قصتي والله اني صادق بكل حرف كتبته لكم
عنوان الموضوع : قصتي والله اني صادق بكل حرف كتبته لكم
مقدم من طرف منتديات الشامل
بعد ماتقرا قصتي اضغط على الفديو لسماع القصيده وهي بصوتي
[قصتي حصلت في مساء يوم الجمعه الموافق 1437-1436/1/7هـ وتحديدا في تمام الساعه التاسعه والنصف ليلا كنت مرافق مع والدي رحمه الله بالمستشفى وكان رحمه الله يعاني من مرض السرطان حماكم الله ووقاكم طبعا كان والدي ياخذ جرعات كيماوي كل 21 يوم وكنت اقوله راح 6 جرعات وباقي جرعتين وراح يوقفون الكيماوي وانشاء الله بتكون بصحه جيده فا لتفت لي رحمه الله وقال يولدي لايعلم الغيب الا الله سبحانه والاعمار بيد الله لكن يولدي ماظن ذلك بيصير واحساس عمري ماحسيته الا هالمره اني راحل ولكن عسى الله يحسن لي الخاتمه يبوك وتكدرت من كلامه لاني فعلا قاعد اشوفه يوم وراء يوم يذبل والسرطان ينتشر في جسمه كان في البطن وانتشر واصاب الكليه اليمين واتلفها ثم ارتفع للصدر واتلف الرئه ثم الظهر والارجل ومن ثم وصل للمخ وكل هذا وانا ماخبرته اقوله انهم قولون انك تتحسن مع العلاج المهم ابتسم رحمه الله وقال يولدي لاتكدر نفسك هذا مجرد احساس وبعدين كثر خيري يبوك انا عندي 5 سنين زياده قلت شلون عندك خمس سنين زياده رد يبتسم ويضحك ويقول يولدي الرسول عليه افضل الصلاة والسلام يقول اعمار امتي بين الستين والسبعين انا يبوك الحين عمري 65 خمسه وستين سنه عرفة ليش اقولك عندي 5 خمس سنين زياده ثم اغمض عينيه وهو مبتسم وكانه سرح بخياله وزادة ابتسامته وكان داخل جو وبعد دقيقتين تقريبا وهو مازال مبتسم ومسكر عيونه يقول يبوك لاتحزن علي انا رايح لمكان احسن من هالمكان انا رايح لمحل زين جدا يبوك والله يبوك انه محل زين وكان يقصد رحمه الله انه رايح للجنه فهو ولله الحمد من طفولتي لم اشهد والدي الا مصلي ومن جماعة المسجد وكان يهاوشني في صغري عند الصلاه ويزعل مني وكان رحمه الله يصوم الست ويحج باستمرار والعمره وكل ماتتصورونه من اعمال خير كان حريص عليها بالاضافه الى انه كان بارا بوالدته ووجدت بعد وفاته دفاتر كثيره كان رحمه الله يكتب وصيته من فتره لفتره ولمحت بعض الدفاتر كان يكتب وصيته من عام 1410 هـ يعني من 22 ثنين وعشرين سنه وهو يكتب وصيته وكل وصيته تبدا بانه يطلب من ابناءه وبناته تقوى الله في السر والعلن والمحافظه على الصلاه ويطلب من اولاده ان يبرو في والدته الي هي جدتي رحمها الله وكان نص الوصيه بخصوص والدته كالتالي اوصي اولادي بوالدتي ان سبقتها الى جوار ربي ان يبرو بها ويحسنو اليها المهم والشاهد في ذلك انني كنت اقوله مره من المرات قبل وفاته بشهرين تقريبا اقوله وجهك زين من باب ادخل السرور عليه وواوهمه انه بخير وان اعرف كل التفاصيل الي وصلت له حالته وكان يرد علي ويقول الحمدلله الحمدلله ولكن نزل من سريره وسجد وبعد السجود رفع يديه وهو يحمد الله ويقول الحمدلله اني دفنت امي وتطمنت عليها فالم اتمالك نفسي وخرجت من الغرفه عشان مايلاحظ علي شي من الحزن وبعد ماجيت قال يبوك الحين مستويه عندي جرعه ولا الفين جرعه اهم شي امي اني لو مت بكون مطمن عليها غسلتها ودفنتها طبعا والدته الي هي جدتي كان عمرها 100 سنه تقريبا وكانت من اكثر عشرة اعوام وهي كالطفل في وزنها كذلك كانت مخرفه وتعرفون معناة مخرفه يعني ماتعرف من يدخل ومن يطلع كانها ثوب مجرد انفاس كانت لاتتحرك فكان رحمه الله ياكلها بنفسه ويلبسها بنفسه وكان يضعها كا الطفل في حظنه ويقص شعر الزائد في راسها ويقلم اظافرها ويرفض ان يعمل احد منا اي شي حتى امي ويقول بالحرف الواحد انا اجد متعه في ذلك وارجوكم دامني حي ونشيط وماسك عقلي لايخدم امي الا انا المهم مره من المرات وهذا الكلام قبل تقريبا سبع سنوات دخلت الا هو اكرمكم الله ورفع قدركم يحفظها كان الله يرحمه يجيب حفائض كحفائض الاطفال ولكن بحجم اكبر وهي مخصصه لكبار السن والمعاقين وجيت الا هو قاعد يحفظها اكرمكم الله فانزلت عليه ابي اساعده فاسحب يدي وقال لا يبوك دامني حي لاحد يحفظ امي الا انا فابعد ماخلص نظر رفع راسه الي لاني كنت واقف عند باب الغرفه وحس انه كسر خاطري او انه ردني او ماعرف وش كان احساسه تجاهي لكن قال من باب انه مايبي يكسر خاطري لاطحت انا يبوك حفظني لكن امي انا يبوك ابي اخدمها دامني حي وان الله خذ امانته ترا امي بذمتك وانت بالنيابه عني المهم ماتت والدته الي هي جدتي قبل موت والدي ب 8 ثمانية شهور وكان رحمه الله في بداية علاجه بالكيماوي كانت اعتقد اول جرعه اخذها وكان يقدر يتحرك المهم كنا في المقبره ندفن جدتي انا وهو وطلب مني اجيب حجره ووضعها عند قبرها كاعلامه نعرف بها القبر ودعاء لها وكان يحب يكون متماسك امامي وكنت انا وولدي اورانس الله يحفظه واقفين وراه وندعي لجدتي الا يلتفت علي قال يابوك جعل قبري مايجي بعيد عن قبر امي قلت يايبه العمر الطويل لك وش هالكلام يبه اذكرالله ان رجال فيك دين قال يبوك ادري ولكن انا اقول جعل قبري مايجي بعيد عن قبر امي عشان ماتعبك في الزياره عشان تزورنا سواء بس ابيك تجي عند امي قبل ماتجي عند قبري ........
والله ثم والله ثم والله انها تحققت امنيته وطلبه كانت المقبره على شكل مربعات وكل مربع والثاني بينهم طريق قبر جدتي كان من جهت الطريق اخر شي في المربع وابوي صار قبر في اول المربع الثاني يعني هي في اخر المربع من اليمين وهوفي اول المربع الجديدمن اليسار وصار الفاصل بينهم فقط عرض الشارع تقريبا 5 امتار يعني اوقف السياره بالطريق بينهم بالضبط هي تصير على يمين السياره وهو على يسار السياره وتحققت امنيته وكان يكرر طلب يقول يولدي انا قريت في كتاب لابن القيم ان بعض الاحاديث تواترت انه قد يعلم الميت بمجي الحي له عند قبره ولكن يابوك ابيها على قولتهم حج وحاجه تجي وتحضر وقت صلاة العصر عشان تاخذ اجر الصلاه على الجنازه وتشارك بالدفن وتاخذ اجر وبنفس الوقت تزورني ولكن تزور امي قبلي لاتجيني الابعد ماتزور امي قلت يبه وش هالكلام اذكرالله والعمر الطويل انشاء الله لك قال يولدي الاعمار بيد الله ولايعلم الغيب الا الله سبحانه لكن هذا الي بيصير وانت ورانا لاتوقع انك بتجلس ترا هذا يرحل وهذا لاحقه لكن اجتهد بطاعة الله والزم صلاتك واسئل الله دايم حسن الخاتمه وقول امين يولدي عسى الله يجمعني بك وخوانك وامك ووالدينا واولادنا بالفردوس الاعلى امين امين قلت امين يارب المهم طلعت من عنده وكل مره اقول ليه ابوي حاس انه بيموت وكنت كل شي ممكن اتخيله الا ان الموت بياخذ ابوي ماكنت مستوعب بعيش بدون ابوي ولكن صار اليم عور قلبي من لحظة وفاته وحتى هذه اللحظه الي اكتب لكم قصتي والى اخر يوم بحياتي راح اقولكم شي ويمكن راح تستغربون منه والله الى هذا اليوم وانا يوميا ازور قبره واقعد بمعدل نصف ساعه على الاقل وادري كثير بيقولون هالشي غلط او بيقولون شي ثاني وراي ثاني لكن اسمحولي أي راي غير مرحب فيه لان هالشي فيه سلوى وراحه لي اجي بعد صلاة الفجر وبعد مافطر امي الله يطول بعمرها ويلبسها ثوب العافيه وابيكم تدعون لها لانها تعبانه نسولف وعقب اشغل موتري وعلى المقبره ازور جدتي وبعدها اجي عند قبر ابوي وادعيله واجد متعه في ذلك هذا في فترة الشتاء اما في فترة الصيف فالروحه تكون صلاة العصر واجلس عنده قدر ماستطيع معي كرسي الي على شكل عصاء الي ينصف طاو اخذ سجاده واجلس عنده المهم الى هاللحظه لم استوعب انه رحل وتركني رحل رحيل بلارجعه ماطيبك ياوالدي حي وميت راح اقولكم شي جميل لم نكتشفه الا بعد وفاته احد اخواني راح بيكفله يتيم بغرض يكون اجرها لبوي رحمه الله وجد انه الله يرحمه كافل ايتام وماكان معطي احد منا خير وله ملف لدى جمعية الايتام من سنين طويله فقدته وفقده جماعة المسجد وكل من يعرفه فقده طبعا لم اتكلم عن شخصيته وعصاميته وصبره فهو ليس له اخوه رجال فقط اختين الي هم عماتي ثنتين وكان وحيد فقط هو وابوه وامه وخواته الثنتين وتوفي والده وهو صغير وتحمل المسئوليه من صغره والان انا ساكن في بيته رحمه الله فقد ترك لنا منزل وخير رحمك الله ياوالدي رحمة واسعه كم انت عظيم ياوالدي كان خاطري يكون لي عمام يعني اخوان لابي لكن لم يكن ذلك والله اعلم واقدر وله حكمه في ذلك اخواني واخواتي وجميع من يقرا قصتي لم اكمل لكي لاتملون ولكن لو اكتب عن والدي لان يفيه سطور ولا صفحات لكن اتمنى من جميع من والده ووالدته على قيد الحياه ان يبر بهم وان يطلب رضاهم وان يجتهد في ذلك اولا تكسب رضاء الله لان الله سبحانه وتعالى ربط رضاه برضاء الوالدين لاتعقو والديكم فتعقكم ابنائكم وهذا فديو بصوتي قصيدة رثاء وتعبر عن حالي وعن ماح سبه بعد وفاته رحمه الله وللامانه ليست لي وانما بصوتي فقط وتقبلو تحياتي وتقديري
<center> >>>>> ردود الأعضـــــــــــــــــــاء على الموضوع <<<<<
================================== </center>
قصة مؤثرة جداً
سبحاااان الله مااأقصر الدنياا
السعيد من عمل لآخرته
سبحااااان الله .. ليس لأمثال هؤلاء نحزن
بل نحزن على انفسنا وكيف نحن لاااهووون
اللهم ردنا إليگ رداً جميلاً
اسأل الله عز وجل ان يرحم ابيك وجدتك ويجمعكم في الفردووس الأعلى من الجنة
اللهم ارزقني بر والديّ
اللهم اغفر لي ولوااالدي وللمؤمنين والمؤمنات
والمسلمين والمسلمات
الأحياااء منهم والأموات
الله يجزاااگ الجنة على هذه القصة التي كتبتها بإحساااسك قبل قلمك
الله يعطيگ ألف عاافية على الطرح
إحتراامي
♡Helen♥
__________________________________________________ __________
سبحآن ربي .. لكم أثر في بر أبيك بأمه حتى بعد وفاته بوصيته لك بزيآرة قبرها قبل قبره !!
يحق لك أخي أن تفخر بأب مثل والدك الفاضل**
رحمه الله رحمة واسعة وأسكنه فسيح جناته وجمعكم جميعآ تحت عرشه ،، اللهم آمين ~
و ربي يعافي والدتك و يشافيها بقدرته و لطفه "
بارك الله فيك أخي ،، سعدت بقراءة مآ كتبت روحك
أسأل الله أن يعيننآ على البر بأمهاتنآ و آبآئنآ كمآ بر أبوك بأمه ،،
آمين *
__________________________________________________ __________
.
قصه تدمع العين
أحسن الله له لمن احسن لوالدته
وبر ابنائه ببره لوالدته ,,الله أكبر هذا قصه عبره
لكل عاق بوالديه اللي يبي الجنه يحسن لوالدينه
اعتذر لحذف المقطع لوجود موسيقى
لكـ كل الاحترام والتقدير وغفر الله لجدتكـ ووالدكـ
__________________________________________________ __________
قصة مؤثرة
دون ما أشعر ذرفت دموعي
رحم الله والدك وأسكنه فسيح الجنان
يعطيك العافيه
__________________________________________________ __________
قصه مآثره بر الوالدين
رحمه الله عليهم
جمـــــــــــــــــــــــــيلة ....
