرو تقولو ما زايدشْ فالمغرب ، حيت كان يتكلم بالعبرية ومْخلطة بالدارجة المغربية.
المهم كانت عندو خروفة ديما تابعاه فين ما مْشى .كانْ مْسمّيها موموتْ.
غير يلْغى ليها : موموتْ أجي !
تجي دغيا لْعندو
واحد النهار قلنا لو حْنا فالعيد لكبير ندبحولكباشْ وراه موموت تصلح للْعيدْ لكبيرْ.خونا بالله خافْ ومسكينْ غْبر شي 3 شهورا حتى داز العيد ويمكن حتى عاشورا.
هاد موموت كان يلبسها جاكيطا فوقت البرد وكان يْحوّقْ ليها راسْها.زعما كان مْهلّي فيها بالمعقول.أنا صراحة ما عمّرني شفت شي واحد يتْهلّى فْشي حيوان بْحالْ هادْ خيْنا.
الى اللقاء مع الحلقة رقم 7 من مذكرات الطفولة .هذه الحلقة مع حوميدي في المستوى الرابع
مذكرات الطفولة : حوميدي داك البرهوش الصغير
حلقة رقم 8 : حوميدي والمستوى الخامس
الجزء الأول : عام تاني مع سّي الطْويلْ
بالنسبة للسنة الخامسة كانت البداية مزيانة ، خصوصا مين سّي الطويل سَنْدو لو هاد المستوى بصفة استثنائية.اللي وْقع أن المعلّم اللّي يْقرّي الخامسْ دارْ شي عملية جراحية وبالطبع الغياب ديالو غادي يْأتّرْ على السير العادي للدراسة وحْنا متبوعين بالامتحانات.على داكْ الشّي سّي الطْويل قال ما فيها باسْ نْعاودْ نْقرّي التلاميد دياوْلي اللي كانو عندي فالرابع.
خوكم الحوميدي عجبو الحال بزاف .هي هاديكْ تْنبّأْ بسنة دراسية ناجحة بكل المقاييس.
لكنْ اللي وْقع ما كانْ فالحسبان .حوميدي اللي حصل على أعلى معدل فالامتحان التجريبي : تقريبا 78 نقطة على 120 ، يلقى راسو فالامتحان يا الله لْحقْ على 59.5 .النجاح ديك لوقيتة كان هو النقطة 60 .عندك هاد النقطة راك خْديتي الشهادة الابتدائية ديالك معندكشْ ، غادي تعاود العام أولدي واخّا تكون خاصّاكْ غير نصْ نقطة
من بعد مين كنا نْقرّيوْ الخامس هاد المعدّل هبطْ حتى 34 .هدا الديل على المستوى اللي وصلولو التلاميد ديانا.
المهم خوكم الحوميدي قْرى عام عند السّي الطويل اللّي الصراحة كان نعم الناصح والمرشد والدّليل.
الجزء الثاني : راها تْهرْساتْ يا أستادْ
بالنسبة للمعلّم التاني واللي كان يْقرّينا اللغة الفرنسية ، كان باقي شابْ.يمكن عندو ديك 24 أو 25 سنة .كان مْهالّي فْراسو ديما الكوستيم ولكْرافاطا.قضية مهمة لاحظْناها عليه : هو أنه كانيْبدّلْ لقْوامجْ بزافْ وكل لون عندو إشارة.مثلا النهار اللي يلبس قاميجّة حمراء ، هاداكْ النهار يدوز علينا أكحَلْ.التلاميد كولهوم ياكْلو سلخة كي المجتهدين كي الكوسلاء ، مع الفابور لتّلاميد لمْساليينْ.
النهار اللي يكون لابس قاميجّة لونها أصفر ، هاداكْ النهار ديال السِّلم.نهار يْدوز على خير وحتى اللّو لخضر .ولكن الخطار هو اللون لكْحلْ.الحمد لله غير مرّة وحدة اللي لبسْ فيها قاميجّة بهاد اللون والا يمكن كونْ راه سالا معانا كولنا.
واحد النهار كان باينْ راشقا ليه وبالطبع كان لابس اللون لصفر .المهم يا الله قال لينا جبدو الكتب وقْراوْ .الى ما خفتش نكدب كان النصْ يتعلق بالمعْزة ديال السيد سوغان.سّي غيّوغي خرجْ .يمكن مشى عند المدير.المهم دازت ديك رْبع ساعة ، المعلم ما ضْهرْ لو أثَرْ.صافي التلاميد قلبوها غْواتْ وصْداعْ.شي يلعب فوق الطابلة ، شي مْشى للمكتب لاعبها معلم.شي اللي يكتب فالسبورة.المهم الحيحة نايضة.
بْلا ما نْحسّو ، دخل سّي غيّوغي وشافْ اللّي شافو.مَنْ داكْ الشّي اللي شافْ واحد التلميد سْميْتو حجي .كان طويل ورقيق بْحالْ الستيلو .هاد خونا بالله كان زعما يْقلّدْ المعلم فالقراية ديالو .سّي غيّوغي ما قالّو والو .يا الله فاشْ رْجع كل واحد لبْلاصْتو ، قرّبْ من حجّي وقال ليه بكل أدب : مسْيو حجّي تفضّل وقْرى لينا شوية هاد النصْ الرائع .
حجي هو لمكلخ ديال القسم ولقرايا ديالو تقتل بالضحك.خونا بالله كيتْهجّى بالحرف والى قْرى غير جملة يمكن فربع ساعة .سّي غيّوغي اعْطى الإشارة لواحد 6 ديال التلاميد صْحاحْ وقال
ليهوم :جيبو المتعوسْ وحطّوه فوق الطّابلة.يا الله شدّوه مزيانْ ودَوْروهْ لْجيهة التلاميذ.
سّي غيّوغي قرّب منّو شادْ عْمودْ صْحيحْ وانزلْ على المؤخِّرة ديالْ خونا بالله .خونا بالله غيرْ داقْ الدّقة اللّولى ، بْدى فالتْبَحْليطْ (لغْواتْ) .سّي غيّوغي زادْ أكْسيرا فالضرب.
شي وْقيتة حجي علّى(رْفَعْ) يدّو وقال على فورْ جهدو : ميسْيو ميسْيو ريَّضْ ريَّضْ (باراكا عليا) صافي تْهرْساتْ
واه واشْتا هادي اللي تْهرْساتْ ؟
سّي غيّوغي حتى هو حار لو لعجب.هي هاديكْ ما زادشْ ضْربْ حجي.المهم حطْ لعمود وقال لْحجّي : شكون هي اللي تْهرْساتْ ، تْكلّم يا متعوسْ
حجي باينة عليه الفرحة قال للمعلم أُو هو كيْورّيه المؤخّرة ديالو : هادي هي اللي تْرْساتْ يا ميسْيو
اول مرة سّي غيوغي كنْشوفوهْ يضحك.حْنا تْبعنا المعلم ديالنا والصراحة بْكينا بالضحك.
الجزء الثالث : كيفاشْ حوميدي عاودْ العامْ
الامتحانات ديال الخامس ماكانتشْ بحال هادي .كانت الصراحة قاصْحة بالمعقول وكانت تقريبا تشبه الباكلوريا حيتْ كانتْ على المستوى الوطني.
المهم اول مادة كانت هي العربية وفيها حتى القرآن الكريم والتاريخ والجغرافية .خوكم الحوميدي حسْ باللي غادي يجيبْ شي معدّلْ مْطَرْطَكْ.
ولكن اللي جا من بعد ما كانشْ فالحسبان.هاد الشّي وقع في مادة الرياضيات.خوكم حوميدي كان مْهنّي بْحالْ الحوتة فالما.ياكْ هاد الحسابْ ما عندي مْعاه مشْكيلْ ؟ خوكم غادي يجيبْ كولشي صحيح خصوصا وكنت لْقيتْ نضْرة على الاسئلة وبانتْ لي كولْها بْحالْ شْريبْ الما.
المهم خوكم خدّامْ يْجاوبْ على الاسئلة وسيابق التلاميد اللي ما زال حاصلين يا الله مع العمليات الأولى.
شي وْقيتة ، الورقة ديال الوساخ عمْراتْ وما لقيتْشْ فينْ يمكن نحسب.بالطبع كان خاصني نطلب شي ورقة خاوية من عند مراقبين ولكن حْشمتْ على حقّاشْ كنت من قبل طلبْت عليهوم ورقة.
اللي كانْ فتحتْ المحفظة باشْ نْشوف الى عندي شي ورقة خاوية .من الزهر لْقيت ورقة فيها جهة عامرة.باقي عاقل فيها الأفعال بالفرنسية وطريقة الصرف ديالهوم للمضارع .خوكم الحوميدي ردْ الورقة.واحد من المراقبين شافني وجا عندي وقال لي بْحالْ الى زعما شدْني نْديرْ شي جريمة كبيرة : شَدّيتَكْ يا الغشّاشْ
أنا شفتْ فيه .ما فاهم والو .هي هاديك حلّ الكارْتابْلْ (المحفظة ) وخرّجْ الورقة اللي أنا زعما ردّيتْها.
_ وهادي ألغشاش ماشي هي الورقة اللي كنتي باغي تنقل منها؟
الحوميدي ما عمرو كان لا نقّال لا غشّاشْ ، جاوبتو : انا ماشي نقّال ومن الفوق هاد الورقة ما عندها حتى علاقة بلحساب.شوف مزيان راها مكتوبة بالفرنسية
بالطبع المراقب ما رْضاشْ برهوشْ بْحالي يْورّيه .اوى اللي كان قال لصاحبو: أجي تْشوف هادْ لفْهايْمي ضْبطْناهْ ينقلْ ودابا راهْ يضحك علينا
صاحبو جا ولكن ضاهرْ باللي موحال الى عندو شي دراية ديال هاد اللغة.ماشي بعيد يكون من هادوك اللي قاريين 60 حزب ومْتلْفين 70 .العجيب فالامر شد الورقة بالمقلوب ودارْ راسو يقرى وقال لصاحبو : عندك الحق فيها شي معلومات ديال الامتحان .
انا حيت حسّيتْ بالضُّلمْ ، شدّيت الورقة وقلت لو راكْ قالبها ماشي هكْدا تتْنقْرى لفْرانسوية
اوى خونا بالله صافي غْضبْ وغلْغَلْ : كيفاشْ أنت يا داكْ النقّال باغي تْورّيني آشْ نْديرْ
زاد صاحبو قالّو : شوف هادا ما يصلح مْعاه غير نعطيوْ لو 0 ونكتبو لو باللي ضبطناهْ ينقلْ
صافي داكْ الشّي اللي وقع .حوميدي الأول فالقسم يصبح مجرد غشّاشْ.عييتْ ما نرغبْ غيرْ باشْ يْخلّيوْني نْكمّلْ التمارين ولكن بدون جدوى
النتيجة باينة خْديتْ .
واخّا هكدا قْدرت نوْصل ل59.5 ديال النقط ولكن للأسف ما كانشْ عندي الحق فالنجاحْ
بالطبع السلخة اللي كْليتْ من عند الواليد ما عمرو ما ننْساها.
داكْ النهار الواليد حسّنْ الموسطاشْ وسبحان الله بانْ ليا شْحالْ واعرْ.المهم كْليتْ وفرّقْتْ كي ما نقولو بالوجدية
الى اللقاء مع الحلقة رقم 9 وسنتي الثانية في المستوى الخامس
