رواية فهد وحمد تفطسون من الضحك

عنوان الموضوع : رواية فهد وحمد تفطسون من الضحك
مقدم من طرف منتديات الشامل

راح انزل لكم قصه منقوله بس تفطس من الضحك اتمنى انه تعجبكم
فهد وحمد إلى أوروبا
مرتن من المرارير (وقيل المرات و قيل المراتيت) كنت جالسن بلحالي احاتسي روحي الله يهدين
جا‎ ‎لمي فهودي يركض يركض و يطامر و يطامر مير اقوله يا ولد اهجد وشجاك
قالي حمودي تجززززززززم؟ قلتله عسى ما شر وشبلاك قالي تجزم ولالااااااااااا
قلت و مصع رقبه قلي وشبك قالي انا بسافر برا تخاوين
و اكرّها ضحك و اقهقه لين دحدرت دموعي من الضحك
قلتله وين يا وجه الفقر قالي اوروباااااااااااا هذي اللي ذبحونا به ودي اشوفه @@
قربت منه و قعدت اقبصه و هو يقول ولد وشبك لا تقبص
قلتله لا بس بشوف انت نايم ولا صاحي قلتلي وين؟؟؟؟؟؟؟ تراه اوروبا مهيب طعس التحدي نفرك الفسحه و نرجع اخر الدوام
قالي والله جد اكلمك ياخي افهمن ولو مره وحده
قلتله طيب باخذك على قد عقلك يااوروبا من وين بتجيب فلوس و من وينلك لغه ونت حتى عربي ما تعرف تحط كلمتين على بعضهم و من وينلك و من وينلك ..........؟؟؟
قالي انت ما عليك كل شي علي بس وافق
قلتله يا فهيدان مثل ما للصبر حدود ترا الهبال له حدود <<< شجاب ذا لذا
قال اللغه مو كل من راح معه لغه و الفلوس ناخذ قرض و نسدد حبه حبه
قلتله ماشالله كيف تسدد من مصروفك كل يوم ولا من الخزاين اللي مخبيها ابوك
ارجوك فهودي اطلع من راسي
قالي طعني لو هالمره بس طيب
لالا لو سمحت اطلع من راسي
اها بس اقلب وجهك عقابا لك بتسلفني خمسه ريال اشتري بهم نبيطه و سن توب و فصفص
و الايام تدعس ونا افكر بكلام فهودي موب مسأله اني يمكن اقتنع بس وشجاب هالفكره لباله و هو ما قد عدى حدود السعوديه ذا لو شاف كيس اسود انهبل يحسبها عبايه لو يطلع برا شبيسوي بينط له عرق و القولون العصبي
بينفقع ونا بعد يا عمري يا انا .. انا مير ازفت منه .. عندي ابو لو اقوله بسافر برا .. بالعقال يفك ظهري
مير تدعس الايام مرتن ثانيه و تجي الصيفيه التسبييره و ننجح انا و الخبل فهد
و دعس يوم واحد زياده و جاني لم بيتنا و يدق الجرس و تطلعله شغالتنا تقوله مين ؟؟
و يقولها انا فهد ترد عليه الشغالة مين تبين ؟ يرد عليها :تبين حمد انقزي ناديه انتي و خشتس
ثم ترد عليه : تيوب تيوب ما في سرررخ
و اطلعله انا و كشرتي و سروال السنه حقي هع هع هاه يا رجال نجحت ولا كالعاده مفحط
قال ابشرك هالمره جت سليمه الا قلي حمد وشرايك بموضوعنا القديم ترا و ربي متحمس
قلت أي موضوع يبن الحلال
قالي ياخي خلنا نسافر برا خلنا نعيش حالنا حال العالم باتسر بتخطب تروح انت و زوجتك لأبها تفشلنا
اعتمد على نفسك ياخي
ونا عقلي بدا ينلحس و قعد يشجعني لين ارتخيت ونا و ربي مو مقتنع بس مابي اردله طلب <<< اشوا انك تفرررررررررك تبي تروح
قلت بس أي شي يجينا انت المسؤول الاول و الاخير
قال انت قل تم و ما عليك
تم
و تدعس الايام كمّن يوم زياده و حنا نخطط وندبر و نحوس و ندور شلون نقنع ابهاتنا << هع هع حلوه ابهاتنا
قال ما به الا حل واحد نقول لابهاتنا << بعيدها كل شوي .. نبي نروح للدمام بغرض الوناسه<< اهم شي غرض.. و ان حنا كبرنا و لازم نعتمد على نفسنا و منها نطير لسما اوروبا يا روحي يا ارووبا
فهد: اي نسيت اقولك انا عندي وحده بالمسنجر باوروبا قلتلها بواعدتس اول ما اطب هناك
انا: @@ تعرف اوروبيات يالسمرمدي من وراي
فهد: علشان بس اوريك اني موب هين
انا: والله ما وراك الا الدجه طيب قلي شيفهمها عربي
فهد: تقولي انها تعرف عربي شوي بس و تقول انها تعرف الفيصليه اللي عندنا
انا : كاااااااااااااااااااااااااااااااااااك والله انك زلابه مصخره للي يسوا و اللي ما يسوا
فهد:ليش ؟؟
انا: بالله كيف اجنبيه تعرف عربي و فاضيه لامك تعرف الفيصليه وخر بس
فهد : صدز هذي شلون فاتتني
انا : و تبي تودينا لاوروبا والله يا خوفي اننا ناكل هوا مكعب هنااك
و تدعس الايام شوي و بقى عالاجازه شهرين وتخلص
و جا وقت الصراحه للابهات ..
الفصل الاول ببيتنا
المشهد الاول بالمطبخ
انا: يمه انا بسافر ابها مع ولد جيراننا فهد << بالوجه ما فيه ..
امي: يا البيييييي يا البييييييييي منت صاحي والله انك خبل
انا: أي تراني تسبير و اكبر اخواني و لازم اعتمد على نفسي
امي : شف لا تقلقني رح لم ابوك و تفاهم معه و ان قلتله ان امي موافقه ابط كرشتك <<< دبلوم عربجه
المشهد الثاني بغرفه ابوي و هو يقرا جريده و توه معبي كرشته
انا: يبه
ابوي: هاه
انا: ابقولك شي
ابوي :قل و لا يكثر
انا: طيب عطني وجه
ابوي: بتقول ولا اقلب وجهك <<< الاخلاق (busy) الظهر
انا: طيب انا بسافر
مير ما امداني اسد افمي بعد ما خلصت حتسيي الا و بحركه بهلوانيه متعوب عليها سطحني للصاله
امي: كاااااااااك تستاهل يالهدر قايلتلك بس ما طعتني
انا:ماصير ولد ابوي اذا ما رحت
امي : على كم؟؟<< مهيب عاقله
انا: أوديتس لمحل كل شي بعشره << إغرااااااااااااء
الفصل الثاني ببيت فهد
المشهد الأول بالصاله ,,
فهد: يبه
ابوه: سم <<< اذرب من ابوي شوي مشكله اللي ما كملو الجامعه هع هع
فهد : انا قررت قرار اغير فيه مجرى حياتي << @@ هذي الكلمه انا مو مسؤول عنها ولاهو ذا فهد اللي اعرفه
ابوه: وشناوي يا فهد
فهد:انا ودي اسافر مع ولد جيراننا حمد
ابوه: اقول ورا ما تنقلع لا بالصينيه مع وجهك
تلاقينا العصر انا و ابو راس عند براده المسجد
انا: هاه بشر يا فهد وشصار معك
فهد:ولاشي قالي لا و هددني اني اذا عدت عليه السالفه يحرمني من الورث<< الله وا اكبر يا المملكه كلها محل اواني منزلية و تخب ,,
انا:تستاهل قايلك
فهد:ونت وشصار معك
انا: بالله وش متوقع بيقولي ماشالله عليك بديت تكبر .. كفوف و هددني بحرماني من السيكل هع
فهد : حمد انا بسافر و اللي يصير يصير
حمد .. قصدي انا : والله فوكرة مش بطاله و نحطهم قدام الامر و الواقع و بدل ما يجلدونا على اشياء تافهه
ننجلد على شي يسوا
فهد: يالله انا بمشي المطار تامر على شي؟
انا: كاااااك طيب لا تتحمس ما بعد حجزت ياللوح و ثاني شي وشو تامر على شي .. موب جاي معك انا يادوب؟
فهد : طيب امش للخطوط و نركب السيكل و هو راكبن وراي .. باقي سطل مويه و تايد و نصير هنود غسيل سيارات
بالخطوط لبقنا السيكل و نزلنا
و درعمنا << للمعلوميه انا دخلت قبله هع
قعد هو و قعدت انا جنبه و ساكتين
سألنا الموظف وش تشربون
فهد:حليب جلكسي ابو ريالين الله يخليك
حمد: اندومي ,
الموظف: وين بتروحون يا شطار
فهد: اوروبا
الموظف: وين باوروبا
فهد : حمد وش عاصمه اوروبا
حمد:اظن ابو ظبي اذا ماني واهم
الموظف : هذا كبركم و ما تعرفون وشهي اوروبا
فهد: لا حنا نعرف اصلا بس انا بختبر ذكاء حمد ابوه موصيني عليه<<بغيت اجلده بس تماسكت باللحظه الاخيره
الموظف: اوروبا قاره يا شباب فيها فرنسا و فيها بريطانيا و فيها سويسرا و دول كثيره
فهد : طيب وش احسن شي فيهم
الموظف: يقهقه بعنف .. امممممم مادري بس انا اروح لفرنسا كثير يمكن تصلح لكم<< ياخذنا على قد عقولنا
فهد: فرنسا فرنسا مو مشكله ولا وشرايك حمد
حمد: وشدراني يابن الحلال اخلص أي شي المهم اووروباااا
فهد: يا موظف احجز لنا كرسيين عند التلفزيون الله يعافيك و جمب الشباك
الموظف : اممممم اشوف
حمد:عندكم سبيس تون بالطياره؟؟؟؟
الموظف: لا
حمد: طيب ابطال الدجتل؟
الموظف:لا يا ابني لا
حمد : طيب الكابتن ماجد ؟؟
الموظف: يادين اللللللللله يا ولد اسكت خلنا نشوف شغلنا
حمد: طيب
فهد(و هو يرشف اخر قطرات الحليب):رهيب جلكسيكم بجيكم كل يوم
الموظف : حياك الله هات الفلوس الله يرضى عليك
فهد:خذ هالبطاقه و خذ اللي تبونه و هاتو الباقي<< لا يخفى عليكم ان فهد زرف بطاقه الفيزا حقت ابوه و نفس الحكايه مع الجوازات انا وياه
الموظف: خلاص كل شي تمام توكلو على الله طيارتكم يوم السبت الجاي الساعه 5 فجر
فهد يلم حمد و يقوله: ما تدري وشكثر انا فرحانن بهالسفره
حمد:والله انا مستانس اكثر منك (ولا زال العناق مستمرا)
الموظف:ماودكم تمشون؟؟؟
فهد:طيب خلاص يالله باي
حمد:تبي اجيبلك شي من اووروبا ؟؟
الموظف: سلامتك و مشكورين على استخدامكم الخطوط الجويه السعوديه نرجو ان نقدر على حسن الضيافه
حمد: لا عادي
و نطلع و حنانغرد و نغني و نطامر و نسحب جلنطات بالسيكل
و فهد يقولي مصدق اننا بنسافر اوروبا
حمد:أي عادي اصلا حنا كل سنه نسافر<ابوك يالنصبات الأليمه
فهد:اقول انثبر بس والله ماقد عديت الحكير لاند<< الواقع المرير
و تدعس الايام كم يوم و يجي يوم الجمعه بالليل
و نتفق انا و فهد لما ينامون ابهاتنا نطلع << و ربي حلوه ابهاتنا
و يخمدون ..
و تجي الساعه وحده
و نتلاقى عند البراده << خخخخخخخ
و كلن معه شنطه وشكبرها
و القى فهد معه كيس فيه كاسيت و فصفص
قلتله وشوله الكاسيت؟؟
قالي: علشان لا منا ركبنا تكسي هناك نشغلهم
قلتله: الله يخلف عليك و ربي مو شايف نعمه خلهم ورا البراده و نرجعلها بعد ما نرجع و المشكله كلها كسرات و محمد سليم
قالي: طيب ( و يلف لفتين حول نفسه) شرايك بملابسي
قلتله: انا احسن منك اصلا
(و كلنا ماخذين خلاقين ابهاتنا ايام شهر العسل)
و نوقف تكسي و نقوله رح للمطار (راكبين ثنينا قدام )
وصلنا للمطار الرحلات الدوليه
و بعد أسئله و بحث متعوبن عليه وصلنا للكاونتر
فهد:بالله عليك حنا بنروح اوروبا و هذي تذاكرنا شنسوي
الموظف: طيب خلك معي دقيقه ..
الموظف: وين ابوك يا شاطر ...( مع ابتسامتن شاقتن وجهه)
فهد:ابوي تسبير بالعمر جالس هناك
الموظف:ماشالله ونتو كم مره رحتو لفرنسا
فهد: والله بصراحه(تكّى على الطاوله و اخذ راحته ) انا ماحب اكذب على الناس هذي يمكن المره السبعطعش
الموظف:ونت كم عمرك يا شاطر
فهد: 15
الموظف:و سبعطعش كيف تجي ذي
فهد: أي احم لا والــ....
قاطعته انا: لا هو داخل المدرسه متأخر علشان كذا <<< يقالك يكحلها عماها
الموظف: طيب خذو البوردنج و رحله موفقه
و بعد ما درنا المطار كله وصلنا للطياره و ركبنا
وصلنا للمقاعد و تضاربنا على المقعد اللي جنب الشباك طربق طربق طربق
لين جت ذيك المضيفه اللبنانيه اللي تفك الجبهه من حلاها
المضيفه:شو بكون واين امكون و بيكون ( المترجم الفوري: شفيكم وين امكم و ابوكم)
فهد:ابوي بالحمام
حمد:و امي نسيناها بالمطار<< حسم الموضوع
واخر شي اتفقنا ان هو يقعد الحين جمب الشباك و انا بالرجعه
مرت ربع ساعه
شوي ولا تجي وحده طلققققققققة تهممممممممممبل و تجلس جمبي << هلااااااا والللللللللله
فهد:اقول حمد انا مابي اقعد جمب الشباك لا بالروحه ولا بالرجعه تبادل؟
حمد:لا خلاص ما في تغيير راي
البنت التفت علينا و قهقهت
لحظات سكوت ..
فهد يهمس : حمد تكلم ما يصير تتبرطم
حمد:احم أي اجل الاخت من وين
البنت:نعم؟
حمد:لا اقصد يعني وشسمك
البنت:نعم؟
حمد:قصدي يعني .. خلاص ولا شي
البنت:وشفيك؟
حمد:ما فيني شي
البنت:وشسمك انت
فهد:انا حمد
حمد: انا فهد
فهد:قصدي انا فهد
حمد:أي و انا حمد
ضحكت.. ابوك يالضحكه ما عمري شفت وحده تضحك زيها متعود على شخير الوالد و صراخ الوالدةK
قالت كم عمركم طيب
انا : 15 و نص
فهد:15
قالت اها يعني انت اكبر
انا: أي يعني انا اذا قلتله جبلي مويه يجيبلي عادي<< بينجلد
فهد:اوريك اللي يجيبلك مويه ,,
حمد:لا خلاص خلاص
البنت: طيب وين امكم .. ابوكم
انا: والله ابوي و امي قالولنا روحو ادرسو انجليزي احسنلكم من التنبيط بخلق الله
البنت: وش تنبيطه.. ؟؟
فهد: يعني نفقش بيض بسيارات التكاسي زي كذا<<< انواع السوابق مع التكاسي
البنت:هااااااااهااااااااااااااااااااي يا دلبي عليكم تهبلون انتو فيري كول
انا: اخ يا قلبي (مع اني ما فهمت شي)
البنت:وشو
انا:لا ولاشي
و تمر لحظات و يخمد فهد
و التفت عالبنيه شفتها ساكته و سانده راسها على الكرسي<< لازم نحرك الجو شوي خخخخخ
قلتلها: انتي شوداك لفرنسا لحالك عادي اهلك ما يقولون شي؟<<ابوك ياللقافه
قالت لا انا اهلي هناك و انا خلصت تقديم على جامعه و لاحقتهم
قلتلها: اها طيب
قالت: و انتو وشوله رايحين
قلتلها: والله حنا بصراحه رايحين لحالنا و اهلنا ما يدرون<<< ذكرتني بعواقب الجريمه
قالتلي: لا تكذب علي قل الجد انت رجال وشكبرك تكذب؟؟
قلتلها: ايوالله جعلي اموت
قالت: منتو صاحين و الله حراااااام الحين امكم شتقول بتبببببببببكي كثييييييير يا الللللله الله يعينكم من ربي
قلتلها: لا بس انا حطيت رساله تحت مخدتها ان حنا سوف نرحل كم يوم و نرجع<< يسمع بالتعبير
قالت: طيب كيف بتجلسون هناك تعرفون احد فيه ناس يقربونلكم؟
قلتلها: لاوالله بس اعرف فهيدان ذا اللي جمبي
قالت:طيب مافيه الا تجون معي تجلسون عندنا تنبسطون
قلتلها:لا امي ما ترضى<<< لاتعليق!!
قالت:لاعادي انتو توكم صغار وين بتروحون و على فكره ترا عندي اخت صغيره كبركم انشالله تنبسطون معها << اغراااااااااااااااااااااااااااء
انا:حلوه يعني؟
هي:نعم؟؟
انا:احم لا سلامتك !!
و يمشي الوقت و بعد ساعات وصلنا
سألتنا وين جوازاتكم قلتلها مع فهد
مدت يدها تبي تصحي فهد
البنت:فهودي اصحى
انا:مين فهودي؟؟
البنت:ليش .. وشسمه هو؟
انا:فهد
البنت: فهودي اسم دلع لفهد !!
انا:اها
فهد:هاااااااااااااااه خلوني انااااااام كل يوم مدرسة كل يوم مدرسة
البنت:فهد قووووم عااااد يالله وصلنا
و بعد عناء و شقاء مصعنا فهد من الكرسي
البنت: وين الجوازات ؟
فهد(يحك راسه): هذوليهم
البنت اخذت الجوازات و حنا نمشي وراها تقل تيوس
و نزلنا للمطار ..
و ختموا الجوازات و طلعنا برا
فهد:ياخي برد عندكم
البنت:أي علشان كذا حنا نجي كل سنه
فهد:اهاااا

<center> >>>>> ردود الأعضـــــــــــــــــــاء على الموضوع <<<<<
================================== </center>
يتبع




شوي ولا تجي ذيتس السياره يا خبر ابيض
و ركبنا ذيتس الفياقرا اللي تفك الجبهة
و ركبنا كالعاده انا و فهد قدام فاقين خشتنا
المصيبه ان فهد جمب القير
فهد : سديق هاذي سياره كم تمشي
السواق:بردون؟؟؟
فهد: حمد بردون يعني كم بالسعودي
حمد:مادري بس اظن 180 << سرعه الددسن
البنت:فهودي خل الرجال يسوق لا نصدم
فهد:طيب
وصلنا القصر
اويلي ويلااااااااااااااااااااااه
و تطلع بنتهم الصغيره مره موب اللي قالت عنها
اهليييييييين ريممممممم وحشتيني << و لمتها ذيتس اللمه اللي تخلي القلب يطرطططططع
ريم(خلاص عرفنا اسمها هع):هلا حياااااااتي انتي وحشتيني اكثررررررر يا عمري يا مشاعل
مشاعل:ريم مين هذولي<< خرفان موب اوادم
ريم:هذولي ضيوف رحبي فيهم
مشاعل:هاي قايز
فهد:طيب
ريم:لما واحد يقولكم هاي قايز تردون عليه هاي تو
انا:اهااااا
فهد:هاي تو .. هاي تو .. هاي تو <<< علشان ما ينساها
المهم دخلنا الحوش يا ويلي عالسياكل انواع السياكل يا نااااس
و نلقى اللي تقول عنها كبرنا تدور بالسيكل و توقف عندنا
البنت اللي كبرنا: اهلييييين ريم كيفك اشتقتلك هاه كيف التقديم وين قبلوك
ريم:كلية علوم طبية
البنت اللي كبرنا: الحمد لله .. مين جايبه معك
ريم:هذولي .......... (السالفه من اولها لاخرها)
البنت اللي كبرنا:منتو عاقلين يالدشير ..
فهد:هاي قايز !!
ريم:سحر وين ماما و بابا
سحر(عرفنا اسمها ذي بعد هع):طلعو يتسوقون و قالو لا تنتظرونا عالعشاء
ريم:اوكي انتي شوفي وضع الاولاد و انا بروح ارتب غرفتي و انام شوي
ثم درعمنا داخل انواع الثريات انواع الانواع عندهم
فهد:شف يا حمد شف يا حمد وينك يا ام فهد تشوفين هالخير
سحر:اممم الحين مين اكبر انت ولا فهد
انا:اوقسم بالله اني انا اكبر منه
سحر: طيب بأي صف انت
انا:بثالث متوسط رايح لأول ثانوي و انتي
سحر:انا زيك ..
انا:اها يعني رايحه لاول ثانوي<< الاستيعاب بطيئ
سحر: طيب ما ودكم ترتاحون
انا:لا عادي
فهد:حمد ترا فيني نوم ابي انوم وين فرشكم؟؟
سحر:تعالو معي اوريكم غرفكم
وصلنا غرفه دخل فهد ركض للفراش و قام يطامر
فهد: فراشكم نقّازي
سحر:عساه عجبك
فهد:أي بالحيل
سحر:ونت حمد تعال معي اوريك غرفتك
هينا انغرف قلبي بدا يطرررررررربق
مشينا لحالنا لين وصلنا غرفتي
سحر:انت هذي غرفتك معليش مغبره بس تعرف محد سكنها سنين
حمد:لا اصلا عادي
سحر:يالله اتركك انا ترتاح
حمد:طيب شكرا
خمدت لين المغرب
طلعت برا الغرفه مير ضيعت ابي غرفه فهد عجزت القاها كل البيبان تشبه بعض
قمت انادي فهدددددددددددد يا فهددددددددد
و لا كأن البيت فيه احد
شميت ريحه اكل و مشيت وراها لين وصلت المطبخ
يوووووه من زمان ما اكلت و افتح الثلاجه يمي يمي حاقات و حاقات
و اطلع اللي ابيه و اللي مابيه ما وفرت شي ابد
و اشتغل بلع لين خلصت
و بطلعتي لقيت ريم
قالتلي:هاي
انا:هاي قايز
ريم: مو هاي قايز .. هاي تو
انا:طيب هاي تو
ريم:هاه كيفك وشسويت ما سويت
انا:ابد نمت و توي اصحى بس وين فهد
ريم: يلعب بالسيكل برا بالحوش
انا:ونا اقووول فهد يشوف سيكل و ما يركبه هذا حتى سياكل الهنود ما خلاهم بحالهم
ريم:خله يستانس وش قاهرك .. امش معي نسولف
و جلسنا بأحد الصالات (حلوة احد الصالات هع هع تحس انك فعلا)
ريم:قلي وشسالفتك انت قصتكم ما هضمتها صراحه
حمد: شلون يعني ما هضمتيهاا
ريم: يعني ما بلعتها
حمد:اها يعني ما هضمتيها؟
ريم :أي!!
حمد:طيب كيف ماهضمتيها<<< بيتشوت
ريم:مبين عليك انك سطحي مره
حمد:كيف يعني سطحي<< هالمره بنجلد جد
ريم:ما عليك الحين انت قلي وش قصت امك<<< قفلت اخلاقها هع هع
حمد:ابد نجحنا و قررنا انا و الخبل فهد اننا نسافر برا قلنا لابهاتنا نبي نسافر أي مكان داخل السعوديه
بس ما وافقو قمنا خربناها و سافرنا برا عقابا لهم و ردعا لامثالهم
ريم: طيب كيف فكرتو تعيشون هينا مين يصرف عليكم و نتو ما عندكم حتى لغه
حمد:فهد مدبر كل شي <<< أي هين ..
ريم:اها
و تدخل علينا سحر
سحر:هاي قايز
حمد:لا حنا ولا ذالقايز وشقصتكم انتو سلمو زي العالم << بيتصفق
سحر:هاهاااااااااااااااي طيب ولا يهمك السلام عليكم
حمد:هاي تو كااااااااك واحد صفر << حواري..
سحر:ريم وين بتطلعين
ريم: باخذ الاولاد اطلعهم
سحر:طيب انا بجي معكم
ريم: طيب نادي فهد علشان يجي معنا
سحر:طيب
راحت تناديه و بعد دقايز جا الخبل و ثيابه كلها طين و كشرته من الاذن للاذن
فهد:اوقسم بالله عندكم سياكل بنت كلب انا خلاص قررت اعيش معكم
حمد:اثقل يا وجه الفقر
ركبنا البي ام غير عن الفياغرا .. و كالعاده (ثنينا قدام)
و قاعدين ندور و حنا نكحل بالشباك فاقين خششنا تقل اول مره نشوف حريم
فهد:الحين عندكم عادي الحرمه ما تلبس عبايه
ريم:هينا عادي عندهم فهودي
فهد:طيب ليش ما نصير زيهم بالسعوديه
ريم:علشان اللي زيك مشفوح
فهد: اها طيب
و تدعس اللحظات شوي و نوصل لسوق كبيييييير
ريم:لازم نشتري لكم ملابس زينه
حمد:طيب و ملابسنا شنسوي فيها<< استيعابه off
فهد:اشوا انها ملابس ابوك خخخخخخ << فضيحة
و نفرفر بالسوق و عيوننا كذا @@ بكل بنت رايحه و جايه
اشترينا و خلصنا و طلعنا و رحنا لمطعممممممممممممممممممممم
عقب ماجلسنا ..
فهد:انتو انتظروني هينا انا بروح اشوف قسم العوايل وين و اجي
ريم: اجلس ما فيه عوايل كله زي بعضه
فهد:اها طيب
ريم:قرسووون
القرسون : ايوه طلباتكو؟
فهد:الحين ذا شلون يتكلم عربي
سحر:لانه عربي
فهد:اها طيب
ريم: حمد وش تبي تطلب
حمد:2 شاورما و كوكتيل كبير بس قوليله بدون مخلل
ريم:حمد حنا مو بالسعوديه هينا غير
حمد:طيب خلاص زي ما تبي سحر انا ابي زيها
ريم:طيب و فهد وشتبي
فهد(و يا ليته ما تكلم): اممممم انا ابي سندويش فلافل و قوليله يكثر طحينيه و ابي فول قلابه و نا بروح ادور مخبز بجيب تميس
ريم:والله ما وراكم الا الدجه الشرهه عاللي يسألكم (و طلبت طلبات مدري وشتبي من الحياه لا تحضر جعبتي الان و ختمت طلباتها بـ ... ) اند فور كوكا كولا
فهد: انا اقول ورا ما تجيبون ببسي من البقالة ارخص
ريم:اسكت اسكت بس<< احس انها ندمت عاليوم اللي جابتنا فيه بس تستاهل هع هع محد قالها تلزم
إلموهم و جا الطلب
و وزعو كل واحد و أكله
و في ذلك الحين كان فهد يأكل بوحشية و ريم وجهها يحمّر و يخضّر و يتبنسفج (يصير بنفسجي)
ريم: هاه شبعتو يالله مشينا
فهد: دقيقه باقي شوي
ريم:لا خلاص بعدين
فهد:طيب ناخذه سفري
ريم:قلتلك خلاص انا اجيبلك بعدين
فهد:طيب
جينا نركب السياره و كالعاده ثنينا قدام
و قعدنا ندور و ندور لين وصلنا البيت درعمنا لقينا امهم
الام:هلا والله ببنيتي الحمد لله عالسلامه<< يووووه فرق بين امي و امهم
ريم:هلا ماما ابشرك قبلوني بكليه العلوم الطبية
الام:الحمد لله الله يبشرك بالخير بس من ذولي؟؟
ريم: أي ذولي امممم (تعضعض شفايفها) تعالي اقولك قصتهم و راحت معها امها
انا قلت بس هذي النهايه L وداعا سحر وداعا ريم وداعا الفياغرا تهئ تهئ
رجعت هي و امها معصبه
ريم:تعال فهد و حمد روحو غيروا ملابسكم
فهد:طيب وين باقي العشا << ما يخلي شي بقلبه
ريم:أي الحين اجيبلكياه
المهم و رحنا و غيرنا ملابسنا و قعدنا نلعب بلاي ستيشن 2 مع اخوهم الصغير(عبودي)
فهد:اتحداك تفوز علي
عبودي : اصلا انا اللي اتحداك
فهد:بس شوف اذا فزت تعطيني لفه بالسيكل حقك(قد طلب منه ياخذه و عيّا عبودي هع)
عبودي:اوكي
جت الساعه 12 بالليل
جت الشغاله اخذت عبودي علشان ينام و فهد راح نام ونا رحت غرفتي
و جلست افكر بكلام امهم يا ترا بنطلع ولا بنبقى
دعست لحظات قلائل و تدخل سحر علي
سحر .. تهمس: نايم؟
حمد:لا اقلطي..
فتحت اللمبات سحر و جلست على سريري << مسرع صار سريري
سحر:حمد انا خايفه امي تطلعكم
حمد:ليش شسوينا؟
سحر:ماسويتو شي بس تعتبركم اغراب ونا صراحه استانست معكم و مابيكم تروحون
حمد:اجل خلاص حنا نطلع من نفسنا احسن
سحر:من جدك وين بتروحون؟
حمد:بس انتي امك ما ترضى
سحر:طيب فكر بحل
حمد:صدقيني ما في الا اننا نطلع
سحر: لا مابيك تطلع
حمد : معليش سحر قضيت معكم احلا لحظات عمري و انا مسرور لاني معكم <<@@اخلي مسؤوليتي كاملتن من هذه الجمله
سحر:اذا طلعت بطلع معك
حمد: يؤ من جدك انتي؟
سحر:أي من جدددي ..
حمد:سحر انا ودي تجين معنا بس وين؟ حنا ما عندنا احد هينا اهئ اهئ << الله ياخذك يا فهد على هالسفره
سحر:ما عليك انا معي فلوس تكفينا
حمد:سحر خلي فلوسك معك و خليك ببيت اهلك
سحر:حمد انتظرني بروح ارتب ملابسي و جايه و انت رتب ملابسك و الحين بنهرب
حمد (يحاتسي روحه):لحول وش ذالنكبه اللي طحنا فيها هذي لو يدري ابوها والله ما يخليني الا و ماصع رقبتي
المهم رتبت ملابسي و بعد ربع ساعه جت هي
سحر:وين فهد؟
حمد:نايم
سحر:طيب امش نصحيه
حمد:اوكي
وصلنا غرفة فهد..
حمد:فهد قم بنطلع
فهد:هااااااااااه لا ابي سيكل عبودي ابي سيكل عبودي (يحلم)
سحر(و هي حاطتن يدها بفمها):خويك موب صاحي كيف مدبر كل شي ذا
حمد:قولي انا كيف طعته
سحر:طيب صحه بسرعه قبل لحد يجي
و بعد عناء مصعناه من الفراش هو و مخدته
حمد:وشلون نروح مين يودينا
سحر: ما عليك يودينا السواق يطلعنا من هينا و بعدين نتصرف
حمد:طيب اكتبي لامك سوف نرحل كم يوم و راجعه !!
المهم طلعنا للحوش
فهد:اقول سحر باخذ السيكل معي و بالرياض برجعه لكم
حمد:ورا ما تحط رجلك بفمك و تسكت
و ركبنا الجاقوار .. غير عن البي ام و الفياغرا .. اهئ اهئ
و وصلنا لمركز المدينه و نزلنا
و في ليله ظلماء تملاْ شوارع فرنسا بالسكارى و الشرّابين قررنا المبيت بأحد الفنادق لحين حلول الصباح و من اصبح افلح .. لقينا شقق و نمنا ذيتس الليله بشقه صغنونه
انا و فهد نترافس بفراش و سحر بفراش
يوم قمنا الصبح نزلنا قعدنا نتمشى نشوف الرايح و اللي جاي
حمد:انتو من كم سنه و انتو تجون هينا
سحر: من كم سنه
حمد: و منبسطين؟
سحر: لا عادي بس شي و تعودنا عليه
حمد: ترا انا من شفتك اول مره احس انك متضايقه
سحر:أي انا دايم زهقانه يا حمد مليت من كل شي
فهد: يوووووه كل ذي السياكل و مليتي والله ما عندك سالفة وخري بس
سحر:السياكل مو كل شي يا فهد
فهد:لا خلاص انتي ما عندك سالفة
سحر:طيب افهمك
فهد:قلتلك خلاص يعني خلاص
مير انا اصوب الزبيريه على خشم فهد << ام الركبه وشجاب الزبيريه لفرنسا؟؟..
حمد:طيب خلينا نروح حتة ولا حتة ابي امبسط
سحر:تبون نروح دزني؟؟
فهد:وشو يعني دزني؟
سحر:ملاهي كبيره مره
فهد:يووووه يالله مشينا مشينا
حمد:تكسي تكسي
يوم وقف التكسي
فهد:كم ودي دزني سديق؟؟
التكسي:بردون؟؟
فهد:هذيك الملاهي الكبيييييره عرفتها؟
سحر:فهد اسكت خلني اتفاهم معه
يوم تفاهمت معه و نركب انا و فهد قدام هع هع و سحر بلحالها ورا
و يوم وصلنا لدزني و ننزل و ندخل و لعبنا لين دخنا و ضحك و وناسه و حركتات
طلعنا ..
فهد:حمد انا بجيب ابوي و امي هينا ياشيخ بينبسطون والله
حمد:اسكت لا تذكرني لا افقع وجهك
وصلنا للفندق ..
فهد:انا بروح اتمشى تحت لين يجيني النوم تجون معي؟
حمد:لا يبوي تعبان خلها باتسر
سحر:ونا بعد فيني نوم بنام
فهد:بكيفكم يالله هاي قايز
راح فهد لحظات استرخاء كلن فينا فكره هايم بالعواقب
سحر: حمد حنا اللي نسويه صح ولالا؟
حمد:اكيد لا ما في شك
سحر:طيب شسوي الحين
حمد: نبهتك ما طعتيني !!
سحر:بس انا احبك !!!!!!!!!!!!!!!
حمد ضاعت علومه و شانت احواله و تخربط و تكرفس من فراشه و يوم قام خبط راسه بالطااوله
حمد:وشوو؟؟؟؟؟
سحر:معليش ما قصدت طلعت غصب عني ! .. أنا آسفة
حمد:قهر K ...
سحر:وشو؟؟
حمد:لا ولا شي حصل خير
سحر:انا بنام تصبح على خير
حمد:ونتي من اهله ..
ونا افكر و افكر و متغطي باللحاف اقول بنفسي من زمان محد حبني يهوووووه و ذي ماشالله حلوة و عايله
بس تعال ذي لو اوريها بيتنا يمكن تهون هاه يووه تهقى كذا؟ ولا تعال يمكن تلعب بعواطفي << امحق عواطف
.. ثاني شي حتى انا اصلا احبها .. الحين خلاص بنام اسكت بكره يصير خير
و في الصباح الباكر .. قمت من فراشي اخذت لفه حول الشقه .. فهد منبطح بالارض (ياناس ما يعرف ينام ذا من اول ما انولد) .. سحر لا زالت خامدتن .. قلت انزل احتسي قليلا من القهوه اصرفلي
نزلت تحت .. لقيت شرطه .. يتناقشون مع الرسبشن و بطبعي سعودي الجنسيه اجتاحني الفضول و قربت منهم
شوي و لا يطلع صوره بنت .. انا قربت بشوف الصوره ولا هي سحر ‍‍‍‍‍‍‍‍‍‍‍‍‍‍!!!!!!!!
تنححححححت ..
قلتله ترا ذي مو هينا انصحكم توخرون .. قام يخمبق علي .. قلتله لا ولا شي
و اركض فوق دخلت الغرفه بصحي سحر و فهد
سحر:وشفيك؟
حمد: شرططططي تحت شرطططططي
سحر:طيب وشفيها؟
حمد:عندهم صوورررررتك يدورون عليك
سحر:يوووه طيب يالله صح فهد و خلنا نروح بسرعه قبل لا يجون
حمد:طيب
حمد:فهد بسرعه الشرطه يلحقونا
فهد:حمد موب وقت حبشه برب بنام
حمد:نعنبو بليسك بياخذون سحر قم قامت عصبك
فهد:ارجوك حمد وخر عني (وفي تلك الاثناء جت سحر و بيدها جالون مويه فضت ابوه على خشه فهد)
فهد:حمد انا اغرق ساعدني انا اغرررررق
حمد:ياليت تغرق و نفتك منك
فهد:وشفيكم ؟
حمد:الشرطه تحت يدورون على سحر بسرعه خلنا ننحاش
فهد:يؤ طيب خلاص انا جاي بس بلبس
حمد:تلبس مييييين؟ اقولك هم بالطريق هينا قممممممممم
فهد:طيب بس ..
سحر:قم فهد ترا بلعن جدفك ( طلعت الاخلاق)
فتحنا باب الشقه و شايلين سحر بكيس زباله (ونتم بكرامه)
و الشرطه تمر جنبنا نزلنا من الدرج بسرعه هائله حيث تعكرفت رجولي فتكرفست ادى ذلك الى كرفسه سحر فكرفسة فهد ..
ثم انحشنا الى خارج الفندق و اخذنا نركض ركضن مبرحن الى ان وصلنا الى بر الامان ..
فهد: الحين افرض اخذو سحر شيسوون؟
حمد:بيرفعون بك و يحوسونك بس
فهد: اها
حمد:سحر انتي لازم ترجعين لاهلك
سحر:أي كلامك صح انا اصلا بالاساس غلطانه
حمد:لا تفهميني غلط سحر بس اهلك الحين يدورون عليك لازم ترجعين لهم
سحر:لامابي
حمد:تذكري امك اختك ابوك كيف وضعهم
سحر:طيب انت نفس الشي خليت اهلك
فهد:يا حليلك بس هع هع والله ما درو عننا .. انا ابوي يبيها من الله
حمد:انا غلطت و بصحح غلطتي و برجع
فهد:ارجع بلحالك انا بقعدهينا .. انت اصلا بس تخيل اني ارجع الرياض؟
حمد:بترجع و راسك فوق خشمك مدري رجلك تحت راسك .. المهم انطم لا ادخل راسك بالدرج(وشبلاي قمت اخمبق)
سحر:طيب خلاص حمد انا برجع بس علشانك ولا انا مابي
حمد:صدقيني هذا لمصلحتك و بالنسبه لي بتنسيك الايام
سحر:صدقني ما راح انساك
حمد:بتذكرين كلامي
و تدعس الساعات
وصلنا البيت
حمد:فهد اقلب وجهك شوي بكلم سحر على انفراد(الله من زين الاخلاق)
فهد:ياخي انا دايم اقولك اسرار .. والله ماقول لاحد قل عادي
سحر:معليش فهد بس دقايق
فهد:طيب
حمد:سحر انا ماني عارف وشقولك .. بصراحه انا احبك بعد ولا يهون علي فراقك
سحر:ولا انا حمد ..
حمد:احبك
سحر:انا كمان حمد(و دموعها تدحدر باستمرار)
حمد:خلاص لا تبكين اشوفك على خير
سحر:الله يخليك حمد خلك معي شوي
حمد:ارجوك سحر ما اقدر استحمل اهلك ينتظرونك يالله فمان الله
سحر:انا احبك حمد اموت فيك
حمد:....
كلن مشى بطريقه
حمد:فهدددددددد
فهد:هلاااا انا هينا
حمد:يالله مشينا الرياض
فهد:بدري؟
حمد:الله يرحملي والديك فهد امش ولا تقلقني
فهد:طيب وش السر؟
حمد:مالك دخل
فهد:منب رايح للرياض لين تقولي
حمد:انثبر لحالك هينا انا بروح
فهد:خلاص خلاص اوووف
و بعد فرفره و دوران و هلاك و كثر اسئله وصلناللخطوط السعوديه هناك حجزنا على اقرب طياره للرياض
و رجعنا للديار
فهد:هاه وشرايك بفكرتي حمد؟
حمد:فكرة مين ياعمي الحمد لله وصلنا بسلامه بس
فهد:الحين شنقول لابهاتنا ؟
حمد:يارجال وسع صدرك ما عاد شي نخاف منه كلها كفين و تحجيره يومين و خلصنا J
في منزل فهد..
فهد:يا اهل البيييت ..
ام فهد:هاااه مين
فهد:انا فهد يمه عرفتيني؟
ام فهد:فهد؟؟ .. (تركض من المطبخ متجهه للصاله لتدبغ فهد) .. فهد و لعنة وين كنت
فهد:اتحداك تعرفين
ام فهد:الله يلعن شكلك وين كنت (تمصع اذنه)
فهد:طيب فكي و افك .. كنت باوروبا
ام فهد:وين ذي اوروبا
فهد:استحي على وجهك هذا كبرك و ما تعرفين اوروبا
ام فهد:طيب لا تنفخ .. اوروبا قصدك اللي باوروبا؟
فهد:أي ذيك
ام فهد:اقول اها بس
فهد:احسن لا تصدقين
ام فهد:والله يا ويلك من ابوك يا انك بتنجلد
فهد:وين ابوي صح؟
ام فهد:بغرفته فوق
فهد:برب بروحله
ام فهد:تيت
بالغرفه..
فهد:هلا يبه
ابو فهد:هلا فهد وين الناس؟
فهد:والله تعرف ظروف و اشغال يالله خلصتها بشرني عنك انت وشمسوي ..
(في ذلك الحين التفت ابو فهد الى فهد و رفعه من شوشته الى تحت السقف بشوي فغمس قبضة يمينه بكرشه حتى ارداه ارضن بعدها اخذ يكيل له كثيرا من التشويتات المؤلمة حتى كادت ان روحه ان تزهق)
فهد(و العصافير تدور حول دميجته):موب مشكلة ضريبه الوناسه ..
في بيت حمد..
حمد:هاي قايز
ابو حمد:هلا وليدي
حمد:هلا يبه والله لك وحشه (همّ حمد في تلك اللحظه للعناق)
ابو حمد:هلا ولدي وين كنت من زمان عنك؟
حمد:الله يرجك يا يبه اليوم العصر انا متقهوي معك
ابو حمد:نعنبو بليسك لك اسبوع ما لك حس
حمد:شكلك حلمان يبه ..
ابو حمد:تهقى كذا؟
حمد:اهقى و بقوة ..
ابو حمد:اها جب العقال الله لا يهينك
حمد:طيب انا عندي حل وشرايك نتفاهم؟
ابو حمد:انت جب العقال و بعدها يصير خير
حمد:طيب اشرحلك؟
بعد ذلك بقس ابو حمد ابنه حمد بقس أسقط مخه في معدته بعدها رفعه الى الاعلى
(ما تلاحظون كل ما انجلدنا انا و فهد لازم الترفيعه ذي ليش مادري.. بس اتوقع انهم سوابق كره طائرة والله العالم .. نرجع للموضوع
فسفطه و جعل منه كرة و ثبتة بالارض فشاته حتى انتهى به المشوار بحضن الوالده و هي تلف سمبوسة بالمطبخ ..
ام حمد:ولددددددددددددددي حمددددددد
حمد:يممممممممه
ام حمد:وينكككك يا دوببببببب
حمد: افا حتى انتي حلمانة ......................................
ابي ردوووووووووووود حلوه يعني امدحوا

__________________________________________________ __________
ههههههههههههههههههههههههههههههههههههههــــ


هههههههههههههههههههههههههههههههههــــ


والله حلوة قليلة عليها بجد نقعتني من الضحك



تسلمين بانتظار جديدك الغلا



تحياتي

__________________________________________________ __________
هههههههههههههه
ههههههههههههه
مشكوره عالمرور
الله لا يجرمني منك
هههههههههههه

__________________________________________________ __________
ههههههههههههههههههه مره حلوه يعطيكي العافيه

__________________________________________________ __________
هههههههه
يسلموووووووو

يعطيك الف عافيه