ابطال القصة : برطم نملة ( انا ) وسعيدان ( صديق الطفولة والفقر ) وابو راس ( صديق مصالح ) والكبش وعوض بلونه والصاالح ( كومبارس )
قررنا نطلع البر بعد ما اخذنا Approval من ابو راس لأن عنده حق استخدام الفيتو و راينا تحصيل حاصل ولا فية ديمقراطية ولا يأخذ براي الجماعة وكنا راضين كل الرضا ولا نطالب بالاصلاحات ولا الحوار لانه كان يشتري ظمائرنا بفلوسة (يدهن سيرنا) العيشه صعبه اول ,عطانا ابو راس الخطه المدروسة والاوامر والفلوس .
الزمان : في عز القايلة . المكان: بنبان ( بر ) الموقع: بعد المخرج بنبان يمين 30 كيلو عن الرياض.
توزيع المهام
انا علي مصاريف الخط و السيارة نوع 200 أل موديل 85 بيضاء فتحة القزاز توماتيك مكيفة ,المكينة والقير شد بلد ماقد توضبت . ابو راس عليه المؤنة وسعيدان عليه القدور والصحون والبريق والبيالات .. الخ .
جمعنا عزبتنا وسرينا العصر وحنا في الطريق مرينا سوق العويس وطيبة لا حقنا البنات ولا احد عطانا وجهة كالعادة وبكل روح معنوية كملنا طريقنا وصلنا نزلنا الاغراض اظلمت الدنيا , انا وسعيدان قطعنا البصل والطماط والدجاج وخمرنا الرز (حبشيات) وابو راس مريح ناقصة الممرضة الاوكرانية ويصير القذافي , ضبطنا العشاء وتعشينا و صلحنا شاهي وجاب سعيدان العود ويغني الأغاني الشعبية . خلصت من جملة الخلان احسلي اعيش وحداني وخلاص من حبكم يازين عزلنا .. كلها اغاني فراق وابو راس حاط قدامة ثلاث بكتات مالبورو احمر ويدخن الجلسة رايقة اخذ ابو راس مزة من زقارته وقال وش رايكم نروح الشام قلنا له يبيلها دراهم قال اشتغلو اي شغله واذا نقص شي رقبتي سداده ,اعجبتنا الفكرة وايدناها بقوه, ومن الوسخاه مانخاف لا من قوارص ولا عقارب ناقص نطير بليل ونصير جن نمنا بدون خيمة وقمنا الا الشمس في وجيهنا والذبان حايسنا والحر ذابحنا تفصخنا وقعدنا بسناوي وابو راس راح يصيد طيور اللي يشوفنا يقول هذولي في جزيرة فرسان .
ضفينا اغراضنا ورجعنا للحارة خشيت البيت ورحت اتروش وانا اتروش اشوف ينزل من راسي تراب وشوك وخنفسان وصوارير وقطوف زقاير ( عش غراب ) .
نقطة تحول
ثاني يوم دورنا وظايف انا اشتغلت في كبينة وسعيدان اشتغل سكرتي في شركة كملنا الشهر اخذنا الراتب وسحبنا عليهم قصينا تذاكر من النقل الجماعي لان الفلوس ماتكفي نروح بالطيارة , قلت فية واحد اسمة الكبش يعرف واحد دايم يروح للشام رحنا لبيتهم خمس مرات وكل مره يطلع اخوه ويقول نايم المره السادسة طلع وهو يتثاوب وعطانا رقم شغاله اسمها ام انس قال كلموها اذا وصلتو وهو داخل لبيتهم يكمل نومته قال ترى سوريا الشعب الحلو https://65.55.172.183/att/GetInline....1ff&oneredir=1وصك الباب .
رحنا انا وسعيدان البطحاء وشارع الوزير والخزان والحراج و شرينا ارخص ملابس ( مد لحافك على قد رجليك ) كل واحد شرى بنطلون انا اخذت جينز وسعيدان بنطلون اسود واتفقنا اننا نتبادل بلبس , ابو راس تقضى من سوق الشعلة لانه كاش . وشرينا عطر (يجيب الحساسية) من واحد اسمه الصااالح بايعه علينا ب 65 وهو شارية بعشره ويحلف انه بايعة براس ماله . قرب يوم السفر رحنا وحلقنا عند هندي مات قبل خمس سنوات (اخر واحد حلق عنده العاني ) حلقنا تواليت رقيت السطح وادخل عشه الحمام ( بلاي ستيشن زمان ) وارفع رف فيه فروخ واخذ الكيس اللي تحتة حاط فيه 300 ريال (مخليهم لليوم الأسود) سارقهم من جدي قبل لا يهذري وطلعت للحارة علشان نخطط للروحة تكينا مع عيال الحارة ويعطونا من هالنصايح البايخه اللي يقول اذا تلبس ثوب وشماغ يخطفونك ويطلبون فديه (ارهابي ) واللي يقول لا تعطي البنات وجهه ترى يسحرونك وحنا نقول ايه ايه نسلك, تواعدنا من بكره الصبح الساعة سبع عند بيت ابو راس لان القطه معه رجعت البيت جهزت الشنطه وحطيتها في السيارة ونمت وحطيت الساعة الخراش القديمة اللي المنبه كنه جرس كنيسة .
لا تلوح للمسافر
قمت مرتاع من صفاره الانذار والبس واخذ جوازي واكتب على ورقة للأهلي اني مسافر واسترو على ما واجهتو يالقراوى ( شغالة ) بروح الخرج وبجي بعد عشرة ايام واحطها على التلفزيون النشونال القديم اللي فيه بيبان واجيب فوق الورقة بيالة شاهي .
تقابلنا ومشينا رجلية وقفنا عند بوفيه افطرنا ولقينا واحد اسمه عوض بلونة طالب 7 كبدة وببسي دايت على باله رجيم قلنا له خاونا : قال الدنيا مقلب كبير شربتوه ,تركنا عوض وكملنا لين طلعنا على الشارع العام ركبنا مع خط البلدة من زود التوفير وعلشان مانلعب بالقطة .
وصلنا لمحطة النقل الجماعي ايام ما كانت في البطحاء , انطلق الباص الساعه 9 صباحا ساعتين على ماطلعنا من زحمة البطحاء و ساعتين ثانيه على ما طلعنا من الرياض . الباص مليان على الاخر وحاطين العوائل قدام (ياقلبي) والعزاب ورى (وع ) وكل 200 كيلو يوقف في محطة اول مرة نزلنا للبخاري وتغدينا ,المره الثانية رحنا للبوفية وطلبنا شاهي وابو راس قعد يدخن ,المره الثالثة ماندري وش نسوي بدينا نتحرش في الهنود حقين المحطة البنزين ونستهبل علي الزيود اللي في البنشر ونسرق من البقالة علوك و حلاو ونعطي عيال الأشوام ( اعمال انسانية ) . وصرنا نتبيثر على السواق في البداية نسالة كم بقى من كيلو وكم راتبه يوم شفناه حبيب قلنا له خلنا نسوق الباص وحنا راجعين لكراسين نغمز للبنات https://65.55.172.183/att/GetInline....623&oneredir=1ونتبسم اشتكونا العوائل من ازعاجنا وهددنا السواق انه ينزلنا عند اول نقطة تفتيش مسكنا الجادة وكل واحد جلس على كرسية لين وصلنا .
الشــــــام ( دمشق )
اول ماوصلنا المحطة اللي في الشام اتصلت على ام أنس وقالت اركب مع اي تكسي وخلية يوديك على مشفى = مستشفى امية . ركبنا مع اول تكسي وقلنا له على المشفى اميه وحنا في الطريق سالنا وقال من وين الزلمات قال ابو راس وسعيدان انهم سعوديين وانا قلت اني كويتي علشان مايحش , نزلنا عند المشفى وحاسبناه وراح اول مانزلنا من التكسي والقى وحده في سياره رحت بساله من زود الزين اللي فيها بغيت افتح الباب واركب قلتلها انتي ام انس ماردت وسكرت القزازة في وجهي رجعت عند العيال وحنا ننتظر وابو راس يدخن وقف تكسي ونزلت منه .
أم انـس , عجوز العمر في اوائل الخمسينات نحيفة وقصيرة الوجهة شاحب وفيه تجاعيد ومحجبه تشبهه الممثلة ( سمية الجزائري ) قالت انت برطم قلتلها وهذولي اصحابي ركبنا معها و ودتنا للشقة و تسولف ماندري وش تقول وحنا انواع القز .
وصلنا التوقيف قصدي الشقه اللي كل شي فيه صغير صاله ومطبخ صغار وحمام بابه ماينصك ولا فيه لمبه وغرفتين ابو راس استخدم الفيتو واخذ الغرفه الزينه لانه دافع اكثر وانا وسعيدان اخذنا الغرفه الثانيه فيها سريرين منفصله (نص نفر) من صغره لو تنقلب تطيح على الارض كنك نايم على زلفة باب (طرار). راح سعيدان يشيك على المطبخ ويشوف الثلاجة الصغيره يحسبها سفتي بوكس ولا تجوري حط فيها الجوازات درى ابو راس وتطاق معه .
من التعب والقرف من الشقه نمنا لين بكره ,صحينا من النوم انا وسعيدان ولقينا ابو راس يسولف مع ام انس عطاها ( بخشيش ) وصارت تمدح فيه وتقوله انت ادمي ومهضوم وشيك وامور والله يحرسك من العين واأأاويها يازين الشباب (حركات باب الحاره) .
قالها سعيدان وبكل ثقه وحنا قالت انتو بشعين ووحشين وكنت فاكره انكن شحاتين واشكالكم عمانين مو سعوديين ,, قال سعيدان أفاأاا .
ضاقت صدورنا راحت ام انس للمطبخ لحقناها وقلنالها وش الحل قالت هاتو المصاري ( فلوس) وتعالوا معاي .
رحنا سوق الحميدية سوق شعبي ومافيه الا هو شرت لنا شامبو وصابون ابوعنز وليفة السوريه اللي لو يفركونها في كفر انسلخ , شرينا ملابس على ذوقها ومن ضمن الملاابس شريت بجامه وشيشة ومعسل .
رجعنا للشقه تروشت وتفركت واشوف زي البترول ينزل مني بعد ماخلصت لبست البجامه واروح المرايه ماعرفت نفسي من الجمال والغنج حسيت اني محمد قواسمه (( قواسمه أردني في حارتنا نسميه عبير عيسى مايعطينا وجهه وانتو عارفين ليه ))
جهزت أم انس الغدا واكلنا ,نص الاكل ماندري وشو بس اعجبنا بعدها جابت زهورات ( زي النعناع ) والشيشه الصح اللي عثورتها ( دخان الشيشه ) يروح خمسه متر.
تعلقنا ب أم انس وبدت تفهمنا وتعطينا جونا وتعودنا عليها وصارت تشيش معنا وتكملنا في البلوت وحطينا فيها عياره وصارت تروس وسعيدان ترك الاغاني الشعبيه وصار يغني نسم علينا هوى من مفرق الوادي( لفيروز) .. و اغنيه انا بعشقك انا (لمياده) , وفي الليل ماندري الا ابو راس واقف كنه شيطان مشخص ومتعطر من عطره الغالي شارية من وشيقر و مزبنه علشان مانخلصه عليه ويقول يالله مشينا نسهر .
استمرينا على الوضع كم يوم وبدينا نمل وبدى المزح الثقيل وحنا قشران في البدايه وهي تسولف نقاطعها وناكل اللحم عنها ونحطلها في المويه ملح وهي ماتزعل علشان لقمه العيش وزاد الهبال وصرنا نطلق الروائح الكريهة ( ماركة فيش ) وتقعد تكحك واذا دخلت المطبخ نحط عند الباب قشر موز ,وفكها الله .
العوده للأرض الوطن
خلصت القطه وقررنا العوده ضفينا شناطنا ورحنا المحطة النقل الجماعي و أم انس معنا علشان تودعنا وتاخذ كروتها , ودعها سعيدان وركب الباص وابو راس شال الشناط هو والسواق وقعد يدخن وركب , أنا بلشت فيها بدت تدعيلي وتخمخمني وقالتلي ما قصرت معكم ليه ما تكرموني زيادة كسرت خاطري وانا ما معي الا عشرين ريال حق الطريق, فكرت و اخترت نفسي واطلع الباص وارفسها واقول لسواق سكر الباب وبدت تسب وتلعن وتسوي حركة الاصبع ( طلعت على حقيقتها).
مايستفاد من القصه
1- I love me
2-نسمع عن فوائد السفر ولا ندري وشي لان فوائد السفر ماتبان الا عند طلب العلم .
3-تعرفنا على واحد طفران وحنا راجعين اسمه عرار واول ما وصلنا قطعناها معه .
مع تحيات
برطم نملة . لاعب حواري سابق .
